Fesili Mai le ʻAufaitau

O anafea na avea ai le Malo Malosi o Peretania ma Amerika, ma malo malosi lona fitu o le lalolagi e tusa ai ma valoaga a le Tusi Paia?

▪ O le faatagata telē na vaaia e le tupu o Nepukanesa, e lē o faaātaina mai ai malo malolosi uma o le lalolagi. (Tani. 2:31-45) Ua faaalia mai ai na o malo malolosi e lima, na pule mai taimi o Tanielu ma faasolo mai ai, ma sa iai se aafiaga tele i le auala na o latou feutagaʻi ai ma tagata o le Atua.

O le faamatalaga a Tanielu e faatatau i le faatagata, ua faaalia mai ai o le a tupuga mai le Malo Malosi o le Lalolagi o Peretania ma Amerika mai iā Roma, nai lo o lona faatoʻilaloina o lea emepaea. Na vaaia e Tanielu, e amata mai le uʻamea mai i vae o le faatagata, ma faasolo atu ai i tapuvae ma ona tamatamaʻivae. (I tapuvae ma tamatamaʻivae o le faatagata, ua fefiloi ai le uʻamea ma le omea.) * I lenā faamatalaga ua faaalia mai ai, e tupuga mai le Malo Malosi o le Lalolagi o Peretania ma Amerika mai vae uʻamea o le faatagata. Ua faamaonia i le talafaasolopito le moni o lenā faamatalaga. O Peretania, o se tasi o vaipanoa sa i lalo o pulega a le Emepaea o Roma, na iloga le tulaʻi mai, i le taufaaiʻuiʻuga o le senituri lona 18. Na mulimuli ane aliaʻe mai le Iunaite Setete o Amerika e avea ma malo malosi. Peitaʻi e leʻi avea ai i lenā taimi Peretania ma Amerika ma malo malosi lona fitu o le lalolagi, e pei ona faamatalaina i le Tusi Paia. Aiseā? Ona e leʻi amata i lenā taimi ona galulue faatasi Peretania ma le Iunaite Setete i se auala faapitoa. Na faatoʻā tupu lenā mea ina ua faagasolo le Taua Muamua a le Lalolagi.

I lenā taimi, na galulue ai ʻatalii o le malo,’ ae o le toʻatele o i latou sa i totonu o le Iunaite Setete, ma na faatūina la latou ofisa ulu i Brooklyn i Niu Ioka. (Mata. 13:36-43) Na galulue sui o le vasega faauuina i le galuega talaʻi i atunuu sa i lalo o le Emepaea a Peretania. A o faagasolo le Taua Muamua a le Lalolagi, na faamalosia ai e Peretania ma Amerika se faiā faapitoa ina ua faasagatau atu i o la fili i lenā taua. Na faateteleina e lenā taua le uiga lotonuu i Peretania ma Amerika, ma na la faasagatau atu foʻi i le fanau a le “fafine” a le Atua. Na faasāina e nei faigāmalo nisi o lomiga faale-Tusi Paia a le fanau a le fafine, ma faafalepuipuiina i latou na taʻimua i le galuega talaʻi.—Faaa. 12:17.

Ua tatou aʻoaʻoina mai i valoaga a le Tusi Paia, e leʻi aliaʻe mai le malo malosi lona fitu o le lalolagi, i le taufaaiʻuiʻuga o le senituri lona 18, ina ua iloga le tulaʻi mai o Peretania. Ae na faatoʻā aliaʻe mai lenei malo malosi lona fitu o le lalolagi, ina ua amata le aso o le Alii. *

[Faaopoopoga i lalo]

[Ata i le itulau 19]

O uso e toʻavalu mai le ofisa ulu o le Olomatamata, na faafalepuipuiina iā Iuni i le 1918