Ia Atamai Saʻili i “le Taʻitaʻiga Atamai”

Ua faatusaina le olaga i se faigāmalaga. Peitaʻi, ua masani ona faamaonia le itiiti o le aogā o le atamai o le tagata, ina ia mafai ai ona folau ma le manuia i le olaga. O le toʻatele o tagata ua afātia i le tele o faafitauli o le olaga. (Sala. 107:23, 27) Aiseā ua talafeagai ai le faatusaina o faafitauli o le olaga, i se folauga i le sami sousou?

I aso anamua, e leʻi faigofie folauga i le vasa, o lea sa manaʻomia ai ona iai se tomai faapitoa. O lea tomai e masani lava ona aʻoaʻoina mai i tagata fōlau ua lava le poto masani, atonu o se tautai agavaa. (Galu. 27:9-11) Ua faaalia i le tele o ata mai i aso anamua, le tāua tele o le matafaioi a le tautai mata palapala, e ala lea i le tusi faatelē o lona ata nai lo o isi o le ʻauvaa. Ina ia mafai ona iloa e tagata fōlau le ala e ao ona uia i la latou faigāmalaga i le vasa, e latou te aʻoaʻoina le tomai e faatatau i le faaaogāina o fetu, le itu e agi mai ai le savili, ma isi lava mea e tapasāina ai la latou faigāmalaga. O loo faamatalaina nei tagata fōlau e le Tusi Paia, o ni ē e “atamamai.”—Eseki. 27:8.

E pei lava ona faigatā se fōlauga i le vasa i aso anamua, e faapena foʻi le matuā faigatā o faafitauli o le olaga i aso nei. O le ā e mafai ona fesoasoani iā i tatou?

E MAFAI FAAPEFEA ONA TATOU MAUAINA “LE TAʻITAʻIGA ATAMAI”?

Pe a mafaufau i le faatusatusaga lea na taʻua e faatatau i le olaga ua pei o se fōlauga, seʻi mātau lenei upu moni mai i le Tusi Paia: “O le tagata atamai e faalogo ma ave i fale faatonuga, ma o le tagata malamalama e na te mauaina le taʻitaʻiga atamai.” (Faata. 1:5, 6) O le upu Eperu ua faaliliuina i “le taʻitaʻiga atamai,” e mafai ona faamatalaina ai gaoioiga a se tautai o se vaa i aso anamua. E faasino atu i le tomai e taʻitaʻia ma faatonutonu lelei ai se mea.

E ui lava e manaʻomia ai ni taumafaiga, ae e mafai lava ona tatou maua “le taʻitaʻiga atamai,” ma aʻoaʻoina ina ia “fōlau” ma le manuia i lenei soifuaga. E pei ona faaalia i le tusi o Faataoto, e tatau ona ō faatasi le “atamai,” “malamalama,” ma le “tofā mamao.” (Faata. 1:2-6; 2:1-9) E lē tatau foʻi ona tatou tuulafoaʻia le saʻili atu i le taʻitaʻiga a le Atua, auā e oo lava i tagata amioleaga, atonu e latou te iloa foʻi ona ʻtaʻitaʻia’ i tatou i ala lē lelei.—Faata. 12:5.

O lea la, e tāua tele ona avea i tatou o ni ē e filigā e suʻesuʻe le Afioga a le Atua. O le faia faapea, e mafai ona tatou aʻoaʻoina ai ni faamatalaga tāua e faatatau iā Ieova, ma lē e sili ona faaatagiaina mai o Ia, o Iesu Keriso. (Ioa. 14:9) E tatou te mauaina le tele o fautuaga aogā i sauniga faa-Kerisiano. E mafai foʻi ona tatou aʻoaʻoina mai ni mea aogā mai i isi, e aofia ai o tatou mātua.—Faata. 23:22.

IA NOFOSAUNI MA FAIA FUAFUAGA

E sili atu ona tatou manaʻomia “le taʻitaʻiga atamai,” pe afai e tatou te afātia i tulaga matuā faigatā, o le fōlauga i lenei soifuaga. E mafai ona faavaivaia i tatou ma iʻu atu ai i ni iʻuga mataʻutia, pe afai e tatou te lē mautonu i le  gaoioiga e tatau ona fai, pe a tulaʻi mai se tulaga faigatā.—Iako. 1:5, 6.

O loo faaaogāina foʻi le faaupuga “le taʻitaʻiga atamai,” e faasino atu i faigātaua. Ua faapea mai le Tusi Paia: “O le taʻitaʻiga atamai e te faia ai lau taua, ma e iai le faaolataga i le toʻatele o faufautua.”—Faata. 20:18; 24:6.

I le pei o se tagata e iai le tomai i le fuafuaina o faigātaua, e tatau foʻi ona faia a tatou taumafaiga malolosi, ina ia nofosauni ai i ni lamatiaga e ono oo i lo tatou itu faaleagaga. (Faata. 22:3) O se faaaʻoaʻoga, atonu e tatau ona e faia se filifiliga pe e te taliaina se galuega fou ua ofoina mai, po o le siitia foʻi o le tulaga i le galuega. E te ono iloiloina lelei le totogi, le umi o le taimi e faimalaga atu ai ma toe foʻi mai le galuega, ma isi tulaga. Peitaʻi, e iai foʻi isi manatu e tatau ona mafaufau i ai: Pe e talafeagai lea ituaiga o galuega ma mataupu silisili o le Tusi Paia? E faapefea ona aafia ai aʻu gaoioiga faa-Kerisiano, ona o le uumi o taimi ou te faigaluega ai?—Luka 14:28-30.

Sa lelei le totogi sa maua e Loretta, o se Molimau a Ieova, i se kamupani. A o leʻi suia le nofoaga o le a siitia i ai le kamupani, sa ofoina atu iā Loretta se tulaga maualuga i le kamupani. Na faapea atu faauluuluga o le kamupani: “O se tasi nei o avanoa e lē aumaua. Aua e te popole, o loo iai se Maota mo Sauniga e latalata ifo i le nofoaga o le a iai le kamupani.” Peitaʻi, sa manaʻo Loretta e faafaigofie lona olaga, ina ia mafai ai ona faateleina lona taimi e auauna ai i Lē na foafoaina mea uma. Sa ia manatu o le a faaitiitia lona taimi mo gaoioiga faa-Kerisiano, ona o le tulaga fou ua ofoina mai i le galuega. O lea, na ia tuuina atu ai loa lana tusi faamavae, e ui lava sa faapea atu se tasi o taʻitaʻi, e na o ia lava le tagata faigaluega o loo manaʻomia moni lava e le kamupani, ina ia faigaluega pea. Pe ua tusa nei ma le 20 tausaga o paeonia sauatoa pea Loretta. Ua ia talitonu, ona o le faaōgatusa o fuafuaga o lona olaga ma “le taʻitaʻiga atamai,” po o fautuaga mai le Afioga a le Atua, ua ia mauaina ai ni iʻuga lelei. Ua faamalosia le la faiā ma Ieova, ma ua ia mauaina foʻi le faaeaga o le fesoasoani lea i isi tagata, ina ia taliaina aʻoaʻoga moni o le Tusi Paia.

E matuā manaʻomia lava “le taʻitaʻiga atamai” i totonu o aiga. O le tausiaina aʻe o fanau, o se tiute tauave e umi se taimi e faia ai. E aafia le lumanaʻi o le aiga atoa, ona o filifiliga e faia e mātua e tusa ai ma o latou manaʻoga faaleagaga, ma manaʻoga faaletino. (Faata. 22:6) O se faataʻitaʻiga, e ono fesili ifo mātua Kerisiano e faapea: ʻE ala i a ma faamatalaga ma faaaʻoaʻoga, pe faamata o ma aʻoaʻoina ai la ma fanau e faalatalata atu iā Ieova, ina ia fesoasoani iā i latou ina ia iloa le auala e taulimaina ai ma le atamai faafitauli e tulaʻi mai, pe a avea ma tagata matutua? Po o fesoasoani le auala o loo ma ola ai, ina ia latou malamalama ai, e maua le fiafia pe a faafaigofie o latou olaga, ma ia uaʻi atu i la latou faiva faa-Kerisiano?’—1 Timo. 6:6-10, 18, 19.

E lē faalagolago le taulau manuia moni i mea faaletino po o tulaga taualoa, lea e masani ona saʻilia e le toʻatele i le lalolagi. Na malamalama lelei le tupu o Solomona i lea tulaga. Na faagaeeina o ia ina ia tusi: “E iʻu ina manuia i latou e matataʻu i le Atua moni, auā ua latou matataʻu iā te ia.” (Fai. 8:12) Ua faamaonia mai i lenā manatu, le atamai o le saʻilia o “le taʻitaʻiga atamai,” lea e faavae aʻe ma ōgatusa ma le Afioga a le Atua.—2 Timo. 3:16, 17.

[Ata i le itulau 30]

Ina ia faamamafa le tāua tele o lo latou tulaga, e masani lava ona tusi faatelē le ata o le tautai nai lo o isi o le ʻauvaa

[Ē Ana le Ata]

Su concessione del Ministero per i Beni e le Attività Culturali. E lē faatagaina ona toe lomia pe toe faia se kopi o lenei ata.