Yachayniyoq kay ‘Allin yuyaychasqa’ kayta maskhay

Lamar qochapi barcopi puriy hinan kawsayqa. Ichaqa, llakikunapaqmi kay pachaq yachaynin runakunata mana yanapayta atisqan, chhaynapin kawsayninkupi pisipanku (Sal. 107:23, 27). ¿Imaraykun kawsayta chhaynata rikch’anachikun?

Ñawpa tiempopiqa lamar qochapi barcota apanapaqqa allin yachayniyoqmi kana karqan. Chayllaraq barcota apaqpas hukkunapas allin experienciayoq kaqkunamantan yachaqku (Hech. 27:9-11). Ñawpa tiempo dibujokunapiqa barco apaqtan aswan hatunta dibujaqku, chaymi rikuchin aswan importante kasqanta. Lamar qochanta viajanankupaqqa ñawpaqtaraqmi yachananku karqan, wayrakunamanta, ch’askakunamanta hukkunamantapas. Biblian willan wakin barco apaqkuna ‘allin yachayniyoq’ kasqankuta (Eze. 27:8).

Kay tiempopi sasachakuykunapas, ñawpa tiempopi barcota sasa apay hinan. ¿Iman yanapawasunman?

¿IMAYNATAN ‘ALLIN YUYAYCHAYTA’ TARISUNMAN?

Lamar qochapi barcopi puriy hinataq kawsay chayqa, t’aqwisun Bibliaq kay yachachisqanta: “Yachayniyoqpas chaykunata uyarispaqa aswan yachayniyoqmi kanqa, yuyayniyoqpas aswan allin yuyaychasqan kanqa”, nispa (Pro. 1:5, 6). Hebreo simipi ‘allin yuyaychasqa’, nispa t’ikrakuq rimayqa, ñawpa tiempopi allin yuyaywan barcota apaqwanmi tupan. Chayqa allin yachaywan pusaymi.

Sasaña kanman chaypas, llapanchispas atisunmanmi ‘allin yuyaychasqa’ kayta, chhaynapin lamar qochapi puriyman rikch’akuq kawsaypa sasachakuyninkunata atipasun. Proverbios qelqaq nisqan hina, chaypaqqa ‘yachayta’ ‘entiendeyta’, ‘tanteayta’ otaq allin reparaq kaytawanmi necesitanchis (Pro. 1:2-6; 2:1-9). Chaymantapas manan qonqananchischu Diospa yanapaynin mañakuyta, ¿imarayku? Mana chanin runakunapas allintan yuyaykunku munasqankuta ruwanankupaq (Pro. 12:5).

Chhaynaqa, Bibliatan estudiananchis, chay hinapin allinta yachasunchis Jehová Diosmanta, payman rikch’akuq Churin Jesusmantapas (Juan 14:9). Huñunakuykunapipas allin yuyaychaykunatan chaskimunchis. Chaymantapas, allinninchispaqmi kanman huk runakunaq kawsayninmanta yachay, hinallataq tayta-mamanchismantapas (Pro. 23:22).

ÑAWPAQMANTARAQMI QHAWARINANCHIS

Kawsayninchispi sasachakuykuna kaqtinmi astawanqa ‘allin yuyaychasqa’ kayta necesitanchis.  Ima mana allinpipas tarikuspa iskayayqa manan allinninchispaqchu kanman (Sant. 1:5, 6).

Guerrakunata aparinankupaqmi utilizallaqkutaq ‘allin yuyaychasqa’ rimayta. Biblian nin: “Allintaraq yuyaykuspan awqa-tinkuymanqa rina, atipanapaqqa askha yuyaychaqkunawanmi yuyaychachikuna”, nispa (Pro. 20:18; 24:6).

Imaynan huk guerrata apariqqa ñawpaqmantaraq imayna atipananta qhawarin, chhaynallatataqmi Dios serviyninchispi mana allin kaqkunata atipanapaqpas ruwananchis (Pro. 22:3). Kaypi yuyaykuy, sichus huk llank’anata munachishasunkiku otaq aswan allin llank’ayman churayta munashasunkiku chayqa, qhawarinkichá hayk’ata paganasuykita, karupichus chay llank’ana kasqantapas. Ichaqa, qhawarinallaykitaqmi chay llank’ay Diospa kamachikuyninman hinachus kasqanta, hinallataq predicanaykita, huñunakuyman rinaykitapas hark’asunkichus chaytapas (Luc. 14:28-30).

Loretta sutiyoq cristianan mikhuna ruwaq empresapi llank’arqan. Chay empresa huk ladoman astakuqtinmi aswan pagasqa kananpaq munachirqanku. Nirqankun: “Khayna llank’aytaqa manan maypipas tarinkichu. Chaymantapas yacharamuykuñan maypi huñunakunaykipaq wasi kasqantapas”, nispa. Payqa repararqanmi chay llank’aywanqa Diosta servinanpaq pisi tiempoyoq kananta, astawanqa munarqan Diosta servinanpaq aswan tiempoyoq kaytan. Chayraykun chay empresapi umalliqña confiarqan paylla chay llank’aypaq allin kasqanta chaypas, lloqsipurqan. Loretta cristianaqa 20 watañan kashan precursora, ‘allin yuyaychasqa’ kaspa otaq Bibliapi tarikuq yanapayninkunaman hina ruwasqanraykun allinta kawsashan. Diosmanpas astawanmi asuykurqan, askha runakunatan cheqaq yachachikuyta munakunankupaqpas yanaparqan.

Familia kawsaypin necesitakullantaq ‘allin yuyaychasqa’ kayta. Wawakunata yachachiyqa manan chay ratollapaqchu, Diosta servinapaq otaq llank’anapaq imapas ruwasqanchisqa familiaq allinninpaq otaq mana allinninpaqmi kanman (Pro. 22:6). Cristiano tayta-mamakunan tapukunanku: “Rimasqaywan, ruwasqaywanpas, ¿wawaykunaq sonqonmanchu churashani Diospa yachachikuyninkunata, hatunyaqtinku chaykuna yanapananpaq? ¿Imayna kawsasqaywan rikuchinichu imachus necesitakusqallanwan kawsayta, chhaynapi astawan Diosta servinankupaq?”, nispa (1 Tim. 6:6-10, 18, 19).

Runakunaqa qolqeyoq kayta allin qhawarisqa kaytan maskhanku, ichaqa manan chaychu cheqaq kawsayqa. Rey Salomonmi kawsasqanpi chayta yacharqan, Diospa yuyaychasqanmi kayta qelqarqan: ‘Diosta manchakuqkunaqa yupaychaqkunaqa allillanpunin kanqaku’, nispa (Ecl. 8:12). Chaymi rikuchin, kawsayninchispi aswan allin ruwayqa, Diospa Simin Qelqaq yanapayninwan ‘allin yuyaychasqa’ kayta maskhaymi (2 Tim. 3:16, 17).

[30 paginapi dibujo]

Barco apaq aswan importante kasqanta rikuchinankupaqmi pintaqkunaqa aswan hatunta dibujaqku

[Fotota horqorqan]

Su concessione del Ministero per i Beni e le Attività Culturali. Kay dibujotaqa amapuni copiata horqonkichu.