Nong Pwony Ki I Lok Pa Lubanga

Cwec me Cwiny Mono Gigudo Kwowa Nining?

Pwony man nyamo lapeny mogo ma gwok nyo ibedo ka penye kwede dok bene nyutti ka ma itwero kwano iye lagamme ki i Baibulli. Lucaden pa Jehovah cwinygi bibedo yom me nyamo lagam pi lapeny magi kwedi.

1. Lumalaika mono gubedo angagi?

Lumalaika gubedo cwec me cwiny ma gikwo i polo. Gin gitye ki kwo madok tye i rwom ma lamal ma dok pat ki pa dano. Lubanga me ada, ma bene tye cwiny-nyi, ocweyo lumalaika ma peya ocweyo lobo. (Yubu 38:4, 7; Matayo 18:10) Lumalaika milion mapol ma gin lugen gitye gurumo Jehovah dyere.​—Kwan Jabuli 103:20, 21; Niyabo 5:11.

2. Tika lumalaika gikonyo dano?

Lumalaika gukonyo Lot, laco ma onongo kite atir. Lot onongo bedo i boma ma jo ma iye timgi rac adada, pi meno Lubanga omoko tamme me tyeko boma meno woko. Lumalaika aryo guwaco bot Lot ni en kacel ki jo me ode gua woko ki i boma meno. Jo mogo pe guye lok pa Lot pien gutero calo lok me tuko nyo ore. Ento Lot ki anyirane gubwot pien guwinyo lok pa Lubanga, ma lumalaika owaco botgi.​—Kwan Acakki 19:1, 13-17, 26.

Ma lubbe ki Baibul, lumalaika pud wa i kare-ni bene gitye ka konyo jo ma gin lugen me medde ki tito kwena maber me Ker pa Lubanga. (Matayo 24:14) Kwena maber-ri tye iye lok me ciko dano. Calo kit ma kiciko kwede Lot, man pe obedo lok me tuko nyo ore. Lok me ciko dano-ni a ki bot Lubanga kun wok ki bot lumalaika.​—Kwan Niyabo 1:1; 14:6, 7.

Lubanga twero tic ki lumalaika me konyowa ka watye i atematema. En otiyo ki lamalaika mo acel me miyo tekcwiny bot Yecu.​—Kwan Luka 22:41-43.

Cokcok-ki Lubanga bitic ki lumalaika i yo mukene​—me tyeko jo maraco ducu ma gimiyo dano deno can. Man bikelo yomcwiny bot dano ducu.​—Kwan 2 Jo Tecalonika 1:6-8.

  3. Jogi gitwero gudo kwowa nining?

Kit macalo jo mapol i lobo gitye ka timo jami maraco dok pe giwinyo lok pa Lubanga-ni, i polo bene lumalaika mapol gujemo i kom Lubanga. (2 Petero 2:4) Lumalaika ma gin lujemo kilwongogi ni jogi. Lamalaika ma dong lajemo loyo aye Catan, Larac-ci. Catan ki jogine gitye ka bwolo dano.​—Kwan Niyabo 12:9.

Catan tiyo ki biacara maraco, gamente pa dano, ki dong dini goba me bwolo ki kwanyo dano woko ki bot Lubanga. Man dong weko tim ducu calo ngolo kop alenga, gero, ki can ma dano gitye ka denone-ni ducu bedo i wi Catan.​—Kwan 1 Jon 5:19.

4. Jogi mono gibwolo dano nining?

Catan obwolo dano mapol ki pwony ni jo ma guto gidoko tipo ma gitwero lok ki dano. Ento Baibul waco ni jo muto pe gingeyo gin mo wacel. (Latitlok 9:5) Ento jogi pol kare gibwolo dano kun giporo dwan ngat muto-ni. Jogi bene gibwolo dano kun gitiyo ki tim tyet, ngiyo i cing, tyeto gin ma tye anyim kun kitiyo ki lakalatwe. (1 Camuel 28:8-19) Tim magi ducu Lok pa Lubanga ocikowa magwar pe timone matwal. Dong, omyero wabol jami ducu ma watye kwede ma kubbe ki tic pa jogi nyo tim me tyet tyet.​—Kwan Nwoyo Cik 18:10, 11; Tic pa Lukwena 19:19.

Ka wamaro Jehovah, ci myero pe walwor jogi. Ka wabedo ka kwano Lok pa Lubanga dok watimo gin ma wacciwa, ci wabikwero Larac-ci dok wanyikke cok bot Lubanga. Jehovah tek loyo jogi. Lumalaikane ma lugen gitwero konyowa ka watye i peko.​—Kwan Jabuli 34:7; Yakobo 4:7, 8.

Pi ngec mukene, nen dul me 10 i buk, Baibul Mono Ada Pwonyo Gin Ango? ma Lucaden pa Jehovah aye gucoyo.