Lesa Nga Aelela Umuntu, Bushe Alalabako ku Filubo Acitile?
Palameni Kuli Lesa
Lesa Nga Aelela Umuntu, Bushe Alalabako ku Filubo Acitile?
ICASUKO ca kutila, alalabako. Yehova alaya bonse abo atemwa ukuti: “Nkelela ifilubo fyabo, nshakebukishe ne membu shabo.” (Yeremia 31:34) Kanshi Yehova alitweba bwino bwino ukuti nga aelela ababembu abalapiile, tebukisha imembu shabo. Lelo bushe ici calola mu kuti Kabumba uwapangile umuulu ne sonde te kuti ebukishe imembu ishacitile umuntu uo abelele uluse? Amashiwi Esekiele alembele kuti yatwafwa ukwishiba ifyo Lesa eleela no kulabako.—Belengeni Esekiele 18:19-22.
Yehova abomfeshe kasesema Esekiele ku kusoka abaYuda na ba mu Yerusalemu abamupondokele ukuti ali no kubapingula. Uluko lonse lwalilekele ukupepa Yehova kabili ubunkalwe bwali fye mpanga yonse. Yehova asobele ukuti abena Babiloni bali no konaula umusumba wa Yerusalemu. Kabili alilandile ne fyo abalefwaya ukupusuka balingile ukucita. Cila muntu aalingile ukusalapo ifyo alefwaya; ifyo asalilepo ukucita e fyali no kulenga akandwa nelyo ukukanakandwa.—Ifikomo 19, 20.
Nomba cali no kuba shani nga ca kuti umuntu aleka ukucita ifyabipa atendeka no kucita ifisuma? Yehova alandile ukuti: “Umubifi nga aleka imembu shakwe shonse isho acita kabili alakonka ifipope fyandi fyonse no kucita ifya mulinganya ne fyalungama, akaba no mweo. Takafwe iyo.” (Icikomo 21) Kanshi, Yehova ‘ali-iteyenye ukwelela’ umubembu uwaleka imembu shakwe, alanga no kuti cine cine nalapila.—Amalumbo 86:5.
Inga imembu isho acitile, finshi Lesa alecitapo? Yehova alondolwele ukuti: “Ifya bupulumushi fyonse ifyo acitile tafyakebukishiwe pali wene.” (Icikomo 22, Baibolo ya ciBemba iya mu 1956) Nga mwamona, Yehova atile, ifya bupulumushi ifya muntu uwalapila “tafyakebukishiwe pali wene.” Mulandu nshi aya mashiwi yacindamina?
Ishiwi lya ciHebere ilyo bapilibula muli Baibolo ukuti “ukwibukisha,” kuti lyapilibula ifingi ukucila ukwibukisha fye ifyacitike kale. Icitabo cimo calanda pali ili ishiwi ukuti: “Ilingi [ili ishiwi] lipilibula ukucitapo cimo, kabili ilingi balibomfesha pamo na mashiwi yalelangilila ukucitapo fimo.” Kanshi “ukwibukisha” cipilibula “ukucitapo cimo.” E co ifi Yehova alanda pa mubembu uwalapila ukuti imembu shakwe ‘tashakebukishiwe pali wene,’ calola mu kuti Yehova takakande umuntu pa membu acitile kale nga ca kutila alilapila. *
Amashiwi yaba pali Esekiele 18:21, 22 yalatulanga bwino bwino ifyo Lesa eleela nga nshi. Yehova nga atwelela imembu, takatukandile pali isho imembu ku ntanshi. Lelo apoosa imembu sha balapila ku numa yakwe. (Esaya 38:17) Ciba kwati ashifuuta apo ashilembele.—Imilimo 3:19.
Apo fwe bantunse tuli babembu, tulakabila uluse lwa kwa Lesa. Pantu na kuba, tulabembuka imiku iingi. (Abena Roma 3:23) Lelo Yehova afwaya ukuti twishibe ukutila, nga cine cine twalapila, ali-iteyanya ukutwelela. Kabili nga atwelela, alalabako, e kutila, takabuukulule imembu twacitile no kutupingwilapo. Aya mashiwi yalatusansamusha nga nshi! Bushe te kuti mutemwe ukupalama kuli Lesa wa musango yu, uwafulisha uluse?
Amalembo ya kubelenga mu July:
[Futunoti]
^ para. 7 E mo na mashiwi ya kuti, “ukwibukisha imembu” yalola. Yapilibula “ukukanda ababembu.”—Yeremia 14:10.
