Guluu xpiaanuʼ: biyubi «conseju ni jma galán»

Zeeda gaca guendanabani stiʼ binni casi tuuxa ni zeʼ ti viaje lu nisadóʼ. Triste guininu ni, peru stale binni huaniti lu viaje riʼ, purtiʼ rúnicabe ni na ca binni nuu xpiaaniʼ nuu lu guidxilayú riʼ (Sal. 107:23, 27). Xiñee biaʼsi ejemplu bizéʼtenu riʼ yaʼ.

Dxiqué, para ganda cheʼ binni lu nisadóʼ naquiiñeʼ ganna ximodo guni ni. Ne para nga naquiiñeʼ guiziidiʼ de tuuxa ni nanna gusá barcu, casi ti capitán (Hech. 27:9-11). Stale dibuju yooxhoʼ rusihuinni pabiáʼ risaca capitán riʼ ora rutieecabe laa casi ti binni jma naroʼbaʼ que xcaadxi binni. Para ganda cheʼ binni lu nisadóʼ la? naquiiñeʼ gunibiáʼ chaahuiʼ pa neza rundubi bi, gunibiáʼ chaahuiʼ ca beleguí ne ganna xcaadxi cosa ni zacané laa ora maʼ zeʼ. Biblia ruzeeteʼ de caadxi hombre ni guyé lu nisadóʼ ni nabé nuu xpiaaniʼ (Eze. 27:8).

Ca guendanagana ridxaagalú binni lu xquendanabani zanda guchaaganu cani né ca guendanagana gupa binni dxiqué ora maʼ zeʼ lu nisadóʼ. Xi zanda gacané laanu para gudxíʼlunu cani yaʼ.

XIMODO ZANDA GUYÚBINU «CONSEJU NI JMA GALÁN»

Guendanabani stinu zeeda gácani casi ora ñuunu ti viaje lu nisadóʼ, yanna guidúʼyanu xi conseju cudii Biblia laanu: «Ti binni nuu xpiaaniʼ rucaadiaga ne riziidiʼ, ne ti binni ni riene ruyubi conseju ni jma galán» (Pro. 1:5, 6). Diidxaʼ hebreu ni biquiiñeʼ para guníʼcabe «conseju ni jma galán» cuzeeteni de ti capitán ni nanna gusá barcu ora maʼ zeʼ lu nisadóʼ. Laaca riniʼni pabiáʼ nánnabe chinebe ti barcu.

Nécapeʼ gácani nagana para laanu, guiranu naquiiñeʼ gúninu stipa pur guyúbinu «conseju ni jma galán» ne guizíʼdinu guibáninu ndaaniʼ guidxilayú riʼ, casi ñaca ñuunu lu nisa ndaaniʼ ti barcu. Casi cusiene Proverbios, para ganda gúninu nga naquiiñeʼ gácanu binni «nuu xpiaaniʼ» gácanu «binni riene» ne gánnanu xii nga «ni jneza ne ni cadi jneza» (Pro. 1:2-6; 2:1-9). Ne cadi guiaandaʼ laanu guinábanu Dios guluíʼ laanu ximodo guibáninu, purtiʼ dede ca binni malu randa ridxélacaʼ ximodo gúnicaʼ ni racaláʼdxicaʼ (Pro. 12:5).

Nga runi, naquiiñeʼ quixhe íquenu guidúʼndanu ne guiénenu Stiidxaʼ Dios, purtiʼ racá zazíʼdinu stale cosa risaca de Jiobá ne de Jesucristu, Xiiñibe ni jma jneza rusihuinni ca guenda stibe (Juan 14:9). Lu ca guendaridagulisaa stinu laaca ricaanu stale conseju ni zanda gacané laanu. Laaca zanda guizíʼdinu de ni huadiʼdiʼ ca binni jma huaniisi que laanu, casi bixhózenu ne jñaanu (Pro. 23:22).

GUDÍXHECA XI ZANDA GUʼNUʼ DEDE ANTE

Nabé risaca nga guicaanu «conseju ni jma galán» ora ridxaagalunu guendanagana, ni zeeda gaca casi nisadóʼ ni cadi nexhedxí. Pa huaxiéʼ riénenu cani zeeda lu Biblia la? zándaca qué zadxélanu xi gúninu  lu xiixa guendanagana ne pur nga gúninu xiixa ni guniná laanu despué (Sant. 1:5, 6).

Diidxaʼ «conseju ni jma galán» laaca riquiiñeʼ ni ora maʼ caníʼcabe de guendaridinde. Biblia na: «Naquiiñeʼ guicaaluʼ conseju ni jma galán ora maʼ nuuluʼ lu ti guerra, ne zalaluʼ pa guicaaluʼ conseju stiʼ ca binni nuu xpiaaniʼ» (Pro. 20:18; 24:6).

Cásica ruuyaʼ tuuxa xi naquiiñeʼ guni ante cheʼ lu ti guerra para ganda guni ganar la? laanu laaca naquiiñeʼ gúʼyanu xii nga ca cosa ni zándaca gueeda guxheleʼ laanu de Dios (Pro. 22:3). Quíxhenu ti ejemplu. Bixuiʼlú caníʼ íqueluʼ pa zacaaluʼ sti dxiiñaʼ o ti puestu jma risaca. Cadi dxandíʼ zaníʼ íqueluʼ pagala zaguíxecabe lii ne pabiáʼ tiempu zaquiiñeluʼ para cheluʼ ne guibiguétaluʼ la? Peru laaca naquiiñeʼ guiníʼ íqueluʼ xcaadxi cosa, casi pa jneza ruuyaʼ Biblia dxiiñaʼ cudiicabe lii, o pa zucueezani lii de guʼnuʼ xhiiñaʼ Dios pur ca hora chigúniluʼ dxiiñaʼ ne pur ca turnu gudiicabe lii (Luc. 14:28-30).

Guzéʼtenu de Loretta, ti testigu stiʼ Jiobá, laa gupa ti dxiiñaʼ ndaaniʼ empresa ra raca guendaró. Dxi cheʼ empresa que sti ladu, gúdxicabe laabe zacaabe ti puestu jma risaca lugar que. Sicaríʼ gudxi ca xaíque stini laabe: «Qué ziuuruʼ dxi gudiicabe lii sti puestu casi ni cudiʼdu lii riʼ. Ne maʼ bidúʼyadu nuu ti Yoo stiʼ Reinu raqué». Peru bidiibe cuenta maʼ huaxiéʼ tiempu zápabe para gúnibe xhiiñaʼ Dios pa guicaabe puestu que, laandabe maʼ gudixhe íquebe guchaabe caadxi cosa lu xquendanabánibe para gúnibe jma lu xhiiñaʼ Dios. Ngue runi, neca guníʼ director que laasibe nga gunaa ni racalaʼdxiʼ guiaanané lu dxiiñaʼ que la? qué nicaabe dxiiñaʼ que. Yanna maʼ napa Loretta biaʼ gande iza de precursora, ne cayuuyabe guiráʼ ca ndaayaʼ cudii Dios laabe pur biyúbibe «conseju ni jma galán» ni zeeda lu Stiidxaʼ Dios. Jma maʼ gaxha nuube de Jiobá, ne riéchebe purtiʼ maʼ gucanebe xcaadxi binni guiziidicaʼ ni cá lu Biblia.

Laaca riquiiñeʼ «conseju ni jma galán» para ganda gacané binni familia stiʼ. Naroʼbaʼ dxiiñaʼ nga para gusiniisi binni xiiñiʼ ca dxi riʼ. Peru laaca nuu sti cosa: modo guni bixhózecabe o jñaacabe dxiiñaʼ para gudii ni iquiiñecabe ne modo gusiidicaʼ laacabe de Dios, zusiidini laacabe ximodo gúnicabe dxiiñaʼ stícabe ora maʼ guiniisicabe (Pro. 22:6). Ca xpinni Cristu ni napa xiiñiʼ zanda guinabadiidxacaʼ: «Pur cani rinidu ne pur ejemplu stidu, ñee cusíʼdidu ca xiiñidu jma risaca chuʼcaʼ gaxha de Jiobá ti gácacaʼ binni nuu xpiaaniʼ ora maʼ guiniisicaʼ la? Pur modo nabánidu, ñee cusíʼdidu laacabe chúʼcabe nayecheʼ né biaʼ caquiiñeʼ sícabe para guibánicabe ti guicá íquecabe gúnicabe xhiiñaʼ Dios la?» (1 Tim. 6:6-10, 18, 19).

Stale binni riuulaʼdxiʼ gapa stale cosa ne gaca tuuxa nezalú xcaadxi, peru cadi nga diʼ nga ni rusihuinni dxandíʼ cabeendú binni ni galán. Rey Salomón bidii cuenta zacá ni, ngue runi gudxi Dios laabe gucaabe ca diidxaʼ riʼ: «Jma galán zieni cani ridxibi Dios ni dxandíʼ, purtiʼ ridxíbicaʼ laabe» (Ecl. 8:12). Nga runi, ni jma jneza guni ti binni nuu xpiaaniʼ nga guyubi «conseju ni jma galán» ni rudii Stiidxaʼ Dios (2 Tim. 3:16, 17).

[Imagen ni zeeda lu yaza 30]

Para guihuinni jma risaca ti capitán, rutieecabe laa casi ti binni jma naroʼbaʼ que xcaadxi ni zeʼ ndaaniʼ barcu

[Ra gucuaacabe imagen 30]

Su concessione del Ministero per i Beni e le Attività Culturali. Prohibida la copia o reproducción de esta imagen por cualquier medio.