Jehová tä erametre ni tikete

“Ni tä nikren kwin kukwe bökän te, kukwe ne abrä ni mikaka kwäre.” (SANT. 1:25 NGT)

¿MÄ RABA MIKE GARE ÑO?

¿Kukwe meden tä ni ükete rabakäre erametre kwäre, aune ye köböire nire nire kwe kukwe kwin tä nemen?

¿Ni rabadre erametre kwäre yekäre nikwe dre nuaindre?

¿Nire nire käkwe nändi jankunu ji ja nire kräke yebiti angwane dre rabai kwe?

1, 2. a) ¿Ñobätä nitre ñaka nüne jäme? b) ¿Nita Jehová mike täte ye kräke dre kwin tä ja känenkäre?

NITRE tö jondron tuabätä bäri jakwe, kukwe blo nuainta aune ni mada nuainta tare ye käi näire nita nüne (2 Tim. 3:1-5). Kukwe ne ñaka ririadre bäri gäre, gobrantre tä kukwe ükete bäri nuaindre, tätre guardiatre mike bäri kwati sribikäre. Nitre kwati ñaka tä näin jubäre deu aune ñaka tä monsotre kwetre ye tuenmetre ja denkä kaibe ji ngrabare, deu aune rare. Ye tä mike gare nitre ñaka tä nüne jäme, aune kukwe ye ñaka ükaite tuin ietre.

² Ye erere angwane, ¿dre köböire ni raba nüne erametre jäme? Jardín Edén yete, Satana niebare nikwe ja diandrekä mento Jehovabätä ye aibe köböire nüna raba jäme. Akwa kukwe tä nemen bare ye kätä mike gare kukwe ñaka metre niebare kwe. Erametre, Ngöbökwe kukwe ükaninte ja ngwandre ño kräke aune kukwe ja üaire kräke ye nitre ñaka mike täte angwane, nitre jökrä tä ja tare nike gwairebe. Kukwe ne tä mate ni Jehová mikaka täte yebätä arato. Akwa, kä juto nibätä, ñobätä ñan aune ja känenkäre ni ñaka rabaira klabore ngite aune kukwe käme kisete, bätä “ni Ngöbö ngäbriänkä abko kräke Ngöbökwe kukwe kuin nuäre nuendi” nieta Bibliakwe ye rabai nikwe (Rom. 8:21). Erametre, ni mikai kwäre ye kräke Jehová niena ni mike juto. ¿Tä nuainne ño?

3. ¿Jehovakwe kukwe meden biani nuaindre ni kristiano ie, aune kukwe meden ngwantarita abokän ni bike mike gare jai?

³ Ni mikai kwäre ja känenkäre ye kräke Jehová tä ni mike juto, ye nuainkäre niarakwe “kukwe bökän [...] ni mikaka kwäre”, o Biblia mada tä niere ye erere, kukwe “kuin era metre” ye biani nie niebare Santiagokwe (ñäkädre Santiago 1:25 yebätä). Kukwe ükaninte nieta nitre olote angwane, tätre nemen nütüre ñaka rabaira kukwe jökrä nuainne töi jämebiti aune ñaka rabaira kukwe ruäre nuainne tä nemen  ruin ietre. Ye erere ngwane, ¿“kukwe bökän [...] ni mikaka kwäre” ye abokän dre gärätä? ¿Tä ni mike ño kwäre?

KUKWE NI MIKAKA KWÄRE

4. ¿“Kukwe bökän [...] ni mikaka kwäre” ye abokän dre gärätä, aune ye köböire nire nire kwe kukwe kwin tä nemen?

⁴ “Kukwe bökän [...] ni mikaka kwäre” ye ñan Kukwe biani Moisés ie gärätä, ñobätä ñan aune kukwe ye nämene “ni jökrä ngite Ngöbö ngwärekri” mikakäre gare, aune Kristo kukwe ye mikanina nemen bare (Mat. 5:17; Gál. 3:19). Ye abokän “Kristokwe kukwe biani nuendre” yebätä Santiago nämene blite, kädekata arato “kukwe [...] töde[kakäre]” aune “kukwe biani nuendre ni tikatekäre” (Gál. 6:2; Rom. 3:27, NGT; Sant. 2:12). Ye medenbätä, “kukwe bökän” ye abokän kukwe nuaindre nikwe Jehová tä ribere nie ye jökrä gärätä. Kukwe ye köböire nitre kristiano dianinkä nänkäre kä kwinbiti aune “obeja mada” yekwe kukwe kwin tä nemen (Juan 10:16).

5. ¿Ñobätä kukwe ni tikatekäre ye nuäre mikadre täte?

⁵ Juta kwati krubäte yekänti kukwe keta kabre ükateta aune ñaka nuäre mikadre täte. Akwa, “kukwe bökän” yebätä kukwe ütiäte ja jie ngwankäre aune kukwe nuäre nuaindre ribeta nie abokän tä mikani (1 Juan 5:3). Jesukwe niebare: “Yugo tikwe nebrä nuäre ngwan[dr]e, erere arato tribe tikwe abrä juto” (Mat. 11:29, 30, NGT). Ne madakäre, “kukwe bökän” yebätä kukwe ñaka tä ükaninte keta kabre jatäri ni mikakäre ja ngie nuin, o kukwe ükatekäre ni rüere, ñobätä ñan aune kukwe ye tä blite ja tare yebätä aune tä ni töi bätä ni brukwäte, ñaka tä tikani jä kwatare yebätä (ñäkädre Hebreos 8:6, 10 yebätä).

“KUKWE BÖKÄN” YE TÄ NI MIKE ÑO KWÄRE

6, 7. a) ¿Jehová kukwe ükaninte nuaindre yebätä ni raba dre niere? b) ¿“Kukwe bökän” tä ni mike ño kwäre?

⁶ Jehová kukwe keta kabre ükaninte ni kräke abokän köböire kukwe kwin tä nemen nikwe aune tä ni kriemike. Ñodre, ani töbike jondron sribebare kräke kukwe ükaninte yebätä, kä rabadre rare aune dibire kräke kukwe ükaninte. ¿Kukwe ye ñaka tä ni mike nüne jäme nire raba niere? Kukwe ye ütiäte nünankäre kwin gare nie aune ni jökrä tä mike ütiäte jai. Ye erere arato, Jehová kukwe ükaninte ja ngwandre ño kräke aune kukwe ja üaire kräke, tä mikani “kukwe bökän” Kristokwe yebätä, ye tä ükaninte kukwe kwin rabadre nikwe aibe kräke.

⁷ Kukwe ni mikaka kwäre ye tä ni kriemike, tä ni tuenmetre ni töta nemen dre dre nuain ye erere nuainne, kukwe tare ñaka nemen bare nibätä aune nikwe ñaka nitre mada ie kukwe ñäkäidre bätä tö dre dre nuain ye erere tuanemetre nuainne. Ye medenbätä, erametre nikwe nünandre jäme, o ni tö dre nuaindi ye nikwe nuaindre gäre, ni rabadre nuainne Jehová töi aune kukwe ükaninte nuaindre kwe ye ererebätä. Ngöböta jondron tarere ye ni rabadre tarere aune jondron tuin käme ie ye rabadre tuin käme nie arato. Ye erere kukwe ni mikaka kwäre tä driere nie (Amós 5:15).

8, 9. Kukwe ni mikakäre kwäre ye mikata täte angwane, ¿dre kwin tä nemen nikwe? Mä raba bämike.

⁸ Ngite täi nibätä ye ngwane, ñaka rabai nuäre ni kräke kukwe käme denkä ja töite. Akwa nikwe ja ngwain metre Ngöböi aune kukwe biani kwe ni tikatekäre ye mikai täte angwane, ja rabai ruin kwäre nie kä nengwane arato. Kukwe ye erere namani bare Jay yebätä, niara nämene sö duin ye ngwane ja tötika Bibliabätä kani ngäbiti kwe. Kukwe ye käme Ngöbö kräke nükani gare ie angwane, namani töbike: ¿niarakwe ja töi mikai jankunu klabore sö dua yei, o ja mikai Jehová yekri kwe? Niara ja töi mikani kwatibe Ngöbö mike täte aune ja di ngwani kwe ñaka sö duin jankunu. ¿Ñaka namanina sö duin ye ngwane ja namani ruin ño ie? “Kukwe kwin rababa bare, niebare kwe; kä rababa juto krubäte tibätä aune ja rababa ruin kwäre tie.”

⁹ Kukwe ja töi kräke namani gare Jay ie: ni töita dre nuainbätä ye erere nikwe nuaindre drieta nitre ñaka Ngöbö mike täte yekwe, ye abokän ja töi mikadre “kukwe kämekäme aibebtä”,  ye tä metrere ni mike klabore; akwa, Jehová tä ni tuenmetre kukwe nuainne, ye abokän “Ngöbö Üai tö dreye, yebtä [...] ja töi mik[ata] kwatibe” ye tä ni mike kwäre, tä ni mike “nüne kärekäre [...] amne nita nüne jäme” (Rom. 8:5, 6). ¿Dre käkwe Jay dimikani sö dua ye tuenmetre? Ñaka ja di jeñebiti nuainbare kwe, ñakare aune Jehovakwe niara dimikani. Tä mike gare: “Käre ti nämä ja tötike Bibliabätä, ti nämä üai deme kärere Ngöböi aune ja mräkätre konkrekasionte nämä ti dimike töi kwinbiti ye ti nämä kain ngäbiti”. Kukwe ne raba ni dimike ño arato nüne jäme erametre ye ani mike gare jai.

NI JA TÖTIKADRE KWIN NGÖBÖ KUKWEIBÄTÄ

10. ¿Kukwe Ngöbökwe yebätä nikradre kwin nieta ye dre gärätä?

¹⁰ Santiago 1:25 tä käbämike: “Akwa ni tä nikren kwin kukwe bökän te, kukwe ne abrä ni mikaka kwäre, angwane [...] tä käre okwä kukwe nete, [...] ne nie abräbätä kätä nuäre [...] nuainta kwe nebätä”. Kukwe griekore kwitata “nikren kwin” ye abokän metrere “ja mikadrete nikrakäre” o ja töi mikadre kwatibe aune ja di ngwandre gärätä. Kukwe ni mikakäre kwäre ye rabadre ni töite aune ni brukwäte gäre, ni rabadre ja di ngwen ja tötike kwin Bibliabätä aune nikwe orasion nuaindre töbikatarikäre kukwebätä ja tötikata nikwe yebätä (1 Tim. 4:15).

11, 12. a) ¿Kukwe metre ye ererebätä nikwe nünandre ye Jesukwe mikani gare ño? b) Página nekänti üai mikani ye erere, ¿kukwe meden abokän monsotre bati ñaka rabadre nuainne metrere?

¹¹ Kukwe Ngöbökwe ye nikwe mikadre täte jankunu arato, aune kukwe metre ye ererebätä nikwe nünandre. Jesukwe blitabare nitre nänkä ben yebe angwane kukwe ye kwrere mikani gare kwe: “Munkwe nünandikä kärekäre ti kukweibtä  ne ngwane, mun rabadi ja töitikaka era metre tibe. Ye ngwane, kukwe era metre Ngöböbtä rükadi gare munye amne kukwe era yebti mun rabadi tikaninte” (Juan 8:31, 32). Tärä keteiti kukwe känänkäre tä niere ye erere, kukwe kwitata “rükadi gare” ye abokän “mikadre ütiäte jai” gärätä, ñobätä ñan aune “kukwe gare ye ütiäte krubäte nirei nüke gare ye kräke”. Kukwe metre mikadre nüke gare täte jai yekäre, ni rabadre mike ütiäte jai aune nüne kukwe ye ererebätä. Ye aibe köböire ni raba niere metre “Ngöbö Kukwei” ye tä “sribire” nibätä, tä ni mike ja ngwen ni Rün kä kwinbiti erere (1 Tes. 2:13).

¹² Nikwe kukwe ne ngwandretari jai: “¿Kukwe metre ye gare kwin tie? ¿Ye ererebätä tita nüne mantre jetebe? ¿Nitre ñaka Ngöbö mike täte tö dre nuaindi ye erere ti töi täbe nuainbätä arato?”. Ja ngwai iti ririabare mräkätre nämene Jehová mike täte ye ngätäite, niara nämene chi ye ngwane nünanbare ño kwe ye tä mike gare krörö: “Mätä nirien kukwe metrebätä angwane, käre Jehová tä yete. Akwa, ti abokän ie, niara ñaka namani gare metre. Jondron tuin käme ie ye ti ñaka nämä mike tuin käme jai, jondron nuain nämä tikwe ye niara ñaka nämä mike ütiäte jai ti nämä nütüre aune kukwe nämä nemen ti kisete ye ngwane ti ñaka nämä ja di kärere ie. Kukwe jökrä nämä gare tie ti nämä nütüre, akwa ye ñaka metre ñobätä ñan aune kukwe ñaka nämä gare jire tie”. Niara ñaka nämene töbike kwin ye nükani gare ja känenkäre ie aune kukwe ruärebätä ja töi kwitani kwe. Biti ja mikani prekursora regular kwe.

ÜAI DEME TÄ NI DIMIKE RABAKÄRE KWÄRE

13. ¿Üai deme Ngöbökwe tä sribire ño ne kwe ni rabadre kwäre?

¹³ 2 Corintios 3:17 yekänti nieta: “Ni Dänkien [Jehová, NM] [...] Üai tä [...] ye känti nita tikaninte”. ¿Üai deme tä sribire ño ne kwe ni rabadre kwäre? Tä ni töi mike ja ngwen kwin ne kwe ni rabadre kwäre, ñodre, üai ye tä ni töi mike “ni mda mda tarere, käta neme bäri juto nibtä, nita nüne jäme [...], nita jändrän jökrä ngibiare bätärekä, nita ni mda mda kaen ngäbti ja moto jämenbti, nita ja moto mike kuin ni mda mdakrä, [...] tödekata [...], amne nita bike tidrä ni mda mdabtä amne, ni töi kämekäme ye nita ketebtä” (Gál. 5:22, 23). Nitre ñaka Ngöbö mike täte ngätäite nita nüne ye tä mike gare metre niaratre töi ñaka ne erere, metrere ja tare ye ñaka kwetre angwane, ñaka raba nüne jäme. Apóstol Pablo kukwe ne kädekaninte jatäri ye bitikäre niebare kwe: “[Kukwe, NM] ye rüere abko kukwe ñakare jire kä nebtä”. Erametre, kukwe ñaka jire aune kukwe ñaka rabai ükaninte jire abokän ñaka raba üai deme Ngöbökwe tuenmetre sribire (Gál. 5:18). ¿Kukwe ye erere raba nemen ütiäte? Jehová tö ni jökrä tuai ja ngwen jankunu ni kristiano erere aune kärekäre.

14. ¿Nitre ñaka Ngöbö mike täte tä kukwe niere erere nire nire tä nuainne ye tä nemen ño klabore kukwe käme kisete?

¹⁴ Nire nire käkwe ja tuaninametre ngökadre nitre ñaka Ngöbö mike täte ie aune töita kukwe käme nuainbätä jankunu yei ja ñaka raba nemen ruin ngite (ñäkädre 2 Pedro 2:18, 19 yebätä). Akwa erametre niaratre ye tä klabore. Ñodre, kukwe keta kabre tä ükaninte gobrankwe nuaindre ne kwe niaratre tö dre dre nuaindi aune tö ja ngwain ño ye ñaka rabadre bare täte ietre. Pablokwe niebare erere: “Kukwe mikaninte ne abrä ñan ni kwin kräke, [...] mikaninte abrä ni krörö kräke ne: Ni bike kri kräke, ni ñan kukwe mike täte kräke” (1 Tim. 1:9, 10 NGT). Ne madakäre, niaratre ye tä klabore ngite kisete, ñobätä ñan aune “töi [...] ngitiekä” kukwe “kämekäme abko jiebti” ye abokän däkien käme krubäte (Efe. 2:1-3). Niaratre ye bämikata munkä jata munköi ye kwrere: töita kukwe käme jiebiti ye tä mike kukwe tare te ye ñaka tä gain jabätä (Sant. 1:14, 15).

KONKREKASION KRISTIANA YETE NITA KWÄRE

15, 16. ¿Ñobätä ütiäte krubäte nikwe ja mikadre konkrekasion kristiana yekri, aune yete nita nüne ño jäme?

¹⁵ Nita konkrekasion kristiana yete, ye ñaka  nikwe ribebare jai yebätä, ñakare aune Jehovakwe ni mikani nemen konkrekasion kristiana yete (Juan 6:44). ¿Ñobätä nuainbare kwe? ¿Ni namanina ja ngwen metre aune niara mike täte yebätä nuainbare kwe? Ñakare. Ye erere angwane, ¿dre jutuabare nibätä Jehová ie? Niara ni brukwä mikani ñärärä aune ni brukwä namani tuin kwin ie, niara tä ni jie ngwen ye nikwe mikai täte aune kukwe ni mikakäre kwäre ye nikwe kain ngäbiti. Ni namani konkrekasionte ye ngwane, Jehovakwe kukwe ja üaire mikani nirien ni brukwäte, ni mikani kwäre kwe ni ngöka yebätä aune nitre tä Ngöbö mike täte akwa ñaka metre kätä kukwe ngwarbe mike era jai yebätä aune nikwe ja ngwandre ni kristiano erere ye driebare kwe nie (ñäkädre Efesios 4:22-24 yebätä). Niara köböire, juta keteitibe tä kwäre kä jökräbiti tibien ye ngätäite nita nüne kä nengwane (Sant. 2:12).

¹⁶ Nita nitre Jehová tarekä ja brukwä tätebiti ngätäite angwane, kä jürä ñaka nemen jire nibätä ¿ñan ererea? Ni ñaka tä käre krare jabiti ¿ñan ererea? Ju ja Ükarakrö yete nita blite ja mräkätre yebe angwane ni ñaka tä mokrere tribe nikwe yebiti ¿ñan ererea? ¡Jän! Jata nemen ruin kwin nie, aune kwäre. ¡Nita nemen kä mada känti ye ngwane ja ñaka nemen ruin ye erere nie! Kä nengwane juta Ngöbökwe yete jata nemen ruin kwäre nie ye abokän kä ja känenkäre yete ni rabai nüne bäri jäme bämikata.

“NGÖBÖ MONSOITRE YEKWE MIKADI KWÄRE”

17. ¿“Ngöbö monsoitre mikadi gare” ye köböire nitre kä nebätä rabai ño kwäre?

¹⁷ Jehovakwe nitre niara mikaka täte mikai kwäre yebätä Pablokwe blitabare angwane mikani gare kwe: “Ngöbö monsoitre mikadi gare ye abokän ni [kä tibienbätä] sribebare ye tä ngübare krubäte”. Ye bitikäre niebare kwe: “Ni sribebare tä klabore kukwe käme kisete yebätä mikadi kwäre aune Ngöbö monsoitre yekwe mikadi kwäre” (Rom. 8:19-21). Texto nekänti, “ni sribebare” nieta ye abokän nitre käkwe nünain kärekäre Kä tibienbätä gärätä. Ngöbö ngäbriäntre dianinkä nänkäre kä kwinbiti “mikadi gare”, ye mräkätre mada täbe kä tibienbätä, gaikröta abokän rabaira kä kwinbiti, Kristo dimike nitre kukwe käme nuainkä diankakäre Kä tibienbätä aune “nitre kwati krubäte” mikai nüne kä mräte kwetre ye ngwane kukwe kwin rabai nitre kä tibienbätä yekwe (Apoc. 7:9, 14).

18. ¿Nitre Ngöbö mikaka täte ye mikai ño kwäre bätärekä jatäri, aune dre rabai kwetre?

¹⁸ Nitre kä nebätä rabai kwäre täte, ñobätä ñan aune rabai kwäre Satana aune chokalitre tä kukwe nuainne yebätä (Apoc. 20:1-3). ¡Ja rabai ruin kwin nie! Biti nitre 144.000 reire aune sacerdotere Kristokwe käkwe bätärekä jatäri ni mikai kwäre täte ngite yebätä ni kökanintari yebiti (Apoc. 5:9, 10). Tödeka nitre kä nebätä yekwe nuaite ye bitikäre niaratre rabai kwäre täte Jehová tö namani ie ye erere, ye abokän, “Ngöbö monsoitre yekwe mikadi kwäre”. ¿Ni raba bämike ja töibätä? Ni ñaka rabaira ja di ngwen ja tuakäre kukwe käme yebe, ñobätä ñan aune ni ngrabare jökrä yebätä ngite ñaka rabaira jire aune ni töi rabai metre Ngöbö erere.

19. ¿Ni tö ja tuai erametre kwäre angwane nikwe dre nuaindre?

¹⁹ ¿Ngöbö monsoitre käkwe ni mikadi kwäre ye mätä ribere krubäte jai? Ye erere angwane, mäkwe “kukwe bökän [...] ni mikaka kwäre” ye tuanmetre jankunu nemen ja töi aune ja brukwäbätä. Mäkwe ja tötika kwin aune käre Bibliabätä. Mäkwe nüna kukwe metre ye ererebätä. Mäkwe üai deme kärä Jehovai. Mäkwe ñaka kä mikate konkrekasion kristiana yebätä aune Jehová tä mrö ja üaire bien nie ye mäkwe ñaka juan ja bäre. Mäkwe ñaka ja ngwan Eva ye erere, niarakwe ja tuanimetre ngökadre Satana ie aune Ngöbö kukwei ye ñaka nuäre nuaindre namani ruin ie. Erametre Diablu yei ni ngöka gare krubäte. Akwa nikwe mikai gare jai kukwe ja tötikara ja känenkäre yebätä erere, ni raba niara ganainne, ñobätä ñan aune “Satana käre tä juto biare kukwe miketbe ni rüere, ye abko garera nie” (2 Cor. 2:11).

[Kukwe ngwantarita]

[Jondron üai bämikani página 9]

¿Nitre ñaka Ngöbö mike täte tö dre nuaindi ye erere ti töi täbe nuainbätä arato?

[Jondron üai bämikani página 9]

¿Tita nüne kukwe metre ye ererebätä?