Yachaq kë ‘Musyaq këta’ ashi

Kawëtaqa igualatsiyashqa lamarpa viäjetawanmi. Llakikïpaqqa, nunapa yachaq kënin alläpa mana yanapashqa kaptinmi wakinkunaqa tsë viäjechö imëka undikaqnö kayashqa (Sal. 107:23, 27). ¿Imanirtaq kë igualatsikïqa rasumpa kaqllata rikätsikun?

Unë tiempochöqa, lamarpa barcowan viajëqa alli yachaq këpaqmi kaq. Tsëtaqa yachakuyaq unëna barcochö trabajaqkunata rikarmi, barcopa timonninta tsaraq nunapitanö (Hech. 27:9-11). Unë dibüjokunachöqa tsë nunatam wakinkunapitapis más jatunta dibujayaq más precisaq kanqanta rikätsikuyänampaq. Lamarpa más peligroso kaq sitiompa viajëta munaqqa, puntataqa yachakunan kaq vientokuna mëman pükanqanta, qoyllurkuna ima sitiochö këkanqan rikëta y mëchö këkayanqanta musyayänampaq imakunatapis rikëtam. Lamarpa pureq wakin nunakunapaqmi “musyaq” kayanqanta nin Bibliaqa y tsëpaqqa “yachaq” neq palabratam utilizan (Eze. 27:8; nota).

Kanan witsan kawënintsikchö problëmakunaqa unë tiempochö barcowan viajënö alläpa sasam o ajam. ¿Imaraq yanapamashwan tsë problëmakunata altsanapaq?

¿IMANÖTAQ “MUSYAQ KËMAN” TIKRASHWAN?

Lamarpa alläpa sasa viäjewan kawëta igualatsiyanqanman yarparnin yachakurishun Biblia kënö ninqampita: “Yachaq nunaqa wiyakurmi más yachakun, y entiendeq nunaqa consejayanqanta wiyakurmi más musyaq këman tikran” (Pro. 1:5, 6). ‘Musyaq kë’ nishqan hebreo idiömachö palabraqa, unë barcochö alläpa yachaq mandakoq nunamanmi pensatsimantsik. Tsë palabraqa alli yachëwan pushakoq këpaqmi parlan.

Alli kallpachakïpaq kaptimpis, llapantsikmi “musyaq këman” tikrëta y imëka lamarchönö këkar shumaq viajëta yachakïta puëdentsik. Proverbios libro ninqannömi, tsëta ruranapaqqa “yachëta”, “musyaq” këta y “tanteaq” këta katsinantsik (Pro. 1:2-6; 2:1-9). Jina manam qonqanantsiktsu Dios pushamänantsikpaq mañakïta, musyanqantsiknöpis mana alli nunakunapis munëninkunata rurayänanrëkurqa imatapis juknöpam tikraratsiyan (Pro. 12:5).

Tsëmi alläpa precisan Diospa Palabrampita imëpis yachakunantsik, tsënöllapam Jehoväpita y pë imanö kanqanta rikätsikoq Jesucristupita tukïta yachakushun (Juan 14:9). Jinamampis, reunionkunachömi kawënintsikchö yanapamaqnintsik consëjokunata chaskintsik. Jina yachakïta puëdentsikmi teytantsikpitawan mamantsikpita y wakin nunakuna pasayanqampitapis (Pro. 23:22).

ALLEQRAQ PENSË IMATA RURANËKIPAQPIS

‘Musyaq këqa’ alläpam precisan imëka laqcheqsaq yakupanö viajashqaqa. Sasa o aja problëmakunapa  pasarqa tukïman yarpachakunqantsikmi imata ruranatapis dejamashwantsu y tsënö kanqampitam tukï mana alliman jeqarkushwan (Sant. 1:5, 6).

Jina precisanmi ‘musyaq kë’ palabrata guërrakunapaq parlar utilizäyanqanta musyanantsik. Kënömi nin: “Musyaq këwan [o ‘sumaj yapachacuycur’] guërrachö pelyë, y atskaq consejakoqkunachöqa salvacionmi kan” (Pro. 20:18; 24:6, TDI).

Imanömi guërrachö peleëta yachaq nuna juk batällata imanö ruranampaq kaqta pensan, tsënöllam Jehoväpa kaqchö alli kënintsikta ushakätsita munaq cösaskunaman pensanantsik (Pro. 22:3). Këllaman yarpärishun, quizaschi yarpachakunëki juk trabäjota o cargota chaskinëkipaq kaqman, ëkata gananëkipaq kaqman, trabäjoman ëwanëkipaq y wayiman kutinëkipaq ëka tiempo kanampaq kaqman. Pero manam tsëllatsu, jina pensankimanchi Biblia ninqannö alli trabajo kanqanta o ëka hora o imë hora trabajanqëki Jehoväpaq rurënikichö yanapashunëkipaq kaqta o manapis (Luc. 14:28-30).

Loretta jutiyoq Jehoväpa testïgonmi alli trabäjoyoq karqan listollatana mikïta rantikoq emprësachö. Tsë empresa juk sitiomanna witikunan kaptinmi, tsë mushoq sitiochöna precisaq cargochö trabajanampaq niyarqan. Empresa rikaqkunam këta niyarqan: “Këtanöqa manam imëpis tarinkitsu. Jinamampis, musyapakayämurqönam tsë sitiochö Diospita Yachatsikuyänan Wayi kanqanta”. Pero pëqa Diosta más sirwinampaqmi tiempota munarqan, tsëmi cuentata qokurirqan tsë cargochö trabajarqa Jehoväpa kaqchö más rurëta mana puëdenampaq kaqta. Tsëmi, emprësachö juk mandakoq trabäjopita ëwakunanta mana munayanqanta nikaptimpis, Lorettaqa manana trabajanampaq neq cartata entreguëkur yarqukurirqan. Lorettaqa ishkë chunka watapanam precursöranö yanapakun, y ‘musyaq këwan’ o Diospa Palabran ninqannölla ruranqampita allilla yarqapakunqantam nin. Jehoväwan amigo këninqa masmi sinchiyashqa y atskaq nunakunatam Diospita yachakuyänampaq yanapashqa.

Jina ‘musyaq këtaqa’ necesitantsik familiata rikänapaqmi. Wamrakunata yachatsiqa manam juk ishkë watakunallatsu, y Jehoväpa kaqchö imata ruranantsikpaq o cösaskunata tarinapaq churapakanqantsikqa wayichö llapan kaqkunatam alliman o mana allimampis chätsinqa (Pro. 22:6). Teyta kaq cristiänokunaqa kënömi tapukuyanman: “Parlanqantsikwan y ruranqantsikwan, ¿wamrantsikkunata Jehoväpa kaqta yachëkätsintsikku poqurkur imatapis yachëwan rurayänampaq? ¿Imanöpis kawanqantsikwan yachëkätsintsikku kayäpunqanllawan kushishqa kawayänampaq y Jehoväpa kaqchö más yanapakuyänampaq?” (1 Tim. 6:6-10, 18, 19).

Rasumpa alli kawëqa manam nunakuna reqishqa o imëkayoq këta ashiyanqampitatsu. Tsëtam rey Salomonpis entienderqan y Diospa yanapakïninwanmi këta qellqarqan: “Cuentata qokömi rasumpa kaq Diosta mantsaqkuna alli kayänampaq kaqta, porque pëtam mantsayashqa” (Ecl. 8:12). Awmi, tsëmi rikätsimantsik Diospa Palabranchö ‘musyaq këta’ ashiqa más alli rurë kanqanta (2 Tim. 3:16, 17).

[30 kaq päginachö dibüju]

Barcopa timonninta tsaraq nuna más precisaq kanqanta rikätsikuyänampaqmi, wakinkunapitapis más jatunta dibujayaq

[Pikunapa kanqan]

Su concessione del Ministero per i Beni e le Attività Culturali. Kë dibüjotaqa manam imanöpapis copiayänmantsu ni juk publicacionkunachö jorqayanmantsu.