Amube Basongo Kamulijanina ‘Lulayo Lwamaano’

Buumi bukozyanisyigwa alweendo lulamfwu lwamulwizi. Nikuba boobo, busongo bwabantu bwatondezya kuti tabukonzyi kugwasya bantu kuti bazwidilile mulweendo lwamubuumi. Banji baloba mbuli bwato akaambo kamapenzi aamubuumi. (Int. 107:23, 27) Nkaambo nzi cikozyanyo eeci ncoceelela?

Kaindi, lweendo lwamulwizi lwakali kukatazya alimwi kwakali kuyandika luzyibo. Wakali mulimo iwakali kuyiigwa kuzwa kubantu ibakacibwene kweenzya mato. (Mil. 27:9-11) Zifwanikiso zinji zyakaindi zilatondezya mbouyandika mulimo wasikweenzya bwato kwiinda muzifwoto zitondezya nguwe kaboneka amubili mupati kwiinda bamwi. Kutegwa bacikonzye kweenda mulwizi, bantu babeleka mubwato bakali kwiiya kujatikizya nyenyezi, muuwo alimwi ambazu zimwi ziyandika. Bbaibbele lipandulula basikweenzya mato bamwi kuti ‘balicenjede,’ libelesya bbala likonzya kupandulula “busongo.”—Ezk. 27:8.

Mapenzi aamubuumi mazuba aano alakonzya kuboneka mbuli mapenzi aamulweendo lwamulwizi ciindi cakaindi. Ncinzi cikonzya kutugwasya?

MBUTI MBOTUKONZYA KUJANA ‘LULAYO LWAMAANO’?

Katuyeeyede cikozyanyo cabuumi kuti buli mbuli lweendo lwamulwizi, atulange-lange kasimpe kamu Bbaibbele kakuti: “Musongo aswiilile akuliyungizizya lwiiyo, asimaanu alijanine lulayo.” (Tus. 1:5, 6) Mabala aaci Hebrayo aamba ‘lulayo lwamaano’ alakonzya kupandulula micito yamupati wamubwato kaindi. Eeci caamba kucikonzya kusololela camaano.

Nikuba kuti kuyandika kusolekesya, tulakonzya kujana ‘lulayo lwamaano’ akwiiya kweenda mubuumi kutegwa tuzwidilile. Mbubwenya mbuli lugwalo lwa Tusimpi mbolutondezya, tweelede kulekela “busongo,” “kumvwisya” alimwi “akucenjela” kuti zibelekele antoomwe. (Tus. 1:2-6; 2:1-9) Alimwi tatweelede kuleka kuyandaula busolozi bwa Leza, nkaambo nibaba basizibi balakonzya kuyeeya mbobakonzya kuba “[a]makanze” kutegwa bacite milimo yalweeno.—Tus. 12:5.

Aboobo, cilayandika kuti tube basikwiiya ba Jwi lya Leza basungu. Kwiinda mulwiiyo luli boobo, tulakonzya kujana makani aayandika aajatikizya Jehova alimwi ayooyo wiinda kumwiiya, Jesu Kristo. (Joh. 14:9) Tulatambula lulayo lunji lwabusongo kumiswaangano ya Bunakristo. Kuyungizya waawo, tulakonzya kwiiya kuzyintu zyakacitikila bamwi kubikkilizya abazyali besu.—Tus. 23:22.

AMULANGILE AKUYEEYA

‘Lulayo lwamaano’ lulayandika kapati ciindi nituli mumapenzi. Kudooneka kujatikizya ncotweelede kucita mubukkale bukatazya kulakonzya kutumana nguzu akutuletela mapenzi mapati.—Jak. 1:5, 6.

 Cikkomanisya ncakuti, mabala aakuti ‘lulayo lwamaano’ alakonzya kubelesyegwa kunkondo. Tubala kuti: ‘Lulayo lwamaano lulayandwa mukucita inkondo alimwi muli basinkuta banji molujanwa lufutuko.’—Tus. 20:18; 24:6.

Mbuli syaazibwene uulibambila nkondo, tweelede kuzilangila ntenda zikonzya kutunyonganya kumuuya. (Tus. 22:3) Mucikozyanyo, mulakonzya kusala kuzumina mulimo mupya naa kusumpulwa amulimo. Mulakonzya kuyeeya mali ngomunoovwola, ciindi cakweenda kuunka akupiluka kumulimo alimwi atwaambo tumwi. Nikuba boobo, kuli twaambo tumwi tweelede kubikkilwa maano: Sena musyobo wamulimo uleendelana anjiisyo zyamu Bbaibbele? Mbuti ciindi, mbuli kucinca-cinca ciindi cakubeleka mbokukonzya kujatikizya milimo yangu ya Bunakristo?—Lk. 14:28-30.

Ba Loretta, Bakamboni ba Jehova, bakalijisi mulimo mubotu mukkampani ibamba zyakulya. Ciindi kkampani niyakajana busena bumbi bwakubelekela, ba Loretta bakapegwa cuuno caatala kubusena bupya. Basikubalemba mulimo bakabaambila kuti: “Ncoolwe citabonwi-bonwi. Twakalanga-langa kale akujana kuti kuli Ŋanda ya Bwami okuya.” Pele ba Loretta bakali kuyanda kuti baubye-ubye buumi bwabo kutegwa babelekele Mulengi kakunyina kunyonganizyigwa. Bakabona kuti mulimo mupya ulabamanina ciindi cakucita milimo ya Bunakristo. Aboobo, bakalemba lugwalo lwakuleka mulimo, nikuba kuti sikubalemba mulimo wakabaambide kuti kkampani yakali kuyanda buyo mbabo balikke kuti bazumanane kubeleka. Ba Loretta, balo ibali kubeleka kabali bapainiya baciindi coonse kwamyaka iibalilwa ku 20, balisinizyide kuti bubotu mbobakajana bwakaboola akaambo kakuyeeya ‘lulayo lwamaano,’ lulayo lujanwa mu Jwi lya Leza. Bakayumya cilongwe cabo a Jehova alimwi bajana coolwe cakugwasya bantu banji kutambula kasimpe kamu Bbaibbele.

‘Lulayo lwamaano’ lulayandika mumukwasyi. Kukomezya bana mulimo uutola ciindi cilamfwu, alimwi zyintu zyakumuuya naa zyakumubili zisalwa zilabujatikizya buumi bwakumbele bwa banamukwasyi boonse. (Tus. 22:6) Mucikozyanyo, bazyali Banakristo balakonzya kulibuzya kuti: ‘Kwiinda mumibandi yesu alimwi acikozyanyo, sena bana besu tulabayiisya zyintu zyakumuuya zyalo zikonzya kubagwasya kuliyumya baakukomena? Sena buumi mbotupona bulabagwasya kumvwisya mbociyandika kukkutila kwiinda mukupona buumi buuba-uba akubikkila maano kumulimo wabo wa Bunakristo?’—1 Ti. 6:6-10, 18, 19.

Kuzwidilila kwini-kwini takujanwi kwiinda muzyintu zyakumubili naa mbaakani nzyobalibikkila bantu bamunyika. Mwami Solomoni wakali kucimvwisya eeci. Wakasololelwa amuuya kulemba kuti: “Ndizi kuti bayoowa Leza bayooba kabotu, nkaambo balamulemeka.” (Muk. 8:12) Masimpe, eeco citondezya busongo bwakuyandaula ‘lulayo lwamaano’ luyeeme alimwi lweendelana a Jwi lya Leza.—2 Ti. 3:16, 17.

[Cifwanikiso icili apeeji 30]

Kutondezya mulimo ngobakajisi, zifwoto zyabasikweenzya bwato kanji-kanji zyakali kubatondezya kababoneka amibili mipati kwiinda bamwi

[Kulumba]

Su concessione del Ministero per i Beni e le Attività Culturali. Tamuzumizyidwe kupanga makkopi aambi aacifwoto eeci munzila iiliyoonse.