‘Taravatu goevadaena, ura kwalimu gauna unai, itaia noho.’ ​—⁠IAM. 1:25.

ANINA OI GWAURAIA DIBA, A?

Edena taravatu ese taunimanima ia hegaegaelaia ura kwalimu korikorina idia abia totona? Daidia be unai taravatu amo namo idia abia?

Dahaka ita karaia be namo ura kwalimu ita abia totona?

Iehova idia badinaia taudia be edena bamona ura kwalimu do idia abia?

1, 2. (a) Hari, taunimanima edia noho be edena bamona, bona dahaka dainai? (b) Iehova ena hesiai taudia ese edena bamona ura kwalimu do idia abia?

 HARI inai negai, mataganigani, dagedage bona taravatu utua karadia idia bada idia lao noho. (2 Tim. 3:1-5) Unai dainai, gavamani be taravatu momo idia atoa, pulisi edia gaukara idia hagoadaia, bona gabu momo ai sekuriti kamera idia atoa taunimanima idia karaia gaudia itaia totona. Tano haida ai taunimanima be sibona idia gimaia totona, edia ruma ai alam, loka momo, bona paoa fensi idia atoa. Danu, momo be idia gari dainai hanuaboi ai idia loaloa lasi, o edia natudia be murimuri ai idia gadara lasi. Unai ese ia hahedinaraia momo be edia ura gaudia idia karaia diba lasi, bona toana be unai kara ia bada ia lao.

² Eden ai Satani ia gwau, bema taunimanima be Iehova ena lohia siahuna idia dadaraia, sibona idia naria diba. Unai nega amo ema bona hari idia vara gaudia ese idia hamomokania iena hereva be koikoi! Taunimanima be Dirava ena taravatu idia dadaraia bona sibodia edia ura idia badinaia dainai, momo be hisihisi idia davaria. Iehova ena hesiai taudia danu be hisihisi idia davaria. To, ita be mai eda helaro badina Baibel ia gwau, nega ta “Dirava ena natudia edia ura kwalimu hereadaena” do ita abia, bona kara dika ena igui amo ita do ia ruhaia. (Roma 8:21) Hari, Iehova ese ena hesiai taudia ia hegaegaelaia noho, unai ura kwalimu idia abia totona. Edena dala ai unai ia karaia?

3. Iehova be ena hesiai taudia dekenai dahaka taravatu ia henia? Edena henanadai do ita herevalaidia?

³ Nega vairai ura kwalimu ita abia totona, Iehova be ita dekenai gau ta ia henia. Iamesi ese ia gwauraia “taravatu goevadaena, ura kwalimu gauna unai.” (Iamesi 1:25 duahia.) Baibel haida ese idia gwauraia, “ita ia  ruhaia taravatuna” o “ita ia ruhaia taravatu goevadaena.” a Taunimanima be taravatu idia laloa neganai idia be ura kwalimu idia laloa lasi, to ta ese idia ia biagua auka karana idia laloa. Vadaeni, “taravatu goevadaena, ura kwalimu gauna unai,” be dahaka? Bona edena dala ai ita ia ruhaia diba?

ITA IA RUHAIA TARAVATUNA

4. “Taravatu goevadaena, ura kwalimu gauna unai,” be dahaka? Daidia be unai taravatu amo namo idia abia?

⁴ “Taravatu goevadaena, ura kwalimu gauna unai,” be Mose ena Taravatu lasi. Iehova ese unai Taravatu be Israela taudia dekenai ia henia, unai amo do idia diba idia be kara dika taudia. Unai Taravatu be Keriso ese ia hagugurua vadaeni. (Mat. 5:17; Gal. 3:19) To, Iamesi be edena taravatu ia herevalaia? Ia be “Keriso ena taravatu” o “abidadama karana ena taravatu,” bona “ura kwalimu taudia edia taravatu” ia herevalaia. (Gal. 6:2; Roma 3:27; Iam. 2:12) Ita gwau diba, “taravatu goevadaena” be Iehova ia ura ita karaia gaudia ibounai ia herevalaia. Horoa taudia bona “mamoe ma haida” be unai taravatu amo namo idia abia.​—⁠Ioa. 10:16.

5. Dahaka dainai taravatu goevadaena ita badinaia be auka lasi?

⁵ “Taravatu goevadaena” be tano momo edia taravatu amo ia idau. Unai Taravatu goevadaena ena oda herevadia bona hakaua herevadia be auka lasi ita lalopararalaia bona badinaia totona. (1 Ioa. 5:3) Iesu ia gwau: “Lauegu huaia auna be ia namo, bona umui lau noia do umui huaia gauna be ia metau lasi.” (Mat. 11:29, 30) Danu, “taravatu goevadaena” lalonai taravatu momo herea idia noho lasi. Unai taravatu ena badina be lalokau, bona ia be taunimanima edia lalona bona kudouna ai ia noho. Ia be nadi latanai idia torea gauna lasi.​—⁠Heberu 8:6, 10 duahia.

“TARAVATU GOEVADAENA” ESE ITA IA RUHAIA DALANA

6, 7. Iehova ena taravatu be edena bamona ita laloa be namo? Taravatu goevadaena ese ita ia durua dahaka ita karaia totona?

⁶ Iehova ena taravatu be taunimanima durua bona gimaia totona ia atoa. Hegeregere, ia ese guba bona tanobada biagua taravatudia ia atoa. Idia ta be graviti taravatuna. Taunimanima be unai taravatu dainai idia maumau lasi, to idia moale badina idia diba unai taravatu be mai ena namo. Unai hegeregerena, Keriso ena “taravatu goevadaena” amo, Iehova ena ura ita dibaia bona badinaia be mai ena namo.

⁷ Taravatu goevadaena ese ita ia gimaia dainai, eda ura namodia ita hagugurua diba, sibona ita hadikaia lasi bona ma haida ita matauraia. Danu, namona be ita ura karaia gaudia be Iehova ena ura hegeregerena. Anina be Iehova ia ura henia gaudia ita ura henia, bona ia inai henia gaudia ita inai henia. Oibe, taravatu goevadaena ese ita ia durua unai ita karaia totona.​—⁠Amo. 5:15.

8, 9. Taravatu goevadaena ita badinaia ena namo be dahaka? Ekspiriens ta gwauraia.

⁸ Ita be goevadae lasi dainai, eda ura dikadia ita biagua be auka. To, taravatu goevadaena ita badinaia neganai, eda ura dikadia ita dadaraia diba. Hegeregere, tau ta ladana Jay be kuku ania momo tauna. Baibel stadi ia matamaia neganai, ia laloparara Iehova be kuku ania karana ia moalelaia lasi. Jay ese abia hidi ta ia karaia be namo. Kuku do ia ania noho eiava Iehova do ia kamonai henia? Ena be kuku ia rakatania be auka, to ena lalona ia hadaia Dirava ia hesiai henia totona. Unai ia karaia murinai ena hemami be edena bamona? Ia gwau ia moale badina kuku ania karana ese ia biagua lou lasi.

⁹ Tanobada taudia be edia ura kwalimu idia gaukaralaia, sibodia edia ura idia karaia totona. To, Jay ia laloparara unai kara  ese momo be kara dika ena igui hesiai taudia ai ia halaoa. Taravatu goevadaena idia badinaia taudia be Dirava ena lauma ese ia hakaudia, unai dainai “mauri bona maino” idia abia diba. (Roma 8:5, 6) Jay be daika amo goada ia abia kuku ania karana ia rakatania totona? Ia be Dirava amo goada ia abia. Danu, hanaihanai Baibel ia stadilaia, lauma helaga totona ia guriguri bona tadikaka taihu edia heduru ia abia dae. Unai gaudia ese ita idia durua diba ura kwalimu korikorina ita abia totona. Ita idia durua dalana mani ita itaia.

DIRAVA ENA HEREVA ITAIA NOHO

10. Taravatu goevadaena “itaia noho” ena anina be dahaka?

¹⁰ Iamesi 1:25 ia gwau: “To taravatu goevadaena, ura kwalimu gauna unai, ia itaia noho bona ia badinaia noho tauna be unai bamona ia karaia dainai do ia moale.” Greek herevana idia hahanaia “itaia noho” ena anina be, gau ta badinai oi igo diho oi itaia namonamo totona. Unai dainai, bema ita ura taravatu goevadaena ese eda lalona bona kudouna ia biagua, hanaihanai Baibel ita stadilaia namonamo bona ita duahia gaudia ita laloa dobu be namo.​—⁠1 Tim. 4:15.

11, 12. (a) Edena dala ai Iesu ia hahedinaraia, hereva momokani be eda mauri ai ita badinaia be namo? (b) Ataiai laulau bamona, bema oi be matamata tauna, edena bamona karadia oi dadaraia be namo?

¹¹ Baibel amo ita dibaia hereva momokani be eda mauri ai ita “badinaia noho” be gau badana. Iesu be ia idia abidadama henia taudia haida dekenai ia gwau: “Bema egu hereva umui badinaia, umui be momokani egu hahediba taudia, bona umui be  hereva momokani do umui diba, bona hereva momokani ese umui do ia ruhaia.” (Ioa. 8:31, 32) Baibel diksenari ta ia gwau, inai hereva “diba” anina be ta ia laloparara ia dibaia gauna be mai anina bada ena mauri lalonai. Unai dainai, bema hereva momokani be eda mauri ai ita badinaia, ita gwau diba ita be hereva momokani ita diba, bona “Dirava ena hereva” be eda lalonai do “ia gaukara.” Unai ese ita do ia durua eda kara ita haidaua bona eda guba Tamana ita tohotohoa.​—⁠1 Tes. 2:13.

¹² Sibona oi nanadaia: ‘Hereva momokani lau diba namonamo, a? Hereva momokani be egu mauri lalonai lau badinaia, a? Eiava tanobada taudia ese idia karaia gaudia haida lau ura henia danu, a?’ Taihu ta ena ekspiriens mani oi laloa. Ia maragi neganai ena Keristani tama sina ese ia dekenai Iehova ena dala idia hadibaia. Ia diba Iehova ia noho, to iena kara ia diba namonamo lasi. Ia gwau: “Iehova ia inai henia gaudia lau dadaraia lasi. Bona lau laloa ia be lau karaia gaudia ia laloa bada lasi. Hekwakwanai negadiai, heduru totona ia lau noia lasi, to sibona egu diba dekenai lau tabekau. Hari lau laloparara, unai be lalohadai kavakavana.” Ita moale badina taihu be ena lalohadai ia hamaoromaoroa, bona ena mauri ia haidaua. Gabeai, regula painia gaukara ia karaia danu.

LAUMA HELAGA ESE OI IA RUHAIA DIBA

13. Lauma helaga ese edena dala ai ita ia ruhaia diba?

¹³ Korinto Iharuana 3:17 ia gwau: “Iehova ena lauma helaga ia noho gabudia ibounai, ura kwalimu ia noho.” Lauma helaga ese edena dala ai ita ia ruhaia diba? Ita ia durua “lalokau, moale, maino, boga-auka, hebogahisi, kara namo, abidadama, manau, bona sibona biagua karana” ita hahedinaraia totona. (Gal. 5:22, 23) Hari, taunimanima be unai kara namodia, hegeregere lalokau idia hahedinaraia lasi dainai, ura kwalimu korikorina idia moalelaia lasi. Aposetolo Paulo be lauma helaga ena huahua ia herevalaia murinai, ia gwau: “Unai gaudia dekenai taravatu be lasi.” Iena hereva ena anina be dahaka? Anina be taravatu ta ese ita ia koua lasi eda mauri lalonai lauma helaga ena huahua ita hahedinaraia totona. (Gal. 5:18) Iehova ia ura unai kara namodia ita hahedinaraia ela bona hanaihanai.

14. Edena dala ai tanobada ena kara ese taunimanima ia biagua?

¹⁴ Tanobada ena laloa dalana bona sibona edia ura ese ia biagua taudia idia laloa, idia be gau ta ese ia koua lasi. (2 Petero 2:18, 19 duahia.) To, idia diba lasi gauna be, idia be kara dika ena igui hesiai taudia ai idia lao. Unai dainai, gavamani be taravatu momo idia karaia, unai bamona taudia edia kara idia biagua totona. Paulo ia gwau, “taravatu be kara maoromaoro tauna totona idia karaia lasi, to ia be taravatu utua taudia” totona idia karaia. (1 Tim. 1:9, 10) Danu, idia be edia ‘tauanina ena ura idia badinaia’ dainai, kara dika ena igui hesiai taudia ai idia lao. Oibe, ‘tauanina ena ura’ be biaguna dikana ta bamona. (Efe. 2:1-3) Hegeregere, manumanu maragidia mani ita laloa. Idia ura dikadika hani idia ania dainai, hani ena kavabu lalonai idia vareai. To idia kamokau neganai, idia raka-lasi diba lasi. Unai hegeregerena, sibona edia ura dikadia idia badinaia taudia be kara dika ese ia biagudia, bona unai kara idia rakatania be auka.​—⁠Iam. 1:14, 15.

KONGRIGEISEN ESE OI IA RUHAIA DALANA

15, 16. Kongrigeisen ita bamoa matamaia neganai, dahaka namo ita davaria? Edena bamona noho namona be kongrigeisen ai ita mamia?

¹⁵ Keristani kongrigeisen oi bamoa totona oi be fom ta oi hahonua lasi, klab haida ai idia karaia bamona. To, kongrigeisen ai oi noho badina Iehova ese oi ia veria mai. (Ioa. 6:44) Dahaka dainai oi ia boiria? Ia  itaia oi be kara maoromaoro tauna dainai oi ia boiria, a? Reana do oi gwau, “lasi!” Vadaeni, dahaka dainai oi ia boiria? Badina ia itaia oi ura iena taravatu bona hakaua herevadia oi badinaia. Kongrigeisen oi bamoa matamaia negana amo ema bona hari, Iehova be Baibel amo oi ia hadibaia bona naria. Unai dainai oi be tomadiho koikoi edia hahediba herevadia oi dadaraia, bona Keriso oi tohotohoa diba. (Efeso 4:22-24 duahia.) Oibe, ura kwalimu korikorina idia abia taudia huanai oi noho be hahenamo badana.​—⁠Iam. 2:12.

¹⁶ Mani oi laloa: Iehova idia lalokau henia taudia huanai oi noho neganai oi gari, a? Kingdom Hall ai tadikaka taihu oi hereva henidia neganai, emu kohu atoa gabuna oi itaia loulou badina oi laloa haida ese emu kohu do idia henaoa, a? Reana lasi, ani? Badina oi diba momokani gau ta o tau ta ese oi do ia hadikaia lasi. Gabu ma ta ai oi noho neganai, unai bamona do oi mamia, a? Lasi ani? To hari, Iehova ena taunimanima huanai oi mamia noho namona be nega vairai do oi mamia noho namona ia hahedinaraia.

“DIRAVA ENA NATUDIA EDIA URA KWALIMU HEREADAENA DO IDIA ABIA”

17. Edena dala ai “Dirava ena natudia edia hairai do ia hedinarai negana” be taunimanima ruhaia negana?

¹⁷ Iehova ese ena taunimanima dekenai do ia henia ura kwalimu be Paulo ese ia herevalaia. Ia gwau: “Dirava ese ia havaraia gaudia ibounai be mai edia ura bada ida, Dirava ena natudia edia hairai do ia hedinarai negana idia naria noho.” Bena ma ia gwau: “Dirava ese ia havaraia gaudia ibounai be dika ena igui amo do ia ruhadia, bona Dirava ena natudia edia ura kwalimu hereadaena do idia abia.” (Roma 8:19-21) “Havaraia gaudia” be tanobada ai mauri hanaihanai helarona idia abia taudia ia herevalaia. Bona idia be “Dirava ena natudia,” horoa taudia unai, “edia hairai do ia hedinarai negana” ai hahenamo do idia abia. Keriso be horoa taudia ida kara dika taudia idia haorea, bona tanobada matamatana ai “hutuma bada” taudia idia hakaua vareai neganai, “Dirava ena natudia edia hairai do ia hedinarai negana” do ia matamaia.​—⁠Apok. 7:9, 14.

18. Dirava idia badinaia taudia be edena bamona ura kwalimu do idia moalelaia?

¹⁸ Taunimanima be Satani bona demoni ese do idia biagudia lasi dainai, ura kwalimu hereadaena do idia moalelaia. (Apok. 20:1-3) Unai be moale bada negana! Badina 144,000 taudia ese mauri davalaia boubouna amo, taunimanima be kara dika amo do idia ruhaia bona durudia idia goevadae lou totona. (Apok. 5:9, 10) Iehova idia badinaia taudia be hahetoho ginigabena ai idia kwalimu murinai, ura kwalimu goevadaena do idia abia, unai be “Dirava ena natudia edia ura kwalimu hereadaena.” Mani oi laloa! Dirava ia ura oi karaia gaudia be do ia auka lasi oi badinaia totona. Emu tauanina, kudouna, bona lalona be do ia goevadae dainai, Dirava ena kara namodia do oi tohotohoa goevagoeva.

19. “Dirava ena natudia edia ura kwalimu hereadaena” ita abia totona, dahaka ita karaia be namo?

¹⁹ “Dirava ena natudia edia ura kwalimu hereadaena” oi ura abia, a? Bema oibe, namona be “taravatu goevadaena, ura kwalimu gauna unai,” ese emu lalona bona kudouna ia biagua. Hanaihanai Baibel oi stadilaia namonamo. Hereva momokani be emu mauri lalonai oi badinaia. Lauma helaga totona oi guriguri. Keristani kongrigeisen bona Iehova amo idia mai herevadia oi laloa bada. Namo lasi Satani ese oi ia koia, Heva ia koia bamona, bona oi laloa Dirava ena taravatu oi badinaia be auka. Ena be Satani be mai ena diba ita ia koia totona, to “ita be iena koikoi karadia ita diba” dainai ia do ita dadaraia. Vaira wiki ena stadi ai unai do ita herevalaia.​—⁠2 Kor. 2:11.

[Footnote]

[Study Questions]

[Pictures on page 9]

Tanobada taudia ese idia karaia gaudia haida lau ura henia danu, a?

[Pictures on page 9]

Hereva momokani be egu mauri lalonai lau badinaia, a?