Ikala ne meji​—Ukebe ‘bulombodi bua meji’

Tudi mua kufuanyikija nsombelu wetu ne dienza luendu pa mâyi. Kadi, meji a bantu kaatu anu abambuluisha bua kupita bimpe ne ntatu ne kupeta disanka to. Nsombelu wa bantu ba bungi udi anu bu mazuwa adi madine mu mâyi manene bua tshipepele tshikole. (Mus. 107:23, 27) Bua tshinyi tudi mua kufuanyikija ntatu ya mu nsombelu ne ntatu idi bantu bapeta padibu benza luendu ne buatu?

Ku kale, kuenza luendu pa mâyi kuvua kulomba kumanya malu a bungi bua kuepuka ntatu. Bua kumanya mua kuenda ne mazuwa bimpe, bivua bikengela kulongela mudimu eu kudi bantu bakavua bawenze matuku a bungi anyi kudi muendeshi wa buatu. (Bien. 27:9-11) Bua kuleja mushinga uvua nawu muendeshi wa buatu, bazodi ba bungi ba kale bavua bamuzola munene kupita bakuabu bantu. Bua kuenda bimpe pa mâyi, bivua bikengela kulonga malu adi atangila mitoto, tshipepele ne makuabu malu. Bible udi wamba ne: bamue bendeshi ba matu bavua ne “meji.”​—Yeh. 27:8.

Tudi mua kufuanyikija ntatu itudi tupeta lelu ne ntatu ivua bendeshi ba mazuwa ba kale bapeta. Tshidi mua kutuambuluisha ntshinyi?

TUDI MUA KUPETA ‘BULOMBODI BUA MEJI’ MUSHINDU KAYI?

Ku diambuluisha dia tshilejilu tshia mudi nsombelu wetu mufuanangane ne kuenza luendu pa mâyi, tukonkonone bualu budi Bible wamba ebu: ‘Muntu wa meji neateleje ne neapete dishidimuka divule, ne muntu wa lungenyi ng’eu udi upeta bulombodi bua meji.’ (Nsu. 1:5, 6) Muaku wa mu tshiena-Ebelu udibu bakudimune ne: ‘bulombodi bua meji’ udi uleja malu avua muendeshi wa mazuwa wa kale wenza. Udi uleja kulombola ne kuludika bimpe.

Nansha mudibi bikengela kudienzeja, tudi mua kupeta ‘bulombodi bua meji’ ne kulonga mua kupita bimpe ne ntatu ya mu nsombelu. Anu mudi mukanda wa Nsumuinu uleja, tudi ne bua kulekela ‘meji,’ ‘dijingulula dia malu’ ne ‘busunguluji’ bienda pamue. (Nsu. 1:2-6; 2:1-9, NW) Katuena kabidi mua kulengulula bua kukeba bulombodi bua Nzambi to, bualu nansha bantu babi batu bamanye mua ‘kulombola’ malu bua kukumbaja bipatshila biabu bibi.​—Nsu. 12:5, NW.

Nunku, bidi bikengela tuikale tulonga Dîyi dia Nzambi ne tshisumi. Dilonga edi nedituambuluishe bua kumanya malu a mushinga adi atangila Yehowa ne Yezu Kristo udi tshimfuanyi tshiende tshilelela. (Yone 14:9) Tudi tupeta mibelu ya meji mu bisangilu bia bena Kristo. Tudi kabidi mua kulongela malu ku dimanya didi nadi bantu bakuabu nangananga baledi betu.​—Nsu. 23:22.

ELA MEJI KU TSHIUDI MUA KUENZA NE UDILONGOLOLE

“Bulombodi bua meji” budi nangananga ne mushinga patudi mu ntatu. Tuetu bikale ne dielakana mu nsombelu kampanda mukole, netupangile tshia kuenza ne bidi mua kutufikisha kubi.​—Yak. 1:5, 6.

 Muaku udibu bakudimune ne: ‘bulombodi bua meji’ badi kabidi benza nawu mudimu bua kuakula bua mvita. Bible udi wamba ne: ‘Pakupabu lungenyi lua kuenza [anyi bulombodi bua meji], neumanye mua kuluangana mvita; mu tshisumbu tshinene tshia bafidi ba meji mudi lupandu.’​—Nsu. 20:18; 24:6.

Anu bu mutu mfumu wa basalayi ulongolola mushindu wa kuluangana mvita, mbimpe tuetu petu tuikale tudianjila kuela meji ne tudilongolola ku malu onso adi mua kunyanga malanda etu ne Yehowa. (Nsu. 22:3) Tshilejilu, udi mua kujinga bua kuangata dipangadika dia kuitaba mudimu mupiamupia anyi kuitaba muanzu kampanda ku mudimu. Kakuyi mpata, udi mua kutangila malu bu mudi: difutu, dîba dia kuya ne kupingana ne malu makuabu. Kadi, kudi malu makuabu audi kuyi mua kupua muoyo. Tshilejilu, udi mua kudikonka ne: Mudimu eu udiku upetangana ne tshidi Bible wamba anyi? Mêba angikala mpitshisha ku mudimu eu neampangishaku bua kuenza midimu ya buena Kristo anyi?​—Luka 14:28-30.

Tshilejilu, Loretta udi Ntemu wa Yehowa uvua ne mudimu muimpe. Pavuabu bakeba kushintulula muaba uvua kumpanyi wabu, bakambila Loretta bua kumubandisha mianzu mu muaba mupiamupia uvuabu mua kuya. Bamfumu bende ba mudimu bakamuambila ne: “Edi ndiakalenga dinene diwikala kuyi mua kupeta kabidi to. Tudi bamanye ne: muaba utudi tuya au udi Nzubu wa Bukalenge.” Kadi, Loretta uvua musue kupepeja nsombelu wende bua kuenzela Mufuki wende mudimu wa bungi. Wakamona ne: mudimu mupiamupia au uvua mua kumupangisha dîba dia kuenza midimu mikuabu ya bena Kristo. Kadi, wakalekela mudimu au nansha muvua mfumuende mumuambile pa nkayende ne: yeye ke muena mudimu umue uvuabu basue bua kulama. Loretta udi mpindieu mpanda-njila wa pa tshibidilu kukadi bidimu bitue ku 20, ne mmutuishibue ne: malu mimpe adiye mupete mu mudimu wa buambi mmafumine ku dipangadika divuaye muangate dia kulonda ‘bulombodi bua meji,’ mmumue ne: mibelu ya mu Dîyi dia Nzambi. Wakakolesha malanda ende ne Yehowa ne wakapeta diakalenga dia kuambuluisha bantu ba bungi bua kuitaba bulelela.

‘Bulombodi bua meji’ budi ne mushinga mu dîku. Kukolesha bana mmudimu udi wangata matuku a bungi; nunku, tshidi baledi benza bua bana babu kuikala mu malanda mimpe ne Yehowa ne bua kubakebela bintu bia ku mubidi bidibu nabi dijinga netshibambuluishe mu nsombelu wabu mujima. (Nsu. 22:6) Tshilejilu, muledi muena Kristo udi mua kudiebeja ne: ‘Malu atudi tuamba ne tuenza adiku alongesha bana betu bua kusemena pabuipi ne Yehowa bua bamanye mua kupita bimpe ne ntatu ya mu nsombelu anyi? Nsombelu wetu udiku ubambuluisha bua kumvua ne: mbimpe kuikala ne nsombelu mupepele bua kudifila bikole mu mudimu wa Yehowa anyi?’​—1 Tim. 6:6-10, 18, 19.

Bintu bia ku mubidi anyi bipatshila bia mu nsombelu bidi bena mu bulongolodi ebu bakeba kabiena bipesha muntu disanka dilelela to. Mukalenge Solomo uvua pende mumanye bualu ebu. Wakamba ne: ‘Badi batshina Nzambi nebapete diakalengele ku mêsu kuende bua badi bamunemeka.’ (Muam. 8:12) Bualu ebu budi buleja mudibi ne mushinga bua kukeba ‘bulombodi bua meji’ mu Dîyi dia Nzambi.​—2 Tim. 3:16, 17.

[Tshimfuanyi mu dibeji 30]

Bua kuleja mushinga uvua nawu bendeshi ba matu, bazodi bavua babazola mu bunene kupita bantu bakuabu

[Mêyi a dianyisha]

Su concessione del Ministero per i Beni e le Attività Culturali. Mbikandikibue bua kupatula anyi kutentula foto eu mu mishindu kayi yonso.