Magmaliw ya Marunong​—Anapey “Makabat a Simbawa”

Sa bilay et nikompara ed panagbiahe diad dayat. Balet ta apaneknekan lan limitadoy nagawaan na kakabatan na too pian nigiya iran matalona ed bilay. Dakel so singa barkon linmereg lapud saray mabagyon dinalan dad bilay. (Sal. 107:23, 27) Akin ya matukoy iyan panangikompara?

Nensaman, mairap so panagbiahe ed dayat tan kaukolay eksperiensyad satan. Sakey itan a dunong ya naaralan manlapud saray abayag lan marinero, a singa say kapitan na barko. (Gawa 27:9-11) Diad dakel iran daan ya painting, mas baleg so kapitan barko nen saray arum pian nidanet so kaimportantian na papel to. Pian makapanbiahe ed kadayatan, inaral na saray marinero iray bitewen, dagem, tan arum niran panandaan. Wala ray marinero ya deneskribe na Biblia ya “makabat.”​—Eze. 27:8.

Say pangarap ed saray problemad bilay natan et mair-irap, singa panagbiahed dayat nensaman. Antoy makatulong ed sikatayo?

PANON TAYON MAKAAWAT NA “MAKABAT A SIMBAWA”?

Legan tayon iisipen ya say bilay et singa panagbiahe diad dayat, imanoen iyan Makasulatan a katuaan: “Say sakey a marunong et ondengel tan mangawat na kaaruman a bangat, tan say toon makatalos et aawaten toy makabat a simbawa.” (Uli. 1:5, 6, NW) Say Hebreon salita ya impatalos ya “makabat a simbawa” et nayarin maneskribe ed gagawaen na kapitan na barko nensaman. Ipapatnag na satan so abilidad ya mangigiya a marundunong.

Tua ya mankaukolan itan na sagpot, balet ta sarag tayoy makaawat na “makabat a simbawa” tan naaralan tayoy matalonan “pambiahe” ed dayat na bilay. Singa ibabaga na Uliran, kaukolan ya niwalad sikatayo so “kakabatan,” “pakatalos,” tan “kalakal” [“abilidad a mannonot,” NW]. (Uli. 1:2-6; 2:1-9) Tan agtayo lilingwanan so onkerew na panangigiya na Dios, ta anggan saray mauges et wala met so giya da, balet ta mangipaarap ed panamalikdo.​—Uli. 12:5.

Importante sirin ya magmaliw tayon maseet ya estudyante na Salita na Dios. Diad ontan, naaralan tayoy mabmablin impormasyon nipaakar ed si Jehova tan samay sankaabigan ya mangipapatnag ed saray kualidad To, si Jesu-Kristo. (Juan 14:9) Makakaawat tayo na dakel ya makabat iran simbawa diad saray Kristianon pantitipon. Likud ed satan, makaaral tayod eksperiensya na arum, kaiba lay atateng tayo.​—Uli. 23:22.

ISIPEN IRAY POSIBLIN NAGAWA TAN MANPLANO

Nagkalalon importante so “makabat a simbawa” sano wala itayod singa madaluyon ya situasyon. No manduaruwa tayo no antoy gawaen tayo, ag-itan makatulong, ompan makapuy laingey resulta.​—Sant. 1:5, 6.

 Makapainteres, say salitan impatalos ya “makabat a simbawa” et inusar met a mikonektaan ed guerra. Oniay nabasa tayo: “Nakaukolan ni maong a pamplanom kasakbayan na pibakal mo, tan no panoy karakel na naalam a maong a simbawa ontan so kaasingger na panalom.” (Uli. 20:18; 24:6, Maung a Balita.) Say Hebreon salitan nipatalos ya “maong a pamplanom” ed sayan teksto et pareho ed Hebreon salita ya nipatalos ya “makabat a simbawa.”

Singa sakey ya maong a manplano na estratehiya ed guerra, maabig no isipen tayo ray nayarin mameligro ed espiritualidad tayo. (Uli. 22:3) Alimbawa, ompan kaukolan moy mandesidi no kasin awaten moy sakey a trabaho odino mas atagey a posisyon ed trabaho. Makatunongan labat ya ikonsideram no pigay sueldo, say kaarawi biahe paonlad trabaho, tan arum ni ra. Balet ta wala ni ray arum ya kaukolan ya isipen: Kasin sayan trabaho et mitunosan ed saray prinsipyo na Biblia? Panon ya makaapekto ed saray Kristianon aktibidad ko so eskedyul na trabaho?​—Luc. 14:28-30.

Si Loretta, sakey ed saray Tasi nen Jehova, et walay maong ya trabaho to. Nen iyalis ed sananey a lugar so kompanya, sikatoy inopresian na atagey a posisyon diad pasen ya alisan da. “Mataltalag ’yan pankanawnawa,” so imbaga na saray direktor. “Wala lay anengneng min Kingdom Hall diman.” Balet labay nen Loretta ya pasimplien so kabibilay to pian mas makapanlingkor ed Manamalsa. Naisip ton no awaten toy balon posisyon, daiset lay panaon tod saray Kristianon aktibidad. Kanian sikatoy nanresign, anggano inamin na sakey ed saray direktor ya sikato labat so empleyadon labay dan mansiansia. Natan et 20 taon lan regular payunir si Loretta, tan sikatoy kombinsido ya saray maabig a nansumpalan to et lapud inpamplano to base ed “makabat a simbawa,” on, mitunosan ed simbawa ya manlapud Salita na Dios. Pinabiskeg toy relasyon tod si Jehova tan awalaan na pribilehyon tulongan so pigara ya mangawat ed katuaan a walad Biblia.

Kakkaukolan met so “makabat a simbawa” diad pamilya. Aliwan basta-basta so pamabaleg ed saray anak, tan saray desisyon tayo nipaakar ed espiritual tan materyal et makaapekto ed arapen na amin ed pamilya. (Uli. 22:6) Singa bilang, nayarin itepet na saray ateng ed sarili da: ‘Diad panagsalita tan alimbawa mi, kasin ibabangat mi ray anak mi ya onapit ed si Jehova pian ontulong ed sikaran magmaliw a makabat diad itatken da? Kasin say paraan na panagbilay mi et makakatulong ed sikara pian natalosan da no panon so mankontento ed simplin bilay tan manpokus ed Kristianon ministeryo?’​—1 Tim. 6:6-10, 18, 19.

Say tuan itatalona et agnasukat ed materyal odino kipapasen ed bilay, a kaslakan ya pampupursigian na saray totoo ed mundo. Atalosan itan nen Arin Solomon. Sikatoy pinuyanan ya mangisulat: “Maong naani ed saray antakot ed Dios, ta antakot ira ed arap to.” (Ecl. 8:12) Papaneknekan na satan ya marunong so manaanap na “makabat a simbawa” a nibase tan mitunosan ed Salita na Dios.​—2 Tim. 3:16, 17.

[Litrato ed pahina 30]

Pian nidanet so kaimportantiay papel na managkontrol na barko, diad saray painting et mabetbet a sikatoy mas baleg nen say arum

[Credit Line]

Su concessione del Ministero per i Beni e le Attività Culturali. Isesebel so pangopya ed sayan litrato ed anggan anton paraan.