Nopajan ta stojolal Dios

Kʼalal tspasvan ta perton li Diose chchʼay-o ta sjol li mulile

¿MI MELEL van taje? Jech ta melel. Li Jeovae xi chalbe ta melel li yajtuneltake: «Jʼechʼel ta jchʼaybe o ta coʼnton li xchopolilique; muʼyuc xa ta jtʼabbe o ta coʼnton li smulique» (Jeremías 31:34). Taje jamal chalbutik ti kʼalal tspas ta perton li jpasmuliletik ti sutesoj xa yoʼontonike, muʼyuk xa bu tsvules-o ta sjol. Pe ¿mi jaʼ van skʼan xal ti mu xa xvul ta sjol li muliletik ti spasoj xa perton li Buchʼu la spas vinajelbalumile? Li kʼusi laj yal j-alkʼop Ezequiele tsjambe mas smelolal li kʼusi skʼan xal ti tspasvan ta perton xchiʼuk ti chchʼay-o ta sjol li Diose. (Kʼelo Ezequiel 18:19-22.)

Li Jeovae la stunes Ezequiel sventa chalbe ti chakʼbe stoj smul li jteklum Judá ti muʼyuk tukʼe xchiʼuk li kapital yuʼun ti jaʼ li Jerusalene. Skotol li jteklume laj xaʼox yiktaik li melel relijione xchiʼuk jaʼ bat ta yoʼontonik spasel li kʼusitik chopole. Li Jeovae laj onoʼox yal ti tstunes jbabiloniaetik sventa chakʼbe slajeb li Jerusalene, pe oy kʼusi lek laj yal xtok, yuʼun ta jujuntal chchapan li krixchanoetike. Ta skoj li kʼusitik tsnop tspasik ta jujuntale jaʼ jech chichʼik chapanel (versikulo 19 xchiʼuk 20).

Vaʼun chaʼa, mi oy buchʼu tskʼan chikta li kʼusi chopol toʼox tspase, ¿kʼusi van chkʼot ta stojolal? Li ta versikulo 21 xi laj yal li Diose: «Pero me chlic scomtsan scotol smul li bochʼo chopole, me jaʼ chlic xchʼun li mantaletic cuʼune, me jaʼ chlic spas li cʼusitic lec, li cʼusitic tuqʼue, ta jbel scʼoplal ta xcuxi; muʼyuc ta xcham». Jech kʼuchaʼal chkiltike, li buchʼu tsutes yoʼonton ta melel xchiʼuk mi chiktaik spasel li kʼusi chopole, li Jeovae «ta [xchʼay] ti mulil coloʼile» (Salmo 86:5, Ch).

Pe ¿kʼusi chkʼot ta stojolal li smultake? Li versikulo 22 xi to chale: «Scotol li cʼusitic chopol la spase muʼyuc xa ta xichʼ tʼabbel o». ¿Kʼusi skʼan xal ti «muʼyuc xa ta xichʼ tʼabbel o» li smule?

Jun ti buchʼu chchanbe skʼoplal Diose (teólogo), laj yal li jpʼel kʼop ta Vivlia ta hebreo ti «tʼabbel» xie, maʼuk noʼox skʼan xal ti chvul ta joltik li kʼusitik jelavemik xae, moʼoj, «jaʼ skʼan xal xtok ti oy kʼusi chichʼ pasele». Jaʼ yuʼun li jpʼel kʼop «tʼabbel» xie, jaʼ skʼan xal ti «oy kʼusi chichʼ pasele». Jech oxal, li Jeovae muʼyuk xa ta svules ta sjol mi tsutes yoʼonton ta melel li jpas mulile, taje jaʼ skʼan xal ti muʼyuk xa kʼusi tspasbee o chakʼbe stoj li smultake. *

Li kʼusi tsʼibabil ta Ezequiel 18:21 xchiʼuk 22 ta spat koʼontontik, yuʼun chalbutik bu to kʼalal chakʼutik ta perton li Jeovae. Yuʼun kʼalal tsutes yoʼonton ta melel li jun krixchanoe, li Diose chakʼbe perton, taje jaʼ skʼan xal ti muʼyuk xa tsvules-o ta sjole. Xkoʼolaj kʼuchaʼal tsjip batel ta spat li muliletike (Isaías 38:17). Tslajesbe-o skʼoplal, muʼyuk xa chvul ta sjol (Hechos 3:19).

Jkotoltik chtun kuʼuntik li xkʼuxul yoʼonton Diose, yuʼun ta skoj ti jmulavilutike ta jujulikel ta jsaʼ jmultik (Romanos 3:23). Li Jeovae chakʼ jnaʼtik ti oy ta yoʼonton chakʼutik ta perton mi ta jsutes koʼontontik ta melele. Mi la spasutik ta pertone chchʼay ta sjol, jaʼ xkaltik, muʼyuk xa chakʼ jtoj li jmultike. ¡Jaʼ jun spatobil koʼontontik taje! ¿Mi chakʼan chanopaj ta stojolal jun Dios ti oy xkʼuxul yoʼontone?

[Tsʼib ta yok vun]