Xihloko lexi xi tlakusa swivutiso leswi u nga ha vaka u tivutisa swona ni ku ku komba laha tinhlamulo u nga ti kumaka kona eBibeleni ya wena. Timbhoni ta Yehovha ti ta swi tsakela ku bula na wena hi tinhlamulo ta kona.

1. I yini tintsumi?

Tintsumi i swivumbiwa swa moya leswi hanyaka etilweni. Swi ni vutomi lebyi tlakukeke ku tlula bya vanhu. Xikwembu xa ntiyiso, lexi nga moya, xi vumbe tintsumi emahlweni ko va xi vumba misava. (Yobo 38:4, 7; Matewu 18:10) Yehovha u rhendzeriwe hi tintsumi to tshembeka ta timiliyoni.—Hlaya Pisalema 103:20, 21; Daniyele 7:9, 10.

2. Xana tintsumi ta va pfuna vanhu?

Tintsumi ti pfune wanuna wo lulama loyi vito rakwe ku nga Lota. A a tshama emutini lowu Xikwembu a xi tiyimisele ku wu lovisa hikwalaho ka vubihi bya vanhu. Tintsumi timbirhi ti lemukise Lota ni ndyangu wakwe leswaku va baleka. Vanhu van’wana a va swi teka ku ri matlangwana hiloko va swi ba hi makatla. Kambe Lota ni vana vakwe va vanhwanyana va ponile hikuva va yingise xilemukiso lexi Xikwembu xi xi rhumeleke hi ku tirhisa tintsumi.—Hlaya Genesa 19:1, 13-17, 26.

Hi ku ya hi Bibele, tintsumi ti pfuna vanhu namuntlha hi ku kongomisa ntirho wa lava hi ku tshembeka va chumayelaka mahungu lamanene ya Mfumo wa Xikwembu. (Matewu 24:14) Mahungu lamanene ma katsa xilemukiso. Ku fana ni xilemukiso lexi nyikiweke Lota, a hi mhaka yo tlanga. Xi huma eka Xikwembu hi ku tirhisa tintsumi.—Hlaya Nhlavutelo 1:1; 14:6, 7.

Xikwembu xi nga tirhisa tintsumi ku hi tiyisa loko hi langutane ni miringo. Xi tirhise ntsumi ku tiyisa Yesu.—Hlaya Luka 22:41-43.

Ku nga ri khale Xikwembu xi ta tirhisa tintsumi hi ndlela yin’wana—ku herisa vanhu vo homboloka lava vangaka ku xaniseka. Sweswo swi ta tisa ntshunxeko lowu tsakisaka eka vanhu.—Hlaya 2 Vatesalonika 1:6-8.

  3. Xana madimona ma hi khumba njhani?

Hilaha vanhu vo tala emisaveni va endleke vubihi hi ku ka va nga xi yingisi Xikwembu, ni le tilweni tintsumi to tala ti xandzukele Xikwembu. (2 Petro 2:4) Tintsumi leti nga yingisiki ti vitaniwa madimona. Murhangeri wa tona i Sathana Diyavulosi. Sathana ni madimona yakwe va hambukisa vanhu.—Hlaya Nhlavutelo 12:9.

Sathana u tirhisa mabindzu lama nga ni vukanganyisi, tihulumendhe ta vanhu ni vukhongeri bya mavunwa leswaku a kucetela vanhu ni ku va endla va xandzukela Xikwembu. Xisweswo, Sathana u ni vutihlamuleri eka vuhomboloki, madzolonga ni ku xaniseka loku karhataka vanhu.—Hlaya 1 Yohane 5:19.

4. Xana madimona ma va hambukisa njhani vanhu?

Sathana u kanganyisa vanhu vo tala hi ku dyondzisa leswaku vafi va hundzuka mimoya leyi nga vulavulaka na vona. Hambiswiritano, Bibele yi vula leswaku vafi a va koti ku endla nchumu. (Eklesiasta 9:5) Kambe madimona ma tala ku kanganyisa vanhu hi ku encenyeta marito ya varhandziwa va vona lava feke. (Esaya 8:19) Madimona ma xisa vanhu hi ku tirhisa vangoma, vavhumbhi, vahlahluvi ni vungoma bya swilo swa le mpfhukeni. Rito ra Xikwembu ri hi lemukisa ku papalata swiendlo sweswo hinkwaswo. Kutani hi fanele hi cukumeta nchumu wun’wana ni wun’wana lowu fambisanaka ni madimona ni vungoma.—Hlaya Deteronoma 18:10, 11; Mintirho 19:19.

Loko hi rhandza Yehovha, a hi fanelanga hi chava madimona. Loko hi dyondza Rito ra Xikwembu ni ku endla hilaha ri vulaka hakona, hi kaneta Diyavulosi kutani hi tshinela eka xona. Yehovha u ni matimba swinene ku tlula madimona. Tintsumi ta yena to tshembeka ti nga hi tiyisa loko hi lava mpfuno.—Hlaya Pisalema 34:7; Yakobo 4:7, 8.

Leswaku u kuma rungula leri engetelekeke, vona ndzima 10 ya buku leyi nge Xana Bibele Yi Dyondzisa Yini Hakunene?, leyi kandziyisiweke hi Timbhoni ta Yehovha.