Magpagiya Kang Jehova Ngadto sa Tinuod nga Kagawasan
Magpagiya Kang Jehova Ngadto sa Tinuod nga Kagawasan
‘Sud-onga pag-ayo ang hingpit nga balaod nga iya sa kagawasan.’—SANT. 1:25.
MAKAPATIN-AW KA BA?
Unsang balaod ang motultol ngadto sa tinuod nga kagawasan, ug kinsay makabenepisyo niana?
Unsa ang sekreto sa pagbatog tinuod nga kagawasan?
Unsang kagawasan ang mabatonan niadtong magpabilin sa dalan sa kinabuhi?
1, 2. (a) Unsay nahitabo sa kagawasan sa mga tawo, ug ngano? (b) Unsang kagawasan ang gipaabot sa mga alagad ni Jehova?
NAGKAGRABE na karon ang kahakog, kamalapason, ug kapintasan. (2 Tim. 3:1-5) Tungod niini, ang mga gobyerno naghimog dugang balaod, nagpalig-on sa puwersa sa kapolisan, ug nagbutag mga surveillance camera. Sa ubang nasod, ang mga tawo dunay mga alarm system sa ilang balay, daghang kandado, ug dekoryenteng mga koral alang sa dugang proteksiyon. Daghan ang dili na mogawas magabii o padulaon ang ilang mga anak sa gawas sa balay nga walay magbantay. Tin-aw nga anam-anam nang nawala ang kagawasan sa mga tawo, ug morag mosamot pa kini.
2 Balik sa tanaman sa Eden, si Satanas miingon nga ang yawi sa tinuod nga kagawasan mao ang pag-independente kang Jehova. Bakak gayod kana! Samtang gilapas sa tawo ang moral ug espirituwal nga sukdanan sa Diyos, mas migrabe hinuon ang pag-antos. Kini nakaapektar usab sa mga alagad ni Jehova. Apan nahibalo kita nga sa dili madugay ang katawhan mahigawas na sa pagkaulipon sa sala ug pagkadunot. Ug ato nang mabatonan ang gitawag sa Bibliya nga “mahimayaong kagawasan sa mga anak sa Diyos.” (Roma 8:21) Gani, giandam na ni Jehova karon ang iyang mga alagad alang niana nga kagawasan. Sa unsang paagi?
3. Unsang balaod ang gihatag ni Jehova sa iyang katawhan, ug unsang mga pangutana ang atong tubagon?
3 Bahin sa maong kagawasan, gihatagan kita ni Jehova nianang gitawag ni Santiago nga “hingpit nga balaod nga iya sa kagawasan.” (Basaha ang Santiago 1:25.) Gihubad kini sa ubang Bibliya nga “ang balaod nga magpahigawas kanato” (The New English Bible) ug “ang hingpit nga balaod sa kagawasan” (The New American Bible). Kon balaod na ganiy hisgotan, ang sagad mosantop sa hunahuna sa mga tawo maoy restriksiyon, dili kagawasan. Nan, unsa ang “hingpit nga balaod nga iya sa kagawasan”? Ug sa unsang paagi kini magpahigawas kanato?
ANG BALAOD NGA MAGPAHIGAWAS KANATO
4. Unsa ang “hingpit nga balaod nga iya sa kagawasan,” ug kinsay nakabenepisyo niini?
4 Ang “hingpit nga balaod nga iya sa kagawasan” dili mao ang Moisesnong Balaod. Gihatag ni Jehova sa mga Israelinhon ang Moisesnong Balaod aron makaamgo sila sa ilang pagkamakasasala, ug si Kristo lang ang nakatuman sa maong Balaod. (Mat. 5:17; Gal. 3:19) Nan, unsa ang balaod nga gihisgotan ni Santiago? Kini mao ang “balaod ni Kristo,” nga gitawag usab ug “balaod sa pagtuo” ug “balaod sa mga tawong may kagawasan.” (Gal. 6:2; Roma 3:27; Sant. 2:12) Busa ang “hingpit nga balaod” naglangkob sa tanang gipangayo ni Jehova kanato. Ang dinihogang mga Kristohanon ug ang “ubang mga karnero” parehong nakabenepisyo niini.—Juan 10:16.
5. Nganong ang balaod sa kagawasan dili lisod tumanon?
5 Dili sama sa balaod sa mga nasod, ang “hingpit nga balaod” dili komplikado o lisod tumanon. Naundan kinig simpleng mga sugo ug paninugdang nga mga prinsipyo. (1 Juan 5:3) “Ang akong yugo masayon ug ang akong luwan magaan,” miingon si Jesus. (Mat. 11:29, 30) Dugang pa, ang “hingpit nga balaod” wala magkinahanglag taas nga listahan sa mga lagda o silot kay kini gipasukad sa gugma ug gisulat diha sa hunahuna ug kasingkasing sa mga tawo, dili sa papan nga bato.—Basaha ang Hebreohanon 8:6, 10.
KON SA UNSANG PAAGI ANG “HINGPIT NGA BALAOD” MAGPAHIGAWAS KANATO
6, 7. Unsay atong ikasulti bahin sa mga sukdanan ni Jehova? Unsay gitugot sa balaod sa kagawasan nga atong buhaton?
6 Ang mga limitasyon nga gitakda ni Jehova makaayo ug makapanalipod sa mga tawo. Tagda pananglitan ang mga balaod sa kinaiyahan, sama sa grabidad. Ang mga tawo wala moreklamo nga napig-otan sila niini. Mapasalamaton pa gani sila kay alang kini sa ilang kaayohan. Sa susama, ang moral ug espirituwal nga mga sukdanan ni Jehova, nga makita sa “hingpit nga balaod” ni Kristo, maoy alang sa kaayohan sa tawo.
7 Gawas nga usa ka proteksiyon, ang balaod sa kagawasan nagtugot usab kanato sa pagtagbaw sa tanan natong hustong mga tinguha nga dili magdaot sa atong kaugalingon o magtamak sa katungod ug kagawasan sa uban. Busa ang sekreto sa pagbatog tinuod nga kagawasan mao ang pagbatog hustong mga tinguha nga nahiuyon sa personalidad ug mga sukdanan ni Jehova. Sa laing pagkasulti, atong higugmaon ang gihigugma ni Jehova ug dumtan ang iyang gidumtan. Ang balaod sa kagawasan motabang kanato sa pagbuhat niana.—Amos 5:15.
8, 9. Unsang mga benepisyo ang mabatonan niadtong nagsunod sa balaod sa kagawasan? Iilustrar.
8 Tungod sa pagkadili-hingpit, nalisdan kita sa pagkontrolar sa daotang mga tinguha. Apan kon kanunay natong sundon ang balaod sa kagawasan, karon pa lang makasinati na kitag kagawasan. Sa pag-ilustrar: Usa ka bag-ong estudyante sa Bibliya nga ginganlag Jay ang naadik sa sigarilyo. Pagkahibalo niya nga dili kini makapahimuot sa Diyos, kinahanglan siyang modesisyon. Padayon ba siyang magpaulipon sa iyang bisyo o sundon si Jehova? Maalamon niyang gipili ang pag-alagad kang Jehova bisag gipangita sa iyang lawas ang nikotina. Unsay iyang gibati human mabuntog kini? Siya miingon: “Malipayon kaayo ko ug mibating gawasnon na gyod.”
9 Naamgohan ni Jay nga ang kagawasan nga gitanyag sa kalibotan, nga mao ang “paghunahuna sa unod,” sa pagkatinuod nag-ulipon sa mga tawo. Apan ang kagawasan nga iya ni Jehova, nga mao ang “paghunahuna sa espiritu,” magpahigawas sa mga tawo ug maghatag kanilag “kinabuhi ug kalinaw.” (Roma 8:5, 6) Giunsa pagbuntog ni Jay ang iyang bisyo? Dili pinaagi sa kaugalingong kusog, kondili pinaagi sa Diyos. Siya miingon: “Regular kong nagtuon sa Bibliya ug nag-ampo alang sa balaang espiritu. Gisunod sab nako ang mahigugmaong mga tambag sa mga igsoon sa kongregasyon.” Kini nga mga tagana makatabang nato sa pagbatog tinuod nga kagawasan. Atong tan-awon kon sa unsang paagi.
SUD-ONGA PAG-AYO ANG PULONG SA DIYOS
10. Unsay kahulogan sa ekspresyong “magasud-ong pag-ayo” sa balaod sa Diyos?
10 Sa Santiago 1:25, atong mabasa: ‘Siya nga magasud-ong pag-ayo sa hingpit nga balaod nga iya sa kagawasan ug magpadayon diha niana magmalipayon sa iyang pagbuhat niini.’ Ang Gregong pulong nga gihubad ug “magasud-ong pag-ayo” nagkahulogang moyuko aron tin-awng makita ang usa ka butang. Kini nagkinahanglag paningkamot. Busa kon gusto nato nga ang balaod sa kagawasan maoy mag-impluwensiya sa atong hunahuna ug kasingkasing, angay kitang magkugi sa pagtuon sa Bibliya ug mamalandong pag-ayo sa atong nabasa.—1 Tim. 4:15.
11, 12. (a) Giunsa pagpasiugda ni Jesus ang panginahanglan nga magkinabuhi uyon sa kamatuoran? (b) Ingon sa giilustrar sa ibabaw, unsang kapeligrohan ang angayng likayan ilabina sa mga batan-on?
11 Angay usab kitang “magpadayon” sa pagpadapat sa Pulong sa Diyos. Sa ingon, atong gipakita nga kita nagkinabuhi uyon sa kamatuoran. Kini usab ang gipasiugda ni Jesus ngadto sa mga mituo kaniya: “Kon magpabilin kamo sa akong pulong, kamo tinuod gayod nga akong mga tinun-an, ug kamo mahibalo sa kamatuoran, ug ang kamatuoran magpagawas kaninyo.” (Juan 8:31, 32) Sumala sa usa ka diksiyonaryo, ang pulong “mahibalo” dinhi nagkahulogan usab ug pagpabili tungod kay “ang butang nga ‘nahibaloan’ sa usa hinungdanon kaniya.” Busa kita makaingon nga bug-os kitang ‘nahibalo’ sa kamatuoran kon kita nagkinabuhi uyon niini. Sa ingon ‘ang pulong sa Diyos naglihok’ kanato, nga nagtabang kanato sa paghimog mga kausaban sa atong personalidad aron mas masundog nato ang atong langitnong Amahan.—1 Tes. 2:13.
12 Pangutan-a ang imong kaugalingon, ‘Nahibalo ba gyod ko sa kamatuoran? Nagkinabuhi ba ko uyon niini? O nangandoy ba gihapon ko sa “mga kagawasan” nga gitanyag sa kalibotan?’ Usa ka sister nga gimatuto sa Kristohanong mga ginikanan ang nahinumdom sa iyang pagkabatan-on: “Nagdako ko sa kamatuoran ug nagtuo kang Jehova. Pero dili bug-os ang akong pagkaila kaniya. Wala ko makakat-on sa pagdumot sa iyang gidumtan. Para nako, dili importante kaniya ang akong ginahimo. Ug wala ko moduol kaniya dihang nagkaproblema ko. Misalig lang ko sa kaugalingon kong pagsabot, pero binuang gayod kadto kay wala man koy nahibaloan.” Maayo na lang kay nakaamgo siya sa ulahi nga sayop gayod ang iyang panghunahuna, ug mihimo siyag dagkong kausaban. Gani nagregular payunir siya.
ANG BALAANG ESPIRITU MAKATABANG KANIMO SA PAGBATOG KAGAWASAN
13. Sa unsang paagi ang balaang espiritu sa Diyos motabang kanato sa pagbatog kagawasan?
13 Sa 2 Corinto 3:17, atong mabasa: “Kon asa gani ang espiritu ni Jehova, adunay kagawasan.” Sa unsang paagi ang balaang espiritu makatabang kanato sa pagbatog kagawasan? Motabang kini kanato sa pag-ugmad sa mga hiyas nga gikinahanglan alang sa atong kagawasan—ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Gal. 5:22, 23) Ang mga tawo dili makabatog tinuod nga kagawasan kon wala kining mga hiyasa, ilabina ang gugma. Dayag kini sa kahimtang sa kalibotan karon. Human hisgoti ang bunga sa espiritu, si apostol Pablo midugang: “Batok sa maong mga butang walay balaod.” Unsay iyang gipasabot? Walay bisan unsang balaod nga makapugong sa pagtubo niining mga hiyasa. (Gal. 5:18) Buot ni Jehova nga padayon natong ugmaron ang maong mga hiyas ug dili nato limitahan ang atong pagpasundayag niini.
14. Sa unsang mga paagi ang espiritu sa kalibotan nag-ulipon niadtong nagpadani niini?
14 Kadtong nadani sa espiritu sa kalibotan ug nagtagbaw sa ilang unodnong mga tinguha lagmit nagtuo nga duna silay kagawasan. (Basaha ang 2 Pedro 2:18, 19.) Apan sa pagkatinuod, sila mga ulipon. Ang mga gobyerno naghimog daghan kaayong balaod aron mapugngan ang makadaot nga tinguha ug panggawi sa mga tawo. Si Pablo miingon: “Ang balaod gipakanaog, dili alang sa tawong matarong, kondili alang sa mga tawong malinapason ug masupilon.” (1 Tim. 1:9, 10) Sila ulipon usab sa sala kay ilang gibuhat ang “mga butang nga gipangandoy sa unod,” ug ang unod maoy mapintas nga agalon. (Efe. 2:1-3) Samag mga insekto nga mipaingon sa panaksan nga punog dugos ug wala na makagawas, gitagbaw niining mga tawhana ang ilang sayop nga mga tinguha ug naulipon sa sala.—Sant. 1:14, 15.
KAGAWASAN SULOD SA KRISTOHANONG KONGREGASYON
15, 16. Unsa ka hinungdanon ang atong pagpakig-uban sa kongregasyon, ug unsang kagawasan ang atong natagamtam?
15 Ang imong pagsulod sa Kristohanong kongregasyon dili sama sa pag-apil ug usa ka asosasyon. Hinunoa, nakasulod ka sa kongregasyon kay gikabig ka ni Jehova. (Juan 6:44) Nganong gikabig ka niya? Tungod ba kay ikaw matarong ug may kahadlok sa Diyos? “Aw dili,” tingali moingon ka. Nan unsa may iyang nakita? Nakita niya nga ang imong kasingkasing andam mosunod sa iyang balaod ug mahigugmaong giya. Sulod sa kongregasyon, giumol ni Jehova ang imong kasingkasing pinaagi sa pagtagana kanimog espirituwal nga pagkaon, pagpahigawas kanimo sa mga doktrina ug patuotuo sa bakak nga relihiyon, ug sa pagtudlo kanimo kon unsaon pag-ugmad sa personalidad ni Kristo. (Basaha ang Efeso 4:22-24.) Ingong resulta, nakapribilehiyo kang mahilakip sa bugtong katawhan sa kalibotan nga matawag nga “mga tawong may kagawasan.”—Sant. 2:12.
16 Tagda kini: Dihang kauban nimo ang mga tawong tinuod nga nahigugma kang Jehova, mahadlok ka ba? Samtang makig-estorya ka sa mga igsoon sa Kingdom Hall, magsige ka ba ug bitbit sa imong gamit kay basig mawala? Siyempre dili! Mobati kang luwas ug dili ra mabalaka. Kana ba usab ang imong bation kon anaa ka sa ubang lugar ug dili mga igsoon ang imong kauban? Dili gayod! Dugang pa, ang kagawasan nga imong natagamtam karon taliwala sa katawhan sa Diyos maoy pasiuna lang sa kagawasan nga anaa sa umaabot.
“MAHIMAYAONG KAGAWASAN SA MGA ANAK SA DIYOS”
17. Sa unsang paagi ang kagawasan sa katawhan nalangkit sa “pagpadayag sa mga anak sa Diyos”?
17 Dihang gihisgotan ni Pablo ang kagawasan nga ihatag ni Jehova sa iyang katawhan, siya misulat: “Ang maikagong pagpaabot sa kalalangan nagahulat sa pagpadayag sa mga anak sa Diyos.” Dayon siya midugang: “Ang kalalangan usab ipagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” (Roma 8:19-21) “Ang kalalangan” nagtumong sa katawhan nga may yutan-ong paglaom, kinsa makabenepisyo sa “pagpadayag” sa dinihogang mga anak sa Diyos. Ang maong pagpadayag magsugod sa dihang ang mga dinihogan sa langit moduyog kang Jesus sa paglaglag sa tanang daotan ug sa pagluwas sa “dakong panon” ngadto sa bag-ong sistema sa mga butang.—Pin. 7:9, 14.
18. Sa unsa pa mahigawas ang masinugtanong katawhan, ug unsang kagawasan ang ilang matagamtam sa kataposan?
18 Dayon ang natubos nga katawhan makabatog bag-ong kagawasan—kagawasan gikan sa impluwensiya ni Satanas ug sa mga demonyo. (Pin. 20:1-3) Pagkadakong kahupayan kana! Unya anam-anam nga ipadapat sa 144,000, nga kaubang hari ug saserdote ni Kristo, ang mga benepisyo sa halad lukat hangtod nga ang katawhan bug-os mahigawas sa sala ug pagkadili-hingpit. (Pin. 5:9, 10) Kay napamatud-ang maunongon bisan ilalom sa pagsulay, maangkon na sa katawhan ang hingpit nga kagawasan nga buot ni Jehova nga ilang mabatonan sukad pa sa sinugdan—ang “mahimayaong kagawasan sa mga anak sa Diyos.” Hunahunaa kini! Dili na ka malisdan sa pagbuhat kon unsay matarong sa mga mata sa Diyos. Hingpit na ang imong lawas, kasingkasing, ug hunahuna, ug bug-os na nimong masundog ang mga hiyas sa Diyos.
19. Unsay padayon natong himoon aron magpabilin diha sa dalan ngadto sa tinuod nga kagawasan?
19 Gusto ba nimong mabatonan ang “mahimayaong kagawasan sa mga anak sa Diyos”? Kon mao, tugoti nga ang “hingpit nga balaod nga iya sa kagawasan” padayong mag-impluwensiya sa imong hunahuna ug kasingkasing. Makugihong tun-i ang Bibliya. Pagkinabuhi uyon sa kamatuoran. Pag-ampo alang sa balaang espiritu. Pahimusli pag-ayo ang pagpakig-uban sa kongregasyon ug ang espirituwal nga pagkaon nga gitagana ni Jehova. Ayaw palimbong kang Satanas, sama sa iyang gihimo kang Eva, nga maghunahuna nga estrikto ra kaayo ang mga sukdanan ni Jehova. Malinglahon kaayo ang Yawa. Apan kinahanglang dili kita “malupigan ni Satanas, kay kita dili kay walay alamag sa iyang mga laraw.” Kini ang atong hisgotan sa sunod nga artikulo.—2 Cor. 2:11.
[Mga Pangutana sa Pagtuon]
[Mga hulagway sa panid 9]
Nangandoy ba gihapon ko sa “mga kagawasan” sa kalibotan?
[Mga hulagway sa panid 9]
Nagkinabuhi ba ko uyon sa kamatuoran?
