“Ini Ekededi Eke Mbufo Ẹbọn̄de Akam, Ẹdọhọ Ẹte, ‘Ete’”

Nso ke esiti ke ini okopde ikọ oro, “Ete”? Edieke ekenyenede eti ete, se editide edidi ete oro enen̄erede ama onyụn̄ ekerede aban̄a ubon esie. Edi edieke owo ekenyenede idiọk ete, enye editi ete oro esifiomode ikọt ufọk esie mînyụn̄ ikereke iban̄a mmọ.

JESUS ekesiwak ndikot Abasi “Ete.” * Ke ini enye ekekpepde mme mbet esie ndibọn̄ akam, enye ọkọdọhọ ete: “Ini ekededi eke mbufo ẹbọn̄de akam, ẹdọhọ ẹte, ‘Ete.’” (Luke 11:2) Edi nso orụk Ete ke Jehovah edi? Enen̄ede ọfọn idiọn̄ọ ibọrọ mbụme emi. Ntak-a? Adan̄a nte itịmde idiọn̄ọ orụk Ete emi Jehovah edide, ntre ke iditịm isan̄a ikpere enye inyụn̄ inen̄ede ima enye.

Idụhe owo emi ekemede ndikpep nnyịn n̄kpọ mban̄a Ete n̄kan Jesus. Enye ama enen̄ede ekpere Ete esie. Jesus ọkọdọhọ ete: “Baba owo kiet itịmke ifiọk Eyen ke mîbọhọke Ete, owo ndomokiet inyụn̄ itịmke ifiọk Ete ke mîbọhọke Eyen ye owo ekededi emi Eyen enyịmede ndiyarade enye nnọ.” (Matthew 11:27) Ntre, mfọnn̄kan owo emi  ekemede ndikpep nnyịn n̄kpọ mban̄a Ete edi Jesus Eyen esie.

Nso ke Jesus ekeme ndikpep nnyịn mban̄a Ete nnyịn eke heaven? Kere kan̄a ban̄a ikọ emi Jesus eketịn̄de mi: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Ikọ Jesus emi owụt ke ima edi n̄wọrọnda edu Ete nnyịn eke heaven. (1 John 4:8) Jehovah owụt nte imade nnyịn ke nsio nsio usụn̄, utọ nte enye ndinyịme nnyịn, ndikop nnyịn mbọm, ndikpeme nnyịn, nditụnọ nnyịn, nnyụn̄ mbọk nnyịn.

Jesus Owụt ke Jehovah Enyịme Nnyịn

Nditọwọn̄ esikop inemesịt ẹnyụn̄ ẹnyene uko ndinam n̄kpọ ke ini mmọ ẹdiọn̄ọde ke ete mmimọ enyịme se mmimọ inamde. Kere nte esịt ekenemde Jesus ndikop Ete esie ọdọhọde ete: “Emi edi edima Eyen mi, emi ami nnyịmede.” (Matthew 3:17) Jesus ọdọhọ ke Ete ama onyụn̄ enyịme nnyịn nde. Enye ọkọdọhọ ete: “Owo eke amade mi, Ete mi ayama enye.” (John 14:21) Nso ikọ ndọn̄esịt ke emi edi ntem! Edi odu owo emi mîyomke nnyịn ifiọk ke Abasi enyịme onyụn̄ ama nnyịn.

Satan oyom ndinam nnyịn iyịk m̀mê Ete nnyịn eke heaven akam ama onyụn̄ enyịme nnyịn. Enye oyom ndinam nnyịn ikere ke Abasi ikemeke ndima utọ owo nte nnyịn. Enye esinam emi ke ini idem ememde nnyịn—nte ke ini usọn̄, ini udọn̄ọ, ini edikpu, m̀mê ke ini nnyịn mînamke se ikpanamde. Kere ban̄a akparawa kiet emi ekerede Lucas, emi ekekerede ke Abasi ikemeke ndima utọ owo nte imọ. Lucas ọdọhọ ke ini imọ ikedide eyenọwọn̄, ke ete ye eka imọ ikanamke aba nti n̄kpọ oro mmọ ẹkekpepde imọ. Etie nte oro akanam enye okûkeme ndisan̄a n̄kpere Ete esie eke heaven. Ke adianade do, Lucas ekedi owo ibụmede, ndien emi ama esisịn enye ke mfịna. Sụn̄sụn̄, n̄wan Lucas emi esinyenede ime esinyụn̄ ọsọn̄ọde enye idem—emi Lucas ọdọhọde ke edi “enọ Abasi”—ama an̄wam enye etre ndinam n̄kpọ ke ibụmede. Lucas ama edi edikụt ke “Christ Jesus ekedi ererimbot ndinyan̄a mme anamidiọk.” (1 Timothy 1:15) Lucas ọdọhọ ke nditie n̄kere adan̄a nte Abasi amade imọ anam imọ ikop inemesịt ye uyụhọ.

Edieke afo esiyịkde ndusụk ini m̀mê Jehovah ama fi, ndikot nnyụn̄ ntie n̄kere se idude ke Rome 8:31-39 ekeme ndidọn̄ fi esịt. Apostle Paul ọdọhọ ke itie N̄wed Abasi oro ete ke baba n̄kpọ kiet “idikemeke ndidian̄ade nnyịn ke ima Abasi oro odude ke Christ Jesus Ọbọn̄ nnyịn.” *

Ete Emi Enyenede Esịt Mbọm

Ufen emi nnyịn isibọde enen̄ede otụk Ete nnyịn eke heaven. Enye edi Abasi emi enyenede “esịt mbọm.” (Luke 1:78) Jesus ama atua mme anana-mfọnmma owo mbọm kpa nte Ete esie esituade. (Mark 1:40-42; 6:30-34) Ata mme Christian ẹdomo ndikpebe Ete mmọ eke heaven. Mmọ ‘ẹsifọn ido ye kiet eken, ẹnyụn̄ ẹtua owo mbọm’ nte Bible etemede.—Ephesus 4:32.

Kere se ikọwọrọde ete kiet emi ekerede Felipe. Usen kiet ke ini enye akakade utom, enye ama okop ata ọkpọsọn̄ ubiak ke edem nte n̄kpọ eke ẹtọde enye usam. Ẹma ẹsọsọp ẹmen enye ẹka ufọkibọk. Ke mbiausọbọ ẹma ẹkeda ofụri hour itiaita ẹse enye idem, mmọ ẹma ẹdikụt ke enye enyene ata akamba unan ke esịt. Mmọ ẹma ẹdọhọ ke enye ididụhe uwem ibe minit 25, ntre ke ufọn idụhe ndisiak enye idem.

Mbọm Felipe ama anam ekemmọ Mme Ntiense emi ẹkedude do, ntre mmọ ẹma ẹsọsọp ẹmen enye ẹfehe ẹka ufọkibọk en̄wen. Ẹma ẹsọsọp ẹsiak enye idem do. Kpukpru mmọ ẹkesụk ẹdu do ye enye tutu ẹsiak enye idem ẹma. Felipe ama ọbọhọ. Ini ekededi  oro Felipe etide n̄kpọ emi, enye esinen̄ede okop inemesịt ke se ekemmọ Mme Ntiense ẹkenamde emi ẹnọ enye. Edi enye enen̄ede enịm ke Ete imọ eke heaven akanam mmọ ẹtua imọ mbọm. Felipe ọdọhọ ete: “Eketie nte n̄kpọ emi Abasi adade mi ke n̄kan̄ nte edima ete ọsọn̄ọ mi idem.” Ke akpanikọ, Jehovah esiwak nditua owo mbọm ke ndinam mme asan̄autom esie mi ke isọn̄ ẹtua owo mbọm n̄ko.

Ete Nnyịn Ekpeme Nnyịn

Ke ini n̄kpọ oyomde ndinam ekpri eyenọwọn̄, enye esifehe ebịne ete esie mbak n̄kpọ idinam enye. Idem idinyekke eyen oro aba ke ndondo oro ete esie afatde enye akama. Jesus ama enen̄ede ọbuọt idem ke Jehovah eyekpeme imọ ntre. (Matthew 26:53: John 17:15) Nnyịn n̄ko imekeme ndibuọt idem ke Ete nnyịn eke heaven eyekpeme nnyịn. Jehovah ekpeme nnyịn mfịn akpan akpan ke n̄kan̄ eke spirit. Oro ọwọrọ ke enye ọnọ nnyịn kpukpru se iyomde mbak n̄kpọ ndomokiet ididian̄ade nnyịn ikpọn̄ enye inyụn̄ ibiat itie ufan nnyịn ye enye. Item Bible edi usụn̄ kiet oro enye ekpemede nnyịn. Ke ini nnyịn ibọde item Bible, etie nte n̄kpọ eke Jehovah asan̄ade nnyịn ke edem ete: “Ọkpọusụn̄ edi emi. Mbufo ẹsan̄a ke esịt.”—Isaiah 30:21.

Da Tiago ye nditọeka esie Fernando ye Rafael ke uwụtn̄kpọ. Mmọ mbita ẹkedi mbon n̄kaikwọ ye unek. Esịt ama enen̄ede enem mmọ ke ini ẹkedọhọde mmọ ẹdibre ikwọ ke ọwọrọetop ufọkunek São Paulo ke Brazil. Eketie nte mmọ ẹmọn̄ ẹforo. Edi ekemmọ Ntiense ama odụri mmọ utọn̄ aban̄a se edidụk ndụk ye mbon oro mîbakke Abasi ekemede ndida ndi. (Mme N̄ke 13:20) Enye ama owụt ufọn edinam item Bible ke nditịn̄ se ikọwọrọde imọ. Enye ama ọdọhọ mmọ ke utọ ndụk emi akanam eyeneka imọ anam idiọkn̄kpọ. Emi ama anam Tiago ye nditọeka esie ẹwọrọ ẹkpọn̄ n̄kaikwọ oro. Kpukpru mmọ mbita ẹdidi mme ọkwọrọikọ ofụri ini idahaemi. Mmọ ẹnịm ke ndikanam item Bible ama ekpeme mmimọ, inyụn̄ iyakke n̄kpọ ekededi anam mmimọ idue Abasi.

Ete Nnyịn eke Heaven Esitụnọ Nnyịn

Eti ete esitụnọ nditọ esie sia enye oyomde mmọ ẹwọrọ n̄kpọ ke ini iso. (Ephesus 6:4) Utọ ete oro isidiaha ndisịme, edi enye isinyụn̄ ifiomoke nditọ esie. Kpasụk ntre, esiyom Ete nnyịn eke heaven otụnọ nnyịn ndusụk ini. Edi enye esitụnọ nnyịn kpukpru ini ke ima inyụn̄ ifiomoke nnyịn. Jesus okonyụn̄ etie nte Ete esie, enye ikofiomoke mme mbet esie idem ke ini mmọ mîkọsọpke inam  se enye etịn̄de.—Matthew 20:20-28; Luke 22:24-30.

Kpan̄ utọn̄ kop nte ete kiet emi ekerede Ricardo okowụtde esịtekọm aban̄a nte Jehovah okotụnọde imọ ke ima. Ete Ricardo ekefehe ọkpọn̄ enye ke ini enye edide eyen ọfiọn̄ itiaba kpọt. Ke Ricardo ama okokpon ebe isua 12, unana ete ama esịn enye ke ediwak mfịna. Enye ama esinam ndiọi n̄kpọ, ndien esịt ama ọtọn̄ọ ndimia enye ufen. Ke enye ama ekedi edifiọk ke nte ikodude uwem ikekemke ye se Bible etemede, enye ama eketịn̄ mfịna esie ọnọ mbiowo esop mmọ. Mbiowo emi ẹma ẹda Bible ẹnọ enye ntụnọ ke ima. Kpa ye oro Ricardo ekenen̄erede ama onyụn̄ ọbọ ntụnọ emi, esịt okosụk amamia enye ufen ke ntak n̄kpọ emi enye akanamde—enye ikekemeke ndide idap, akatua eyet eyet, onyụn̄ enen̄ede ofụhọ. Ke akpatre, enye ama edifiọk ke ntụnọ oro ẹkenọde imọ okowụt ke Jehovah ke amama imọ. Enye ama editi ikọ Mme Hebrew 12:6 emi ọdọhọde ete: “Koro Jehovah otụnọde owo eke enye amade.”

Akpana iti ke ntụnọ idịghe sụk ndimia owo ufen, m̀mê ndisua nnọ anamidiọk. Bible owụt n̄ko ke ntụnọ abuana unọ ukpep. Mmọdo, edima Ete nnyịn eke heaven ekeme nditụnọ nnyịn ke ndiyak nnyịn ibọ utịp ndudue nnyịn. Edi Bible owụt ke ntụnọ Abasi esikpep nnyịn ndinam se inende. (Mme Hebrew 12:7, 11) Ke akpanikọ, Ete nnyịn eke heaven enen̄ede oyom n̄kpọ ọfọn ye nnyịn, ntak edi oro enye esitụnọde nnyịn.

Ete Nnyịn Eke Heaven Esibọk Nnyịn

Edima ete esibọk ubon esie ke ndinọ se mmọ ẹyomde. Jehovah esinam kpasụk ntre n̄ko. Jesus ọkọdọhọ ete: “Ete mbufo eke heaven ọfiọk ke mbufo ẹmeyom kpukpru n̄kpọ emi.” (Matthew 6:25-34) Jehovah ọn̄wọn̄ọ ete: “Ndidehedei n̄kpọn̄ fi, ndinyụn̄ nsịnke fi.”—Mme Hebrew 13:5.

Mma kiet emi ekerede Nice ama edikụt ke ikọ emi edi akpanikọ ke ini ẹkesiode ebe esie ke utom. Ikebịghike enye mma emi ọkọkpọn̄ eti utom emi enye ekesinamde man ekeme ndinyene ini nse mban̄a nditọiban esie iba nnyụn̄ n̄keme ndisịn idem ke n̄kpọ Abasi. Idahaemi, nso ke mmọ ẹdida idu uwem? Enye ama ọbọn̄ akam ọnọ Jehovah. Ke ndan̄nsiere, ebe esie ama aka itieutom oro ete ikatan̄ n̄kpọ imọ inyọn̄. Edi idem ama akpa enye ndikop eteutom esie ọdọhọde ke imenyene utom en̄wen ndinọ enye. Omokụt do ke ekedi ẹsio ebe Nice ke utom mfịn, n̄kpọn̄ enye enyene utom en̄wen. Nice ye ebe esie ẹma ẹkọm Ete mmọ eke heaven ke mfọnido esie. Emi owụt ke edima Ete nnyịn eke heaven emi edide Andibọk nnyịn ikemeke ndifre mme anam-akpanikọ asan̄autom esie.

Ndiwụt Esịtekọm Mban̄a Ima Abasi

Ke akpanikọ, inua ikemeke ndibụk adan̄a nte Ete nnyịn eke heaven amade nnyịn! Ke ini ikerede iban̄a nsio nsio n̄kpọ oro Jehovah anamde ndiwụt ke idi edima Ete nnyịn—ndinyịme nnyịn, ndikop nnyịn mbọm, ndikpeme nnyịn, nditụnọ nnyịn, nnyụn̄ mbọk nnyịn—kpukpru emi ẹwụt ke Jehovah edi mfọnn̄kan Ete oro owo ekededi ekemede ndinyene!

Didie ke ikpowụt esịtekọm ke adan̄a ima emi Ete nnyịn eke heaven amade nnyịn? Edi ke ndisịn ukeme n̄kpep ekese mban̄a enye ye se enye aduakde. (John 17:3) Ke ndidu uwem ekekem ye uduak esie. (1 John 5:3) Ke ndinyụn̄ mma mme owo nte Abasi amade nnyịn. (1 John 4:11) Edieke inamde kpukpru emi, nnyịn iwụt ke Jehovah edi Ete nnyịn, ye nte ke edi ata akwa ukpono ndidi nditọ esie.

[Mme Ikọ Idakisọn̄]

[Se ẹwetde ke ikpọ abisi ke page 19]

Adan̄a nte itịmde idiọn̄ọ orụk Ete emi Jehovah edide, ntre ke iditịm isan̄a ikpere enye inyụn̄ inen̄ede ima enye

[Se ẹwetde ke ikpọ abisi ke page 22]

Nnyịn iwụt ke Jehovah edi Ete nnyịn, ye nte ke edi ata akwa ukpono ndidi nditọ esie

[Ekebe/​Mme ndise ke page 21]

NSIO NSIO N̄KPỌ ORO JEHOVAH ANAMDE NDIWỤT KE IDI EDIMA ETE

ENYỊME NNYỊN

OKOP MBỌM

EKPEME NNYỊN

OTỤNỌ NNYỊN

ỌBỌK NNYỊN