Nue Iehova Pi Troa Nue Gufa Nyipunie
27 OGAS–2 SEMITREPA 2012
NYIMA: 107, 27
Nue Iehova Pi Troa Nue Gufa Nyipunie
“Thuluëne [ jë] ngöne la wathebo ka meköti me gufa.”—IAKO. 1:25.
QEJEPENGÖNE JË!
Nemene wathebo la ka troa nue gufane la atr, nge drei la ka troa kepe manathithi qa ngöne la wathebo cili?
Nemene la nyine troa kuca matre melëne jë së la nyipi inuegufa?
Nemene la inuegufa hna hni kow hnene la itre atr asë ka xötrëne la gojenyi ne la mel?
1, 2. (a) Kola mele tune kaa la itre atr enehila, nge pine nemen? (b) Mele ka ue la hna hnëkëne hnei Iehova kowe la itre hlue i Nyidrë?
EASË enehila ngöne la hneijine kola elë la pi hetrenyi thene la itre atr, me itre thiina ka tha meköti kö, me iakötrë. (2 Tim. 3:1-5) Celë hi matre nyimutre fe hë la etrune la itre wathebo hna acile hnene la itretre mus, me itre polis, nge goi ami caméra fe göi troa thupëne la itre ka huliwa menu. Ame ngöne la itre xa nöj, hnene la itre atr hna saane la itre alarme, me lokane la itre iqëhnelö ne uma, me saa tirisiten la iwaea ne la hage ne hnalapa i angatr. Ketre, tha pi tro hmaca kö la itre atr a tro jidr, me nue pena la itre nekö i angatr troa elo casi e kuhu tröne e pëkö atre thupë nyudren, e lai ju hë maine e jidr. Nyipici laka, ase hë xome acone la mele ne la itre atr hnene la itre ewekë cili, nge kösë lo, kolo pala hi a ngazo catr.
2 Öni Satana ekö e Edena, ka hape, ame la nyipi inuegufa, tre ene la tro sa ketre kuca la mekuna së, trö i Iehova. Tha fene trengathoi ka co kö lai hnei angeice hna qaja. Ame la ewekë ka mama hnyawa, tre, kola nanyi trootro la atr qa ngöne la itre ifego hna acile hnei Akötresie, nge kolo fe a elë catre la itre akötre i angeic. Hna akötrë së mina fe, itre hlue i Iehova, hnene lai aqane mele cili. Ngo mejiune hë së laka, tro ha thepe së qa ngöne la ithahluë ne la ngazo me hnyeqetr, matre melëne jë hë së lo trenge ewekë i Tusi Hmitrötr, ka hape “hna nue gufane ka hadehadeu ne la ite nekö i Akötesie.” (Rom. 8:21) Hane lai kepine matre hnëkëne jë Iehova la itre hlue i Nyidrëti kowe lai pengöne mele cili. Hnei Nyidrëti hna kuca tune kaa?
3. Nemene wathebo la hnei Iehova hna hamëne kowe la itretre xötrethenge Keriso, nge nemene la itre hnyinge nyine tro sa ce sa?
3 Hnene la ketre atre cinyihane la Tusi Hmitrötr, ene Iakobo, hna qaja ka hape, Iehova a hnëkë së jëne “la wathebo ka meköti me gufa.” (E jë la Iakobo 1:25.) Hnene la itre xa Tusi Hmitrötr hna ujëne lai hnaithanata celë ka hape, “wathebo ka inuegufa” (The New English Bible). Ngo tha hnene kö la itre atr hna majemine troa xome la wathebo ceitu me ka inuegufa, ngo ka iothe pe. Ngo kola qeje nemene lai hna hape “wathebo ka meköti me gufa”? Nge kola nue gufa së tune kaa hnene lai wathebo cili?
WATHEBO KA INUEGUFA
4. Nemene wathebo “la wathebo ka meköti me gufa,” nge drei la itre ka troa öhnyi thangane ka loi qa ngön?
4 Tha kolo kö lo trenge wathebo hna hamë Mose “la wathebo ka meköti me gufa,” ke ame la sipu qa ne la Wathebo i Mose ekö, tre ene hi la troa amekunëne la itre atr laka, itre ka ngazo angatr; nge Iesu hi la pune lai wathebo cili. (Mat. 5:17; Gal. 3:19) Ngo wathebo ka ue kö lai hnei Iakobo hna qaja? Kolo hna qaja hnei Tusi Hmitrötr ka hape “wathebo i Keriso,” me “wathebo ne lapaun.” (Gal. 6:2; Rom. 3:27; Iako. 2:12) Ame la nöjei hna amekötine asë hnei Iehova hna upi së troa kuca, tre celë hi “wathebo ka meköti” lai. Nge ngacama itre Keresiano hna iëne ju hë maine “ite xa mamoe” pena, ngo ame pe tro asë hi angatr a öhnyi thangane ka loi qa ngöne la wathebo cili.—Ioane 10:16.
5. Pine nemene matre tha ka hace kö la wathebo ka inuegufa?
5 Isapengöne catre la “wathebo ka meköti” memine la itre wathebo ne la itre musi enehila; pëkö ehacene lai wathebo cili, eje pe a hamëne la itre hna amekötine me itre trepene meköti nyine troa trongën. (1 Ioane 5:3) Öni Iesu ka hape, “uqa la nyine isilikeung, nge maloe la ehnefeng.” (Mat. 11:29, 30) Ketre mina, ame la “wathebo ka meköti” tre, tha wenge mekune kö hna fejane trongëne nyine athipi wathebone me nyine troa itranyin, ke hna hnea trepen ej hnene la ihnim, nge tro ej a jilapa e kuhu hni me ngöne la mekun, ngo tha hna sija kö hune sine etë.—E jë la Heberu 8:6, 10.
AQANE NUE GUFA SË HNENE LA “WATHEBO KA MEKÖT”
6, 7. Nemene la pengöne la itre trepene meköt i Iehova, nge pine nemene matre kola qaja ka hape, ka inuegufa la wathebo ka meköti me gufa?
6 Hnei Iehova hna acile la itre hna amekötine thatraqane la nöjei hnei Nyidrëti hna xup ka inamacan, nyine loi me nyine thupë angatr. Ame la ketre ewekë hnei Iehova hna kuca, tre ene la mene ka eje thene la ihnadro (ame ngöne qene Faras tre, kola hape gravité); kola mama e cili hnene laka, pëkö ewekë ka thipe ju pe e caha nyipin, ngo tro asë hi a hule amalane itre eje hnene la ihnadro. Tha öhnyi engazone kö hnene la itre atr la itre hna amekötine hnei Iehova, ngo angatre pe a madrine laka, ame la aqane ameköti ewekë i Nyidrë, tre nyine loi koi angatr. Ceitune hi lai memine lo itre trepene mele me itre trepene meköti hna amë ngöne la “wathebo ka meköt;” hnei Iehova hna acile itre eje nyine loi kowe la atr.
7 Hnene fe la wathebo ka inuegufa hna aijijë së troa kuca la nöjei aja së; ngo tha hna nue së pe troa nyi engazone la mele së me elë hune la göhmeku i ketre. Celë hi matre, maine easa ajane troa nue gufane hnyawa së, loi e troa thele hnyawa la itre ewekë ka nyipi loi kowe la mele së, itre ka ihmeku hnyawa memine la pengö i Iehova me itre hna amekötine hnei Nyidrë. Haawe, e tro sa inine troa hnine la itre ewekë hnei Iehova hna hnin, me sisiine la itre hnei Nyidrëti hna sisiin, tro la wathebo ne inuegufa a xatua së troa mele tune lai.—Amosa 5:15.
8, 9. Nemene la thangane ka traqa kowe la itre ka xötrethenge la wathebo ka inuegufa? Qeje pengöne jë.
8 Qa ngöne laka, itre ka tha pexeje kö së, haawe easa isi pala hi memine la itre aja ka ngazo the së. Ngo trongëne jë hi së la itre hna amekötine hnene la wathebo ka inuegufa, ene pe easë hë lai a nyiqaane öhne ju la emenene ej. Hanawange la pengöi Jay ekö, ketre trahmanyi ka ufi tepeke catr. Ame ju hi la angeic a atre ka hape, ngazo lai hna majemine cili, haawe nyipi ewekë hë tro angeic a ië ewekë. Tro angeic a drenge la musi drei, aja i ngönetrei, maine musi Iehova? Ka inamacane la aqane ië ewekë i angeic, ke hnei angeice hna ajane troa nyi hlue i Akötresie, ngacama ka zane tepeke hë la ngönetrei angeic. Nemene hë la thangane lai hnei angeice hna nuetrije lo lai hnei angeice hna majemin? Öni angeice ka hape, “Ase hnyawa ha nue ni nge mingöminge me lolo la meleng.”
9 Atre hë Jay jëne la itre hnei angeice hna melëne laka, ame la itre inuegufa ne la fen, tre ka iuku troa “hnine la ngönetei,” me othe la itre atr. Ngo ame la itre inuegufa qaathei Iehova, kola upi së troa “hnine la [“ua,” MN],” celë hi nyipi inuegufa, ke atre xomi së kowe la ‘mele me tingeting.’ (Rom. 8:5, 6) Hnei Jay hna öhne ekaa la trenge catr ka xatua angeice troa elë hune la itre hnei angeice hna majemine ka ngazo, nge ka othi angeice ekö? Qaathei Akötresie, ngo tha qaathei angeice kö. Öni angeic, “Hnenge hna inine lapane la Tusi Hmitrötr, me thithi matre hetrenyi ni la uati hmitrötr, nge hnenge hna thele ixatua thene la itre Keresiano ne la ekalesia. Tro fe la itre ewekë cili a xatua së asë troa öhne la nyipi inuegufa. Ce wange jë pe së la aqan.
THULUËNE JË NGÖNE LA WESI ULA I AKÖTRESIE
10. Nemene la aliene la kola hape, troa “thuluëne” ngöne la wathebo i Akötresie?
10 Easa e ngöne la tusi Iakobo 1:25 ka hape: “Ame la ate thuluëne ngöne la wathebo ka meköti me gufa kö, me cile huti ngön, . . . tro ha manathithi la ate celë ngöne la huliwa i angeic.” Ame la aliene lai “thuluëne” qene Heleni, tre, kola hape, troa goeëne hutine la ketre ewekë, troa thele troa atrepengöne hnyawa. Maine easa ajane tro la wathebo ka inuegufa a hane jilapane la hni së me mekuna së hnen, haawe, loi e tro fe sa kuca la hnëqa së, ene la troa catre inine la Tusi Hmitrötr, me catre thithi fë la itre mekune ka jui hne së hna e.—1 Tim. 4:15.
11, 12. (a) Jëne la trenge ithanata i Iesu, hnei nyidrëti hna nyihatrene tune kaa la enyipiewekëne la troa melëne la nyipici? (b) Nge tune lo hna amamane hnene la hna melëne hnene la trejine fö, nemene la nyine tro la itre thöthi a thupëne hnyawa?
11 Ketre mina, loi e tro sa ‘cile huti’ ngöne ej, kola hape troa catre trongëne la itre hna amekötine hnene la Wesi Ula i Akötresie; aqane tro hi së lai a melëne la nyipici. Kolo hi lo itre trenge ithanata i Iesu lai, kowe lo angetre lapaune koi nyidrë; öni nyidrë: “Maine tro nyipunie a xome hutine la tenge ewekënge, itete dei ni nyipunie ka nyipici; nge tro hë nyipunie a ate la nyipici, nge tro ha nue amacai nyipunie hnene la nyipici.” (Ioane 8:31, 32) Hnene la ketre itusi hna qaja la aliene la hnaewekë hna hape “ate,” kola hape, “drenge thenge, melëne hnyawa.” Haawe, ame la atr ka “ate” la nyipici, tre, kolo lai a hape, ka melëne angeice la nyipici. Qa ngöne lai, ijije tro sa qaja ka hape, “wesi ula i Akötesie” a “huliwane” la itre hni së, me xom ameköti së, matre tro sa nyi hnaiji ne la Tretretro së e hnengödrai.—1 Thes. 2:13.
12 Isa sipu hnyingë së ju kö, ka hape, ‘Atre hnyawa kö ni la nyipici?’ Eni kö a melëne la nyipici? Maine, ajane pala kö la “inuegufa” ne la fen? Kola mekune hmaca hnene la ketre Keresiano föe hna hetrune hnene la keme me thine i angeic, lue Keresiano, ka hape: “Ame la eö a tru ngöne la nyipici, tha saze kö Iehova, Nyidrëti pala hi la. Ngo ame ni, tre tha hnenge kö hna thele troa atre Nyidrë. Tha hnenge kö hna inine troa sisiine la itre hnei Nyidrëti hna sisiin. Thatre kö ni ka hape, tha sihngödri kö koi Nyidrëti la itre hnenge hna kuca. Nge tha hnenge kö hna inine troa thele Nyidrë e kola traqa la itre jole koi ni. Hnenge hna xötrethenge la itre ewekë thenge la aqane trotrohnineng, nge eni pëhë enehila a nango hmahma, ke atre hë ni laka pëkö ca hnenge hna atre ekö.” Eloine pe, e thupene hë, atre hë la trejine föe ka hape, ka tria catre la aqane mekune i angeic, ame hnei angeice hna hmaca ju. Goi xome fe angeice la huliwa ne pionie lapa.
ATREINE HI LA UATI HMITRÖTR TROA NUE GUFA SË
13. Tro la uati hmitrötr a nuegufa së tune kaa?
13 Easa e ngöne 2 Korinito 3:17 ka hape: “Ame la hnei Ua i Joxu hna hne ngön, te, troa shenge la ate cili.” Tro la uati hmitrötr a sei së tune kaa? Ame mina fe la ketre ewekë ne la uati hmitrötr ka troa cia ngöne la isa hni së nge ka nyipi ewekë troa sei së, tre ene la “ihnim, me madin, me tingeting, me xomi hni ahoeany, me metöt, me thina ka loi, me nyipici me thina ka menyik, me xome hnöth.” (Gal. 5:22, 23) E patre kö la itre thiina cili, tune la ihnim, haawe xom acone ju hi la mele ne la atr; nge aqane mele ne hi la itre atr enehila. Thupene jë hi la hnei Paulo aposetolo hna e wengëne la itre pengöne la wene ne la ua, öni angeice hmaca jë hi: “Tha hna wathebo sane kö la ite ka tun.” Kola qeje nemene lai? Pëkö wathebo ka atreine troa thingi jëne la wene ne la ua troa kökötr. (Gal. 5:18) Ngo ame pe, nemene jë la enyipiewekëne la wathebo cili? Aja i Iehova troa mele epine palua la itre thiina ne la Keresiano e kuhu hni së, nge tro sa amamane thenge la hni ka pexej.
14. Hna hule tune kaa la itre atr hna musinëne hnene la ua ne la fen?
14 Kola mekune hnene la itre atr hna hule hnene la ua ne la fen, ka hape, itre hna nue gufane angatr, ke tha hna othi angatre kö troa kuca la itre aja i ngönetrei. (E jë la 2 Peteru 2:18, 19.) Ngo iananyi catre memine la nyipici. Loi hmaca pë hë lai e troa kuca la itre trenge wathebo me hna amekötine nyine wenë la itre aja ka ngazo ne la hni me itre thiina i angatr. Öni Paulo ka hape, “tha hna acile la wathebo thatraqane la ate ka meköt, ngo thatraqai angete shashaithe la wathebo, me tha idei.” (1 Tim. 1:9, 10) Angatre fe hi a hane nyihluene la ngazo, me “kuca la ite aja ne la ngönetei,” lo tane ihumuth. (Efe. 2:1-3) Angatre lai a qene nengetreij, kola sesë thenge la ewekë ka pi. Joxu hë thei angatre la itre aja ka ngazo, ngo ame la engazon, tro angatr a jötre hnen.—Iako. 1:14, 15.
MELE JË HNINE LA EKALESIA I KERESIANO TUNE LA ITRE HNA NUE GUFAN
15, 16. Nemene la enyipiewekëne la easa ce memine la ekalesia, nge nemene la pengöne la inuegufa ka troa thue madrine së e cili?
15 Ame lo nyipunieti a xötrei lö kowe la hmi Keresiano, tha nyipunieti kö a traqa itronyi ne tro hi a ithikeu. Ngo nyipunieti a lö, ke Iehova a hë nyipunieti koi Nyidrë. (Ioane 6:44) Hnauëne laka kola huli nyipunieti hnei Nyidrë? Hnene jë laka, ka meköti nyipunieti me xoue Akötresie? Maine jë tro nyipunieti lai a sa ka hape, “Pëkö!” Nemene jë kö la hnei Akötresieti hna öhne thei nyipunie? Hni nyipunieti la ka mama koi Nyidrë, ke ka hmala troa kapa la wathebo ka inuegufa, me hni ka canga drengethenge Nyidrë. Jëne la ekalesia, hnei Iehova hna ithuane la hni nyipunieti hnene la göxeni ne la ua, matre thepe nyipunieti pi qa ngöne la itre ini ka tria ne la itre hmi ka thoi, me ini nyipunieti troa xome la thiina ne Keresiano. (E jë la Efeso 4:22-24.) Ame enehila, nyipunieti fe hë e hnine la lapa ka cas ngöne la fene hnengödrai celë, hna nyipi ‘nue gufan.’
16 Ame la nyipunieti a ce memine la itre atr ka nyipi hnimi Iehova, hapeu, xou i nyipunieti kö? Nyipunieti kö a xouene e tro ketre a qeje gelene la huliwa i nyipunie? Ame la nyipunieti a porotrike memine la itre trejin e hnine la Uma Ne Baselaia, tro kö nyipunieti a ea catrëne la watrenge i nyipunie wanga atrekënö pi? Ohea! Pëkö hnei nyipunieti hna xouen. Nge tune kaa pena e nyipunieti ju ngöne la itre hnë ithikeu e cahu trön? Tha lapa hnyawa kö nyipunie! Celë hi matre, ame la trenge madrine i nyipunieti enehila qa ngöne la inuegufa ka eje e hnine la nöje i Akötresie, tre nyine tro hi a pane amamai nyipunie la nyipi inuegufa hnei nyipunieti hna troa kapa elany.
“HNA NUE GUFANE KA HADEHADEU NE LA ITE NEKÖ I AKÖTESIE”
17. Troa nuegufane tune kaa la itre atr hnene lo hna hape, “amamane la ite nekö i Akötesie”?
17 Hna qeje pengöne hnei Paulo aposetolo la inuegufa hnei Iehova hna hnëkëne kowe la itre hlue i Nyidrë, ka hape: “Ite ewekë hna xupe a tengeneune kola teqene la troa amamane la ite nekö i Akötesie.” Nge angeic a sisedrëne ju me hape: “Kola mejiune la tro ha nue la ite ewekë hna xupe qa ngöne la hna othe hnene la ka hnyeqet, kowe la hna nue gufane ka hadehadeu ne la ite nekö i Akötesie.” (Rom. 8:19-21) Ame la “ite ewekë hna xupe” celë, tre kolo hi a qaja la itre atr ka mejiune kowe la mel e celë fen, nge itre ka troa manathithi e “troa amamane” pi la itre nekö i Akötresieti hna iën. Ame la hna amamane cili, tre troa nyiqaane e mele hmaca jë la itre “nekö i Akötesie,” nge tro angatr me Keriso a apatrene trije la iakötrë qa ngöne la fen, me xatuane la “ka ala nyimu atraqat” troa traqa kowe la fene ka hnyipixe.—Hna ama. 7:9, 14.
18. Tro ha nue gufane tune kaa la itre atr ka idrengethenge, nge nemene la pengöne la inuegufa hnei angatre hna troa melën?
18 Troa thapa la itre atr kowe la ketre inuegufa ka hnyipixe, matre nue gufa angatre pi qa ngöne la mene ne la itre huliwa i Satana me itre dremoni. (Hna ama. 20:1-3) Hane petre hi lai ketre inuegufa ka sisitria! Thupene jë hi lai, tro lo ala 144 000 angetre troa ce joxu me huuje me Keriso a nue gufane la itre atr; tro angatr a fe gojenyine trongëne la itre manathithi ka xulu qa ngöne la huuje nyine thupene mel, uti hë la troa apatrene hnyawa la itre ngazo me itre ethanyine la mele hna kapa qaathei Adamu. (Hna ama. 5:9, 10) Maine tro pala hi la itre atr a mele nyipici hnine la itre itupath, tro angatr a traqa kowe la nyipi inuegufa hnei Iehova hna hnëkëne thatraqai angatr, ene la “hna nue gufane ka hadehadeu ne la ite nekö i Akötesie.” Öhne hë nyipunieti lai! Hmaloi hnyawa ha koi nyipunieti troa kuca la meköti xajawa i Akötresie, ke pexeje hnyawa ha la ngönetrei nyipunie, nge meköti hnyawa fe hë la thiina i nyipunie; ase hë xome ujëne matre hnaiji Akötresieti hnyawa ha.
19. Nemene enehila la nyine tro pala hi sa catre kuca, matre tro kö sa xötrëne la gojenyi ne tro kowe la nyipi inuegufa?
19 Hapeu, nyipunieti kö a lapa treqene lai “hna nue gufane ka hadehadeu ne la ite nekö i Akötesie”? Maine eje hi, haawe epi tro pala hi a amekötine la mekuna i nyipunie me hni nyipunie hnene la “wathebo ka meköti me gufa.” Catre jë inine hnyawa la Tusi Hmitrötr. Melëne hnyawa jë la nyipici. Thithi jë troa sipone la uati hmitrötr. Kapa hnyawa ju la manathithi qa ngöne la ekalesia i Keresiano memine la itre göxeni ne la ua qaathei Iehova. Wange kö ke iaö nyipunieti pi hnei Satana, tune lo aqane iaö Eva ekö, nge mekune menune jë nyipunieti ka hape, pë hë jëne enije së, ke tru la hna xom aconyi së hnene la itre wathebo i Akötresie. Nyipici laka, ka atreine catre Satana lo nyinyithiina. Ngo ame pe, tro pëhë së lai a ce wange ngöne la wiike ka troa xulu ka hape, tha “iaö shë hnei Satana ; ke tha tha ’te kö shë la ite nyinyithina i nyën.”—2 Kor. 2:11.
[Thying]