¿Mbaʼépa repensa rehendúvo pe ñeʼẽ “ru”? ¿Repensápa peteĩ kuimbaʼe ohayhu ha ojepyʼapývare ifamília rehe, térãpa peteĩ nokumpliséivare irresponsavilida ha ivioléntova? Ñambohovái hag̃ua koʼã porandu, odependéta mbaʼeichagua túvapa jaguerekorakaʼe.

JESÚS heʼivaʼekue “che ru” oñeʼẽ jave Ñandejárandi térã oñeʼẽ jave hese. a Ha ohechaukárõ guare hemimboʼekuérape mbaʼéichapa oñemboʼevaʼerã, heʼi: “Peñemboʼévo, peje: ‘Che Ru’” (Lucas 11:2). Péro ¿mbaʼeichagua túvapa Jehová? Iñimportanteterei jaikuaa upéva, ¿mbaʼérepa? Jaikuaa porãvévo mbaʼeichagua túvapa Jehová, jahayhuvéta chupe ha ñañemoag̃uivéta hese.

Jesús oikuaa porã rupi ñande Ru yvagapeguápe ikatu oñeʼẽ ñandéve hese. Haʼe akóinte oĩ porã hendive, upévare heʼivaʼekue: “Pe Túva añoite oikuaa porã pe Taʼýrape ha pe Taʼýra añoite oikuaa porã pe Túvape. Ha pe Taʼýra  omombeʼuséramo ambue tapichápe mávapa pe Túva, upéva oikuaa porãta avei chupe” (Mateo 11:27, NM). Upéicharõ, ñahendúramo añoite pe Taʼýrape, jaikuaa porãta ñande Rúpe.

Jesús heʼivaʼekue Jehová rehe: “Ñandejára ohayhuetereígui pe múndo omeʼẽ Itaʼýra peteĩete, ani hag̃ua oñehundi opaite umi hese ojeroviáva, ohupyty hag̃ua guei jeikove opaveʼỹva” (Juan 3:16, NM). Ko téysto ohechauka porã mbaʼeichaitépa ñande Ru ñanderayhu (1 Juan 4:8). Ñandejára heta hendáicha ohechauka upéva. Pór ehémplo, ñandeguerohory, ñandeporiahuvereko, oñangareko ñanderehe, ñandekorrehi ha omeʼẽ ñandéve ñaikotevẽva.

Ñandeguerohory

Tuvakuéra ohechakuaa ha oguerohorýramo umi mbaʼe porã ifamília ojapóva, omokyreʼỹ ha omoñeñandu porãta chupekuéra. Epensamíntena mbaʼeichaitépa oiméne Jesús ovyʼáraʼe ohendúvo Itúvape heʼi: “Kóva hína che Raʼy ahayhuetéva ha aguerohorýva” (Mateo 3:17, NM). Jesús ohechauka porã Jehová ñanderayhu ha oguerohoryha jajapóva. Haʼe heʼi: “Che ru ohayhúta upe cherayhúvape” (Juan 14:21). Ajépa ñanemokyreʼỹ ha ñanembovyʼaite jaikuaávo ko mbaʼe. Péro oĩ peteĩ ndoipotáiva jahechakuaa upéva.

Satanás ogueroviaukase ñandéve Jehová nomombaʼéi ha ndoguerohoryiha jajapóva. Oipota ñapensa nañamereseiha haʼe ñandeguerohory, ha oaprovecha ohecháramo ñande edáma, nañaneresãivéi, ñañeñandu vai nosẽigui ñandéve jajaposéva térã ndoikóigui peteĩ mbaʼe ñahaʼarõháicha. Jahechamína Lucas rehe oikovaʼekue. Haʼe ningo opensa nomereseiha Ñandejára oguerohory chupe. ¿Mbaʼérepa? Imitãme isy ha itúva omboʼe chupe heta mbaʼe porã, péro haʼekuéra voi ndojapói upéva, ha ikatu oime upévare ijetuʼúraʼe Lúcaspe oreko hag̃ua Ñandejárape iñamígoramo. Haʼe ningo opensaʼỹre heʼi térã ojapóma peteĩ mbaʼe ha pyʼỹinte oikovai ambue hapicha ndive. Péro mbeguekatúpe, hembireko ipasiénsia ha oipytyvõ rupi chupe ojejokokuaave. Upévare, chupe g̃uarã hembireko haʼe peteĩ “vendisión térã jopói Ñandejára omeʼẽva chupe”. Tiémpo rire, Lucas ohechakuaa ‘Cristo Jesús ou hague ko yvy ape ári pekadorkuérape osalva hag̃ua’ (1 Timoteo 1:15, BNP). Ojepyʼamongetávo mbaʼeichaitépa Jehová ohayhu ha oguerohory chupe, oñeñandu porã ha ovyʼa.

Ikatu sapyʼánte repensa Jehová nanderayhuiha ha arakaʼeve nerembovyʼamoʼãiha chupe. Upéicha jave, rejepyʼamongetavaʼerã Romanos 8:31-39 heʼívare. Upépe apóstol Pablo heʼi mbaʼevete “ndaikatumoʼãiha ñandepeʼa Ñandejára mborayhúgui, ojehechaukáva ñande Ruvicha Cristo Jesús rupive”. b

Ñandeporiahuvereko

Ñande Ru yvagapegua “ñandeporiahuvereko” ha ontende umi mbaʼe jahasáva (Lucas 1:78). Jesús ohechauka avei oporoporiahuverekoha otrata porãvo umi héntepe ha upéicha osegi Itúva ehémplo (Marcos 1:40- 42; 6:30-34). Umi kristiáno añetegua oñehaʼãmbaite avei osegi Jehová ehémplo. Ohechakuaa hikuái ojapovaʼerãha ko konsého: “Pende pyʼaporã uvei oñondive, ha pejoporiahuvereko” (Efesios 4:32, BNP).

Jahechamína mbaʼépa oiko Felipe rehe. Peteĩ árape, ohokuévo itravahohápe hasyeterei sapyʼa chupe ilómo, haʼetévaicha voi ojekutu mbaʼéva. Pyaʼe ojegueraha chupe ospitálpe. Upépe 8 óra pukukue ojejapo chupe estúdio ha upépe ae umi doktór ohechakuaa peteĩ ivéna poguasu (aorta) osẽva ikorasõgui ojedesgarra hague hyepy gotyo. Umi doktór  heʼi Felipe 25 minútontema oikovetaha ha ojopera reitamaha.

Upérõ Felipe ndive oĩ umi ermáno oservíva avei Jehovápe. Haʼekuéra oiporiahuvereko Felípepe ha ogueraha chupe ótro ospitálpe. Upépe umi doktór pyaʼe oopera chupe, umi ermáno katu ohaʼarõ upe aja ha amo ipahápe osẽ porãiterei pe operasión. Felipe oagradeseterei umi ermáno ohayhu ha ojepyʼapy haguére hese. Haʼe ohechakuaa Itúva yvagapegua omomýi hague umi ermánope oiporiahuvereko hag̃ua chupe. Felipe heʼi: “Akóinte añandu Ñandejára oĩha che ykére ha chemombarete peteĩ túvaicha”. Jehová ohechauka oporoporiahuverekoha omomýivo isiervokuérape otrata hag̃ua hapichakuérape, haʼe ojapoháicha.

Oñangareko ñanderehe

Peteĩ mitã ningo ojecha vaírõ pyaʼe oñemoag̃ui itúvare oikuaágui oñangareko porãtaha hese. Upéicha avei, Jehová oñangareko itaʼyrakuérare ha Jesús ojeroviavaʼekue oñangareko porãtaha hese (Mateo 26:53; Juan 17:15). Ñande ikatu avei ñañemoag̃ui ñande Ru yvagapeguáre oñangareko hag̃ua ñanderehe, haʼe ningo koʼág̃a ñanepytyvõ ñaime porã hag̃ua hendive. Upearã omeʼẽ ñandéve opa mbaʼe ñaikotevẽva ani hag̃ua ñasẽ hapégui ha ndajarekovéi chupe ñane amígoramo. Umíva apytépe, omeʼẽ ñandéve Iñeʼẽ, la Biblia. Jajapóramo umi konsého oĩva pype, haʼetéta ñahendúva Jehovápe heʼírõ ñandéve: “Kóva hína pe tape, tapeho koʼárupi” (Isaías 30:21).

Peteĩ mitãrusu hérava Tiago oĩvaʼekue peteĩ grúpo ombopúvape rock, oĩ avei hendive iñermáno Fernando ha Rafael. Haʼekuéra ovyʼaiterei oikuaárõ guare igrupokuérape ojeporavo hague ombopu hag̃ua peteĩ lugár iñimportantevévape oĩva São Páulope (Brasil). Haʼetévaicha oho porãitereítava chupekuéra, péro peteĩ ermáno oservíva avei Jehovápe heʼi mbohapyvévape ojeheʼa meméramo umi ndoservírivare Jehovápe ogueraha vaitaha chupekuéra (Proverbios 13:20). Oñemoñeʼẽ hag̃ua chupekuéra oiporu la Biblia ha peteĩ mbaʼe haʼe voi ohechavaʼekue oiko. Haʼe omombeʼu iñermáno teete ojeheʼa rupi umi ndohayhúivare Jehovápe ou hague hekovai. Tiago ha iñermanokuéra odesidi ohejaite pe grúpo. Koʼág̃a, Tiago, Fernando ha Rafael oiporuve itiémpo predikasiónpe. Ohechakuaa hikuái ojapo rupi la Biblia heʼíva oipytyvõha chupekuéra ani hag̃ua opyta vai Jehová renondépe.

Ñandekorrehi

Peteĩ túva oipotaitereígui ifamília osẽ porã, okorrehímante chupekuéra (Efesios  6:4). Ndohejareíri chupekuéra mbaʼeve, péro arakaʼeve naipyʼahatãi. Upéicha avei, ñande Ru yvagapegua sapyʼánte ohecha tekotevẽha ñandekorrehi, péro ojapo mborayhúpe ha arakaʼeve nañandetratavaíri. Jesús avei okorrehi jave hemimboʼekuérape, osegi Itúva ehémplo ha arakaʼeve ndotratavaíri chupekuéra nokambiapyaʼéiramo jepe (Mateo 20:20-28; Lucas 22:24-30).

Jahechamína Ricardo ehémplo, haʼe ohechakuaa Jehová ohayhúgui okorrehiha chupe. Orekórõ guare siete mesemínte itúva ohejavaʼekue chupe. Upéi imitãrusúpe oikotevẽtereivaʼekue itúvare ha ojapo heta mbaʼe noĩporãiva. Ohechakuaávo ndoikoiha Ñandejára Ñeʼẽ heʼiháicha, oñepyrũ ojopy chupe ikonsiénsia. Upévare odesidi oñeʼẽ ansianokuéra kongregasionpegua ndive, ha haʼekuéra la Biblia rupive mborayhúpe oñemoñeʼẽ porã chupe. Ricardo iñeʼẽrendu ha oagradeséramo jepe ojekorrehi haguére chupe, akóinte oñeñandu vai umi mbaʼe ojapovaʼekuére, hasẽháre oiko, ndokevéi pyharekue ha oñedeprimi. Péro upéi tuichaiterei ombopyʼaguapy chupe Hebreos 12:6 heʼíva: “Ñandejára niko ohekomboʼe [okorrehi] umi ohayhúvape”. Ko téysto oipytyvõ chupe ohechakuaa hag̃ua Jehová ohayhúguinte okorrehi hague chupe.

Ñanemanduʼavaʼerã peteĩ ojekorrehíva ndahaʼeiha oñeñemoñeʼẽntéva chupe térã ojekastiga. La Bíbliape oñeñeʼẽ jave peteĩ ojekorrehívare ohechauka oñehekomboʼeha. Sapyʼánte ñande Ru yvagapegua ñandekorrehi ohejávo jahasa asy peteĩ tiémpore ñane rembiapo vaikuére. Péro la Biblia heʼi upéicha ñanerekomboʼeha ñakambia hag̃ua tekotevẽhápe (Hebreos 12:7, 11). Jehová ningo ñandekorrehi oipotágui oho porã ñandévente.

Omeʼẽ ñandéve ñaikotevẽva

Peteĩ túva ohayhúva ifamíliape ningo ohechakuaa mbaʼépa oikotevẽ ha oñehaʼãmbaite omoĩ chupekuéra, ha Jehová upeichaite avei. Jesús heʼivaʼekue: “Pende Ru yvagapegua oikuaa voi peẽ peikotevẽha opa koʼã mbaʼe” (Mateo 6:25-34, NM). Jehová opromete avei: “Ndorohejaichéne ha noromotyreʼỹichéne arakaʼeve” (Hebreos 13:5, BNP).

Nice ohechakuaa añeteha ko téysto heʼíva iména operdérõ guare itraváho. Upérõ Nice oheja ramoite itraváho ohasave hag̃ua tiémpo umi mokõi imembykuña ndive ha opredikave hag̃ua. ¿Mbaʼépa ojapóta hikuái koʼág̃a? Nice ojerure Jehovápe oipytyvõmi hag̃ua chupekuéra, ha upe koʼẽme iména ohóvo ogueru hag̃ua ikosakuéra itravahohágui, ipatrón omeʼẽ jey chupe itravahorã. Amo ipahápe ni un día ndopytái travahoʼỹre, ha upévare oagradeseterei hikuái Itúva yvagapeguápe. Koʼãichagua tembiasakue ohechauka ñandéve Jehová ñanderayhuetereiha ha akóinte omeʼẽtaha ñandéve umi mbaʼe ñaikotevẽva.

Jaagradesékena ñande Ru yvagapeguápe ñanderayhu haguére

Jaʼepátaramo mbaʼeichaitépa ñande Ru Jehová ñanderayhu, ipukúta. Haʼe ningo ñandeguerohory, ñandeporiahuvereko, oñangareko ñanderehe, ñandekorrehi ha omeʼẽ ñandéve ñaikotevẽva. ¿Ajépa koʼã mbaʼe porã ohechauka ñandéve ndaiporiha ñande Ru Jehová rasaharã?

¿Mbaʼépa jajapovaʼerã jahechauka hag̃ua ñamombaʼeha pe mborayhu Jehová ohechaukáva? Ñepyrũrã ñañehaʼãvaʼerã jaikuaa porãve Ñandejárape ha hembipota (Juan 17:3). Avei jaikovaʼerã haʼe heʼiháicha ñandéve (1 Juan 5:3). Jasegivaʼerã iñehémplo jatratávo mborayhúpe ñande rapichakuérape (1 Juan 4:11). Jajapóvo koʼã mbaʼe, jahechaukáta jahechaha Jehovápe ñande Rúramo ha tuichaiterei mbaʼeha ñandéve jaiko itaʼýraramo.

[Nóta]

[Komentário oĩva páhina 19-pe]

Jaikuaa porãvévo mbaʼeichagua túvapa Jehová, jahayhuvéta chupe ha ñañemoag̃uivéta hese

[Taʼanga ha rrekuádro oĩva páhina 21-pe]

PETEĨ TÚVAICHA JEHOVÁ OHECHAUKA ÑANDERAYHUHA

ÑANDEGUEROHORY

ÑANDEPORIAHUVEREKO

OÑANGAREKO ÑANDEREHE

ÑANDEKORREHI

OMEʼẼ ÑANDÉVE ÑAIKOTEVẼVA