Wuhrẹ No Ẹme Ọghẹnẹ Ze

Ẹvẹ Emama Ẹzi I Bi ro Kpomahọ Omai?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Amono họ ikọ-odhiwu?

Ikọ-odhiwu yọ emama ẹzi nọ e be rria obọ odhiwu. A kpehru vi ahwo-akpọ. Ọghẹnẹ uzẹme na yọ ẹzi re, yọ ọ ma ikọ-odhiwu na no taure ọ tẹ te ma otọakpọ na. (Job 38:4, 7; Matiu 18:10) Ima ikọ-odhiwu buobu nọ e be romakpotọ kẹ Jihova, a be rria obọ odhiwu kugbei.—Se Olezi 103:20, 21; Daniẹl 7:9, 10.

2. Kọ ikọ-odhiwu i re fi obọ họ kẹ ahwo-akpọ?

Ikọ-odhiwu i fi obọ họ kẹ Lọt, ọzae okiẹrẹe na. Ọ jẹ rria ẹwho nọ Ọghẹnẹ ọ ta nọ ọ te raha no fiki eware iyoma nọ ahwo ẹwho na a je ru. Ikọ-odhiwu ivẹ e tẹ vẹvẹ Lọt avọ uviuwou riẹ unu re a dhẹ no okpẹwho na. Ahwo jọ a rri unuovẹvẹ yena wọhọ ẹme evere gheghe, a tẹ jẹe fiẹ. Rekọ Lọt avọ emetẹ riẹ a zọ, keme a gaviezọ kẹ unuovẹvẹ nọ Ọghẹnẹ ọ rọ ẹkwoma ikọ-odhiwu kẹ ae na.—Se Emuhọ 19:1, 13-17, 26.

Wọhọ epanọ Ebaibol ọ ta, ikọ-odhiwu i bi fi obọ họ kẹ ahwo nẹnẹ, be kpọ ahwo nọ a be rọ ẹrọwọ ta usiuwoma Uvie Ọghẹnẹ. (Matiu 24:14) Emamọ usi na u kugbe unuovẹvẹ. Wọhọ unuovẹvẹ nọ a kẹ Lọt na, onana yọ ẹme evere gheghe he. Ọghẹnẹ họ ọnọ ọ rọ ẹkwoma ikọ-odhiwu riẹ kẹ unuovẹvẹ na.—Se Eviavia 1:1; 14:6, 7.

Ọghẹnẹ ọ rẹ sae rọ ikọ-odhiwu bọ omai ga nọ ma tẹ rẹriẹ ovao dhe edawọ. Ọ rọ ukọ-odhiwu bọ Jesu ga.—Se Luk 22:41-43.

Kẹle na, Ọghẹnẹ ọ te rọ ikọ-odhiwu ru iruo evaọ edhere ọfa, koyehọ, ọ te rehọ ai kpe ahwo oyoma nọ e be wha uye-oruẹ ze. Oyena o te wha ufuoma se ahwo-akpọ.—Se 2 Ahwo Tẹsalonika 1:6-8.

  3. Ẹvẹ idhivẹri na i bi ro kpomahọ omai?

Wọhọ epanọ ahwo buobu evaọ otọakpọ na a be ghẹmeeyo kẹ Ọghẹnẹ ẹkwoma eware iyoma nọ a bi ru na, ere ọvona ikọ-odhiwu buobu a ghẹmeeyo kẹ Ọghẹnẹ re. (2 Pita 2:4) A re se ikọ-odhiwu nọ e ghẹmeeyo kẹ Ọghẹnẹ na idhivẹri. Ọnọ ọ karo evaọ usu rai họ Setan, Ẹdhọ na. Setan avọ idhivẹri riẹ a be viẹ ahwo-akpọ họ.—Se Eviavia 12:9.

Setan ọ be rọ ekiọthuọ iwhayo, egọmeti ahwo-akpọ, gbe egagọ erue rọ viẹ ahwo họ, je bi ru re ahwo a siọ Ọghẹnẹ ba ẹgọ. Fikiere, Setan họ ọnọ ọ be wha okienyẹ, ozighi, gbe uye-oruẹ se ahwo-akpọ.—Se 1 Jọn 5:19.

4. Ẹvẹ idhivẹri na e be rọ viẹ ahwo họ?

Setan ọ viẹ ahwo buobu họ no, ẹkwoma uwuhrẹ na inọ ahwo nọ a whu no a re zihe ruọ izi, nọ e rẹ sai lele ahwo nọ a rrọ uzuazọ ta ẹme. Rekọ Ebaibol na ọ ta nọ ahwo nọ a whu no, a rẹ sai ru oware ovo ho. (Ọtausiuwoma Na 9:5) Ẹsibuobu, idhivẹri na e rẹ rọ urru ahwo nọ a whu no rọ ta ẹme kẹ imoni rai nọ e rrọ uzuazọ re a ruẹse viẹ ae họ. (Aizaya 8:19) Idhivẹri na e rẹ jẹ viẹ ahwo họ ẹkwoma iruẹru imizi, ebo-ẹva, aruọruẹ, gbe isi-erọgbẹva. Ebaibol na ọ vẹvẹ omai unu inọ ma whaha iruẹru itieye na kpobi. Fikiere, o gwọlọ nọ ma raha oware kpobi nọ ma wo nọ u wobọ kugbe iruẹru imizi hayo emajiki.—Se Iziewariẹ 18:10, 11; Iruẹru Ikọ Na 19:19.

Ma te you Jihova, ma rẹ dhozọ idhivẹri na ha. Ma te bi wuhrẹ Ẹme Ọghẹnẹ je bi fi eware nọ ma wuhrẹ họ iruo, ma rẹ sai mudhe kẹ Ẹdhọ je si kẹle Ọghẹnẹ. Jihova o wo ogaga vi idhivẹri na. Ikọ-odhiwu riẹ nọ e be romakpotọ kẹe, a rẹ sae bọ omai ga evaọ oke ẹbẹbẹ.—Se Olezi 34:7; Jemis 4:7, 8.

Re whọ gbẹ riẹ kpahe ẹme nana, rri uzou avọ 10 orọ obe nana, Eme Ebaibol na O Gine Wuhrẹ? onọ Isẹri Jihova a kere.