Lidan arütíkulu le, gayarabei hadarirun tidan hibibülian guánarügü óunabagülei lun álügüdahani le adüga humaalibei húniwagua. Ánhadün busén gayarabei hakutihani gefentiña luagu Heowá óunabagülei úara huma.

1. Kátaña san ánheligubaña?

Sífirigu gürigia hagía —wéirigutimati luwuyeri habagari luéi habagari gürigia— ani sielu heredera. Bungiu inarüniti, le giñe sífiribei, adügübaliña ánheligu lubaragiñe ladügüni Ubóu (Hobu 38:4, 7; Matéu 18:10). Añahein saragu míñunu ánheligu geyegu lau Heowá Bungiu. (Aliiha huméi Sálumu 103:20, 21 luma Arufudúni 5:11.)

2. Íderagua hamutiwa san ánheligu?

Lidan dan le sügühalibei, íderagua hamuti meha ánheligu aban wügüri richaguati le gíribei Lotu. Wínwanti meha lidan aban uburugu le meha desidírü lubéi Bungiu lagünrinchagun ladüga lanarime hariban gürigia ha erederubaña ñein. Aba hawisaruni biama ánheligu Lotu hama lufamilian lun hanurahan ñéingiñe. Añahein meha fiú barǘ hamuti awisahani le kei siñagei, ani madügüntiña gasu. Ánheinti Lotu hama lisaanigu würiña adügatiña gasu lau le lóunahabei Bungiu ariñaga houn hama ánheligu hagía ani séfutiña. (Aliiha huméi Agumesehani 19:1, 13-17, 26.)

Arufudatu giñe Bíbülia íderagua hamutiña lan ánheligu gürigia uguñe weyu. Ida? Adundeha hamutiña gürigia úaraguatiña ha apurichihabalin uganu buiti luáguti Larúeihan Bungiu (Matéu 24:14). Anihein giñe eweridihani lidan uganu le. Ítara kei meha lidan lidaani Lotu, siñati lanügǘniwa uganu le kei aban huraraü, lugundun Bungiu ayusurubaliñu lani ánheligu lun gayarabei lan lachülüragüdüni uganu le woun. (Aliiha huméi Arufudúni 1:1 luma 14:6, 7.)

Yusu lumutiña giñe Bungiu ánheligu lun líchugun iderebugu woun dan le wóuchawagun, ítara kei meha ladügün lun Hesusu. (Aliiha huméi Lúkasi 22:41-43.)

Yarafa madise, layusurubaña Heowá ánheligu lun lagumuchun hau gürigia wuribatiña ha adügübaña lun hasufurirun amu. Mame lueirin awalidaguni houn gürigia! (Aliiha huméi 2 Tesalónikana 1:6-8.)

  3. Kátaña san máfianubaña ani ka hadügübei?

Ítara kei maganbadi hamá saragu gürigia lun Bungiu, desidírütiña giñe saragu ánheligu hebedaagun lun Bungiu sielu (2 Féduru 2:4). Ánheligu maganbaditiña ha, hagía máfianubaña. Satanási le Mafia hachügüdinabei, úara eyeedagua hamutiña gürigia ani amañounra hamaña. (Aliiha huméi Arufudúni 12:9.)

Yusu lumuti Mafia óundaruni lánina bísinisi, gumadimatiña ha ubouagubaña luma relihión mama inarüniti lun gayarabei lan ladisedagüdüniña gürigia luéi Bungiu. Ligíati, Satanási gadurunbei luagu marichaü, anarimeni luma asufuriruni le arihubei ubouagu. (Aliiha huméi 1 Huan 5:19.)

4. Ida liña san hamañounruniña máfianu gürigia?

Adügati Satanási lun hasaminarun gürigia saliguatiña lan hilaaña sífirigume ha gayarati hayanuhan hama gürigia ha wínwangiñabaña. Mítaranti tarufudahani Bíbülia, afuranguagüdatu siñati lan hadügün hilaaña ni kata (Apurichihati 9:5). Ligíati, anihein dan áyeiha hamuti máfianu hamalali iduheñu ha hilaaña lun heyeeduniña gürigia (Isaíasi 8:19). Yusu hamutiña giñe búyeigu, egesihatiña, aturiahatiña waruguma, hama amu gürigia ha adügübaña katei líbeina lira lun heyeeduniña gürigia. Ariñagatu Bíbülia woun lun mánharun wamá lun burí échuni le luma lun wáguruni sun le gánibei hama máfianu. (Aliiha huméi 2 Lúrudu 18:10, 11 luma Adügaü 19:19.)

Anhein hínsiñe lubéi Bungiu woun, moun lumuti wanufudedun hawéi sífirigu wuribatiña ha. Dan le waturiahanu Lererun Bungiu ani gaganbadi wagía lun le tariñagubei aba wadisedun hawéi máfianu ani aba wayarafadun lun Bungiu. Gabafutimati Heowá hawéi máfianu ani lidan lidaani lénrengunga gayarati layusuruniña lani ánheligu lun líchugun iderebugu woun. (Aliiha huméi Sálumu 34:7 luma Santiagu 4:7, 8.)

Hadariruba lanwoun ariñahani lidan kapítulu 10 tidan líburu to, hadügün gefentiña luagu Heowá. Kátima san tarufudahabei Bíbülia?