Na artikel disi e poti prakseri na aksi di yu ben abi kande èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Suma na den engel?

Engel na yeye di e libi na hemel. Den hei moro libisma. A tru Gado di de wan yeye tu ben meki engel fosi a meki grontapu (Yob 38:4, 7; Mateyus 18:10). Yehovah poti milyunmilyun reti-ati engel na en lontu.​—Leisi Psalm 103:20, 21; Danièl 7:9, 10.

2. Engel e yepi sma trutru?

Engel ben yepi a reti-ati man Lot. A ben libi na ini wan foto di Gado ben wani pori fu di den sma ben du furu ogri. Tu engel warskow Lot nanga en osofamiri fu lowe. Son sma no ben teki a warskow dati leki wan seryusu sani. Ma Lot nanga den umapikin fu en tan na libi fu di den gi yesi na a warskow di Gado ben meki den engel gi den.​—Leisi Genesis 19:1, 13-17, 26.

Soleki fa Bijbel e sori, dan engel e tiri a wroko fu den wan di e preiki a bun nyunsu fu Gado Kownukondre fayafaya. Na so den e yepi sma na ini a ten disi (Mateyus 24:14). A bun nyunsu na wan warskow tu. Neleki fa a ben de nanga a warskow di Lot ben kisi, na so a warskow na ini a ten disi na wan seryusu sani tu. Na Gado e meki engel warskow sma.​—Leisi Openbaring 1:1; 14:6, 7.

Gado kan gebroiki engel fu gi wi deki-ati te wi abi problema. A ben gebroiki wan engel fu gi Yesus deki-ati.​—Leisi Lukas 22:41-43.

Dyonsro Gado o gebroiki engel na wan tra fasi. A o meki den kiri den ogrisma di e pina trawan. Na so Gado o frulusu libisma èn den o de koloku.​—Leisi 2 Tesalonikasma 1:6-8.

  3. Fa ogri yeye abi krakti na wi tapu?

Neleki fa furu sma na grontapu trangayesi Gado fu di den du ogri, na so furu engel na hemel opo densrefi teige Gado (2 Petrus 2:4). Den e kari den trangayesi engel ogri yeye. A moro prenspariwan fu den na Satan Didibri. Satan nanga den ogri yeye fu en e kori libisma.​—Leisi Openbaring 12:9.

Satan gebroiki kruka bisnisman, libisma tirimakti nanga falsi bribi fu abi krakti na tapu sma, so taki den e drai baka gi Gado. Sobun, na Satan e meki taki kruktudu nanga ogridu de èn taki sma e pina.​—Leisi 1 Yohanes 5:19.

4. Fa ogri yeye e kori sma?

Satan kori furu sma fu di a leri taki dedesma e tron yeye di kan taki nanga den. Ma Bijbel e taki dati dedesma no man du noti kwetikweti (Preikiman 9:5). Ma nofo tron ogri yeye e bedrigi sma fu di den e meki a gersi leki na den lobiwan fu wi di dede e taki (Yesaya 8:19). Ogri yeye e kori sma, fu di den e gebroiki bonuman, lukuman nanga sma di e luku den stari fu si san o pasa. Gado Wortu e warskow wi gi den sortu sani disi. Sobun, wi musu trowe ala sani di abi fu du nanga ogri yeye èn nanga afkodrei.​—Leisi Deuteronomium 18:10, 11; Tori fu den apostel 19:19.

Efu wi lobi Yehovah, dan wi no abi fu frede gi ogri yeye. Te wi e studeri Gado Wortu èn e du san a e taki, dan wi kan kakafutu gi Didibri èn wi kan kon krosibei na Gado. Yehovah tranga moro den ogri yeye. Den reti-ati engel fu en kan yepi wi te wi de na nowtu.​—Leisi Psalm 34:7; Yakobus 4:7, 8.

Efu yu wani sabi moro, dan luku kapitel 10 fu a buku disi, San Bijbel e leri wi trutru?, di Yehovah Kotoigi tyari kon na doro.