WEN. Inkari ni Jehova kadagiti anamonganna: “Ta pakawanekto ti biddutda, ket ti basolda saankonton a lagipen.” (Jeremias 31:34) Ipanamnama kadatayo ni Jehova a no pakawanenna dagiti agbabbabawi a nakabasol, saannan a lagipen ti basolda. Ngem kayatna kadi a sawen a ti Namarsua iti naglawa nga uniberso dinan malagip dagiti pinakawanna a basol? Ilawlawag dagiti sasao ni Ezequiel no kasano a mamakawan ken manglipat ti Dios.​—Basaem ti Ezequiel 18:19-22.

Babaen ken propeta Ezequiel, impakaammo ni Jehova ti panangukomna iti nasukir a Juda ken Jerusalem. Ti intero a nasion binaybay-anda ti panagdayawda ken Jehova ken pinunnoda iti kinaranggas ti Israel. Impadto ni Jehova ti panangdadael dagiti Babilonio iti Jerusalem. Nupay impadtona ti panangukom, nangted ni Jehova iti namnama. Tunggal indibidual adda wayawayana nga agpili ngem manungsungbat iti aniaman a pilienna.​—Bersikulo 19, 20.

Kasano ngay no agbalbaliwen ti nagbasol? Kuna ni Jehova: “No maipapan iti maysa a nadangkes, no kas pagarigan tumallikud kadagiti amin a basolna nga inaramidna ket pudno a salimetmetanna amin a paglintegak ket ipakatna ti kinahustisia ken kinalinteg, di bumurong nga agtultuloyto nga agbiag. Saanto a matay.” (Bersikulo 21) Wen, ‘sisasagana ni Jehova a mamakawan’ iti nakabasol a mangtallikud iti dakes nga aramidna ken mangipakita iti pudno a panagbabawi.​—Salmo 86:5.

Ti ngay naaramidna a basol? “Amin a salungasingna a naaramidanna​—saandanto a malagip maibusor kenkuana,” kuna ni Jehova. (Bersikulo 22) Paliiwem ta ti basol daydiay agbabbabawi ket “saandanto a malagip maibusor kenkuana.” Apay a napateg daytoy?

Iti Biblia, ti Hebreo a sao a naipatarus a “malagip” ket saan laeng a pananglagip iti napalabas. Kuna ti maysa a reperensia maipapan iti daytoy a sao: “Kinapudnona, masansan nga ipasimudaag dayta ti panagtignay wenno agparang a kadua dagiti berbo a panagtignay.” Gapuna, ti sao a “lagipen” kaipapananna ti “panagtignay.” Isu a no kunaen ni Jehova a ti basol daydiay agbabbabawi “saandanto a malagip maibusor kenkuana,” ibagbagana a saanton nga agtignay a maibusor iti dayta nga indibidual gapu kadagita a basol, kas iti panangpabasol wenno panangdusa. *

Nagsayaat ti panangiladawan ti Ezequiel 18:21, 22 iti naan-anay a panangpakawan ni Jehova. No pakawanen ni Jehova dagiti basoltayo, pulos a dinatayton sidiren iti masanguanan. Imbes ketdi, arigna ipuruakna iti likudanna ti basol daydiay agbabbabawi. Kasla pinunasnan iti listaan dagidiay a basol.​—Aramid 3:19.

Kas imperpekto a tattao, kasapulantayo ti asi ti Dios ta mamin-adu nga agbasoltayo. (Roma 3:23) Ngem kayat ni Jehova a maammuantayo a no sipapasnek nga agbabawitayo, situtulok a mangpakawan. Ken no mamakawan, lipatenna, kayatna a sawen dinatayto sidiren wenno dusaen manen gapu kadagiti basoltayo. Anian a makaliwliwa dayta kadatayo! Sigurado a kayatmo ti agbalin a nasinged iti naasi a Dios.

Singasing a basaen iti Biblia iti Hulio:

▪ Ezequiel 6-20

[Footnote]