Wan koni sma e suku „bun rai”

Sma agersi a libi son leisi nanga wan boto di e waka na se. Ma nofo tron libisma no koni nofo fu man tyari a boto disi na wan bun fasi. A libi fu furu sma de leki wan boto di sungu na ini wan krasi se (Ps. 107:23, 27). Fu san ede na agersitori disi fiti?

Na ini owruten, a no ben makriki fu tyari wan boto na se èn wan sma ben musu abi koni fu man du dati. Wan sma ben kan kisi a koni disi te a ben kisi leri fu wan botoman di sabi tyari boto (Tori 27:9-11). Na tapu furu prenki fu owruten, sma teken so wan botoman moro bigi leki den trawan fu sori o bigi a frantwortu fu en ben de. Fu man waka na se, den botoman ben musu sabi sani fu den stari, fu a fasi fa a winti e wai èn fu tra sani di ben kan yepi den sabi pe den de. Bijbel e taki dati sonwan fu den botoman ben de „koniman”.​—Esek. 27:8.

Den problema na ini a ten disi kan muilek neleki den problema di wan sma ben o miti na se na ini owruten. San kan yepi wi?

FA WI KAN FENI „BUN RAI”?

Prakseri na agersitori fu a libi di de leki wan boto na se, dan luku san Bijbel e taki: „Wan koni sma o arki èn a o wani teki moro leri. Wan sma di abi frustan o wani teki den bun rai di trawan e gi en” (Odo 1:5, 6). A Hebrew wortu di vertaal nanga „bun rai” wani taki fu teki fesi èn fu tiri na wan koni fasi. A wortu disi kan abi fu du nanga a wroko fu wan kapten fu wan sipi fu owruten.

Wi kan feni „bun rai” èn wi kan leri fu tyari wi libi na wan bun fasi, ma wi musu du muiti fu dati. A buku Odo e taki dati wi musu abi „koni” nanga „frustan” èn wi musu man „si a dipi fu wan tori” (Odo 1:2-6; 2:1-9). Ma moro de fanowdu, bika srefi den ogri sma „e gi trawan rai”, ma den e du dati fu kori den. Sobun, a prenspari taki wi suku rai na Gado.​—Odo 12:5.

Dati meki wi musu de fayafaya studenti fu Gado Wortu. Te wi e studeri Bijbel, dan wi o kon sabi prenspari sani fu Yehovah èn fu Yesus di ben de soifri leki en papa (Yoh. 14:9). Wi e kisi furu koni rai na den Kresten konmakandra. Boiti dati, wi kan leri tu fu den sani di tra sma soleki wi papa nanga mama, ondrofeni.​—Odo 23:22.

WI MUSU MAN SI SANI NA FESI ÈN WI MUSU SETI SANI NA FESI

„Bun rai” de fanowdu spesrutu te wi boto de na ini sekiwatra noso te wi abi problema na ini wi libi. Te wi no sabi san fu du na ini muilek situwâsi, dan a kan taki wi no wani teki wan bosroiti. Ma disi kan tyari takru bakapisi kon.​—Yak. 1:5, 6.

A moi fu si taki Bijbel e sori taki bun rai de fanowdu tu na ini feti. A e taki: „Koni rai o meki  yu feti wan bun feti èn furu raiman o tyari frulusu kon.”​—Odo 20:18; 24:6.

Na ini wan feti yu abi sabiman di e prakseri sortu problema a legre kan kisi èn san den kan du fu wai pasi gi dati. Na so wi musu prakseri tu sortu sani kan meki wi lasi wi matifasi nanga Yehovah èn fa wi kan wai pasi gi den sani dati (Odo 22:3). Fu eksempre, kande yu musu bosroiti efu yu musu teki wan nyun wroko, noso efu yu musu teki moro frantwortu na wrokope. A no de fu taki dati yu o prakseri fu sani soleki a moni di yu o kisi, o langa a o teki yu fu go na wrokope, èn o langa a o teki yu fu doro na oso baka. Ma yu musu prakseri den sani disi tu: A wroko disi e kruderi nanga Bijbel? Mi musu wroko shift? A de so taki a ten di mi o wroko, o meki taki mi no man du ala sani di wi leki Kresten musu du?​—Luk. 14:28-30.

Loretta na wan Kotoigi fu Yehovah di ben abi wan bun wroko na wan fabriki pe den e meki nyanyan sani. Di den ben o froisi a fabriki go na wan tra presi, den ben wani gi Loretta wan prenspari posisi. Den basi taigi en: „Noiti moro yu o kisi so wan moi okasi! Wi yere srefi taki wan Kownukondre zaal de na ini a birti drape.” Ma Loretta no ben wani gebroiki moro ten na wrokope. Na presi fu dati a ben wani wroko moro syatu fu man du moro gi en Mekiman. A ben frustan taki a nyun wroko ben o meki taki a no ben o abi so furu ten gi den sani di Kresten musu du. Dati meki a libi a wroko aladi a basi taigi en taki en na a wan-enkri wrokoman di a ben wani hori na wroko. Now Loretta e pionier sowan 20 yari kaba. A abi na overtoigi taki den blesi di a kisi na fu di a gebroiki den „bun rai” na ini Gado Wortu fu seti en libi. A tron wan moro bun mati fu Yehovah èn a kisi a grani fu yepi wan tu sma fu teki a tru bribi.

A no de fu taki dati „bun rai” de fanowdu na ini na osofamiri. A e teki furu ten fu kweki pikin. Papa nanga mama musu yepi den osofamiri fu tan krosibei na Yehovah èn den musu sorgu gi na osofamiri. Den bosroiti di den o teki na ini den tori disi o abi krakti tapu a heri osofamiri na ini a ten di e kon (Odo 22:6). Kresten papa nanga mama kan aksi densrefi: ’Wi e leri den pikin prenspari sani fu Bijbel di o yepi den fu teki koni bosroiti te den kon moro bigi? Wi e du dati nanga den sani di wi e taki èn nanga a fasi fa wi e tyari wisrefi? San den pikin e leri fu a fasi fa wi e libi? Den e leri taki wan sma no abi furu sani fanowdu fu man de koloku èn taki na anbegi fu wi na a moro prenspari sani?’​—1 Tim. 6:6-10, 18, 19.

Furu sma na grontapu e denki taki wan sma de koloku te a abi furu gudu èn te a abi wan hei posisi. Ma wi sabi taki disi no de so. Kownu Salomo ben frustan a sani disi. Gado meki a skrifi: „A o go bun nanga den sma di abi lespeki gi a tru Gado, fu di den ben e lespeki en” (Preik. 8:12). Disi e sori krin taki a de wan koni sani fu suku „bun rai” di e komoto fu Gado Wortu èn di e kruderi nanga Gado Wortu.​—2 Tim. 3:16, 17.

[Prenki na tapu bladzijde 30]

Sma ben e teken a botoman di ben e tyari a boto, moro bigi leki den trawan fu sori o bigi a frantwortu fu en ben de

[Sma di abi a reti fu a prenki]

Su concessione del Ministero per i Beni e le Attività Culturali. Nowan sma abi primisi fu teki a prenki disi abra na nowan fasi.