Tjhidela KuZimu

UZimu NekaLibalelako, UyaKhohlwa Na?

IPENDULO, emezwini la, ingu-iye. Malungana nalabo abathandako, uJehova uyathembisa: “Ngizokulibalela imitjhaphwabo, nezono zabo angeze ngisazikhumbula.” (Jeremiya 31:34) UJehova uyasiqinisekisa bona nekalibalela izoni eziphendukileko, akasazikhumbuli izono zazo. Kghani lokho kutjho bona umBumbi omkhulu wendawo yoke angeze asazikhumbula izono azilibaleleko? Amezwi ka-Ezekiyeli akhanyisa indlela uZimu alibalela abe akhohlwe ngayo.—Funda u-Ezekiyeli 18:19-22.

Asebenzisa umporofidi u-Ezekiyeli njengomkhulumeli, uJehova wamemezela isahlulelo ngokujamelene namaJuda neJerusalema ezingakathembeki. Soke isitjhaba sahlubuka ekukhulekeleni uJehova begodu sazalisa inarha yoke ngenturhu. UJehova wabikezela ukutjhatjalaliswa kweJerusalema ngebeBhabhiloni. Ngitjho nanyana bekamemezela isahlulelo, uJehova wanikela nomlayezo wethemba. Omunye nomunye bekanekululeko yokuzikhethela; godu nomthwalo wefanelo ngezenzo zakhe.—IVesi 19, 20.

Kuthiwani nengabe umuntu uyatjhuguluka ekwenzeni okumbi enze okuhle? UJehova uthi: “Malungana nomuntu owenza izinto ezimbi, nekwenzekako abuya kizo zoke izono zakhe azenzileko begodu azibulunga zoke iinkambisolawulo zami, enza ubulungiswa nokulunga, uzokuragela phambili aphila. Angeze afe.” (iVesi 21) Kwamambala, uJehova “ukulungele ukulibalela” isoni esiphendukako ekwenzeni izenzo ezimbi, esiphenduke kwamambala.—IRhalani 86:5.

Kuthiwani ngezono esizenzileko? UJehova uyahlathulula, “yoke imitjhapho yakhe ayenzileko—angeze ikhunjulwe ngokujamelene naye.” (iVesi 22) Tjheja bona izono zomuntu ophendukileko ‘angeze zikhunjulwe ngokujamelene naye.’ Kubayini lokhu kuqakathekile?

EBhayibhilini, ibizo lesiHebheru elithi, “khumbula” lingatjho okungaphezu kokukhumbula into edlulileko. Malungana nebizweli, incwadi ethileko ithi: “Eqinisweni kanengi litjho isenzo namtjhana livela likhambisana namabizo wezenzo.” Ngalokho, “ukukhumbula” kungatjho “ukwenza.” Ngalokho, uJehova nekathi izono zesoni esiphendukileko ‘angeze zikhunjulwe ngokujamelene naso,’ Utjho bona angeze enza isenzo esijamelene naso ngebanga lezonwezo, ngokobana asisole namtjhana asijezise. *

Amezwi ka-Ezekiyeli 18:21, 22 atjengisa indlela epheleleko ukulibalela kwakaZimu okuthinta ngayo iinhliziyo zethu. UJehova nekalibalela izono zethu, angeze asikhumbuze izonwezo esikhathini esizako. Kunalokho, uyazidlulisa izono zesoni esiphendukileko. (Isaya 38:17) Kuba ngasuthi usula irekhodi lezonwezo.—IzEnzo 3:19.

Njengabantu abangakapheleli, sitlhoga umusa kaZimu. Ngaphezu kwalokho, kanengi siyona. (Roma 3:23) Kodwana uJehova ufuna sazi bona nengabe siphenduke kwamambala, ukulungele ukusilibalela. Begodu nekalibalelako, uyakhohlwa—lokho kutjho bona, angeze asikhumbuza izono zethu bona asisole namtjhana asijezise godu. Qala bona lokho kududuza kangangani! Inga-kghani umusa kaZimu ukwenza bona ufune ukutjhidela kuye?

[Umtlolo waphasi]