Shumisani Vhuṱali Ni Pfesese “Kufunzele”

Vhutshilo vhu nga fanyiswa na u fara lwendo. Naho zwo ralo, vhuṱali ha vhathu ho sumbedza u vha ho linganyiselwaho malugana na u kona u vha thusa uri vha bvelele vhutshiloni. Vhathu vhanzhi vho pwashetshelwa nga gungwa musi vho sedzana na vhuleme vhu ngaho maḓumbu vhutshiloni. (Ps. 107:23, 27) Ndi ngani zwo tea u fanyisa vhuleme vhutshiloni na lwendo lwa lwanzheni lu re na thaidzo nnzhi?

Zwifhingani zwa kale, u fara lwendo nga gungwa zwo vha zwi tshi ṱoḓa uri muthu a vhe na tshenzhelo. U tshimbidza gungwa ndi vhutsila he vhathu vha vha vha tshi vhu guda kha vhareili vha magungwa vha re na tshenzhelo, khamusi kha muthu ane a vha mulanguli waḽo. (Mish. 27:9-11) Zwifanyiso zwa kale zwinzhi zwi ombedzela ndeme ya mushumo une wa itwa nga mulanguli, nahone zwi sumbedza uri o vha e wa ndeme u fhira vhaṅwe vhoṱhe. U itela u alavha nga gungwa lwanzheni, vhane vha a shumisa vho vha vha tshi fanela u guda nga ha dziṋaledzi, maḓumbu, na zwiṅwe zwithu zwine zwa itea henefho. Bivhili i ṱalusa nga ha vhaṅwe vhatshimbidzi vha magungwa vho “ṱalifhaho” zwine zwa sumbedza uri vho vha vhe na vhutsila.—Hesek. 27:8.

U sedzana na vhuleme vhutshiloni ṋamusi zwi nga vhonala zwi tshi konḓa u fana na u alavha nga gungwa zwifhingani zwa kale. Ndi mini zwine zwa nga ri thusa?

RI NGA PFESESA HANI “KUFUNZELE”?

Samusi ni tshi kha ḓi humbula nga ha tshifanyiso tshe ha ambiwa ngatsho u thomani tsha uri vhutshilo vhu fanyiswa na u fara lwendo, ṱhogomelani mafhungo-ngoho a Bivhili ane a ri: “Wa vhuṱali nga a i pfe, a anze zwine a zwi ḓivha; wa ṱhalukanyo a wane kufunzele.” (Mir. 1:5, 6) Ipfi ḽa Luheberu ḽine ḽa amba “kufunzele,” ḽi ṱalusa zwe mulanguli wa gungwa wa zwifhingani zwa kale a vha a tshi zwi ita. Ḽi katela u vha na vhukoni ha u eletshedza na u livhisa nga vhutsila.

Naho zwi tshi ṱoḓa vhuḓidini, ri nga kona u pfesesa “kufunzele” na u guda u alavha nga hu bvelelaho lwanzheni lwa vhutshilo. Samusi bugu ya Mirero i tshi zwi sumbedza, ri fanela u tendela “vhuṱali,” “ṱhalukanyo,” na “nḓivho” zwi tshi shumisana. (Mir. 1:2-6; 2:1-9) Nahone ri fanela u dzula ri tshi humbela thuso kha Mudzimu, nga nṱhani ha uri na vhavhi vha a ḓivha nḓila ya u “ela” zwa vhufhura.—Mir. 12:5.

Nga zwenezwo, ndi zwa ndeme uri ri fhisetshele u guda Ipfi ḽa Mudzimu. Nga u vha na ngudo yo raloho, ri ḓo kona u pfesesa mafhungo a ndeme nga ha Yehova na Yesu Kristo we a sumbedza nga ho fhelelaho zwine Yehova a vha zwone. (Yoh. 14:9) Ri ṋewa nyeletshedzo nnzhi dza vhuṱali miṱanganoni ya Vhukriste. Zwiṅwe hafhu, ri nga guda kha tsumbo dza vhaṅwe, u katela na kha vhabebi vhashu.—Mir. 23:22.

ḒILUGISELENI NI DOVHE NI DZUDZANYE

Ndi zwa ndeme u pfesesa “kufunzele” zwihuluhulu musi ri tshi ḓiwana ro sedzana na vhuleme. U sa ḓivha vhukando vhune ra fanela u vhu dzhia musi ro sedzana na vhuimo vhu konḓaho zwi nga ri vhaisa, nahone zwa ita uri ri sedzane na mvelelo dzi si dzavhuḓi.—Yak. 1:5, 6. 

 Zwi takadzaho ndi uri ipfi “kufunzele” ḽi dovha ḽa shumiswa musi hu tshi ambelwa kha u bva pfumo kana u ya nndwani. Ri a vhala: “Maano a konadzea nga u eledzana; ibvani pfumo nó langana.”—Mir. 20:18; 24:6.

U fana na muthu ane a dzudzanya nndwa, zwi ḓo vha zwavhuḓi arali ra elekanya nga ha zwithu zwine zwa nga tshinya vhushaka hashu na Mudzimu. (Mir. 22:3) Sa tsumbo, ni nga kha ḓi fanela u ita phetho arali ni tshi ḓo ṱanganedza mushumo muswa, kana u ṋewa vhuimo ha nṱha mushumoni. Ndi ngoho uri ni ḓo elekanya nga ha muholo une na ḓo u wana, tshifhinga tshine na ḓo tshi fhedza ni tshi khou ya na u vhuya mushumoni na zwiṅwe-vho. Naho zwo ralo, hu na zwiṅwe zwithu zwine na fanela u humbula nga hazwo: Naa mushumo une nda ḓo u ita u a lwisana na zwilinganyo zwi re Bivhilini? Awara dzine nda ḓo dzi shuma, khamusi u dzhena nga zwifhinga zwo fhamba-fhambanaho, zwi ḓo kwama hani mishumo yanga ya Vhukriste?—Luka 14:28-30.

Loretta ane a vha muṅwe wa Ṱhanzi dza Yehova o vha e na mushumo wavhuḓi kha khamphani ya zwiḽiwa. Musi khamphani i tshi pfuluwa, Loretta o ṋewa mushumo wa vhuimo ha nṱha he ya vha i tshi ḓo pfulutshela hone. Vhalanguli vho ri khae: “Ndi tshibuli tshi sa anzeli u wanala vhutshiloni. Ro no ḓi wanulusa uri hu na Holo ya Muvhuso henefho tsini.” Fhedzi Loretta o vha a tshi khou ṱoḓa u leludza vhutshilo hawe u itela u shumela Musiki nga ho engedzeaho. O ṱhogomela uri mushumo wawe muswa wo vha u tshi ḓo ita uri a si vhe na tshifhinga tshinzhi tsha u ita mishumo ya Vhukriste. Nga zwenezwo, o mbo ḓi vha ṋea luṅwalo lwa u litsha mushumo naho mulanguli o vha o mu vhudza uri ndi ene mushumi e eṱhe ane a sa ḓo pandelwa khamphanini yeneyo musi i tshi pfuluwa. Loretta ane zwino o no fhedza miṅwaha i ṱoḓaho u vha 20 e muvulanḓila wa tshifhinga tshoṱhe, o amba uri mvelelo dzavhuḓi dze dza vha hone dzo itiswa nga u pfesesa hawe “kufunzele” kune kwa tendelana na zwi re kha Ipfi ḽa Mudzimu. O khwaṱhisa vhushaka hawe na Yehova nahone o vha na ndugelo ya u thusa vhathu vhanzhi uri vha ṱanganedze mafhungo-ngoho a Bivhili.

U pfesesa “kufunzele” zwi a ṱoḓea muṱani. U alusa vhana ndi mushumo wa tshifhinga tshilapfu, nahone phetho dzine muthu a ita dzi kwama vhumatshelo ha vhathu vhoṱhe muṱani. (Mir. 22:6) Sa tsumbo, vhabebi vha Vhakriste vha nga ḓivhudzisa uri: ‘Naa zwine ra zwi amba na tsumbo ine ra i vhetshela vhana vhashu zwi khou vha gudisa uri vha vhe na vhushaka ha tsini na Yehova, zwine zwa ḓo vha thusa uri vha kone u sedzana na vhutshilo nga vhuṱali musi vho no aluwa? Naa vhutshilo hashu vhu a vha thusa u pfesesa uri ndi zwa ndeme u fushea nga u tshila vhutsilo vhu leluwaho na u livhisa ṱhogomelo kha vhuḓinḓa ha Vhukriste?’—1 Tim. 6:6-10, 18, 19.

U bvelela zwa vhukuma a zwi ḓiswi nga u swikelela zwipikwa zwa zwithu zwi vhonalaho zwine ra anzela u zwi tovhola kana u vha na vhuimo ha nṱha. Khosi Salomo o vha a tshi pfesesa mafhungo enea. O hevhedzwa u ṅwala a ri: “Vha ofhaho Mudzimu vha vhona zwivhuya nga u’ vha mu ofha.” (Muh. 8:12) Maipfi eneo a sumbedza uri ndi vhuṱali u ṱoḓa u pfesesa “kufunzele” kwo thewaho Ipfini ḽa Mudzimu na kune kwa tshimbidzana na zwi re khaḽo.—2 Tim. 3:16, 17.

[Tshifanyiso kha siaṱari 30]

U itela u sumbedza uri vha na mushumo wa ndeme, kanzhi vhalanguli vho vha vha tshi dzhielwa nṱha u fhira vhaṅwe vhareili vha gungwa

[Ṱhaluso ya Vhubvo ha Tshifanyiso]

Su concessione del Ministero per i Beni e le Attività Culturali. It is forbidden to reproduce or duplicate this image in any way or by any means.