Wek Jehovah Oteri I Bedo Agonya Kikome
Wek Jehovah Oteri I Bedo Agonya Kikome
“[Nen i] cik maber ma kelo kuc [bedo agonya].”—YAK. 1:25.
TIKA IROMO TITONE?
Cik mene ma miyo wanongo bedo agonya kikome, dok angagi ma gilimo mot ki i cik meno?
Mung me nongo bedo agonya kikome-ni obedo gin ango?
edo agonya ki i kom gin ango ma jo ma gitye ka lubo yo me kwo gitye ka kurone?
1, 2. (a) Gin ango ma tye ka timme i kom bedo agonya i lobo-ni, dok pingo? (b) Bedo agonya mene ma lutic pa Jehovah gitye ka kurone?
WATYE ka kwo i kare ma wel jo ma gimaro lim, gituro cik dok giger tye ka medde ameda. (2 Tem. 3:1-5) Me temo turo tung jo magi, gamente kati ki cik mapol manyen, jingo kero pa abili dok bene gitero jami mogo calo kameragi-gu me konyogi neno lutim aranyi. I lobbe mukene, dano ata-ni bene gitute me gwoko kucgi kun gitero i pacigi jami ma ka kigudogi ci gikok, gipungo doggolagi ki kopulo mapol dok bene gikubo mac alektrik i kom cel murumo gangigi. Jo mapol pe gikato woko i dyewor nyo bene pe giye lutinogi gituko kengi labongo ngat mo madit ma nenogi—kadi bed i dyeceng nyo dyewor. Ki lok ada, bedo agonya pe dok bene obimedde ki bedo pe.
2 I poto me Eden, Catan obango lok ni meno bedo agonya kikome-ni bibedo tye ka ce wape i te loc pa Jehovah ento walone kenwa. Lacen onen ka maleng ni man pud dong obedo twon goba mo marac adada! Ki lok ada, ka dano gimedde ki cayo rwom me kwo ma Lubanga oketo kun gitimo jami ma igi mito, dano gibimedde ki deno can. Dong, kit ma rac pa piny-nye tye ka medde ameda-ni, lutic pa Jehovah bene gideno can. Ento kadi bed kumeno, watye ki gen me neno agikki me bedo opii pa bal ki to dok wabibedo ki kare me nongo mit pa gin ma Baibul lwongo ni “kuc [bedo agonya] ki deyo ma kimiyo ki litino pa Lubanga.” (Rom. 8:21) Lok ada tye ni Jehovah gire dong ocako yubo luticce pi nongo bedo agonya meno. I yo mene?
3. Cik mene ma Jehovah omiyo bot lulub kor Kricito, dok lapeny mene ma wabinenogi?
3 Lagamme tye i gin ma Yakobo olwongo ni “cik maber ma kelo kuc [bedo agonya].” (Kwan Yakobo 1:25.) Baibul mukene gonyo tyeng man ni “cik ma weko wabedo agonya” (New English Bible) ki ni “cik maber pi bedo agonya” (New American Bible). Pol kare ka kiloko i kom cik, dano gitamo pi kigeng ento pe bedo agonya. Ci dong, ‘cik maber ma kelo bedo agonya-ni’ obedo gin ango? Dok cik meno kono dong weko wabedo agonya nining?
CIK MA WEKO WABEDO AGONYA
4. ‘Cik maber ma kelo bedo angonya-ni’ obedo gin ango dok jo mene ma ginongo adwogi maber ki iye?
4 ‘Cik maber ma kelo bedo agonya-ni’ pe obedo Cik ma Kimiyo bot Moses, pien dul cik maca onongo weko bal pa dano nen woko ka maleng dok bene ocobbe i kom Kricito. (Mat. 5:17; Gal. 3:19) Dong cik mene ma Yakobo onongo tye ka lok iye-ni? En onongo tye ka tamo pi “cik pa Kricito,” ma kilwongo bene ni “cik me niye.” (Gal. 6:2; Rom. 3:27) Pi meno, “cik maber[-ri]” kwako jami ducu ma Jehovah mito ki botwa. Lukricitayo ma kiwirogi kacel ki “romi mukene[-ni]” ginongo adwogi maber ki iye.—Jon 10:16.
5. Pingo cik maber ma kelo bedo agonya-ni pe nurowa?
5 Pien pe obedo calo cik ma kitiyo kwede i lobbe mapat pat, “cik maber[-ri]” lubone yot dok bene pe nurowa ento opong ki cik ma igi lac dok pigi tek. (1 Jon 5:3) Yecu owaco ni, “yatta yot, ki yecca bene pe pek.” (Mat. 11:29, 30) Medo i kom meno, “cik maber[-ri]” pe oryeyo kigeng mapol nyo pwod, pien gutine aye obedo mar dok bene kicoyo i tam kacel ki cwiny dano, ento pe i kom kidi ma apada.—Kwan Jo Ibru 8:6, 10.
KIT MA “CIK MABER[-RI]” WEKO WABEDO AGONYA
6, 7. Gin ango ma watwero wacone ma lubbe ki cik pa Jehovah, dok pingo cik me bedo agonya-ni miyo wawinyo agonya ada?
6 Wangcor ma Jehovah oketo pi cwecce ma giryek-ki tye pi ber bedogi ki me gwokogi. Me laporre, tam kong i kom cik ma gidoro ginacweya, calo ka ngat mo opye ki ka ma lamal, en romo poto wanne nyo to. Dano pe gibako lok mapol pi cik man. Ma ka meno, cwinygi bedo yom, dok gingeyo ni cik ma gidoro ginacweya-ni konyo me yubo ber bedogi. I yo acel-lu bene, cik ma Jehovah oketogi ma ginen i kom “cik maber” pa Kricito-ni, gitye pi yubo ber bedo pa dano.
7 Mapat ki gwokowa, cik ma kelo bedo agonya-ni miniwa kare me cobo mitiwa ducu i yo mupore labongo wanowa nyo turo twero ki balo bedo agonya pa jo mukene. Man te lokke ni omyero wanyeb miti matir, ma rwatte ki kit pa Jehovah kacel ki rwom me kwo ma en cwako. Watwero wacone macek ni, omyero wapwonye me maro gin ma Jehovah maro ki me kwero gin ma en dagi, ma cik man me bedo agonya konyowa kwede me timone-ni.—Amoc 5:15.
8, 9. Adwogi ango ma jo ma gimoko liking ka lubo cik ma kelo bedo agonya-ni ginongo? Mi labol.
8 Kadi bed watye ki roc, wan pud wayelle me lweny ki miti maraco. Ento kadi bed kumeno, ka wabedo lugen i lubo cik ma keliwa bedo agonya-ni, ci wanongo olo to bedo agonya manok i kare-ni. Me lapore: Jay, ma pud onongo ocako kwano Baibul acaka-ni onongo tye opii pa taa. I kare ma en oniang ni kodi kwone-ni pe yomo cwiny Lubanga, en onongo ni myero emok tamme. Tika en bimedde ki bedo opii me cobo miti me kome nyo kece cobo miti pa Jehovah? Obedo me ryeko mada pien en oyero me cobo miti pa Lubanga kadi bed ni cwinye obedo ka pukke i kom taa. En owinyo nining i nge weko mato taa? En owaco ni: “Awinyo ni atye agonya dok yomcwiny ocira woko.”
9 Jay onongo pwony ki i gin mutimme i kome-ni ni bedo agonya ma lobo miyo-ni, ma cuko cwiny dano me ‘lubo kit pa dano-ni,’ kara weko dano gidoko opii, ento bedo agonya ma Jehovah miniwa dok ma en aye obedo “lubo kit pa cwiny maleng[-ngi],” kelo bedo agonya kikome dok miniwa “kwo ki kuc.” (Rom. 8:5, 6) Jay mono onongo kero me loyo tim me bedo opii pa taa-ni kikwene? Lubanga gire aye ma okonye. En owaco ni: “Abedo ka kwano Baibul kare ki kare, alego pi cwiny mere maleng dok bene ayenyo kony ki bot kacokke pa Lukricitayo.” Jami magi giromo konyowa bene ka wayenyo bedo agonya kikome. Kong dong wanenu kit ma watwero timone kwede.
NGI LOK PA LUBANGA
10. “Neno” cik pa Lubanga te lokke gonye ningo?
10 Yakobo 1:25 bute kwanne ni: ‘Ngat ma neno cik maber ma kelo kuc [bedo agonya], ka ori iye, . . . gibimiye gum [yomcwiny] i gin ma en otiyo ducu.’ Nyig lok me leb Ibru ma kigonyo kany ni ‘neno’ te lokke ni “kule piny me ngiyo gin moni,” ma te lokke ni tute ki keroni ducu. Ada, ka wamito ni cik ma keliwa bedo agonya-ni olok tamwa ki cwinya, omyero watute matek me cobo katalawa me kwano Baibul, lega, ki dong lwodo lok i kom gin ma wakwano.—1 Tem. 4:15.
11, 12. (a) Yecu onyuto nining ni mitte-ni lok me ada myero odok yo me kwowa? (b) Kit ma kinyuto kwede malo-ni, gin ango marac ma myero jo matino gugwokke kwede?
11 Kitungcel bene omyero ‘wadi cwinywa,’ me keto i tic Lok pa Lubanga, wek ada odok yo me kwowa. Yecu bene owaco lok acel-lu bot jo ma guye en ni: ‘Ka wumoko i lokka, ci wun lupwonnyena adada; miyo wubingeyo lok me ada, lok me ada bigonyowu.’ (Jon 8:31, 32) Buk mo acel waco ni ‘ngeyo’ ma kiloko iye kany-nyi tere ni bedo ki pwoc pienni “gin ma ngat moni ‘ngeyo-ni’ pire tek bote.” Pi meno, ‘wangeyo’ lok me ada maber adada ka waloko doko yo me kwowa. Ka watimo kumeno, ci watwero wacone ka maleng ni “lok pa Lubanga” tye ka “tic” i kwowa, kun yubo kitwa wek wanyut kit pa Wonwa me polo.—1 Tec. 2:13.
12 Penye kekeni ni, ‘An tika angeyo lok me ada? Tika dong aloko odoko yo me kwona? Nyo tika kine mukene abedo ka gomo “lone ken” ma lobo-ni miyo?’ Lamego mo ma odongo i cing lunyodone ma gubedo Lukricitayo, ocoyo kuman i kare ma obedo ka ngiyo kit kwone i kare me tinone: “Ka idongo i paco ma kipwonyi iye ki lok me ada, inongo Jehovah pe dok pat i yo mo keken. Ento kitung bota gira, pe amedo ki ngeyo en. Pe amedo ki pwonye me kwero jami ma en dagi. Pe bene onongo aye ni jami ma atimogi-ni gudo kit ma en winyo kwede. Dok bene pe atemme me lega bote kadi bed peko mo tye. Aketo genna i kom niango ma atye kwede, ma dong kombeddi angeyo ni obedo tim me mingo pien onongo kara pe angeyo gin mo.” Berre tye ni, lamego man oniang lacen ni tamme-ni onongo rac, dok bene otimo alokaloka mogo madongo i kwone. En odoko painia.
CWINY MALENG TWERO WEKO IBEDO AGONYA
13. Cwiny maleng konyowa me bedo agonya nining?
13 Wakwano i 2 Jo Korint 3:17 ni: “Ka ma cwiny pa Rwot [Jehovah] tye iye, kunnu kuc [bedo agonya] bene tye iye.” Cwiny maleng mono weko wabedo agonya nining? I kin jami mukene, nyako i kwowa kit mapol ma pigi tego wek wabed agonya, calo ‘mar, yomcwiny, kuc, diyo cwiny, kica, ber, niye, mwolo, gwokke ken.’ (Gal. 5:22, 23) Labongo kit magi, tutwalle mar, pe tye ngat mo keken ma romo bedo agonya—man tye ka nen ka maleng i kare-ni. Lacen, ma dong lakwena Paulo oryeyo but nyig magi ma nyak pi cwiny maleng-ngi, en omedo ni: “Cik mo pe ma kwero gin macalo magi”.” Ngo ma onongo en tye ka wacone? Pe tye cik mo keken ma twero gengo dongo pa but nyig ma nyak pi cwiny maleng-ngi. (Gal. 5:18) Pien ka tye kumeno, ci pingo kono dong cik me bedo agonya-ni tye? Obedo miti pa Jehovah ni myero wadong pi naka kit macalo pa Kricito dok wanyutgi bene labongo kigeng mo keken.
14. I yo ango ma cwiny me lobo-ni weko jo ma gimine me lubone gibedo opii?
14 Jo ma cwiny me lobo-ni dorogi gitamo ni gitye agonya, pien gineno ni gitye ka cobo mitigi me kom. (Kwan 2 Petero 2:18, 19.) Ento inongo ni olungtukene aye tye lok ada. Cik mapol ata mitte me konyo lweny ki miti kacel ki kit maraco ma gitye kwede-ni. Lakwena Paulo owaco ni, “cik pe giketo pi jo ma kitgi atir, ento giketo pi lutur-cik.” (1 Tem. 1:9, 10) Gitye opii pa bal, dok ginongo dic me bedo ka ‘cobo miti me komgi,’ dok miti man tye laloc mager adada. (Ep. 2:1-3) Dong jo ma kit meno gubedo calo nginingini ma gilak gidonyo wa i atabo ma kic tye iye. Lacen, pi miti me camo kic, gipo ni nongo gimoko iye.—Yak. 1:14, 15.
WAWINYO AGONYA KA WATYE I KACOKKE
15, 16. Nywako kacel ki kacokke pire tek lakwene, dok bedo agonya ango ma wanongo i kacokke?
15 I kare ma icako bino i kacokke, pe i coyo waraga calo me donyo i gurup mo. Ma ka meno, idonyo i kacokke pien Jehovah aye onyiki. (Jon 6:44) Gin ango mumiyo en onyiki? Gwok nyo en oneno ni in kiti atir? Itwero waco ni “pe kumeno wacel!” Ci dong, gin ango ma Lubanga oneno? En oneno cwiny mupore ma bijolo cikke ma kelo bedo agonya-ni, cwiny ma bilubo tirane me kica. I kacokke, Jehovah ogwoki kun piti ki cam me cwiny, ogonyi woko ki i pwony me dini goba kacel ki bedo ki niye i kom tim mogo me kwiya piny dok opwonyi bene me dongo kit mogo pa Kricito. (Kwan Jo Epeco 4:22-24.) Macalo adwogine, itye ki mot me bedo i kin jo ma gin keken ki i lobo-ni, kitwero lwongogi ni jo ma “gitye i te cik ma kelo kuc [bedo agonya].”—Yak. 2:12.
16 Tam kong lok man: Tika ibedo lwor ka itye i kin jo ma gimaro Jehovah ki cwinygi ducu? Ka ce boko lok dong okur i Ot me Ker, tika ibedo ki tam ni kiromo kwalo jamini? Pe kumeno matwal! Pe ibedo lwor ento iwinyo agonya. Tika iromo winyo agonya ka ma jo ma pe gubedo Lukricitayo gugure iye? Pe twere! Bedo agonya ma inongo i kin jo pa Lubanga i kare-ni obedo abil mamwa me kom bedo agonya kikome-ni ma tye i anyim.
“KUC [BEDO AGONYA] KI DEYO MA GIMIYO KI LITINO PA LUBANGA”
17. Bedo agonya pa dano kubbe ki “nyuto litino pa Lubanga” nining?
17 I kare ma Paulo tye ka lok i kom kuc [bedo agonya] ma Jehovah bimiyone bot luticce me lobo, en ocoyo ni: “Ginaketa ducu gitye ka kuro nyuto litino pa Lubanga ki miti madwong mukato kare.” Dok omedo ni: “Ceng mo gibigonyo ginaketa woko ki i opii me bedo gin ma top, wek gunong kuc [bedo agonya] ki deyo ma gimiyo ki litino pa Lubanga.” (Rom. 8:19-21) “Ginaketa” man obedo jo ma gitye ki gen me kwo i lobo, jo mapol gibilimo mot pi “nyuto” litino pa Lubanga, jo ma kiwirogi ki cwiny maleng. Nyute meno bicakke i kare ma “litino” pa Lubanga ma dong kicerogi me kwo polo-ni, gibinywako kacel ki Kricito i tyeko jo maraco dok gibigwoko “lwak dano mapol ata[-ni]” me donyo i lobo manyen.—Yabo. 7:9, 14.
18. Bedo agonya bimedde ameda pi jo ma gin luwiny nining, dok bedo agonya ango ma gibinongone me agikki?
18 Dano ma dong kilarogi gibilimo bedo agonya manyen—bedo agonya ki i bedo opii pa Catan kacel ki jogine. (Yabo. 20:1-3) Pud dong bibedo twon yweyo madit ya! Ingeye, jo pa Kricito, gin 144,000 ma gitye luker ki lulamdog, gibimedde ki gonyo dano ki i bal kun gitiyo ki ginkok nio ka bal pa Adam kacel ki roc ducu kikwanyogi woko liweng. (Yabo. 5:9, 10) I nge gwoko gennegi kun giwok ki i atematema, dano nongo dong gunongo bedo agonya kikome ma Jehovah oyubo pigi—“kuc [bedo agonya] ki deyo ma gimiyo ki litino pa Lubanga.” Tam kong! Pe dok ibiyelle ki keroni me timo jami matir i wang Lubanga, pien komi ducu dong gikwanyo roc woko liweng ki iye dok kiti bene odoko rom ki pa Lubanga.
19. I kare-ni, ngo ma myero wamedde ki timone wek wabed ki gen me nongo bedo agonya kikome-ni?
19 Tika iparo pi “kuc [bedo agonya] ki deyo ma gimiyo ki litino pa Lubanga”? Ka tye kumeno, ci wek tammi ki cwinyi obed ka lubo “cik maber ma kelo kuc [bedo agonya].” Ada, kwan Ginacoya ki cwinyi ducu. Wek lok me ada odok yo me kwoni. Leg pi cwiny maleng. Nywak kacel ki kacokke dok ibed ka nongo cam me cwiny ma Jehovah miyo. Pe iwek Catan obwoli kit ma obwolo kwede Kawa-ni, oweko en otamo ni lubo yo me kwo ma yomo cwiny Lubanga tek tutwal-li. Nge ni, Larac-ci kine mukene ryek ma pe wacce. Ento kit ma wabineno kwede ipwony ma lubo man, pe myero wawek “Catan olowa, pien wan pe wakwiya dirone.”—2 Kor. 2:11.
[Peny me Kwan]
[Cal ma tye i pot karatac 14]
Tika agomo “lone ken” ma lobo-ni miyo?
[Cal ma tye i pot karatac 14]
Tika dong lok me ada odoko yo me kwona?
