ʻPe a Outou Tatalo, ia Faapea Atu, le Tamā e’

“Tamā.” O le ā le uiga o lenā upu iā te oe? Pe e te mafaufau i se tane alofa faapelepele, e manatu mamafa mo le lelei o lona aiga? Po o se tane faatamala ma e faasauā? E faalagolago lava le tali i le ituaiga o tane e iai lou tamā.

NA MASANI ona faaaogā e Iesu le upu “Tamā” pe a talanoa atu i le Atua, pe e uiga foʻi iā te Ia. * Ina ua aʻoaʻo ona soo e tatalo, na faapea atu Iesu: “Pe a outou tatalo, ia faapea atu, Lo matou Tamā e.” (Luka 11:2) Ae e faapeʻī le ituaiga o tamā e iai Ieova? E matuā tāua le tali o lenei fesili. Aiseā? O le tele lava o lo tatou malamalama i le ituaiga o tamā e iai Ieova, o le tele foʻi lenā o lo tatou vavalalata atu ma lo tatou alolofa iā te ia.

E leai se tasi e sili atu ona agavaa e faamatala mai iā i tatou lo tatou Tamā i le lagi, nai lo o Iesu. Sa ia mauaina se faiā vavalalata ma lona Tamā. Ua faapea mai Iesu: “E leai se tasi e iloa lelei le Atalii, ua na o le Tamā. E leai foʻi se tasi e iloa lelei le Tamā, ua na o le Atalii ma sē ua loto le Atalii e faaali i ai.”  (Mataio 11:27) O lea la, o le auala sili e iloa ai le Tamā, e ala lea i le Alo.

O le ā e tatou te aʻoaʻoina mai iā Iesu, e uiga i lo tatou Tamā i le lagi? Mātau le fetalaiga lenei a Iesu: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” (Ioane 3:16) Ua faaalia i upu nei le uiga sili o lo tatou Tamā i le lagi, o le alofa. (1 Ioane 4:8) E tele auala ua faaalia mai ai e Ieova lona alofa, e pei o lona finagalo malie, alofa faapelepele, puipuia ma aʻoaʻia i tatou, faapea ma le tausia o o tatou manaʻoga faaletino.

Mautinoa i le Mauaina o le Finagalo Malie o lo Tatou Tamā

E faamalosia ma faalaeiauina fanau pe a malilie o latou mātua i mea e latou te faia. Seʻi mafaufau i le faalaeiauina o Iesu ina ua faalogo atu o faapea mai lona Tamā: “O loʻu Atalii pele lenā, o lē ua malie i ai loʻu loto.” (Mataio 3:17) Ae ua faamautinoa mai foʻi e Iesu, le alofa ma le finagalo malie o lo tatou Tamā. Na fetalai o ia: “O lē e alofa mai iā te aʻu, e alofa foʻi loʻu Tamā iā te ia.” (Ioane 14:21) Maʻeu ni upu faamāfanafana! Peitaʻi, e iai se tasi e lē o manaʻo e te maua lenā faamāfanafanaga.

E taumafai Satani e faatupu iā i tatou ni manatu e faapea, atonu e lē o finagalo malie mai lo tatou Tamā i le lagi. E na te saʻili se auala e faatalitonu ai i tatou, e lē mafai ona finagalo malie mai le Atua. E masani ona ia faia faapea i taimi e sili ona tatou vaivai ai, e pei o le soifua matua, maʻi, tino vaivai, faalogona o le lē taulau, pe ona ua faia e se isi se mea e tatou te lē fiafia ai. Mātau le mea na tupu i le alii talavou o Lucas, o lē na lagona e lē o finagalo malie mai le Atua iā te ia. Na ia faapea mai, a o talavou, na matuā suia lava uiga o ona mātua, ma na lē toe ano i mea e sili ona tāua ia na la aʻoaʻoina ai o ia. Atonu o le māfuaaga lenā na faigatā ai ona mafuta vavalalata atu Lucas i lona Tamā i le lagi. E lē gata i lea, o ona uiga osovale e masani ona oo ai i faafitauli, aemaise i lona va ma isi. Peitaʻi, na mafai ona pulea ona uiga osovale ona o le onosaʻi ma faalaeiauga a si ana avā, o lē na ia taʻua o se faamanuiaga ma o se meaalofa mai i le Atua. Na oo ina iloa e Lucas, “na maliu mai Keriso Iesu i le lalolagi, na te faaolaina o e agasala.” (1 Timoteo 1:15) Na taʻua e Lucas, o le manatunatu loloto i le alofa o le Atua ma lona finagalo malie mai, na ia maua ai le fiafia ma le faamalieina.

Pe afai e te masalosalo po o alofa ma finagalo malie mai Ieova, e ono faalaeiauina la oe pe a e faitau ma manatunatu loloto i le Roma 8:31-39. Ua faamautinoa mai ma le alofa e le aposetolo o Paulo, e leai se mea e “faateʻaeseina i tatou mai i le alofa o le Atua ua iā Keriso Iesu, lo tatou Alii.” *

O se Tamā e Alofa Faapelepele

O loo silafia mai e lo tatou Tamā “alofa faapelepele” i le lagi o tatou mafatiaga. (Luka 1:78) Na faaalia mai e Iesu le alofa faapelepele o lona Tamā i tagata lē lelei atoatoa. (Mareko 1:40-42; 6:30-34) E taumafai foʻi Kerisiano moni e faaaʻoaʻo i le alofa faapelepele o lo latou Tamā i le lagi, ma faatatau le apoapoaʻiga a le Tusi Paia ina “ia agalelei le tasi i le isi, ia māfana lo outou alofa.”—Efeso 4:32.

Mātau le mea na tupu i se tane e igoa iā Felipe. I se tasi o aso a o alu atu i lana galuega, na faafuaseʻi ona ia lagona se tigā tutui e pei o loo tatui e se isi lona tua, ma na faatopetope atu loa i le falemaʻi. Ina ua māeʻa se suʻesuʻega na faia mo le valu itula, ona faapea atu lea o fomaʻi, ua masae le ʻafuʻafu pito i totonu o lona alātoto autū. Na latou faapea atu e toe 25 minute o loo totoe o lona soifua, ma e lē aogā ona fai se taotoga.

Na iai i inā nisi o uso tapuaʻi o Felipe, ma o le alofa faapelepele na uunaʻia ai i latou e gaoioi. Na vave ona latou faia ni fuafuaga e siitia atu Felipe i se isi falemaʻi ma faia ai se taotoga,  ma faatalitali ai i inā seʻia oo ina uma. O le mea e fiafia ai, ona na manuia le taotoga o Felipe. Pe a toe mafaufau i lenā mea na tupu, e lotofaafetai Felipe i le alofa faapelepele na faaalia e ona uso tapuaʻi. Ae na talitonu o ia, o lona Tamā i le lagi na uunaʻia ona uso e faaalia lea alofa. Na ia faapea mai: “Na pei le Atua o se tamā alofa o loo iai pea i oʻu autafa e faamalosia aʻu.” O le mea moni, e masani ona faaalia e Ieova lona alofa faapelepele e ala i le uunaʻia o ana auauna i le lalolagi, ina ia faaalia lenā lava uiga.

E Saunia e lo Tatou Tamā le Puipuiga

E sulu atu se tamaitiiti i lona tamā mo se puipuiga pe a ia iloa ua iai i se tulaga lamatia. E na te lagona le saogalemu pe a fusi atu o ia ma le alofa e lona tamā. Na faatuatua atoatoa atu Iesu iā Ieova, e puipuia o ia. (Mataio 26:53; Ioane 17:15) E tatou te lagona foʻi le saogalemu i le puipuiga a lo tatou Tamā i le lagi. O le puipuiga ua saunia e Ieova e autū atu i le itu faaleagaga. I se isi faaupuga, e na te puipuia i tatou mai i le faaleagaina i le itu faaleagaga, i le faaauupegaina lea o i tatou i mea e manaʻomia e ʻalofia ai lamatiaga, ma puipuia ai la tatou faauōga ma ia. O se tasi o auala ua ia saunia ai le puipuiga, e ala mai lea i fautuaga a le Tusi Paia. Pe a tatou maua na ituaiga o fautuaga, e pei o loo savali mai Ieova i o tatou tua ma faapea mai: “O le ala lenei. Ia outou savavali ai.”—Isaia 30:21.

Mātau le faaaʻoaʻoga a Tiago, ma ona uso o Fernando ma Rafael, o ē na auai i se ʻaufāʻili. Na matuā fiafia i latou ina ua filifilia e tātā i se tasi o fale koneseti taʻutaʻua i São Paulo, i Pasili. E foliga mai o le a taulau manuia i latou. Ae na lapataʻia i latou e se tasi o o latou uso tapuaʻi, e uiga i lamatiaga o le faauō atu i ē e lē o ola e tusa ma tapulaa a le Atua. (Faataoto 13:20) Na ia faamamafa atu le moni o lenei fautuaga a le Tusi Paia, e ala i le faamatala o se mea na tupu i lona lava uso, o lē na faia ni amioga e lē fiafia i ai le Atua, ona o le sesē o tagata na faauō i ai. Na filifili Tiago ma ona uso e tuua le ʻaufāʻili, ma ua avea nei i latou o ni Kerisiano e talaʻi faataimi atoa. E talitonu i latou, o le faatatauina o fautuaga o loo i le Afioga a le Atua, ua puipuia ai mai i le faaleagaina i le itu faaleagaga.

E Aʻoaʻia i Tatou e lo Tatou Tamā i le Lagi

E aʻoaʻi e se tamā alofa lana fanau, ona e manatu mamafa i le ituaiga o tagata o le a iai i latou. (Efeso 6:4) Atonu e maumauaʻi lenā tamā, ae e lē taitai ona faasauā pe a faasaʻoina lana fanau. I se tulaga taitutusa, e iai taimi atonu e finagalo ai lo tatou Tamā i le lagi ua tatau ona aʻoaʻia i tatou. Ae o aʻoaʻiga a le Atua e aumaia pea i se auala alofa ma e lē  faasauā. I le pei o lona Tamā, e leʻi faasauā Iesu, e oo lava i taimi e leʻi vave ai ona usitaʻia e ona soo ana faasaʻoga.—Mataio 20:20-28; Luka 22:24-30.

Mātau le auala na talisapaia ai e se tane e igoa iā Ricardo, le auala na aʻoaʻia ai o ia ma le alofa e Ieova. Na tuua Ricardo e lona tamā a o fitu masina lona matua. A o talavou, na ia matuā lagona le leaga o le leai o se tamā. Na ia faia ni amioga leaga, ma na taʻusala ai o ia e lona lotofuatiaifo. I le iloaina e lē o ōgatusa lona olaga ma tapulaa tau amio a Kerisiano, na ia filifili ai loa e talanoa i toeaina o lana faapotopotoga. Na avatu e toeaina iā te ia ni fautuaga mai i le Tusi Paia. Na talisapaia e Ricardo le aʻoaʻiga, ae ona o mea sa ia faia, o lea na matuā mafatia ai, lē maua sana moe, ma e tagi i taimi uma. Mulimuli ane na malamalama o ia, o le aʻoaʻiga na tuu atu iā te ia ua iloa ai o loo alofa mai pea Ieova iā te ia. Na manatua e Ricardo upu o loo i le Eperu 12:6 e faapea: “E aʻoaʻia e Ieova o lē e alofa i ai.”

E lelei pe a tatou manatua, o aʻoaʻiga e lē na o se faasalaga po o se faasaʻoga mo mea sesē. I le Tusi Paia, e fesootaʻi atu foʻi aʻoaʻiga i se toleniga. O lea la, e ono aʻoaʻia i tatou e lo tatou Tamā alofa i le lagi, e ala i le tuu mai o se taimi e mafatia ai i iʻuga lē lelei o a tatou mea sesē. Peitaʻi, ua faailoa mai i le Tusi Paia, o lana aʻoaʻiga ua toleniina ai i tatou, ma fesoasoani e ui i le ala saʻo. (Eperu 12:7, 11) Ioe, e manatu mamafa mai lo tatou Tamā mo lo tatou lelei, ma faasaʻo i tatou ina ia maua ai ni aogā.

Ua Saunia e lo Tatou Tamā o Tatou Manaʻoga Faaletino

E taumafai se tamā alofa e tausia manaʻoga faaletino o lona aiga. E faapena foʻi Ieova. Ua faapea mai Iesu: “Ua silafia e lo outou Tamā o i le lagi, o mea uma ia o loo outou manaʻomia.” (Mataio 6:25-34) Na folafola mai e Ieova e faapea: “Ou te lē tuua lava oe, ma ou te lē tuulafoaʻia lava oe.”—Eperu 13:5.

Na iloa e se fafine e igoa iā Nice le moni o na upu ina ua leai se galuega a lona toʻalua. Na faatoʻā uma lava ona tuua e Nice lana galuega e lelei le totogi, ina ia tele ai lona taimi e faaalu ma si a la fanau teine e toʻalua, faapea lana auaunaga i le Atua. O le a faapefea nei ona latou maua mea e ola ai? Na tatalo o ia iā Ieova. I le isi aso na sosoo ai, na alu atu ai lana tane i le fale faigaluega e tapena mai ana mea. Na faateʻia o ia ina ua faapea atu le pule o loo iai se isi galuega o loo avanoa mo ia! O lona uiga, na leai se galuega a le toʻalua o Nice i le isi aso, ae maua se isi ana galuega i le aso na sosoo ai. Na faafetaia e Nice ma lona toʻalua lo la Tamā i le lagi ona o tulaga fiafia ua oo i ai. Ua faamanatu mai e lenā mea iā i tatou, e lē taitai ona galo iā Ieova ana auauna faamaoni, auā o ia o le Atua alofa o Lē saunia mea.

Talisapaia le Alofa o lo Tatou Tamā

O le mea moni, e lē mafai e upu ona faamatala le tele o le alofa o lo tatou Tamā i le lagi! Pe a tatou manatunatu i le tele o auala ua faaalia ai lona alofa o se tamā, e pei o le mauaina o lona finagalo malie, o le alofa faapelepele, puipuiga, aʻoaʻiga, ma le saunia o o tatou manaʻoga, e mautinoa e tatou te faapea atu o ia o le Tamā silisili e lē mafaatusalia!

E faapefea ona faailoa atu lo tatou talisapaia o le alofa ua faaalia mai e lo tatou Tamā i le lagi? E ala i le faia o taumafaiga e iloa atili o ia ma lana fuafuaga. (Ioane 17:3) E tatau ona faaōgatusa o tatou olaga ma lona finagalo ma ona ala. (1 Ioane 5:3) E mafai ona tatou faaalia lona alofa i le auala e tatou te feutagaʻi ai ma isi. (1 Ioane 4:11) I nei auala uma, e mafai ona faaalia ai e tatou te manatu iā Ieova o lo tatou Tamā, ma o se faaeaga le avea ma ana fanau.

[Faaopoopoga i lalo]

[Faamatalaga faaopoopo i le itulau 19]

O le tele lava o lo tatou malamalama i le ituaiga o tamā e iai Ieova, o le tele foʻi lenā o lo tatou vavalalata atu ma lo tatou alolofa iā te ia

[Faamatalaga faaopoopo i le itulau 22]

E mafai ona faaalia ai e tatou te manatu iā Ieova o lo tatou Tamā, ma o se faaeaga le avea ma ana fanau

[Pusa/​Ata i le itulau 21]

E TELE AUALA UA FAAALIA MAI AI E IEOVA LONA ALOFA

FINAGALO MALIE

ALOFA FAAPELEPELE

PUIPUIA

AʻOAʻIA

TAUSIA MANAʻOGA FAALETINO