Hlalefa—Tsoma “Tlhahlo e Bohlale”

Batho ba bantši ba swantšha bophelo le go sesa ka sekepe. Lega go le bjalo, bohlale bja batho gantši bo ipontšhitše bo palelwa ke go thuša batho go lebeletšana le mathata a bophelo ka katlego. Ba bantši ba ile ba palelwa ke go lebeletšana le mathata a magolo bophelong, ba swana le sekepe seo se robegilego ka lewatleng leo le nago le madimo. (Ps. 107:23, 27) Ke ka baka la’ng e le mo go swanetšego go swantšha mathata a bophelo le go sesa ka sekepe lewatleng le nago le madimo?

Mehleng ya bogologolo, go tšea leeto ka sekepe e be e le tlhohlo yeo e bego e nyaka gore motho a be le phihlelo. E be e le bokgoni bjoo motho a bego a ithuta bjona go basesiši ba kgale ba dikepe goba mohlomongwe go mosepediši wa sona. (Dit. 27:9-11) Diswantšho tše dintši tša bogologolo di gatelela karolo e bohlokwa ya mosepediši wa sekepe ka go mmontšha e le yo mogolo go feta ba bangwe. E le gore basepediši ba dikepe ba kgone go phatša lewatle, ba be ba swanetše go ithuta ka dinaledi, diphefo le dilo tše dingwe tšeo di ka ba šupetšago tsela. Beibele e hlalosa basepediši ba bangwe ba dikepe e le ba nago le “bokgoni,” gomme e šomiša lentšu leo le ka bolelago gore “bohlale.”—Hesek. 27:8.

Go phatša mathateng a bophelo lehono go ka bonagala go le boima bjalo ka go sesiša sekepe mehleng ya bogologolo. Ke’ng seo se ka re thušago?

RE KA HWETŠA BJANG “TLHAHLO E BOHLALE”?

Ge o dutše o naganišiša ka tshwantšhišo ya go bapetša bophelo le go sesa lewatleng, ela hloko therešo ya Beibele e rego: “Motho yo bohlale o tla theetša a hwetša thuto e ntši gomme yo a kwešišago o hwetša tlhahlo e bohlale.” (Die. 1:5, 6) Lentšu la Seheberu leo le fetoletšwego e le “tlhahlo e bohlale” le ka hlalosa boikarabelo bja molaodi wa sekepe sa mehleng ya bogologolo. Le bolela go hlahla le go laola ka bokgoni.

Le ge go nyakega boikgafo, re ka hwetša “tlhahlo e bohlale” gomme ra ithuta go “sesa” ka katlego lewatleng la bophelo. Ka ge puku ya Diema e bontšha, re swanetše go dumelela “bohlale,” “kwešišo” le “temogo” di šomišana. (Die. 1:2-6; 2:1-9) E bile re ka se tlogele go tsoma tlhahlo ya Modimo, ka gobane le ba kgopo ba ka tseba kamoo ba ka ‘hlahlago’ ditaba gore di feleletše ka bobe.—Die. 12:5.

Ka gona, go bohlokwa gore re be diithuti tše mafolofolo tša Lentšu la Modimo. Ka go dira seo, re tla ithuta dilo tše bohlokwahlokwa ka Jehofa le yoo a bontšhago gabotse dika tša Gagwe, Jesu Kriste. (Joh. 14:9) Re hwetša keletšo e bohlale dibokeng tša Bokriste. Go tlaleletša moo, re ka ithuta diphihlelong tša ba bangwe gaešita le tša batswadi ba rena.—Die. 23:22.

NAGANELA PELE E BILE O ITOKIŠE

“Tlhahlo e bohlale” e bohlokwa kudu ge e ba re ikhwetša re le lewatleng la seswantšhetšo la madimo. Ge e ba re sa kgonthišega ka seo re swanetšego go se dira boemong bjo thata, gona re ka ferekana gomme seo sa ba le ditlamorago tše kotsi.—Jak. 1:5, 6.

 Se se kgahlišago ke gore lentšu leo le fetoletšwego e le “tlhahlo e bohlale” gape le ka šomišwa ge go bolelwa ka ntwa. Re bala gore: “Ka tlhahlo e bohlale [“ka leano le bohlale,” The Revised English Bible] wena o tla lwa ntwa ya gago, gomme mo go lego baeletši ba bantši go na le phološo.”—Die. 20:18; 24:6.

Go swana le mothei wa leano la go fenya ntweng, re dira gabotse ge re naganela pele le go itokišeletša dilo tšeo di ka beago tswalano ya rena le Jehofa kotsing. (Die. 22:3) Ka mohlala, o ka swanelwa ke go kgetha ge e ba o tla amogela mošomo o mofsa goba go hlatlošwa mošomong. Ka tlwaelo, o tla naganela tšhelete yeo o tlago go e hwetša, nako ya go ya le go boa mošomong, le dilo tše dingwe. Lega go le bjalo, go na le dintlha tše dingwe tšeo o swanetšego go di gopola: Na mošomo wo o tla dumelelana le melao ya motheo ya Beibele? Go šoma mošomo woo matšatšing a mangwe go šongwago bošego go tla kgoma bjang mediro ya ka ya Bokriste?—Luka 14:28-30.

Loretta, e lego yo mongwe wa Dihlatse tša Jehofa, o be a na le mošomo o mobotse khamphaning ya go dira le go phuthela dijo. Ge khampani yeo e be e tlo hudugela lefelong le lengwe, Loretta o ile a holofetšwa go hlatlošetšwa maemong a bohlokwa khampaning yeo, gomme balaodi ba ile ba mmotša gore: “Ke mošomo wo o sa hwetšwego ke mang le mang. E bile re hweditše gore go na le Holo ya Mmušo gona moo.” Eupša Loretta o be a nyaka go bula sebaka bophelong bja gagwe gore a kgone go hlankela Mmopi ka mo go oketšegilego. O ile a lemoga gore mošomo wo o mofsa o be o tla tšea nako ya mediro ya Bokriste. Ka gona, o ile a tsenya lengwalo la go rola modiro, gaešita le ge molaodi a ile a mmotša sephiri sa gore ke yena feela ba bego ba nyaka go mo nea mošomo woo. Loretta, yo ga bjale a nago le nywaga e 20 a hlankela e le mmulamadibogo wa ka mehla, o kgodišegile gore meputso e mebotse yeo a e hweditšego e bile gona ka baka la go rulaganya ka “tlhahlo e bohlale,” ee, ka go latela seo se lego ka Lentšung la Modimo. O ile a tiiša tswalano ya gagwe le Jehofa gomme a ba le tokelo ya go thuša ba mmalwa go hwetša therešo ya Beibele.

Ruri go nyakega “tlhahlo e bohlale” ka lapeng. Go godiša bana go tšea nako, gomme diphetho tšeo di dirwago mabapi le dilo tša moya le tša nama di kgoma bokamoso bja bohle ka lapeng. (Die. 22:6) Ka mohlala, batswadi ba Bakriste ba ka ipotšiša gore: ‘Na re ruta bana ba rena gore ba godiše tswalano ya bona le Jehofa ka dipoledišano tša rena le mohlala wa rena, e le gore ba kgone go lebeletšana ka bohlale le mathata a bophelo ge ba godile? Na tsela ya rena ya bophelo e ba thuša gore ba kgone go kgotsofalela bophelo bjo bonolo gomme ba šetše kudu bodiredi bja bona bja Bokriste?’—1 Tim. 6:6-10, 18, 19.

Katlego ya kgonthe ga e bonwe ka dilo tšeo di fihleletšwego tša nama goba dilo tše tlwaelegilego tšeo batho ba lego lefaseng gantši ba di phegelelago. Kgoši Solomone o be a tseba se. O ile a budulelwa go ngwala gore: “Bao ba boifago Modimo wa therešo dilo di tla ba sepelela gabotse, ka ge ba be ba mmoifa.” (Mmo. 8:12) Seo se kgonthišetša gabotse meputso ya go tsoma “tlhahlo e bohlale” go tšwa Lentšung la Modimo.—2 Tim. 3:16, 17.

[Seswantšho go letlakala 30]

E le go gatelela karolo yeo ba e kgathago, basepediši ba dikepe ba be ba bontšhwa e le ba bagolo go feta ba bangwe

[Mothopo]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.