Mauri be davara ai ia loaloa sisima ida idia hahegeregerea. To, taunimanima edia aonega be hegeregere lasi ma haida idia durua edia mauri idia moalelaia totona. Momo be edia mauri lalonai hekwakwanai badadia idia davaria, hegeregere hurehure badadia ese sisima idia hadikaia bamona. (Sal. 107:23, 27) To, dahaka dainai mauri be davara ai ia loaloa sisima ida ita hahegeregerea be maoro?

Idaunegai, davara ai loaloa karana be mai ena hekwarahi dainai, davara ia diba namonamo tauna sibona ese sisima ia taria be namo. To unai ia diba namonamo totona, sisima taria dalana ia diba namonamo tauna ese ia hadibaia be namo. (Kara 27:9-11) Guna idia penia laulaudia ai, sisima ena kapten ena laulau be bada, bona unai ese ia hahedinaraia ia be mai anina bada gaukarana ia karaia. To gadobada idia lao taudia be nega momo hisiu, lai, bona gau ma haida idia stadilaia namonamo guna. Baibel ese sisima taria taudia haida ia gwauraidia “diba momo taudia.”​—⁠Ese. 27:8.

Hari, mauri ai hekwakwanai be momo, sisima be davara ai hekwakwanai momo ia davaria bamona. To, dahaka ese ita ia durua diba?

‘DIBA ITA HABADAIA’ DALANA

Ita herevalaia haheitalai be Baibel ena hereva ida mani ita hahegeregerea. Baibel ia gwau: “Aonega tauna danu bema ia kamonai, ena diba do ia habadaia; bona laloparara tauna be mai ena diba ida do ia gaukara.” (Aon. 1:5, 6, BHğ) Heberu herevana idia hahanaia “mai ena diba” be sisima ena kapten ena kara ia herevalaia. Ia be mai ena diba ida gaukara taudia ia durua bona hakaua.

Bema diba abia totona ita hekwarahi, unai ese ita ia durua diba mauri lalonai ita davaria hekwakwanai ita hanaidia totona. Aonega Herevadia bukana ese ia hahedinaraia bamona aonega, laloa kehoa, bona diba idia gaukara hebou be namo. (Aon. 1:2-6; 2:1-9) Bona nega ibounai Iehova ena hakaua dalana ita badinaia be namo; badina kara dika taudia danu be sisiba idia henia, to unai idia karaia taunimanima koia totona.​—⁠Aon. 12:5.

Unai dainai Dirava ena Hereva ita stadilaia namonamo be gau badana. Unai amo Iehova bona ia ia tohotohoa tauna hereadaena, Iesu Keriso do ita dibaia. (Ioa. 14:9) Keristani heboudia amo hakaua hereva namodia ita kamonai. Danu, eda tama sina bona haida edia ekspiriens amo diba ita abia.​—⁠Aon. 23:22.

VAIRA NEGANA LALOA

Hekwakwanai idia vara neganai, namona be ita diba dahaka do ita karaia. Badina bema ita diba lasi, dika idauidau ita davaria diba.​—⁠Iam. 1:5, 6.

Baibel torea taudia be tuari idia herevalaia neganai, Heberu herevana idia hahanaia ‘diba oi habadaia,’  idia gaukaralaia danu. Baibel ia gwau: “Tuari do umui karaia namonamo dalana, be palani namodia do umui karaia guna [o diba do umui habadaia], bona tuari do umui kwalimu totona, sisiba namona do umui kamonai henia namonamo guna.”​—⁠Aon. 20:18; 24:6.

Tuari ia diba momo tauna ese palani namona ia karaia hegeregerena, ita danu be eda hetura karana Iehova ida idia hadikaia diba gaudia ita diba guna be namo. (Aon. 22:3) Hegeregere, reana bosi ia ura oi dekenai gaukara matamata ia henia bona emu pei do ia habadaia. Unai do oi abia dae, a? Reana oi be do oi abia monina, gaukara dekenai oi lao bona giroa ena horadia, bona gau ma haida do oi laloa danu. To, namona be sibona oi nanadaia danu: Unai moni gaukara be Baibel ena hakaua herevadia hegeregerena, a? Eiava, unai ese egu haroro bona hebou lao henia karana do ia hadikaia, a?​—⁠Luka 14:28-30.

Iehova ena Witnes taihu ta ladana, Loretta be moni gaukara namona ta ia karaia. Ia gaukara kampani be gabu ma ta idia lao gwauraia neganai, kampani ena dairekta ese Loretta ia hamaoroa ia dekenai dagi ta do ia henia. Ia gwau: “Inai be moni gaukara namo hereana, bona reana gabeai inai bamona moni gaukara ta do oi davaria lasi.” Ma ia gwau: “Ai davaria unai gabu ai Kingdom Hall ta ia noho danu.” To, Loretta ia ura ena mauri lalonai gau haida ia haidaua, bona ena Havaraia Tauna ia hesiai henia. Ia diba bema unai gaukara matamata ia abia dae, nega be lasi haroro o hebou ia lao totona. Unai dainai ena be idia noia ia doko lasi totona, to ena risain pepana ia henia. Loretta be lagani 20 regula painia gaukara ia karaia vadaeni, bona ia diba ia karaia abia hidi be Baibel ena hereva hegeregerena dainai, ena hesiai gaukara ia moalelaia. Danu, ena hetura karana Iehova ida ia hagoadaia, bona momo ia durua hereva momokani idia abia dae totona.

Namona be tama sina be ‘mai edia diba’ ida ruma bese idia naria. Natudia naria gaukarana be gaukara badana. Unai dainai, ruma bese ena hetura karana Iehova ida bona tauanina durua gaudia abia hidi dalana dekenai, tama sina edia abia hidi be mai anina bada. (Aon. 22:6) Namona be Keristani tama sina be sibona idia nanadaia: ‘Emai hereva bona kara amo emai natudia idia itaia Iehova tura henia karana be mai anina bada, bona unai ese nega vaira ai idia ia durua diba, a? Kohu momo lasi maurina ai noholaia, unai amo emai natudia ai durua haroro gaukara idia goadalaia totona, a?’​—⁠1 Tim. 6:6-10, 18, 19.

Tanobada taudia idia laloa kohu momo o ladana bada tahua karana ese moale korikorina do ia havaraia. To, King Solomona be unai ia diba dainai, ia gwau: “Dirava idia gari henia taudia be do idia namo, idia ese Dirava idia matauraia noho dainai.” (Had. 8:12) Unai ese ia hamomokania Dirava ena Hereva amo eda ‘diba ita habadaia’ be aonega karana.​—⁠2 Tim. 3:16, 17.

[Picture on page 30]

Guna idia penia laulaudia ai, sisima ena kapten ena laulau be bada, bona unai ese ia hahedinaraia ia be mai anina bada gaukarana ia karaia

[Credit Line]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.