Kuata Olondunge​—Kuenda Pokola ‘Kalungulo’

Omuenyo u sokisiwa loku linga ungende vokalunga. Pole, omanu ka va kuete uloño u va kuatisa oku songuila ciwa omuenyo wavo. Omanu valua va siata oku liyaka lovitangi, ndeci ci pita lonaviyu yi vomba vokalunga. (Osa. 107:23, 27) Momo lie esokiso eli li kuetele esilivilo?

Kosimbu, omanu poku linga ungende vokalunga, va enda oku kuata ovitangi omo liekambo liuloño. Omo liaco, va enda oku pita otembo yalua loku lilongisa uloño woku tapula onaviyu, kuenda woku kala usongui waco. (Ovil. 27:9-11) Oviluvialuvia vialua vio kosimbu vi lekisa okuti, usongui wonaviyu, o kuete ocikele ca velapo okuti, omanu vakuavo ci sule. Poku linga ungende vokalunga, va enda oku songuiwa lolombungululu, lofela, kuenda olondimbukiso vikuavo. Embimbiliya li tukula alume vamue vakuakutapula onaviyu hati, “olonoño.” Ondaka yaco yi kuetevo elomboloko liokuti, ‘vakualondunge.’​—Esek. 27:8.

Ovitangi tua siata oku liyaka lavio koloneke vilo, vi sokisiwa levi vakuakutapula onaviyu va enda oku liyaka lavio. Nye ci pondola oku tu kuatisa?

TU KUATA NDATI “ULOÑO WOKU POKOLA KALUNGULO?”

Sokisa ocindekaise coku linga ungende vokalunga, lolondaka evi Viembimbiliya li popia ndoco: “Ukualondunge layevo o tẽla oku yeva loku amamako kukũlĩhĩso, lu wa lunguka o tẽla oku liupilako uloño.” (Olosap. 1:5, 6) Kelimi lio Heveru ondaka “uloño,” yi lomboloka ovilinga usongui wonaviyu a lekisa, poku songuila vana va yi tapula. Yi lombolokavo oku loñoloha poku endisa onaviyu, ale oku yi songuila lolondunge.

Olondaka evi, vi tu kuatisa oku likolisilako oco tu kuate “uloño” kuenda oku lilongisa ndomo tu lekisa “olondunge,” poku tetulula ovitangi viomuenyo. Elivulu Liolosapo li tu vetiya oku sandiliya ‘olondunge, ukũlĩhĩso kuenda uloño.’ (Olosap. 1:2-6; 2:1-9) Omo liaco, ka tu ka tombi alungulo a Suku, locimãho coku linga ovina vĩvi.​—Olosap. 12:5.

Oku lilongisa Ondaka ya Suku, ku kuete esilivilo. Elilongiso liaco, li tu kuatisa oku sanga olonumbi via velapo viatiamẽla ku Yehova kuenda ku Yesu Kristu. (Yoa. 14:9) Kolohongele, tua siata oku tambula alungulo alua. Tua siatavo oku kuatisiwa lovolandu a vamanji, oku kongelamo olonjali vietu.​—Olosap. 23:22.

SOKIYA OVINA O KA LINGA KOVASO

Oku ‘pokola kalungulo’ ku kuatisa oku tetulula ovitangi vi kasi ndakimba okalunga. Nda ka tu kũlĩhĩsa lutate poku tetulula ocitangi cimue ca tatama, tu tala ohali.​—Tia. 1:5, 6.

Ondaka ‘oku pokola kalungulo,’ yi tiamisiwilavo koku linga ciwa upange umue. Embimbiliya li popia ndoco: ‘Nda wa pokola kalungulo olondunge, o ka tẽla oku endisa ciwa ovita, momo kolondunguli vialua kuli eyovo.’​—Olosap. 20:18; 24:6.

Ndeci kesongo kovita wa loñoloha a sokiya ciwa uyaki, cimuamue haico ci pita letu okuti, tu sukila oku limbuka ovina vi pondola oku tu nenela ovitangi konepa yespiritu. (Olosap. 22:3) Pamue, o tava oku iñila kupange wokaliye, ale oku tambula ovikele via velapo kupange umue. Omo liaco, kũlĩhĩsa ovina vimue ndeci: Ofeto o ka tambula, otembo o linga poku enda kupange waco, kuenda ovina vikuavo. Pole, kuli ovina vimue o sukila oku ivaluka poku lipula ndoco: Upange waco, ka u pisiwa lolonumbi Viembimbiliya? U ka ndi tateka hẽ oku tẽlisa ovikele viange vekongelo?​—Luka 14:28-30.

Manji umue ukãi o tukuiwa hati, Loretta, wa talavaya vonjo yoku teleka okulia. Eci usongui waco a sokiya okuti va ilukila kocitumãlo cikuavo, manji Loretta vo wĩha ocikele ca velapo kupange waco. Kuenje, usongui waco wo sapuila hati: “Ocikele caco ci ku ĩha ekalo liwa, kuenda kocitumãlo caco, kulivo Onjango Yusoma.” Pole, manji Loretta wa yonguile oku leluisa omuenyo waye, oco a kuate otembo yalua kupange woku kunda olondaka viwa Viusoma. Eye, wa limbuka okuti ocikele caco, ci pondola oku nyana otembo yoku linga ovopange ekongelo. Omo liaco, ka tavele oku tambula ocikele caco, kuenje, wa sapuila usongui waye hati, o yongola lika oku kala kupange waye wosimbu. Tunde eci ulandu waco wa pita, manji Loretta, o kasi ale kupange wakundi va velapo ci soka 20 kanyamo. Oku ‘pokola kalungulo’ a litava Londaka ya Suku poku sokiya ovina tu ka linga kovaso yoloneke, ci nena onima yiwa. Omo liaco, manji Loretta wa pamisa ukamba waye la Yehova, kuenda, o kuete asumũlũho oku kuatisa omanu valua oku tava oku lilongisa Embimbiliya.

Oku ‘pokola kalungulo,’ ku kuete esilivilo vepata. Oku tekula omãla, ocikele cimue cambata otembo yalua. Kuenje, nda olonjali ka vi nõla ciwa ovina vi kuatisa omãla vavo konepa yespiritu, omãla va ka kuata ovitangi kovaso yoloneke. (Olosap. 22:6) Olonjali Akristão, vi sukila oku li pula ndoco: ‘Ombangulo lovilinga vietu, vi longisa hẽ omãla oku velisapo ovina viespiritu okuti, eci va linga akulu ci ka va kuatisa oku kuata olondunge? Ovituwa vietu vi va kuatisa hẽ oku limbuka ndomo tu sanjukila oku leluisa omuenyo, oco tu pitise kovaso upange woku kunda?’​—1 Tim. 6:6-10, 18, 19.

Oku kuata ovokuasi loku tẽlisa ovimãho violuali lulo, ka ci tu ĩha ekalo liwa komuenyo. Soma Salomone wa kuata elomboloko liaco. Eye wa vetiyiwa oku soneha ndoco: “[Omanu vana] va sumba Suku va kala ciwa omo va kasi kovaso aye lesumbilo.” (Uku. 8:12) Omo liaco, tu kuati olondunge, poku ‘pokola kalungulo’ a litava Londaka ya Suku.​—2 Tim. 3:16, 17.

[Elitalatu kemẽla 30]

Oco usongui wonaviyu a lekise okuti o kuete ocikele ca velapo, wa enda oku linga ovina vialua okuti, vakuakutapula onaviyu ci sule

[Ono yelitalatu]

Su concessione del Ministero per i Beni e le Attività Culturali. Olondaka evi ocihandeleko ci tateka omanu oku upa olokopia viociluvialuvia eci.