Magmaalamon—Pangitaa ang “Mahanasong Pagtultol”

Ang kinabuhi gipakasama sa paglawig. Apan sagad ang kaalam sa tawo dili igo aron magmalamposon kita sa pagnabigar diha sa balorong dagat sa kinabuhi, gani daghan ang nangalunod. (Sal. 107:23, 27) Nganong haom kini nga pagtandi?

Lisod ang paglawig sa karaang panahon. Nagkinahanglan kinig kahanas nga sagad makat-onan gikan sa hawod nga mga marinero, sama sa timonil. (Buh. 27:9-11) Sa karaang mga dibuho, ang timonil sagad gidibuho nga mas dako kay sa uban aron ipasiugda ang kahinungdanon sa iyang papel. Sa dili pa molawig ang mga marinero, tun-an una nila ang posisyon sa mga bituon, direksiyon sa hangin, ug ubang butang nga makagiya kanila. Ang Bibliya naghisgot ug mga marinero nga “hanas,” termino nga nagpasabot usab nga “maalamon.”—Ezeq. 27:8.

Ang pagsagubang sa mga problema sa kinabuhi karon daw sama kalisod sa paglawig sa karaang panahon. Unsay makatabang kanato?

SA UNSANG PAAGI ATONG MABATONAN ANG “MAHANASONG PAGTULTOL”?

Kay ang kinabuhi gitandi sa paglawig, tagda kini nga kamatuoran: “Ang maalamong tawo magpatalinghog ug magadawat ug dugang nga pagtudlo, ug ang tawong masinaboton mao ang makabaton ug mahanasong pagtultol.” (Prov. 1:5, 6) Ang Hebreohanong termino nga gihubad ug “mahanasong pagtultol” mahimong maghubit sa ginahimo sa kapitan sa karaang mga barko. Nagpaila kini sa iyang kahanas sa pagtultol ug paggiya.

Bisag dili kini sayon, kita makabatog “mahanasong pagtultol” ug makakat-on sa ‘paglawig’ nga malamposon sa kinabuhi. Sumala sa Proverbio, kinahanglan natong gamiton ang “kaalam,” “pagsabot,” ug “hait nga salabotan.” (Prov. 1:2-6; 2:1-9) Gikinahanglan sab nato ang giya sa Diyos, kay bisan ang mga daotan nahibalo sa “pagtultol” sa ilang kaugalingon apan alang sa kadaotan.—Prov. 12:5.

Busa magkugi kita sa pagtuon sa Pulong sa Diyos. Pinaagi niini, kita makakat-on bahin kang Jehova ug sa usa nga hingpit nga nagsundog Kaniya, si Jesu-Kristo. (Juan 14:9) Makadawat usab kitag maalamong tambag diha sa Kristohanong mga tigom. Dugang pa, makakat-on kita gikan sa mga kasinatian sa uban, lakip sa atong mga ginikanan.—Prov. 23:22.

HUNAHUNAA ANG POSIBLENG MAHITABO UG PAGPLANO

Gikinahanglan nato ang “mahanasong pagtultol” ilabina kon baloron ang atong kinabuhi. Kon dili kita segurado sa angay natong buhaton sa usa ka lisod  nga situwasyon, dili kita makalihok. Peligroso kini ug makadaot pa.—Sant. 1:5, 6.

Ang terminong “mahanasong pagtultol” gigamit usab bahin sa pagpakiggubat. Atong mabasa: “Pinaagi sa mahanasong pagtultol [“mahanasong estratehiya,” The Revised English Bible] ikaw magapakiggubat, ug diha sa panon sa mga magtatambag adunay kaluwasan.”—Prov. 20:18; 24:6.

Sama sa usa nga batid sa estratehiya sa gubat, angay natong hunahunaon daan ang mga butang nga posibleng makadaot sa atong espirituwalidad. (Prov. 22:3) Pananglitan, tingali kinahanglan kang modesisyon kon dawaton ba nimo ang usa ka trabaho o posisyon. Siyempre, imong konsiderahon ang suweldo, ang gilay-on sa trabahoan, ug uban pang detalye. Apan duna ka pay angayng tagdon: May malapas ba nga prinsipyo sa Bibliya ang maong trabaho? Makaapektar kaha sa akong pag-alagad ang oras sa trabaho?—Luc. 14:28-30.

Usa ka Saksi nga ginganlag Loreta ang may maayong trabaho sa usa ka kompaniya. Dihang ibalhin na ang kompaniya sa laing lugar, gitanyagan siyag taas nga posisyon: “Ayaw gyod palabya ni nga kahigayonan,” matod pa sa iyang direktor. “Total may Kingdom Hall man pod didto.” Pero gustong ipasimple ni Loreta ang iyang kinabuhi aron mas bug-os siyang makaalagad kang Jehova. Kon dawaton niya kini, gamay na lang siyag panahon para sa Kristohanong kalihokan. Busa miresayn siya, bisag giingnan siya sa direktor nga siya lang ang empleyado nga dili nila gustong mawala sa kompaniya. Si Loreta karon 20 ka tuig nang regular payunir. Kombinsido siya nga ang maayong mga resulta sa iyang desisyon maoy tungod sa iyang pagplano nga may “mahanasong pagtultol,” nga nahiuyon sa tambag sa Bibliya. Mas nasuod siya kang Jehova ug daghan siyag natabangan nga makadangat sa kamatuoran.

Hinungdanon usab diha sa pamilya ang “mahanasong pagtultol.” Taas nga panahon ang gikinahanglan sa pagmatutog mga anak, ug ang mga desisyon nga himoon bahin sa espirituwal o materyal nga mga butang makaapektar sa kaugmaon sa tibuok pamilya. (Prov. 22:6) Pananglitan, mahimong pangutan-on sa Kristohanong mga ginikanan ang ilang kaugalingon: ‘Ang amo bang gisulti ug gibuhat nagtudlo sa among mga anak ug mga prinsipyo sa Bibliya nga motabang nila nga magmaalamon sa pagsagubang sa mga hagit sa kinabuhi inigkahamtong nila? Ang amo bang pagkinabuhi nagtudlo kanila nga magmakontento sa simpleng kinabuhi ug magpokus sa ministeryo?’—1 Tim. 6:6-10, 18, 19.

Ang tinuod nga kalamposan dili masukod pinaagig materyal nga mga butang o kadungganan nga sagad gipangagpas sa mga tawo. Naamgohan kini ni Haring Solomon. Siya misulat: “Maayo ang sangpotan niadtong nahadlok sa matuod nga Diyos, tungod kay sila nahadlok kaniya.” (Eccl. 8:12) Busa maalamon gayong pangitaon ang “mahanasong pagtultol” nga gibase ug nahiuyon sa Bibliya.—2 Tim. 3:16, 17.

[Hulagway sa panid 30]

Aron ipasiugda ang papel sa mga timonel, sila sagad gidibuho nga mas dako kay sa uban

[Credit Line]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.