Naegbọn Jiwheyẹwhe Do Biọ Dọ Sinsẹ̀n-Basitọ Emitọn lẹ Ni Wlealọ hẹ Yisenọ Hatọ lẹ Kẹdẹ?
Kanbiọ Wehiatọ Mítọn lẹ Tọn
Naegbọn Jiwheyẹwhe Do Biọ Dọ Sinsẹ̀n-Basitọ Emitọn lẹ Ni Wlealọ hẹ Yisenọ Hatọ lẹ Kẹdẹ?
▪ Osẹ́n he Jiwheyẹwhe na Islaelivi lẹ bẹ gbedide ehe hẹn gando akọta he lẹdo yé lẹ go: “Hiẹ ma na basi alọwle lẹ po yé po gba; hiẹ ma na yí viyọnnu towe na hlan visunnu etọn gba, kavi na yí viyọnnu etọn hlan visunnu towe gba.” (Deutelonomi 7:3, 4) Naegbọn gbedide enẹ do yin nina?
Tintan, Jehovah yọnẹn dọ Satani jlo na hẹn omẹ Emitọn lẹ flu gbọn lilẹ́ yé biọ sinsẹ̀n-bibasi hlan yẹwhe lalo lẹ mẹ dali. Enẹwutu, Jiwheyẹwhe na avase dọ mayisenọ lọ lẹ “na gọ̀ visunnu towe sẹ̀ sọn hihodo mi mẹ, na yé nido nọ sẹ̀n yẹwhe devo lẹ.” Ehe sọgan hẹn nuhahun susu wá. Eyin Islaelivi lẹ jẹ yẹwhe devo lẹ sẹ̀n ji, yé na hẹn nukundagbe po hihọ́ Jiwheyẹwhe tọn po bu bo gbọnmọ dali jẹ alọ kẹntọ yetọn lẹ tọn mẹ po awubibọ po. To whelọnu lo, nawẹ akọta lọ sọgan wleawuna Mẹsia dopagbe lọ gbọn? E họnwun dọ lẹndai de wutu wẹ Satani do klọ Islaelivi lẹ nado wlealọ hẹ mayisenọ lẹ.
Awetọ, flindọ Jiwheyẹwhe nọ hò dopodopo omẹ etọn lẹ tọn pọ́n. E yọnẹn dọ ayajẹ po dagbemẹninọ dopodopo yetọn tọn po sinai do haṣinṣan pẹkipẹki he yé tindo hẹ ewọ he yin Jiwheyẹwhe yetọn ji. Be owhẹ̀ Jehovah tọn whẹ́n nado hanú gando nuyiwadomẹji agọ̀ alọwlemẹ mayisenọ lẹ tọn go ya? Lẹnnupọndo apajlẹ Ahọlu Sọlomọni tọn ji. E yọ́n avase he Jehovah na gando asi mayisenọ lẹ go dọmọ: “Yé na lẹ́ ayiha mìtọn do yẹwhe yetọn lẹ godo.” Na e tindo nuyọnẹn vonọtaun de wutu, e na ko lẹndọ emi ma tindo nuhudo ayinamẹ Jiwheyẹwhe tọn enẹ tọn, dọ e ma gando emi go. E gbẹkọ ayinamẹ lọ go. Etẹwẹ yin kọdetọn lọ? “Asi etọn lẹ sọ lẹ́ ayiha etọn . . . do yẹwhe devo lẹ godo.” Lehe e blawu do sọ! Sọlomọni lọsu hẹn nukundagbe Jehovah tọn bu bọ akọta lọ klan na nugbonọ-mayin etọn wutu.—1 Ahọlu lẹ 11:2-4, 9-13.
Mẹdelẹ sọgan lẹndọ e ma ylan to whelẹponu nado wlealọ hẹ mayisenọ de. Di apajlẹ, Malọni he yin Islaelivi de wlealọ hẹ Luti he yin Moabinu de, mẹhe wá lẹzun Jehovah sẹ̀ntọ akonka de. Ṣigba nudide owù tọn de wẹ e yin nado wlealọ hẹ Moabinu de. Malọni ma yin pipà na e wlealọ hẹ Moabinu de wutu gba; e kú to jọja-whenu, yèdọ etlẹ yin whẹpo Luti do wá lẹzun Jehovah sẹ̀ntọ. Kiliọni, nọvisunnu Malọni tọn wlealọ hẹ Olpa, Moabinu de he tẹdo “yẹwhe etọn” lẹ go. To vogbingbọn mẹ, Boazi wlealọ hẹ Luti to ojlẹ delẹ godo he ewọ lẹzun yisenọ de. To godo mẹ, Ju lẹ wá pọ́n Luti hlan taidi ‘Jiwheyẹwhe Ju lẹ tọn sẹ̀ntọ akonka’ de. Dona de wẹ alọwle Luti po Boazi po tọn yin na yé omẹ awe lẹ.—Luti 1:4, 5, 15-17; 4:13-17.
To whelọnu lo, be nuyọnẹnnu wẹ e yin nado nọ lẹndọ apajlẹ Malọni po Luti po tọn jẹagọdo ayinamẹ Jehovah tọn nado wlealọ hẹ yisenọ hatọ lẹ kẹdẹ ya? Nulinlẹnpọn to aliho enẹ mẹ na taidi alọdindlẹndo akọhotọ he dù akuẹ daho de nado dohia dọ akọhiho yin aliho dagbe de nado mọ akuẹ.
Biblu dotuhomẹna Klistiani lẹ to egbehe nado wlealọ “to Oklunọ mẹ kẹdẹ.” E na avase ma nado “biọ zẹgẹ he ma sọzẹn de glọ hẹ mayisenọ lẹ.” Klistiani nugbo he to alọwlemẹ dín to alọnu lẹ wẹ ayinamẹ ehe yin nina tlọlọ. Na mẹhe ko wlealọ hẹ mayisenọ lẹ, Biblu na ayinamẹ dagbe lẹ he na gọalọna yé nado pehẹ ninọmẹ yetọn po kọdetọn dagbe po. (1 Kọlintinu lẹ 7:12-16, 39; 2 Kọlintinu lẹ 6:14) Ayinamẹ mọnkọtọn lẹpo dohia dọ Jehovah Jiwheyẹwhe, yèdọ Dowatọ alọwle tọn, jlo dọ míwlẹ he yin sinsẹ̀n-basitọ etọn lẹ ni yin ayajẹnọ, vlavo mí yin alọwlemẹ kavi tlẹnnọ.
