Pathian Thu Aṭangin Inzir Rawh

Engtin Nge Thlarau Thilsiamte’n Min Nghawng?

He thuziak hian i lo ngaihtuah mai theih zawhnate zâwtin, i Bible-a a chhânna i hmuh theihna laite a târ lang a. Jehova Thuhretute chuan chûng chhânnate sawipui che chu an châk hle a ni.

1. Vântirhkohte chu tute nge an nih?

Vântirhkohte chu thlarau thilsiam vâna awm an ni a. Anni chu mihring nunna aia chungnung zâwk nunna nei an ni. Amah pawh thlarau ni ve bawk Pathian dik chuan khawvêl a siam hmain vântirhkohte chu a siam tawh a. (Joba 38:4, 7; Matthaia 18:10) Pathian Jehova chu vântirhkoh rinawm maktaduai tam takte hual vêlin a awm a ni.—Sâm 103:20, 21; Daniela 7:9, 10 chhiar rawh.

2. Vântirhkohte chuan mite an ṭanpui em?

Vântirhkohte chuan mi fel Lota chu an ṭanpui a. Ani chu mite an sual êm avânga Pathianin a tihboral tum khawpuia khawsa a ni. Vântirhkoh pahnih chuan Lota leh a chhûngte chu tlân chhuak tûrin an vaukhân a. Mi ṭhenkhat chuan chu vaukhânna chu an nuihzatin, an pawisa lo a ni. Mahse, Lota leh a fanute chuan Pathianin vântirhkohte hmanga vaukhânna a pêk chu an zawm avângin an dam khawchhuak ta a ni.—Genesis 19:1,13-17, 26 chhiar rawh.

Bible sawi dânin, tûn laiah pawh vântirhkohte chuan taima taka Pathian Ram chanchin ṭha hriltute rawngbâwlna chu kaihruaiin mite an ṭanpui a ni. (Matthaia 24:14) Chanchin ṭhaah chuan vaukhânna thu pawh a tel a. Chu chu fiamthu mai ni lovin, Lota hnêna pêk vaukhânna ang kha a ni a. Pathianin vântirhkohte hmanga a pêk a ni.—Thu Puan 1:1; 14:6, 7 chhiar rawh.

Pathian chuan fiahna kan tawn huna min tichak tûrin vântirhkohte a hmang thei a. Isua tihchak nân pawh khân vântirhkoh a hmang a ni.—Luka 22:41-43 chhiar rawh.

Nakin lawkah Pathian chuan vântirhkohte chu kawng dangin a rawn hmang leh ang—hrehawm tawrhna thlentu mi suaksualte tihboral nân. Chu chuan mihringte tân thawvenna duhawm tak a thlen dâwn a ni.—2 Thessalonika 1:6-8 chhiar rawh.

 3. Engtin nge ramhuaihote’n min nghawng?

Lei chunga mi tak takin Pathian thu awi lo va thil sual an tih ang bawk hian vâna vântirhkoh tam takte pawh Pathian chungah an hel a. (2 Petera 2:4) Chûng Pathian thu awi lo vântirhkohte chu ramhuaite tia koh an ni. An zinga langsâr ber chu Diabol-Setana a ni a. Setana leh a ramhuaihote chuan mihringte hi an bum vêl a ni.—Thu Puan 12:9 chhiar rawh.

Setana chuan mite thunun nân leh Pathian hnên aṭanga lâk pên nân sumdâwnna bawlhhlawh tak tak te, mihring sawrkâr te, leh sakhaw dik lote a hmang a ni. Chuvângin, rorêl dik lohna te, tharum thawhna te, leh mihringte hrehawm tawrhnate awmtîrtu chu Setana a ni.—1 Johana 5:19 chhiar rawh.

4. Engtin nge ramhuaihote’n mi an bum?

Setana chuan mitthite chu thlarauva chang a, anmahni pawh thei anga zirtîrin mi tam tak a bum a. Bible erawh chuan mitthite’n engmah an tih theih loh thu a sawi a ni. (Thuhriltu 9:5) Mahse, ramhuaihote chuan mitthi aw ang chiah chu zirin mite an bum fo ṭhîn a. (Isaia 8:19) Ramhuaihote chuan mitthi thlûk thiam te, nakin hun sawi lâwktu te, aien thiam te leh arsi hmanga ai en thiamte hmangin mite a bum bawk ṭhîn. Pathian Thu chuan chûng thiltih zawng zawngte chu pumpelh tûrin min vaukhân a ni. Chuvângin, ramhuaiho nêna inkungkaih thil engpawh kan neih chu kan paih bo vek tûr a ni.—Deuteronomy 18:10, 11; Tirhkohte 19:19 chhiar rawh.

Pathian Jehova kan hmangaih chuan ramhuaihote chu kan hlauh a ngai lo va. Pathian Thu kan zir a, a sawi anga thil kan tih chuan, Diabola kan dodâlin, Pathian kan hnaih tihna a ni. Pathian Jehova chuan ramhuaihote aiin thil a tithei zâwk daih a. A vântirhkoh rinawmte chuan kan mamawh hunah min tichak thei a ni.—Sâm 34:7; Jakoba 4:7, 8 chhiar rawh. (w12-E 07/01)

Hriat tam lehzual nân Jehova Thuhretute tihchhuah Bible Zirtîrna Dik Tak Chu Eng Nge Ni? tih lehkhabu bung 10-na hi en ang che.