Swivutiso Swa Vahlayi
Swivutiso Swa Vahlayi
Mfumo wa Misava wa Manghezi ni Maamerika wu sungule rini ku va mfumo wa misava wa vunkombo lowu hlamuseriweke eBibeleni?
▪ Xifaniso lexikulu xa nsimbi lexi voniweke hi Hosi Nebukadnetsara a xi fanekiseli mimfumo hinkwayo ya misava. (Dan. 2:31-45) Xi fanekisela ntsena mimfumo ya misava ya ntlhanu leyi fumeke ku sukela enkarhini wa Daniyele ku ya emahlweni ni leyi xaniseke vanhu va Xikwembu.
Nhlamuselo ya Daniyele ya xifaniso lexikulu xa nsimbi yi kombisa leswaku Mfumo wa Misava wa Manghezi ni Maamerika a wu nga ta hlula Mfumo wa Rhoma, kambe a wu ta huma endzeni ka wona. Exifanisweni xexo, Daniyele u vone nsimbi leyi sukelaka emilengeni ya xona yi kala yi fika eminkondzweni ni le swikunwanini swa xona. (Eminkondzweni ni le swikunwanini swa xona, nsimbi yi pfanganisiwe ni vumba.) * Sweswo swi kombisa leswaku Mfumo wa Misava wa Manghezi ni Maamerika a wu ta humelela hi le milengeni ya nsimbi. Matimu ma nyikela vumbhoni bya leswaku mhaka yoleyo i ntiyiso. Tiko ra Britain, leri khale ka rona a ri ri ehansi ka Mfumo wa Rhoma, ri sungule ku va ni matimba eku heleni ka va-1700. Endzhaku ka nkarhi, tiko ra United States of America na rona ri sungule ku va ni matimba. Kambe mfumo wa misava wa vunkombo wa vuprofeta bya Bibele a wu nga si simekiwa. Ha yini? Hikuva tiko ra Britain ni ra United States a ma nga si sungula ku tirhisana hi ndlela yo hlawuleka. Ma sungule ku tirhisana hi ndlela yoleyo hi nkarhi wa Nyimpi yo Sungula ya Misava.
Hi nkarhi wolowo, “vana va mfumo” a va gingiriteka etindhawini to tala ta le United States naswona yindlu-nkulu ya misava hinkwayo a yi ri eBrooklyn, le New York. (Mat. 13:36-43) Swirho swa ntlawa wa vatotiwa a swi chumayela hi ku hiseka ematikweni lawa a ma ri ehansi ka Mfumo wa Manghezi. Hi nkarhi wa Nyimpi yo Sungula ya Misava, mfumo wa Manghezi ni wa Maamerika wu ake vuxaka byo hlawuleka loko wu lwisana ni matiko lama nga valala. Nakambe leswi nyimpi yi nyanyiseke moya wo titlakusa exikarhi ka matiko, mfumo wolowo wu venge lava a va vumba xiphemu xa mbewu ya “wansati” wa Xikwembu, wu yirise minkandziyiso leyi a va yi kandziyisa ni ku khotsa lava a va rhangela entirhweni wo chumayela.—Nhlav. 12:17.
Kutani hi ku ya hi vuprofeta bya Bibele, mfumo wa misava wa vunkombo a wu humelelanga eku heleni ka va-1700 loko tiko ra Britain ri sungula ku va ni matimba, kambe wu humelele eku sunguleni ka siku ra Hosi. *
[Tinhlamuselo ta le hansi]
^ par. 4 Vumba lebyi pfanganisiweke ni nsimbi byi fanekisela vanhu lava nga endzeni ka Mfumo wa Misava wa Manghezi ni Maamerika. Hi ku famba ka nkarhi, vumba lebyi byi endle leswaku mfumo wolowo wa misava swi wu tikela ku va ni matimba hilaha a wu lava hakona.
^ par. 6 Nhlamuselo leyi yi antswisa rungula leri nga ebukwini ya Vuprofeta Bya Daniyele eka tluka 57, ndzimana 24 ni leri tsariweke eka chati leyi nga eka tluka 56 na 139.
[Xifaniso lexi nga eka tluka 19]
Vamakwerhu va nhungu lava humaka eyindlu-nkulu ya Watchtower va khotsiwile hi June 1918