Mara Ihe—Chọọ “Ezi Ntụziaka”
Mara Ihe—Chọọ “Ezi Ntụziaka”
E ji ndụ tụnyere iji ụgbọ mmiri eme njem. Ma, o doola anya na ọtụtụ mgbe, amamihe mmadụ anaghị enyechara ndị mmadụ aka imeri nsogbu ndị na-abịara ha. Nsogbu ndị na-abịara ọtụtụ ndị na-eme ka ha yie ndị oké ebili mmiri mere ka ụgbọ ha kpuo. (Ọma 107:23, 27) Gịnị mere ihe atụ ahụ ji daba adaba?
N’oge ochie, ịkwọ ụgbọ mmiri anaghị adị mfe. A na-eji nkà eme ya. A na-amụta ya n’aka ndị rụrụla ọrụ n’ụgbọ mmiri ọtụtụ afọ, ikekwe onyeisi ụgbọ. (Ọrụ 27:9-11) Ọtụtụ ndị sere ihe n’oge ochie sere ndị na-akwọ ụgbọ mmiri ka ha buo ibu karịa ndị ọzọ na-arụ ọrụ n’ụgbọ mmiri iji gosi otú ọrụ ha si dị mkpa. Tupu ndị na-akwọ ụgbọ mmiri akwọrọ ụgbọ gawa, ha na-ebu ụzọ mụọ banyere kpakpando, ifufe, na ihe ndị ọzọ ga-enyere ha aka ịgaru ebe ha na-aga. Baịbụl kpọrọ ụfọdụ ndị na-arụ ọrụ n’ụgbọ mmiri “ndị nwere nkà,” nke nwere ike ịpụta ndị maara ihe.—Ezik. 27:8.
Nsogbu ndị na-abịara anyị taa nwere ike isi ike ka iji ụgbọ mmiri eme njem n’oge ochie. Olee ihe nwere ike inyere anyị aka?
OLEE OTÚ ANYỊ GA-ESI NWETA “EZI NTỤZIAKA”?
Cheta na e ji ndụ tụnyere iji ụgbọ mmiri eme njem. Ugbu a, chee banyere eziokwu a e kwuru na Baịbụl, ya bụ: “Onye maara ihe ga-ege ntị ma nwetakwuo ntụziaka, ọ bụkwa onye nwere nghọta na-enweta ezi ntụziaka.” (Ilu 1:5, 6) E nwere ike iji okwu Hibru e si na ya sụgharịta “ezi ntụziaka” kọwaa ihe onyeisi ụgbọ mmiri na-eme n’oge ochie. Okwu ahụ pụtara na onyeisi ụgbọ ma otú e si eji nkà eduzi ụgbọ.
N’agbanyeghị na ọ dịghị mfe, anyị nwere ike inweta “ezi ntụziaka” ma mụta ime nke ọma n’ihe ndị anyị na-eme. Dị ka e kwuru n’akwụkwọ Ilu, anyị kwesịrị iji “amamihe” na “nghọta” na-ekpebi ihe ndị anyị na-eme. (Ilu 1:2-6; 2:1-9) Anyị kwesịrị ịchọ ka Chineke na-eduzi anyị, n’ihi na ndị ajọ omume nwere ike ịma otú ha ga-esi duhie mmadụ.—Ilu 12:5.
N’ihi ya, anyị kwesịrị ịna-amụsi Okwu Chineke ike. Ime otú ahụ ga-eme ka anyị mụta ihe bara ezigbo uru banyere Jehova na onye kacha ṅomie ya, bụ́ Jizọs Kraịst. (Jọn 14:9) Anyị na-enweta ọtụtụ ezigbo ndụmọdụ n’ọmụmụ ihe. Anyị nwekwara ike ịmụta ihe n’aka ndị mụrụ anyị nakwa n’aka ndị ọzọ.—Ilu 23:22.
CHEE ECHICHE MA KPEBIE IHE Ị GA-EME
“Ezi ntụziaka” dị mkpa karịchaa mgbe anyị nọ ná nsogbu ndị yiri oké ebili mmiri. Inwe obi abụọ mgbe nsogbu tara akpụ bịaara anyị nwere ike ime Jems 1:5, 6.
ka anyị ghara ịma ihe anyị ga-eme, nke ga-akpatara anyị nnukwu nsogbu.—A na-ejikwa okwu ahụ e si na ya sụgharịta “ezi ntụziaka” akọwa ịlụ agha. Baịbụl kwuru, sị: “N’ihi na ị ga-eji ezi ntụziaka buo agha gị, ọtụtụ ndị ndụmọdụ na-emekwa ka e nwee nzọpụta.”—Ilu 20:18; 24:6.
Dị ka ọchịagha nke na-ahazi ndị agha ya, anyị kwesịrị ịtụ anya ihe ndị nwere ike ime ka anyị na Chineke ghara ịdị ná mma. (Ilu 22:3) Dị ka ihe atụ, o nwere ike ịbụ na ị chọrọ ikpebi ma ị̀ ga-ekweta ịrụ ọrụ ọhụrụ a chọrọ inye gị ma ọ bụ kwe ka e bugoo gị n’ọkwá. O doro anya na ị ga-atụle ego ole a ga-akwụ gị, oge ọ ga na-ewe gị ịga ọrụ na ịlọta, na ihe ndị ọzọ. Ma, ihe ndị ọzọ i kwesịrị ichebara echiche bụ: Ịrụ ụdị ọrụ ahụ ọ̀ ga-emegide ihe Baịbụl kwuru? Awa ole m ga-eji na-arụ ya na mgbe m kwesịrị ịrụ ya ò nwere ike ime ka m ghara ịna-aga ọmụmụ ihe na ozi ọma?—Luk 14:28-30.
Otu Onyeàmà Jehova aha ya bụ Loretta na-arụ ọrụ na-enye ya ezigbo ego n’otu nnukwu ụlọ ọrụ. Mgbe a chọrọ ibuga ụlọ ọrụ ahụ ebe ọzọ, a gwara Loretta na a ga-enye ya nnukwu ọkwá n’ebe ahụ. Ndị isi ụlọ ọrụ ha gwara ya, sị: “Ọrụ a bụ ọrụ onye ọ bụla na-achọ achọ. Anyị achọpụtala na e nwere Ụlọ Nzukọ Alaeze n’ebe ahụ.” Ma, Loretta chọrọ ịkwụsịlata ihe ndị na-eri ya oge ka o nwee ike ijekwuru Jehova ozi. Ọ chọpụtara na ọkwá ọhụrụ ahụ ga-eme ka ọ ghara inwecha ohere ịga ọmụmụ ihe. N’ihi ya, ọ gbara arụkwaghịm n’agbanyeghị na onyeisi ha gwara ya na ọ bụ naanị ya ka ha chọrọ ka ọ ka na-arụrụ ha ọrụ. Loretta asụọla ụzọ ihe dị ka afọ iri abụọ, obi sikwara ya ike na ihe mere ka o rite uru n’ozi ya bụ na o ji “ezi ntụziaka” hazie ihe ndị ọ chọrọ ime, ya bụ, iji ndụmọdụ Baịbụl kpebie ihe ọ ga-eme. O mere ka ya na Jehova dịkwuo ná mma, o nyekwarala ọtụtụ ndị aka ịnata eziokwu.
“Ezi ntụziaka” dị ezigbo mkpa n’ezinụlọ. Ịzụ ụmụ bụ ọrụ a na-arụ ọtụtụ afọ. Ihe ndị nne na nna kpebiri ime n’ihe gbasara ofufe Chineke ma ọ bụ otú ha ga-esi na-egbo mkpa ezinụlọ ha nwere ike ịbara ndị ezinụlọ ha niile uru ma ọ bụ kpatara ha nsogbu n’ọdịnihu. (Ilu 22:6) Dị ka ihe atụ, nne na nna bụ́ Ndị Kraịst nwere ike ịjụ onwe ha, sị: ‘Okwu anyị na omume anyị ọ̀ na-akụziri ụmụ anyị na ha kwesịrị ịbịaru Jehova nso ka ha nwee ike imeri nsogbu ndị ha ga-enwe ma ha too? Ụdị ndụ anyị na-ebi ọ̀ na-enyere ha aka ịghọta na ihe ha nwere kwesịrị iju ha afọ nakwa na mkpa ha kwesịrị ịbụ ozi Chineke?’—1 Tim. 6:6-10, 18, 19.
Ọ bụghị akụ̀ ma ọ bụ ọkwá ndị ụwa na-achụkarị ka e ji amata onye ihe na-agaziri n’eziokwu. Eze Sọlọmọn ghọtara na ihe a bụ eziokwu. O dere n’ike mmụọ nsọ, sị: “Ọ ga-adịrị ndị na-atụ egwu ezi Chineke mma, n’ihi na ha tụrụ egwu ya.” (Ekli. 8:12) Ihe ahụ o kwuru gosiri na onye maara ihe na-achọ “ezi ntụziaka” nke si n’Okwu Chineke.—2 Tim. 3:16, 17.
[Foto dị na peeji nke 30]
A na-ese ndị na-akwọ ụgbọ mmiri ka ha buo ibu karịa ndị ọzọ na-arụ ọrụ n’ụgbọ mmiri iji gosi otú ọrụ ha si dị mkpa
[Ebe E Si Nweta Foto]
Su concessione del Ministero per i Beni e le Attività Culturali. E kwesịghị isi n’ụzọ ọ bụla ma ọ bụ jiri ihe ọ bụla seghachi ihe e sere n’ebe a.