Sai matenek hodi buka “matadalan neʼebé loos”

Ita bele kompara ita-nia moris ho viajen iha ró. Maibé, tanba ema nia matenek la toʼo atu halaʼo sira-nia moris ho susesu, ema barak sente katak sira-nia moris hanesan ró neʼebé sai rahun iha tasi neʼebé fuik. (Sal 107:23, 27) Tanbasá mak ita bele kompara ita-nia moris ho viajen iha ró?

Iha tempu antigu, atu halo viajen liuhusi tasi mak buat neʼebé susar no presiza esperiénsia. Ema bele hetan esperiénsia neʼe hodi aprende husi ema neʼebé iha esperiénsia barak ona atu kaer ró. (Apos 27:9-11) Iha tempu antigu, ema pinta ema neʼebé kaer ró ho isin boot liu fali ema seluk iha ró atu hatudu katak ninia serbisu mak importante liu. Atu bele halo viajen liuhusi tasi neʼebé luan, ema neʼebé kaer ró presiza estuda kona-ba fitun, anin, no buat seluk tan. Bíblia koʼalia kona-ba ema neʼebé kaer ró nuʼudar ema “matenek”.—Eze 27:8.

Problema sira neʼebé ita hasoru iha ita-nia moris ohin loron bele halo ita sente hanesan saʼe ró iha tempu antigu neʼebé hasoru laloran boot iha tasi fuik. Entaun, saida mak bele ajuda ita?

OINSÁ HETAN “MATADALAN NEʼEBÉ LOOS”?

Tanba ita-nia moris hanesan halo viajen iha ró, diʼak atu hanoin kona-ba Bíblia nia liafuan tuirmai neʼe: “Ema matenek sei rona no sei simu hanorin liután, no ema neʼebé matenek sei buka matadalan neʼebé loos.” (Prov 1:5, 6) Liafuan ebraiku neʼebé tradús nuʼudar “matadalan neʼebé loos” hatudu kona-ba buat neʼebé ró nia kapitaun halo. Ida-neʼe koʼalia mós kona-ba kbiit atu dirije no hatudu dalan ho matenek.

Maski ita presiza hakaʼas an, maibé ita bele hetan “matadalan neʼebé loos” no hatene oinsá atu hetan susesu iha ita-nia moris. Hanesan livru Provérbios hatete, ita presiza matenek atu bele hetan susesu. (Prov 1:2-6; 2:1-9) Liután neʼe, tanba ema aat sira mós iha “matadalan” neʼebé lori ba aat, ita presiza duni atu buka Maromak nia matadalan.—Prov 12:5.

Entaun, importante tebes atu badinas estuda Maromak nia Liafuan. Hodi estuda, ita bele hatene liután kona-ba Jeová no Jesus Kristu neʼebé haleno Maromak nia hahalok iha dalan neʼebé diʼak liu. (Joao 14:9) Iha reuniaun sira, ita simu konsellu matenek barak. Liután neʼe, ita bele aprende husi ema seluk, inklui mós ita-nia inan-aman.—Prov 23:22.

HANOIN ULUK

Se ita hasoru problema ruma, ita presiza buka duni “matadalan neʼebé loos”. Se ita laran-namlele atu halo desizaun kuandu hasoru situasaun susar, ida-neʼe bele lori rezultadu neʼebé la diʼak.—Tgo 1:5, 6.

Liafuan ebraiku neʼebé tradús nuʼudar “matadalan neʼebé loos”, mós bele uza atu koʼalia kona-ba  funu. Bíblia hatete: “Ho matadalan neʼebé loos, [“ho planu neʼebé matenek”, The Revised English Bible] ó sei halaʼo ó-nia funu, no iha salvasaun kuandu ema barak mak fó konsellu.”—Prov 20:18; 24:6.

Hanesan ema halo planu atu halo funu, ita mós presiza hanoin uluk no prepara nanis antes atu hasoru situasaun neʼebé bele estraga ita-nia relasaun ho Jeová. (Prov 22:3) Porezemplu, karik ita presiza halo desizaun atu simu ka la simu serbisu foun ka pozisaun foun iha ita-nia serbisu. Klaru katak antes halo ida-neʼe ita sei hanoin kona-ba osan neʼebé ita sei hetan, tempu atu bá no fila husi serbisu, no buat seluk tan. Maibé, iha buat seluk neʼebé ita mós presiza hanoin didiʼak: ‘Serbisu neʼe tuir Bíblia nia matadalan ka lae? Oinsá mak oras serbisu nian kona haʼu-nia atividade kristaun nian?’—Lc 14:28-30.

Irmán ida naran Lorreta, uluk nia iha serbisu diʼak iha kompañia atu prepara ai-han. Kuandu kompañia neʼe muda ba fatin seluk, patraun fó pozisaun neʼebé importante ba Loretta iha fatin foun neʼe. Patraun dehan ba nia: “Ó sei nunka atu hetan fali oportunidade hanesan neʼe. Liután neʼe, ami hetan ona Reuniaun-Fatin iha neʼebá.” Maibé, Loretta hakarak halo ninia moris simples liu atu bele serbí Jeová tempu barak liután. Nia hatene katak ninia pozisaun foun sei la fó nia tempu barak atu halo ninia atividade kristaun. Tan neʼe, maski ninia patraun koʼalia ba nia katak nia mesak deʼit mak serbisu-naʼin neʼebé patraun sei la husik, maibé Lorreta hatama karta atu husu hodi para serbisu. Loretta, neʼebé serbí ona nuʼudar pioneiru ba tinan 20, nia fiar katak nia hetan rezultadu diʼak tanba nia hanoin uluk kona-ba “matadalan neʼebé loos” no halo tuir konsellu husi Maromak nia Liafuan. Nuneʼe, nia hametin ninia relasaun ho Jeová no iha oportunidade espesiál atu ajuda ema seluk atu hatene lia-loos husi Bíblia.

Família sira mós presiza duni “matadalan neʼebé loos”. Tanba haboot oan mak serbisu neʼebé presiza tinan barak, no desizaun neʼebé inan-aman halo kona-ba tau matan ba sira-nia família iha dalan espirituál no kona-ba buka buat neʼebé sira presiza iha sira-nia moris, ida-neʼe bele kona ema ida-idak iha família laran nia futuru. (Prov 22:6) Porezemplu, inan-aman kristaun presiza husu ba sira-nia an: ‘Liuhusi ami-nia koʼalia no ezemplu, ami hanorin ami-nia oan atu hakbesik liu ba Jeová atu nuneʼe sira bele hetan susesu iha sira-nia moris kuandu sira sai boot ka lae? Dalan neʼebé ami halaʼo ami-nia moris loroloron nian ajuda oan sira atu kontente ho moris neʼebé simples no tau uluk serbisu haklaken ka lae?’—1 Tim 6:6-10, 18, 19.

Tuir loloos, susesu la depende ba rikusoin ka pozisaun aas neʼebé ema barak iha mundu neʼe buka atu hetan. Liurai Salomão komprende kona-ba neʼe. Nia hakerek: “Ema neʼebé taʼuk ba Maromak sei hetan buat diʼak, tanba sira taʼuk ba Maromak.” (Ecle 8:12) Ida-neʼe hatudu ho klaru katak matenek duni atu buka “matadalan neʼebé loos” neʼebé mai husi Maromak nia Liafuan.—2 Tim 3:16, 17.

[Dezeñu iha pájina 30]

Ema pinta ema neʼebé kaer ró ho isin boot liu fali ema seluk atu hatudu katak ninia serbisu mak importante liu

[Credit Line]

Su concessione del Ministero per i Beni e le Attività Culturali. Labele kopia dezeñu neʼe iha dalan naran deʼit.