Enọ I Bi Se Ebe Mai A Nọ Inọ . . .

Fikieme Ọghẹnẹ ọ rọ gwọlọ nọ enọ e be gọe a rọo ibe eg’Ọghẹnẹ rai ọvo?

▪ Uzi Ọghẹnẹ kẹ orẹwho Izrẹl u kugbe ujaje nana kpahe ahwo erẹwho nọ e wariẹ e rai họ inọ: “Wha lele ae ruọ orọo ho, wha rehọ emetẹ rai kẹ emezae rai hi hayo wha rehọ emetẹ rai gbehe.” (Iziewariẹ 7:3, 4) Fikieme Ọghẹnẹ o ro fi uzi nana họ?

Jihova ọ riẹ inọ Setan ọ gwọlọ ku idibo riẹ rẹriẹ nyae gọ edhọ, re ọ sae rọ ere gbe ae ku. Fikiere Ọghẹnẹ ọ tẹ vẹvẹ ae unu inọ ahwo erẹwho egedhọ na a “ti ku emezae rai rẹriẹ nọ a gbe ti lele omẹ hẹ, a vẹte gọ ẹdhọ.” Onana yọ okpẹme. Otẹrọnọ orẹwho Izrẹl a kieruọ edhegọ, a gbẹ sai wo aruoriwo gbe uketha Ọghẹnẹ hẹ, yọ onana u ve ti ru nọ ewegrẹ rai a sae rọ vẹro ae lọlọhọ. Kọ ẹvẹ Mesaya nọ a ya eyaa riẹ na ọ sai ro no orẹwho na ze? Ababọ avro, o jọ Setan oja re ọ bẹbẹ emọ Izrẹl họ nyae rọo ahwo erẹwho egedhọ.

Kareghẹhọ re inọ Ọghẹnẹ o wo isiuru kpahe omomọvo ahwo orẹwho na. Ọ riẹ inọ re omomọvo ahwo na a sai wo evawere gbe ufuoma, o gwọlọ nọ a re wo usu okpekpe kugbe ọyomariẹ. Kọ emamọ ẹjiroro jọ ọ riẹ nọ Jihova ọ rọ vẹvẹ unu kpahe enwoma nọ e rẹ sai no orọo kugbe ahwo egedhọ ze? Roro kpahe oriruo Solomọn ovie na. Ọ riẹ uzi Jihova kpahe eyae erẹwho egedhọ, nọ o vẹvẹ unu inọ: “A re ti ku eva rai rẹriẹ bru eghẹnẹ rai.” Fikinọ o wo areghẹ gaga, ẹsejọhọ o je roro nọ o kpehru vi ohwo nọ o re koko uzi oyena, hayo inọ uzi na u kiekpahe ọyomariẹ hẹ. O te gbabọkẹ uzi na. Kọ eme u no rie ze? “Eyae riẹ i te ku udu riẹ rẹriẹ re ọ gọ eghẹnẹ efa.” U yoma kẹhẹ. Enẹ Solomọn o ro ku aruoriwo Ọghẹnẹ fiẹ, orẹwho na o tẹ hẹriẹ fikinọ Solomọn o kiukeku Ọghẹnẹ.—1 Ivie 11:2-4, 9-13.

Ahwo jọ a rẹ sai roro nọ, orọnikọ emọ Izrẹl kpobi nọ i wo eyae erẹwho egedhọ, o via kẹ ere he. Wọhọ oriruo, ọzae Izrẹl jọ nọ a re se Malọn, ọ rọo Rut aye orẹwho Moab, yọ Rut o zihe ruọ odibo Jihova uwhremu na. Rekọ o jọ oware enwoma re ezae Izrẹl a rọo eyae Moab. A jiri Malọn ho fikinọ ọ rọo ọmọtẹ Moab; ọ kaki whu, ẹsejọhọ taure Rut o te ti mu Jihova họ ẹgọ. Oniọvo-ọmọzae Malọn nọ a re se Chiliọn ọ rọo ọmọtẹ Moab ọfa nọ a re se Ọpa, yọ aye nana ọ rọwo siobọno “eghẹnẹ riẹ” hẹ. Rekọ Boaz ọ rọo Rut, ikpe buobu nọ Rut o zihe ruọ odibo Jihova no. Evaọ uwhremu na, ahwo Ju a rehọ Rut wọhọ uvi aye nọ o kurẹriẹ ziọ egagọ Jihova. Orọo Rut avọ Boaz o wha eghale se aimava na.—Rut 1:4, 5, 15-17; 4:13-17.

Kọ o rrọ oware areghẹ re ohwo o roro nọ oriruo orọo Malọn avọ Rut o wọso uzi Jihova nọ o ta nọ ma rọo ibe eg’Ọghẹnẹ mai ọvo? Ohwo nọ o bi roro enẹ ọ wọhọ ohwo nọ ọ be riẹ obọ rri ohwo nọ o thuji fe, jẹ be vro avro inọ uji-utho u woma keme o rẹ sae lẹliẹ ohwo wo ugho rẹrote omariẹ.

Ebaibol na ọ tuduhọ Ileleikristi awọ inọ a rọo “evaọ Ọnowo na.” O vẹvẹ Ileleikristi unu kpahe ‘omaukugbe egedhọ.’ Ohrẹ yena u kiekpahe Ileleikristi nọ e be gwọlọ ọrivẹ-orọo. Rọkẹ Ileleikristi nọ e rọo ahwo nọ a be gọ Jihova ha, Ebaibol na ọ kẹ uvi ehrẹ nọ i re fi obọ họ kẹ ae, nọ a tẹ rẹriẹ ovao dhe ebẹbẹ evaọ orọo rai. (1 Ahwo Kọrint 7:12-16, 39; 2 Ahwo Kọrint 6:14) Ehrẹ itieye na kpobi i dhesẹ nọ Jihova Ọghẹnẹ, ọnọ ọ tuọ orọo họ, ọ gwọlọ nọ ma were eva evaọ egagọ riẹ, te ma rọo no hayo ma re rọo ho.