Sinisimbag sa artikulong ini an mga bagay na tibaad ihinahapot mo asin ipinapahiling man kun saen mo iyan mababasa sa saimong Biblia. Maoogma an mga Saksi ni Jehova na ipakipag-olay sa saimo an mga simbag na ini.

1. Siisay an mga anghel?

An mga anghel espiritung mga linalang na nag-iistar sa langit. Nakakalabi sinda sa mga tawo. Bago lalangon an daga, linalang na sinda kan tunay na Dios, na saro mismong espiritu. (Job 38:4, 7; Mateo 18:10) Napapalibotan si Jehova nin minilyon na maimbod na anghel.—Basahon an Salmo 103:20, 21; Daniel 7:9, 10.

2. Tinatabangan daw kan mga anghel an mga tawo?

Tinabangan kan mga anghel an matanos na si Lot. Nakaistar sia sa sarong siudad na lalaglagon nin Dios huli sa karatan kan mga tawo. Duwang anghel an nagpatanid ki Lot asin sa pamilya nia na dumulag. Para sa nagkapira, suba sana an patanid kaya binaliwala ninda idto. Pero, nakaligtas si Lot asin an mga aki niang babae huling sinunod ninda an patanid na ipinaabot nin Dios paagi sa mga anghel.—Basahon an Genesis 19:1, 13-17, 26.

Segun sa Biblia, tinatabangan kan mga anghel an mga tawo ngonyan. Ginigiyahan ninda an gibohon kan mga maimbod na naghuhulit kan maogmang bareta kan Kahadean nin Dios. (Mateo 24:14) An maogmang bareta may kaibang patanid. Arog kan patanid na itinao ki Lot, bako iyan suba. Hale iyan sa Dios na itinao paagi sa mga anghel.—Basahon an Kapahayagan 1:1; 14:6, 7.

Puedeng gamiton nin Dios an mga anghel tanganing pakosogon kita kun napapaatubang sa mga pagbalo. Ginamit nia an sarong anghel tanganing pakosogon si Jesus.—Basahon an Lucas 22:41-43.

Dai na mahahaloy, gagamiton nin Dios an mga anghel sa saro pang paagi—tanganing paraon an maraot na mga tawo na nagtatao nin kasakitan. Matao iyan nin pambihirang kaginhawahan sa katawohan.—Basahon an 2 Tesalonica 1:6-8.

  3. Paano nakakaapektar sa sato an mga demonyo?

Kun paanong dakol na tawo sa daga an nagin masinuway sa Dios, dakol man na anghel sa langit an nagrebelde sa Dios. (2 Pedro 2:4) An masinuway na mga anghel inaapod na mga demonyo. An pangenot sa sainda iyo si Satanas, an Diablo. Ilinalagalag ni Satanas asin kan saiyang mga demonyo an katawohan.—Basahon an Kapahayagan 12:9.

Ginagamit ni Satanas an madayang mga negosyo, mga gobyerno nin tawo, asin falsong mga relihion tanganing impluwensiahan an mga tawo asin irayo sinda sa Dios. Kaya, si Satanas an nasa likod kan inhustisya, kadahasan, asin kasakitan na nagpapasakit sa katawohan.—Basahon an 1 Juan 5:19.

4. Paano ilinalagalag kan mga demonyo an mga tawo?

Dakol an nadadaya ni Satanas paagi sa pagtokdo na an mga gadan nagigin espiritu na kayang makikomunikar sa mga tawo. Minsan siring, sinasabi kan Biblia na an mga gadan mayo na nin ano man na magigibo. (Parahulit 9:5) Pero, parateng dinadaya kan mga demonyo an mga tawo paagi sa pag-arog sa boses kan nagadan na mga namomotan. (Isaias 8:19) Ilinalagalag ninda an iba paagi sa espiritismo, panghuhula, pagtoodtood, asin astrolohiya. Pinapatanidan kita kan Biblia na likayan iyan gabos. Kaya, dapat tang itapok an ano man na yaon sa sato na konektado sa mga demonyo asin okulto.—Basahon an Deuteronomio 18:10, 11; Guibo 19:19.

Kun namomotan ta si Jehova, dai ta kaipuhan matakot sa mga demonyo. Kun pinag-aadalan niato an Biblia dangan namumuhay kaoyon kaiyan, tinutumang ta an Diablo asin napaparani kita sa Dios. Mas makapangyarihan si Jehova kisa sa mga demonyo. Puede kitang pakosogon kan maimbod na mga anghel nia sa panahon na kaipuhan niato nin tabang.—Basahon an Salmo 34:7; Santiago 4:7, 8.

Para sa dugang pang impormasyon, hilingon an kapitulo 10 kan librong ini, Ano man Nanggad an Itinotokdo kan Biblia?, na ipinublikar kan Mga Saksi ni Jehova.