Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Anwumabɔvolɛ ne mɔ a le nwane?

Anwumabɔvolɛ ne mɔ le sunsum nu abɔdeɛ mɔɔ bɛwɔ anwuma. Bɛlɛ tumi bɛtɛla sonla. Nɔhalɛ Nyamenle ne mɔɔ ɔdaye mumua ne ɔle sunsum la bɔle anwumabɔvolɛ ne mɔ kolaa na yeabɔ azɛlɛ ye. (Dwobu 38:4, 7; Mateyu 18:10) Anwumabɔvolɛ mgbe dɔɔnwo mɔɔ bɛdi nɔhalɛ la ɛbɔ Gyihova ɛyia.—Kenga Edwɛndolɛ 103:20, 21; Daneɛle 7:9, 10.

2. Anwumabɔvolɛ ne mɔ boa yɛ ɔ?

Anwumabɔvolɛma boale nrenya tenlenenli bie mɔɔ bɛfɛlɛ ye Lɔɔto la. Ɛnee ɔde sua bie mɔɔ menli ne ɛtane ti Nyamenle bɔle kpɔkɛ kɛ ɔsɛkye ye la azo. Anwumabɔvolɛma nwiɔ bɔle Lɔɔto nee ye abusua ne kɔkɔ kɛ bɛnriandi. Menli ne bie mɔ ambu kɔkɔbɔlɛ ne bie. Noko Lɔɔto nee ɔ mra mraalɛ ne mɔ nyianle bɛ ti ɔlua kɔkɔ mɔɔ Nyamenle luale anwumabɔvolɛma nwo zo bɔle mɔɔ bɛdiele la ati.—Kenga Mɔlebɛbo 19:1, 13-17, 26.

Baebolo ne maa yɛnwu kɛ ɛnɛ, anwumabɔvolɛ ne mɔ boa menli mɔɔ fa nɔhalɛlilɛ bɔ Nyamenle Belemgbunlililɛ ne nolo la. (Mateyu 24:14) Kɔkɔbɔlɛ boka edwɛkpa ɛhye anwo. Ɔle kɛ kɔkɔbɔlɛ ne mɔɔ bɛvale bɛmanle Lɔɔto la, ɔnle ngoayɛ. Nyamenle dua ye anwumabɔvolɛ ne mɔ anwo zo a ɔfa ɔmaa a.—Kenga Yekile 1:1; 14:6, 7.

Nyamenle kola dua ye anwumabɔvolɛ ne mɔ anwo zo ɔmaa yɛ anwosesebɛ wɔ sɔnea mekɛ nu. Ɔluale anwumabɔvolɛ nwo zo ɔmanle Gyisɛse anwosesebɛ.—Kenga Luku 22:41-43.

Ɔnrɛhyɛ Nyamenle balua anwumabɔvolɛma nwo zo yeaye ɛtanevolɛma mɔɔ maa yɛnwu amaneɛ la ɛkɛ. Ɛhye bamaa alesama anye alie kpalɛ.—Kenga 2 Tɛsalonaekama 1:6-8.

  3. Duzu a sunsum ɛtane ne mɔ yɛ a?

Kɛmɔ menli dɔɔnwo mɔɔ bɛwɔ azɛlɛ ye azo ɛmbu Nyamenle la, zɔhane ala a anwumabɔvolɛma dɔɔnwo ɛde Nyamenle anwo atua wɔ anwuma a. (2 Pita 2:4) Bɛfɛlɛ anwumabɔvolɛma mɔɔ ɛde atua la sunsum ɛtane. Bɛ kpanyinli a le Seetan Abɔnsam. Seetan nee ye sunsum ɛtane ne mɔ ɛlɛbɛlɛbɛla ewiade amra.—Kenga Yekile 12:9.

Seetan dua gualilɛ ɛtane, sonla arane ngakyile, nee adalɛ ɛzonlenlɛ zo nyia menli na ɔtwe bɛ ɔfi Nyamenle anwo. Yemɔti, Seetan a gyi mgbɔvodɛne, basabasayɛlɛ, nee amaneɛnwunlɛ mɔɔ alesama yia ye dahuu la anzi a.—Kenga 1 Dwɔn 5:19.

4. Kɛzi bɛbɛlɛbɛla menli ɛ?

Ngilehilelɛ ko mɔɔ Seetan dua zo bɛlɛbɛla menli la a le kɛ saa sonla wu a ɔkakyi sunsum nu abɔdeɛ mɔɔ bɛkola bɛ nee ye di adwelie a. Noko Baebolo ne ka kɛ mɔwuamra ɛnze ɛhwee. (Nolobɔvo ne 9:5) Sunsum ɛtane ne mɔ ta fa alɔvolɛ mɔɔ bɛwu la ane tendɛ bɛdua zo bɛbɛlɛbɛla menli. (Ayezaya 8:19) Eza bɛdua menli mɔɔ tendɛ bɛ nloa zo, bɛka kenlebie edwɛkɛ, nwɔlɔra kengavoma anzɛɛ menli mɔɔ biza la anwo zo. Baebolo ne bɔ yɛ kɔkɔ kɛ yɛhwe yɛ nwo yɛvi nyɛleɛ ɛhye mɔ anwo. Ɔwɔ kɛ yɛto debie biala mɔɔ ɔ nee sunsum ɛtane lɛ ngitanwolilɛ la yɛgua.—Kenga Mɛla ne 18:10, 11; Gyima ne 19:19.

Saa yɛkulo Gyihova a, ɔnle kɛ yɛsulo sunsum ɛtane ne mɔ. Saa yɛsukoa Nyamenle Edwɛkɛ ne na yɛdi zo a, yɛsi Abɔnsam adenle na yɛtwe yɛbikye Nyamenle. Gyihova tumi bo sunsum ɛtane ne mɔ ɛdeɛ ne azo. Ye anwumabɔvolɛma mɔɔ di nɔhalɛ la bahola amaa yɛ anwosesebɛ wɔ mekɛ mɔɔ yɛhyia moalɛ la.—Kenga Edwɛndolɛ 34:7; Gyemise 4:7, 8.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 10.