Nejin tamachtilis mitsonpaleuis xikonajsi itech moBiblia itanankilil seki netajtanilmej tein xa tionmochiuiliani. Komo tikonneki, itaixpantijkauan Jiova uelis kiitaskej mouan nejin netajtanilmej.

1. ¿Akonimej ángeles?

Ángeles yejuan seki espíritus tein nemij iluikak. Yejuan amo chijchiujtokej kemej taltikpakneminij. Dios akin melauak, no se espíritu, uan kinchijchiuak ángeles achto ke kichijchiuaskia taltikpak (Job 38:4, 7; Mateo 18:10). Jiova kinpia miak ángeles yolmelaujkej tein kitekitilijtokej. (Xikonixtajtolti Salmo 103:20, 21 uan Apocalipsis [Revelación] 5:11.)

2. ¿Techpaleuiaj ángeles?

Ne uejkauj, ángeles kipaleuijkej se takat yolmelauak akin motokaytij Lot. Yejua nemia itech se xolal tein Dios kiixtalijka kiixpolos, porin akin ompa nemiaj tel amo yolkualmej katkaj. Ome ángeles kinauatijkej Lot uan ichankauan maj cholouanij. Sekin kiauilmatkej nejon tanauatil uan amo kitakamatkej. Sayoj ke Lot uan iichpochuan makiskej porin tatakamatkej keman Dios kintitanik ángeles maj kinnejmachtitij. (Xikonixtajtolti Génesis 19:1, 13-17, 26.)

Biblia kijtoua ke axkan, ángeles no kinpaleuiaj taltikpakneminij. ¿Keniuj? Kinixyekanaj akin ika melaujkayot kiteixmatiltiaj kuali tanauatilmej ika iTekiuajyo Dios (Mateo 24:14). Nejin kuali tanauatilmej no kipiaj se tanejmachtilis. Kemej itech itonaluan Lot, nejin amo auil, ta Dios technejmachtia ika ininnepaleuil ángeles. (Xikonixtajtolti Apocalipsis 1:1 uan 14:6, 7.)

Dios no ueli kinnauatia ángeles maj techyolchikauakan keman tikpiaskej tajyouilis, ijkon kemej kichiuak iuan Jesús. (Xikonixtajtolti Lucas 22:41-43.)

Amo uejkaua, Dios no kintekitiltis ángeles uan ijkon kinixpolos taltikpakneminij akin amo yolkualmej uan kintajyouiltiaj oksekin. Nejon kichiuas maj yolseuikan nochin akin yolmelaujkej. (Xikonixtajtolti 2 Tesalonicenses 1:6-8.)

  3. ¿Akonimej amokuali ejekamej uan toni kichiuaj?

Ijkon kemej miakej taltikpakneminij amo kitakamatinij Dios, ne iluikak miak ángeles kiixpejpenkej kiixnamikiskej Dios (2 Pedro 2:4). Nejin ángeles akin amo tatakamatij yejuan amokuali ejekamej. Inintaixyekankauj yejua Amokuali, Satanás, uan yejuan kinkajkayauaj uan kinpojpolouaj taltikpakneminij. (Xikonixtajtolti Apocalipsis 12:9.)

Amokuali kitekitiltia takajkayaualis tein onkak itech tanamakalis, tekiuajyomej uan taneltokalismej tein amo melaujkej, uan ijkon kinuejkatilia taltikpakneminij iuan Dios. Yejua ika, Satanás itajtakol maj onka miak taman tein amo melauak, tateuilis uan tajyouilis itech taltikpak. (Xikonixtajtolti 1 Juan 5:19.)

4. ¿Keniuj amokuali ejekamej kinkajkayauaj taltikpakneminij?

Satanás kichiua maj taltikpakneminij kineltokakan ke mikemej mokepaj kemej espíritus uan uelis monojnotsaskej iniuan. Biblia amo yejua tein tamachtia, ta kijtoua ke mikemej senkis amo teyi ueli kichiuaj (Eclesiastés 9:5). Sayoj ke amokuali ejekamej kinkajkayauaj taltikpakneminij keman kichiuaj maj mokaki ke tajtouaj akin momikilijkejya (Isaías 8:19). No kintekitiltiaj taltikpakneminij akin iniuan tajtouaj espíritus, akin kiixejekouaj tein panos satepan, sitalixmatinij uan oksekin akin kitekitiltiaj naualot. Biblia techiluia maj tikixtopeuakan nejon tachiualismej, uan maj tikixpolokan nochi tein mouika iuan amokuali ejekamej uan naualot. (Deuteronomio 18:10, 11 uan Hechos 19:19.)

Komo tiktasojtaj Jiova, amo onkak keyej tikinmouiliskej amokuali ejekamej. Keman timomachtiaj iTajtol Dios uan tiktakamatij, tikixtopeuaj Amokuali uan timotokiaj iuan Dios. Jiova okachi chikauak ke amokuali ejekamej, uan ángeles tein yolmelaujkej uelis techpaleuiskej keman monekis. (Xikonixtajtolti Salmo 34:7 uan Santiago 4:7, 8.)

Komo tikonneki tikonmatis okachi, xikonita nejin amaix ¿Toni yekmelauj tamachtia Biblia?, itech capítulo 10, tein kichijchiujkej itaixpantijkauan Jiova.