Lu Orfankwagh Ker u Lun a “Mbamhen Mba Mimi”

Uma wase ngu er zende u shin tso nahan. Nahan kpa, akaa kpishi a ka a shi tseren ior ken uma la tese ér mfe u uumace ve lu a mi la yina u kôôm ior sha er uma ve una doo yô. Ior kpishi tagher a mbamzeyol mba lun er ijeverahumbe nahan, kwagh ne na yô, tso ur a ve ken uma. (Ps. 107:23, 27) Er nan ve i doo u karen mbamzeyol mba se tagher a mi ken uma la sha mbamtaver mba ken zende u shin tsoo?

Sha ayange a tsuaa la, zende u shin tso lu ican kpishi, nahan i gba u saa or a fa tso u nahan tsema tsema ve nana kôrcio u zan zende shin tso ye. Ior yange ve hen tso u nahan sha ikyev i mbatsoov mba ve tse ken tom la yô, er or u kôôm tso nahan. (Aer. 27:9-11) Ior mba kperan ufoto mba tsoo mba sha ayange a tsuaa la kpishi yange ve kpera or u nahan tso nan hemba kehen a mbagenev shin tso cii, sha u tesen er tom u nan la u lu hange hange yô. Cii man mbatsoov ve mough zende a tso shin zegemnger yô, yange ve vande tôvon fan mlu u asan man ahumbe kua akaa agen a nengen akav a mi. Bibilo ôr kwagh u mbatsoov mbagenev ér ka “mbafankwagh” shin mbafantom.—Esek. 27:8.

U nôngon a mbamzeyol mba uma la una fatyô u van se a mtumeyol nyian, vough er zende u shin tso sha ayange a tsuaa la nahan. Nahan se wa ishima a ve nena?

SE ER NAN VE SE LU A “MBAMHEN MBA MIMI”?

Bibilo kaa ér: “Orfankwagh nana̱ ungwa nana̱ seer mhen, orkavenkwagh kpaa nana̱ ar sha mbamhen mba mimi.” (Anz. 1:5, 6) Alaghga yange i ter ishember i ken zwa Heberu i i gem i ér “ar sha mbamhen mba mimi” la, zum u i lu ôron kwagh u kôôm tso yô. Man inja i ishember ne ér u kôôm kwagh zan a mi sha gbenda u vough.

Se fatyô u aren sha “mbamhen mba mimi,” nahan kôôm uuma asev sha er se nôngo a mbamzeyol mba uma tsembelee, shin er i gbe u se nôngo kwagh kpoghuloo ve se kôrcio u eren kwagh ne nahan kpaa. Er i pase ken Anzaakaa nahan, gba u se de ser “kwaghfan” wase man “mfe” wase man “mkav” wase ve er tom imôngo. (Anz. 1:2-6; 2:1-9) Shi gba u mayange se haa iyol inya u keren kwaghwan hen Aôndo ga, gadia mbaaferev je kpa ashighe agen ka ve ker “mbamhen” mba vea wase ve u za eren anyighe yô.—Anz. 12:5.

Sha nahan yô, ka hange hange u se timen ken Mkaanem ma Aôndo sha gbashima. Imba kwaghhenen ne ia na se zua a mfe u injaa sha kwagh u Yehova man Yesu Kristu, un u a bee Yehova vindi vindi la. (Yoh. 14:9) Ka se zua a akaawan a injaa kpishi ken mbamkombo mba Mbakristu. Heela tseegh ga, se fatyô u henen kwagh ken akaa a a vande eren mbagenev ken uma la, kua mbamaren asev kpaa.—Anz. 23:22.

TSENGA HENEN KWAGH U UNA FATYÔ U EREN LA SHI WA AGO IYOL

Shighe u i hembe lun hange hange u se lu a “mbamhen mba mimi” yô, ka shighe u se nyer ken mbamzeyol  la. Aluer se hingir ta ta ta shighe u se nyer ken mlu u taver yô, se fatyô u zuan a ku je kpaa.—Yak. 1:5, 6.

Bibilo ôr kwagh u ishember i i gem ér “mbamhen mba mimi” shin “mhen u sha mfe” la sha kwagh u ityav mbi nôngon kpaa. I̱ nger ér “Ka sha mhen u sha mfe man ú nôngo ityav you ye, man sha mhen u mbawasenmhen imôngo yô, mwar ngu.”—Anz. 20:18; 24:6.

Er kurutya ka nan wa iyol i utya nahan, doo u se tsenga henen sha kwagh u una fatyô u vihin mlu wase vea Yehova la, shi se wa ago iyol u nôngon a mi kpaa. (Anz. 22:3) U tesen ikyav yô, alaghga a gba u ú tsua u lumun u eren ma tom shin vendan, shin ma iantom i i seer we sha ijiirtom you yô. A gba u ú gbidye kwar sha inyaregh ki a kimbin we la, man shighe u yaren tom shi kurun, kua akaa agen kpaa. Nahan cii kpa, akaa agen kpa nga a i gbe u ú fa yô: Tom shon zua sha atindiakaa a ken Bibilo kpa? Ashighe a u lu eren tom shon la aa bende a shighe wou u eren ityom i Mbakristu laa?—Luka 14:28-30.

Kwaseshiada ugen yange eren tom hen kômpeni u eren akaayan, mba yer un ér Loretta. Er va gba u a mough a kômpeni la a yem a mi ijiir igen yô, i na Loretta iantom i vesen hen jiir i he ne. Mbavesen mba kômpeni ne kaa a na ér: “Ior mba tômon a tôm u lun sha iantom i i ne u ne, nahan de vende ga. Iyou i Tartor kpa ngi hen ijiir ne.” Kpa Loretta soo u eren akaa ken uma na akuma akuma, sha er una hemba lun a ian i eren Yehova tom yô. Yange nenge ér iantom i he ne ia na un ian i eren ityom i ken mcivir u Yehova kpishi ga. Nahan a na washika u den tom, shin er orvesen na ugen hen kômpeni la pase un awashima u kômpeni la wang ér ka un je i hembe soon ér a za hemen u eren tom hen kômpeni la nahan kpaa. Loretta er tom u pania u keke kuma anyom 20 hegen, shi a na jighjigh ér, ka er yange un lu a “mbamhen mba mimi,” sha u dondon kwaghwan u ken Mkaanem ma Aôndo ve, un tsua kwagh u van un a mtsera ne ye. Kwagh ne wase un hemba ngun kôôsôô a Yehova, shi a wase ior kpishi ve fa mimi u ken Bibilo.

Hen tsombor kpa, gba u a lu a “mbamhen mba mimi.” Ka i tôô shighe gôgônan u yesen mbayev, shi kwagh u mbamaren ve tsough u eren sha kwagh u mcivir u Yehova man tom u eren la ka a bende a mlu u ken hemen u hanmaor hen tsombor. (Anz. 22:6) U tesen ikyav yô, mbamaren mba ve lu Mbakristu vea fatyô u pinen ayol a ve ér: ‘Iliam yase man ieren yase ngi tesen mbayev asev u kporom ikyua a Yehova sha er vea fa u nôngon a mbamtaver shighe u ve we akondo la kpa? Ieren yase ngi wasen ve u fan er vea eren akaa ken uma ve akuma a kuma shi hemban veren ishima sha u eren tom u pasen kwagh kpa?’—1 Tim. 6:6-10, 18, 19.

Ka akaa a iyolough shin ityom i taregh i ior mba ken tar ka ve shi keren la i tesen ér or ngu zan ikyura ga. Tor Solomon yange fa kwagh ne doo doo. Jijingi u Aôndo yange mgbegha un nger ér: “Mba ve cie Aôndo yô, vea tema doo doo, gadia ve cia Un.” (Orpa. 8:12) Kwagh ne tese wang je ér, u keren u lun a “mbamhen mba mimi” la ka ieren i sha kwaghfan, i̱ i̱ zough sha Mkaanem ma Aôndo yô.—2 Tim. 3:16, 17.

[Foto u sha peeji 30 la]

Ashighe kpishi yange i kpera or u nahan tso nan hemba kehen a mbagenev shin tso cii, sha u tesen er tom u nan la u lu hange hange yô

[Ngeren u pasen orngeren]

Su concessione del Ministero per i Beni e le Attività Culturali. I na ma or ian i hiden eren foto ne sha ma gbenda ga.