Ñande rekove ikatu ñambojoja peteĩ viáhere jajapóva várkope. Heta vése ijetuʼu jaha porã hag̃ua hese, ha ñambyasýramo jepe hetápe osẽ vai, ojerovia rupi yvyporakuérare (Sal. 107:23, 27). Péro ¿mbaʼérepa ñambojoja ñande rekove peteĩ viáhere?

Ymaite guive umi marinéro ha kapitán ikatupyryvaʼerã ogueraha porã hag̃ua ivárko. Ha umi ivalémava omboʼémi vaʼerã umi ótro ndoikuaaguasúivape (Hech. 27:9-11). Umi kuádro yma guarépe ojedivuha tuichave pe kapitánpe ojehechauka hag̃ua iñimportanteha hembiapo. Umi kapitán oñatendevaʼerã moõ gotyopa oipeju yvytu, omañavaʼerã umi estréllare ha ontendevaʼerã hetave mbaʼe oikuaa hag̃ua moõ rupípa ohóta. La Biblia heʼi oĩ hague heta “ikatupyrýva” onavega hag̃ua, ha oñeʼẽvo hesekuéra oiporu avei peteĩ ñeʼẽ heʼiséva “iñaranduha” (Eze. 27:8; nóta).

Umi kapitánpe ijetuʼu vaʼekue ogueraha porã hag̃ua ivárko, ha ñandéve avei koʼág̃a heta mbaʼe ijetuʼu jagueropuʼaka hag̃ua. ¿Mbaʼépa ikatu ñanepytyvõ?

MBAʼÉICHAPA IKATU “NDEKATUPYRYVE”

La Biblia heʼi: “Iñarandúva, ohendúrõ ojeʼéva chupe oikuaavéta; ha iñakãporãva ikatupyryvéta” (Pro. 1:5, 6, NM). Pe ñeʼẽ evréo ojeporúva ko téystope, ha ojetradusíva “katupyry”, ojeporúmi oñeñeʼẽ hag̃ua peteĩ kapitán ivakeánovare, ha ivaléva ohechauka hag̃ua moõ gotyopa ojehovaʼerã.

Opavave ñañehaʼãvaʼerã ñañembokatupyry ikatu hag̃uáicha jaha porã hese ñande “viáhepe”. Péro upéva ndajahupytýi péicha péichante. Heʼiháicha Proverbios, tekotevẽ “ñanearandu”, “jahechakuaa mbaʼépa iporã ha mbaʼépa ivai” ha “ñañatende jajapótavare” (Pro. 1:2-6; 2:1-9, NM). Péro ndahaʼéi koʼã mbaʼénte la ñaikotevẽva, avei jajerurevaʼerã Ñandejárape tañanembokatupyry jadesidi porã hag̃ua. Pórke ñanemanduʼavaʼerã umi iñañáva ikatupyryhánte avei, péro hembiapo vai hag̃ua (Pro. 12:5).

Upéicharõ, tekotevẽterei jastudia Ñandejára Ñeʼẽ jaikuaa porã hag̃ua Jehovápe ha Itaʼýra Jesucrístope (Juan 14:9). Avei jaha meme vaʼerã rreunionhápe, upépe oñemeʼẽ ñandéve heta konsého porã. Ha nañanderesarairivaʼerã ikatuha avei ñaaprende heta mbaʼe umi ikatupyryvévagui, pór ehémplo, ñande tuvakuéragui (Pro. 23:22).

EKALKULA IKATÚVA OIKO

Jahasa jave peteĩ situasión ijetuʼúvare koʼýte tekotevẽ ñandekatupyry. Oimérõ jadesidivaʼerã peteĩ mbaʼe iñimportánteva, ikatu ñañemondýi  ha ndajaikuaái moõ gotyopa jaháta, ha upéva ikatu ñandegueraha vai (Sant. 1:5, 6).

Iñimportánte jaikuaa pe ñeʼẽ “katupyry” ojeporuha avei oñeñeʼẽ jave gérrare. La Biblia heʼi: “Tetãnguéra osẽ porã ñorairõme, oñehaʼã rupi ikatupyry [térã “ojeprepara porã rupi”]” (Pro. 20:18; 24:6, NM).

Umi ohótava gerrahápe okalkula porã mbaʼépa ojapóta oho mboyve oñorairõ, upéicha avei ñande jahecháma vaʼerã mbaʼépa ikatu omokangy ñande jerovia jajehekýi hag̃ua umi situasióngui (Pro. 22:3). Ñamoĩ chupe oñekuaveʼẽha ndéve peteĩ traváho térã peteĩ puésto ijyvatevéva. Reasepta mboyve katuete repensáta mboýpa reganáta ha mboy tiémpopa hoʼúta ndehegui la viáhe, rehokuévo ha rejukuévo. Péro tekotevẽterei avei rekalkula iporãpa upe traváho peteĩ kristiánope g̃uarã, ha ndoʼupamoʼãipa ndehegui ne tiémpo reservi porã hag̃ua Jehovápe (Luc. 14:28-30).

Jahechamína Loretta ehémplo. Haʼe ningo testígo de Jehová ha ombaʼapo porã peteĩ emprésape ojejapohápe tembiʼu. Pe emprésa ovárõ guare, oñemeʼẽse chupe peteĩ puésto ijyvatevéva, ha ipatrón heʼi voi chupe: “Reaprovechavaʼerã ko oportunida. Hiʼarive roaveriguapáma ha oĩ peteĩ Salón del Reino ag̃ui upégui”. Péro Loretta oservi porãseve Ñandejárape; ha oikuaa porã upe traváho hoʼupaitetaha chugui itiémpo. Ipatrón heʼíramo jepe chupe oikotevẽtereiha hese ha ndaiporiha voi ótro ombaʼapóva haʼéicha, haʼe orrenunsiánte. Koʼág̃a ojapóma veinte áño rupi oservi hague de prekursóra rregulár, ha oikuaa oho porã hague chupe heta okalkula haguére odesidi mboyve ha oñehaʼã rupi “ikatupyryve”. Ojapo rupi upéicha oñemoag̃uive Jehováre ha oipytyvõma heta héntepe oservi hag̃ua Ñandejárape.

Ñamongakuaávo ñane famíliape tekotevẽ avei “ñandekatupyry”. Heta áñore ñahekomboʼe chupekuéra, ha umi mbaʼe jadesidíva ohupytypaite avei ñande rogayguakuérape. Upévare jahechavaʼerã ñamotenondepañaína Ñandejára rembipota térãpa umi mbaʼerepy (Pro. 22:6). Tekotevẽ ñañeporandu: “¿Ahechaukápa che famíliape che ehémplo rupive oñemoag̃uivevaʼerãha Jehováre, koʼág̃a ha okakuaapa rire avei? ¿Ohechakuaápa aiko lájare ovyʼataha oñekontentáramo orekomívarente ha omotenondérõ Ñandejára servísio?” (1 Tim. 6:6-10, 18, 19).

Oĩ heta hénte ifamóso térã ipláta hetáva, péro upéva ndeʼiséi opa mbaʼe osẽ porãha chupekuéra. Rréi Salomón ohechakuaavaʼekue mbaʼépa jajapovaʼerã javyʼa hag̃ua. Haʼe ohai: ‘Umi hekopotĩvape opaite mbaʼe osẽ porã, okyhyje rupi Ñandejáragui’ (Ecl. 8:12, ÑÑB). Upévare, jahechaukákena ñanearanduha ha ñañehaʼã “ñandekatupyry” Ñandejára Ñeʼẽ rupive (2 Tim. 3:16, 17).

[Nóta oĩva taʼanga ndive páhina 30]

Umi kuádro yma guarépe ojedivuha tuichave pe kapitánpe ojehechauka hag̃ua iñimportanteha hembiapo

[Roagradese]

Su concessione del Ministero per i Beni e le Attività Culturali. Prohibida la copia o reproducción de esta imagen por cualquier medio.