Yatiñanejj “suma ewjja arunaka” thaqhe

Jakäwejj lamar qotnäm sarañampi sasiwa. Ukampis walja jaqenakaw sarkasajj chhaqhapjje, kunattejj janiw jaqen yatiñkankañapajj sumpun yanaptʼawaykiti (Sal. 107:23, 27). ¿Kunatsa jakäwejj qotnam sarañampi sasejja?

Nayra tiemponjja, lamar qotnam sarañajj wali experiencianitakïnwa. Ukat walja maranak jachʼa barconak apnaqapki ukanakatwa maynejj yateqasispänjja, sañäni timón apnaqerita (Hech. 27:9-11). Nayra maranakat utjki uka cuadronakanjja, timón apnaqerejj mayninakat sipans jachʼpachwa pintapjjäna. Lamar qotnam sarañatakejja, thayata, warawaranakata ukat yaqha ukham chimpunakat yateqañas waliw utjäna. Biblianjja, “wali sum apnaqa[pjje]” sasaw barco apnaqer yaqhepanakat sasiraki, ukajj yatiñanïña sañwa munaraki (Eze. 27:8).

Jakäwin utjki uka jan waltʼäwinakajja, kunjamtï nayra tiempon qotnam sarañajj wali chʼamäkänjja ukhamarakïspawa. ¿Kunas yanaptʼistaspa?

KUNJAMSA “EWJJA ARUNAKA” JIKJJATSNA

Jakäwejj qotnam sarañampi saskaspas ukham amuytʼkasajja, Bibliankir aka arunakat amuytʼañäni: “Khititejj yatiñani, chʼikhïki ukawa aka arunakjja istʼejja, ukatsti jikjjatiwa jukʼamp yatiñ kankaña, ukhamarak jukʼamp suma ewjja arunaka” (Pro. 1:5, 6). Hebreo arut “suma ewjja arunaka” sasin jaqokipatäki ukajja, nayra barco sum apnaqer capitanaruw uñtayi. Ukasti kawknam sarañasa uk sum amuytʼayiri ukat sum irpiri sañ munaraki.

Chʼamachasiñas wakiskchejja, taqeniw “suma ewjja arunaka” jikjjatsna, ukat jakäwin nayrar sumak sarañ yateqaraksna. Kunjamtï Proverbios libron siskejja, ewjja arunaka jikjjatañatakejj “yatiñanïña”, ‘chʼikhi chuymanïña’ ukat “amuytʼasirïñaw” wakisi (Pro. 1: 2-6; 2:1-9). Ukat Jehová Diosat yanaptʼa mayisiñ janiw armasiñasäkiti, kunattejj jan wali jaqenakas kuntï munapki uk lurañsa yatipjjarakispawa (Pro. 12:5).

Ukhamasti, Bibliat sum yatjjatañasawa, ukhamatakwa Jehová Diosat sum yatjjatsna, ukat Diosat yateqasis sarnaqeri Jesucristorus sum uñtʼaraksna (Juan 14:9). Ukatjja, tantachäwinakanwa suma ewjja arunak istʼaraktanjja. Ukat wali experiencianïpki ukanakatsa yateqasiraksnawa, jupanakatjja, awk taykasäspawa (Pro. 23:22).

KUNSA LURÄTA UK SUM AMUYTʼASIÑAMAWA

Kunapachatï jan waltʼäwinakajj wali chʼamani umar uñtat jutki ukhaw ‘suma ewjja arunakajj’ wali wakiskiripunejja. Jan waltʼäwinakan uñjasisajja, pächasisajj janiw kunsa lurirjamäjjsnati ukat jan walinakaruw pursna (Sant. 1:5, 6).

 “Suma ewjja arunaka” sasin jaqokipaski uka arunakajja, guerrat parlkasajj apnaqasirakiwa. Biblian akham siwa: “Wali suma amuytʼäwinakampiwa guerran nuwasiñajj wakisi, walja ewjjerinakampiwa atipjañajj utjaraki” sasa (Pro. 20:18; 24:6).

Kunjamtï maynejj guerran kunjamsa nuwasini uk sum amuykiptʼkejja, ukhamarakiw jiwasajj kunanakas Diosar serviñan jan waltʼayistaspa ukanak sum amuykiptʼañasa (Pro. 22:3). Jumatakejj mä trabajos utjkaspa, jan ukajj pachpa trabajomansa suma puesto churañ munapkiristam ukham amuytʼañäni. Uk katoqañatakejja, trabajor sarañatakisa kuttʼaniñatakisa qhawqha tiempos munasini ukat qhawqsa pagapjjätam ukanakwa amuytʼasiñama. Ukampisa, yaqha toqenakatsa amuytʼañamarakiwa, sañäni: uka trabajojj janit Biblian kamachinakap pʼakintaykätam, jan ukajj kuna horantï trabajkäta ukajj cristianjam phoqhañamäki ukanakan aynachtʼayätamti janicha ukanaksa amuytʼasiñamarakiwa (Luc. 14:28-30).

Loretta kullakajja, wakichtʼat manqʼanak aljir mä empresanwa suma trabajonïna. Uka empresajj yaqha cheqar sarjjañapäkäna ukhajja, mä suma puesto churapjjäma sasaw uka kullakar sapjjäna. Empresa pʼeqtʼirinakajj akham sapjjänwa: “Yaqha suma trabajo janiw jikjjatkätati. Ukhamarus uka jakʼan mä Tantachasiñ Uta utjatap yatjjatapjjtwa” sasa. Ukampis uka kullakajj Diosar yupaychañatakejj jukʼa tiempokiw utjjetaspa sasaw amuyäna, jupajj Diosar jukʼamp serviñatakejj janiw sinti trabajañ munjjänti. Ukat empresa pʼeqtʼirejj jumarukiw akan qheparayapjjäma siskchïnsa, Lorettajj janiw jumanakampi trabaj-jjäti sasaw säna. Uka kullakajj 20 maranakaw precursorjam serviski, ukat “suma ewjja arunaka”, mä arunjja, Biblian ewjjanakaparjam amtatapatwa kusisit jikjjatasiwayi. Jehová Diosarus jukʼampiw jakʼachasiwayi ukat waljaniruw Bibliat yatichawayaraki.

“Suma ewjja arunaka[jja]” familia taypinwa munasiraki. Wawanakar uywañajj janiw mä qhawqha maranakatakïkiti, ukat qollqe toqetsa ukat Diosar yupaychañansa kunanaktï amtkäta ukanakajj familpacharuw walinsa jan walinsa uñjasiyani (Pro. 22:6). Cristian awk taykanakajj akham sasaw jisktʼasipjjaspa: “Arsutajampisa ukat sarnaqäwijampisa, ¿wawanakarojj Jehová Diosar jukʼamp jakʼachasiñti yatichasipktjja ukhamat jilïrïjjapjjañapkam sum jakasipjjañapataki? ¿Jakañatakejj kunatï wakiski ukampik kusisit jakasiña ukat Diosar taqe chuyma serviñti wawanakar yatichasipktjja?” sasa (1 Tim. 6:6-10, 18, 19).

Kusisit jakañajj janiw walja qollqempisa ni wali aytatäñampis jikjjataskiti, ukampis jaqenakajj ukanakwa thaqhapjje. Uk amuyasaw Salomón reyejj Diosan amuytʼayatäsin akham säna: “Nayajj yatirakïyätwa, khitinakatejj Diosar jachʼañchapki, ukhamarak ajjsarapki ukanakajj sumaki jakasipjjatapa” sasa (Ecl. 8:12). Uka arunakarjamajja, Biblian jikjjataski uka “suma ewjja arunaka” thaqhañaw yatiñanïñajja (2 Tim. 3:16, 17).

[30 janan fotopa]

Timón apnaqerirojja, barco apnaqeri mayninakat sipansa jachʼpachwa cuadronakan pintapjjäna

[Fotox khitin apsutasa]

Su concessione del Ministero per i Beni e le Attività Culturali. Aka fotojj janipuniw kunäkipansa copiaqasiñapäkiti.