Jọ Ohwo Owareghẹ Gwọlọ “Otoriẹ”

Uzuazọ nọ ma bi yeri o wọhọ ohwo nọ o bi bi okọ evaọ abade. Dede nọ ohwo-akpọ o wo areghẹ, areghẹ riẹ o te epanọ ọ sae rọ kpọ omobọ riẹ hẹ. Wọhọ odẹme, okọ u zue ahwo buobu no evaọ ẹkporo uzuazọ. (Ol. 107:23, 27) Fikieme ọtadhesẹ yena o ro fo?

Evaọ oke anwae, re a bi okọ evaọ abade o jọ bẹbẹ gaga, yọ o gwọlọ nọ obiokọ o re wo onaa ziezi. Ahwo nọ a bi okọ kri no a jẹ hai wuhrẹ amọfa onaa okọ-ubio. (Iruẹru 27:9-11) Evaọ iwoho oke anwae buobu, obiokọ ọ jẹ hae rro vi amọfa evaọ uwoho, onọ a jẹ hai ro dhesẹ nọ owha-iruo riẹ u wuzou gaga. Taure obiokọ kpobi ọ tẹ te ruọ abade, o re wuhrẹ kpahe isi, ofou, gbe eware efa nọ i re fi obọ họ kẹe bi okọ na. Ebaibol na ọ ta kpahe ibiokọ jọ nọ ‘e riẹ okọ ebi gaga,’ yọ ẹme nọ a ro dhesẹ ahwo nana o sai je wo otofa areghẹ.—Izik. 27:8.

Nẹnẹ, ahwo a be rẹriẹ ovao dhe ebẹbẹ ilogbo evaọ uzuazọ, wọhọ epanọ ibiokọ evaọ oke anwae a jẹ rẹriẹ ovao dhe ebẹbẹ evaọ abade. Eme ọ sai fi obọ họ k’omai?

ẸVẸ MA SAI RO WO “OTORIẸ”?

Nọ ma be rọ oriruo uzuazọ uyero dhesẹ okọ-ubio na, roro kpahe ẹme Ebaibol nana: ‘Ohwo owareghẹ o re yo ẹme, ọ vẹ tua areghẹ riẹ, ohwo nọ o wo otoriẹ o re wo ẹgba.’ (Itẹ 1:5, 6) Ẹme Hibru nọ a jọ etenẹ fa “otoriẹ” na o rẹ sai je dhesẹ oware nọ obiokọ ọ jẹ hai ru evaọ oke anwae. U dhesẹ epanọ a rẹ rọ onaa kpọ oware.

Dede nọ o gwọlọ omodawọ, ma rẹ sai wo “otoriẹ” nọ ma re ro bi okọ uzuazọ mai avọ obokparọ. Wọhọ epanọ obe Itẹ u dhesẹ, ma rẹ kuvẹ re “areghẹ” gbe “otoriẹ” e kpọ omai evaọ uzuazọ. (Itẹ 1:2-6; 2:1-9) Ma rẹ kuvẹ re Ọghẹnẹ ọ kpọ omai ẹsikpobi keme makọ irumuomu dede, u wo oware nọ o be kpọ iroro rai kpohọ eyoma oruo.—Itẹ 12:5.

Fikiere, o gwọlọ nọ ma rẹ romatotọ wuhrẹ Ẹme Ọghẹnẹ ẹsikpobi. Ma rẹ rọ ẹkwoma ere wuhrẹ obọdẹ eware kpahe Jihova gbe Jesu Kristi nọ o tho rie gaga na. (Jọn 14:9) Ma rẹ jọ iwuhrẹ ukoko wo obọdẹ uthubro. Ma rẹ sai je wuhrẹ no eware nọ amọfa gbe ọsẹgboni mai a rọ ẹro ruẹ no ze.—Itẹ 23:22.

RUẸRẸ OMA KPAHE KẸ EBẸBẸ NỌ E RẸ SAI TE OWHẸ

Nọ ẹkporo uzuazọ o te bi fi omai, ẹsiẹe ma mae gwọlọ “otoriẹ” hayo ọkpọvio. Nọ ma gbẹ riẹ oware nọ ma re ru evaọ oke ẹbẹbẹ hẹ, oma o rẹ sae lọhọ omai, yọ onana u re su kpohọ ebẹbẹ ilogbo efa.—Jem. 1:5, 6.

 A rẹ sae jẹ rọ ẹme na, “otoriẹ” dhesẹ oware nọ u wo obọ kugbe ẹmo-ofio. Ebaibol ọ ta nọ: “Ẹjiroro ohwo nọ o wo areghẹ who re ro fiẹmo ra, fiki ekiroro ibuobu a je wo obokparọ.”—Itẹ 20:18; 24:6.

Wọhọ epanọ ohwo nọ o wo onaa ziezi ọ rẹ ruẹrẹ ahwo kpahe kẹ ẹmo na, ere u fo nọ ma re fi ẹro h’otọ kẹ eware nọ e rẹ sae raha usu mai kugbe Jihova. (Itẹ 22:3) Wọhọ oriruo, whọ rẹ jiroro kẹ omara sọ whọ te rọwo nọ a tẹ k’owhẹ iruo efa hayo nọ a te go owhẹ kpehru evaọ oria iruo ra. Whọ sae romatotọ roro kpahe ugho nọ a te hwa owhẹ, oke nọ whọ te hae raha ro kpohọ iruo na je kpozi, gbe eware efa. Rekọ, u wo eware efa nọ who re roro kpahe: Kọ iruo na i mukpahe izi Ebaibol? Ẹvẹ oke nọ mẹ te raha kẹ iruo na u ti kpomahọ oke iwuhrẹ hayo usiuwoma ota?—Luk 14:28-30.

Oniọvo jọ nọ a re se Loretta, o je ru iruo evaọ oria nọ a jẹ jọ hwae emamọ osa. Nọ ekọmpene na ọ jẹ kwa kpohọ oria ofa, ọga-iruo na ọ tẹ ta kẹ Loretta nọ ọ gwọlọ fi ei họ ọkwa ologbo evaọ iruo na. Ọga-iruo na ọ ta kẹe nọ: “Whọ jọ uvẹ nana o vrẹ owhẹ hẹ. Ọgwa Uvie ọ tubẹ kẹle oria nọ ma be kwa kpohọ na.” Rekọ Loretta ọ gwọlọ ru uzuazọ riẹ lọhọ, ọ gwọlọ rọ uzuazọ riẹ kpobi gọ Jihova. Ọ ruẹ nọ ọkwa nọ a bi ti fi ei họ na o te kẹe uvẹ wo obọ ziezi evaọ iruo Uvie na ha. Fikiere, o te fi obe họ inọ ọ gwọlọ no iruo na, dede nọ ọga-iruo na ọ lẹlẹ ta kẹe nọ ọye họ oruiruo nọ ọ mae ghare ae obọ nọ a gwọlọ nọ a re siobọno vievie he. Loretta o ru iruo ọkobaro te ikpe udhe no enẹna, yọ u mu rie ẹro inọ “otoriẹ” gbe ehrẹ Ebaibol nọ o fihọ iruo i fi obọ họ kẹe nọ ọ rọ gbẹ rrọ iruo ọkobaro na rite inẹnẹ. O ru usu riẹ kugbe Jihova ga ziezi no, yọ o fi obọ họ kẹ ahwo buobu ziọ ukoko na no.

O gwọlọ nọ a re dhesẹ “otoriẹ” hayo orimuo evaọ uviuwou. Re a yọrọ emọ yọ owha-iruo nọ o rẹ rehọ oke lelehie, yọ oghẹrẹ nọ esẹgbini a bi ru evaọ egagọ Ọghẹnẹ gbe obọ okọ rai, o rẹ sai kpomahọ uviuwou na soso. (Itẹ 22:6) Esẹgbini nọ e rrọ ukoko na a rẹ sae nọ omarai nọ: ‘Kọ ma be rọ ẹkwoma ẹmeunu gbe uruemu mai wuhrẹ emọ mai inọ u fo re a se usu rai kugbe Ọghẹnẹ gboja, onọ u ti fi obọ họ kẹ ae yeri emamọ uzuazọ? Kọ uzuazọ nọ ma bi yeri u bi fi obọ họ kẹ emọ na wo edẹro kẹ umutho eware nọ a wo, jẹ be tẹrovi usiuwoma ota na?’—1 Tim. 6:6-10, 18, 19.

Orọnikọ ohwo o te wo efe gbe okpodẹ u re dhesẹ nọ ọ kparobọ no evaọ uzuazọ họ. Solomọn ovie na o vuhu onana mu. O kere nọ: “U reti woma kẹ enọ e rẹ dhozọ Ọghẹnẹ fiki epanọ a be dhozọ riẹ.” (Ọtausi. 8:12) Ẹme yena o gine dhesẹ nọ o rrọ oware areghẹ re ma gwọlọ “otoriẹ” nọ o rọwo kugbe Ẹme Ọghẹnẹ.—2 Tim. 3:16, 17.

[Uwoho nọ o rrọ ẹwẹ-obe avọ 30]

Obiokọ ọ jẹ hae rro vi amọfa evaọ uwoho, onọ a jẹ hai ro dhesẹ nọ owha-iruo riẹ u wuzou gaga

[Ọnọ o wo uwoho]

Su concessione del Ministero per i Beni e le Attività Culturali. Ajọ uvumọ ohwo ọ wariẹ rehọ uwoho nana evaọ oghẹrẹ ovo vievie he.