Jọ Jihova O Fi Obọ Họ K’owhẹ Wo Uvi Ufuoma
Jọ Jihova O Fi Obọ Họ K’owhẹ Wo Uvi Ufuoma
“[Riwi] e ruọ eva uzi ufuoma nọ o gba kiete.”—JEM. 1:25.
KỌ WHỌ SAE K’IYO ENỌ NANA VEVẸ?
Uzi vẹ o rẹ kẹ uvi ufuoma, kọ amono a bi wo erere no uzi yena ze?
Eme ọ rẹ kẹ omai uvi ufuoma?
Didi ufuoma ahwo nọ a rrọ edhere uzuazọ na a ti wo evaọ obaro?
1, 2. (a) Eme ọ be via kẹ ufuoma ahwo-akpọ, kọ fikieme? (b) Ufuoma vẹ idibo Jihova a te reawere riẹ evaọ obaro?
MA BE rria etoke nọ uvo-uthei, ababọ-uzikoko, gbe ozighi e jọ d’akpọ fia. (2 Tim. 3:1-5) Re a ruẹse whaha onana, egọmeti o te bi fi izi efa họ, kẹ iporisi ekwakwa nọ a sai ro mugba kẹ ozighi vi epaọ ọsosuọ, je bi fi ekamẹra họ eria sa-sa nọ a sae rọ ruẹ eware nọ ahwo a bi ru. Evaọ erẹwho jọ, ahwo a ru eware nọ i re ru edo nọ ikpehre ahwo a tẹ be gwọlọ ruọ iwou rai, a te je ru isiavẹ buobu nọ a rẹ rọ kare ethẹ rai gbe ogba nọ a fi iwaya avọ erae ẹlẹtriki họ. Ozọ o gbẹ be jọ ahwo buobu no iwou rai ze he evaọ aso, yọ a gbẹ be kẹ emọ rai uvẹ re ae ọvo a zaharo evaọ otafe he. Ababọ avro, ahwo-akpọ a gbe wo ufuoma ha, yọ o wọhọ nọ eware i bi nwene he.
2 Setan ọ ta evaọ Ọgbọ Idẹn inọ ohwo o te bi su omobọ riẹ ababọ obufihọ Jihova ẹsiẹe o re wo ufuoma. Onana yọ ọrue ologbo. Uzẹme na họ, epanọ ahwo a la izi Ọghẹnẹ vrẹ te, ere uye o be bẹ ae te. Ẹbẹbẹ nana o bi kpomahọ omai idibo Jihova re. Dede na, ma wo ẹruore inọ ohwo-akpọ o ti no igbo uzioraha ẹdẹjọ, ọ vẹ te reawere oware nọ Ebaibol na o se “uvẹ oruaro emọ Ọghẹnẹ.” (Rom 8:21) Evaọ uzẹme, Jihova ọ be ruẹrẹ idibo riẹ họ kẹ uvẹ hayo ufuoma yena enẹna. Evaọ oghẹrẹ vẹ?
3. Uzi vẹ Jihova ọ kẹ Ileleikristi, kọ enọ vẹ ma be te kẹ iyo rai?
3 Ma rẹ ruẹ uyo na nọ ma te roro kpahe oware nọ Jemis o se “uzi ufuoma nọ o gba kiete.” (Se Jemis 1:25.) Nọ a tẹ fodẹ uzi, awhaha ahwo buobu a re roro kpahe orọnikọ ufuoma ha. Nọ o rrọ ere na, kọ eme họ “uzi ufuoma nọ o gba kiete”? Kọ ẹvẹ uzi yena o rẹ rọ kẹ omai ufuoma?
UZI NỌ O RẸ KẸ OHWO UFUOMA
4. Eme họ “uzi ufuoma nọ o gba kiete” na, kọ amono a bi wo erere noi ze?
4 Orọnikọ Uzi Mosis na họ “uzi ufuoma nọ o gba kiete” na ha, keme Uzi Mosis na u je ru izieraha dhesẹ oma via, yọ Kristi o ru uzi yena gba no. (Mat. 5:17; Gal. 3:19) Kọ uzi vẹ Jemis ọ ta kpahe na? Oware nọ o wo họ iroro họ, “uzi Kristi na,” onọ a re je se “uzi orọwọ” gbe “uzi ufuoma.” (Gal. 6:2; Rom 3:27; Jem. 2:12) “Uzi ufuoma nọ o gba kiete” na o kẹre te oware kpobi nọ Jihova ọ gwọlọ mi omai. Ileleikristi nọ a rọ ẹzi wholo gbe “igodẹ efa” na a bi wo erere no uzi nana ze.—Jọn 10:16.
5. Fikieme uzi ufuoma na o gbẹ rọ rrọ owha ogbẹgbẹdẹ hẹ?
5 “Uzi ufuoma nọ o gba kiete” na o wọhọ izi erẹwho buobu hu, keme o ga ha, yọ o rrọ owha ogbẹgbẹdẹ hẹ, izi elọlọhọ nọ i no obọ Ọghẹnẹ ze. (1 Jọn 5:3) Jesu ọ ta nọ: “Owhowha mẹ o rẹ lọlọhọ, owha mẹ u re vovovo.” (Mat. 11:29, 30) Ofariẹ, “uzi ufuoma nọ o gba kiete” na orọnikọ izi buobu nọ a rọ gba ahwo ho keme uyoyou o wọ Ọghẹnẹ kẹ uzi na yọ udu gbe iroro ahwo a kere uzi na fihọ orọnikọ ewẹ itho ho.—Se Ahwo Hibru 8:6, 10.
OGHẸRẸ NỌ ‘UZI NỌ O GBA KIETE NA’ O BE RỌ K’OMAI UFUOMA
6, 7. Eme ma rẹ sae ta kpahe izi Jihova, kọ fikieme uzi ufuoma na o rẹ rọ ginẹ kẹ ohwo omofọwẹ?
6 Izi nọ Jihova o jie kẹ ijẹle gbe ahwo-akpọ e rẹ kẹ ae erere jẹ thọ ae. Wọhọ oriruo, roro kpahe uzi nọ Ọghẹnẹ o fihọ nọ oware kpobi nọ who fi kp’ehru u re ro kie ziọ otọ. Ohwo ọvo ọ rẹ sae ta ha inọ izi itieye nọ e be kpọ ehrugbakpọ na e ga hrọ. Ukpoye, a ruẹ nọ izi itieye na i woma keme i re fi obọ họ kẹ ae. Epọvo na re, izi nọ Jihova o fihọ k’omai nọ ma rẹ sae ruẹ evaọ ‘uzi ogbagba’ orọ Kristi na e rrọ rọkẹ ewoma ahwo-akpọ.
7 U te no ẹthọ nọ o rẹ thọ omai no, uzi ufuoma na o rẹ jẹ k’omai uvẹ wo uvi ẹgwọlọ mai t’obọ ababọ enwoma nọ i re te omai hayo amọfa nọ ma rẹ wha uye se. Fikiere, oware nọ o rẹ ginẹ k’omai uvi ufuoma họ, nọ ma tẹ be hai wo isiuru kpahe eware nọ e rọwokugbe izi Jihova. Ẹme na họ, ma rẹ daoma you eware nọ Jihova o you je mukpahe eware nọ o mukpahe, yọ uzi ufuoma na u re fi obọ họ k’omai ru ere.—Emọs 5:15.
8, 9. Didi irere ahwo nọ a bi koko uzi ufuoma na a re wo? Kẹ oriruo.
8 Fikinọ ma gba ha, ma re lele ikpehre isiuru muabọ ẹsibuobu. Ghele na, nọ ma tẹ be daoma koko uzi ufuoma na, ma rẹ reawere omofọwẹ nọ uzi na o rẹ sai fi obọ họ k’omai wo, makọ enẹna. Wọhọ oriruo, ọzae jọ nọ a re se Jay nọ a je wuhrẹ Ebaibol kugbe, o vovo isigareti reria no. Rekọ nọ o wuhrẹ inọ uruemu riẹ na o rẹ dha Ọghẹnẹ eva, o tẹ gwọlọ nọ ọ rẹ j’owọ jọ. Kọ ọ rẹ gbẹ ruabọhọ isigareti ivovo, manikọ ọ rẹ seba wọhọ epanọ Jihova ọ gwọlọ? Ọ j’owọ nọ u fo, ọ salọ nọ ọ rẹ gọ Ọghẹnẹ dede nọ isigareti i bi gbe si ei urru. Ẹvẹ o jariẹ oma nọ ọ siọ isigareti ivovo ba no? Ọ ta uwhremu na nọ: “Eva e be were omẹ gaga keme o rrọ omẹ oma inọ me no igbo.”
9 Jay ọ ruẹ vuhumu inọ oware nọ ahwo-akpọ a se ufuoma nọ o be kẹ ai uvẹ ‘rọ iroro kpahe eware iwo’ na yọ igbo, rekọ ufuoma nọ Jihova ọ rẹ kẹ, koyehọ “iroro eware nọ erọ erọ Ẹzi” e rẹ kẹ ohwo omofọwẹ gbe “uzuazọ gbe udhedhẹ.” (Rom 8:5, 6) Ẹvẹ Jay ọ sae rọ siọ isigareti ivovo ba? Orọnikọ ẹgba obọriẹ hẹ rekọ obufihọ Ọghẹnẹ. Ọ ta nọ: “Me re wuhrẹ Ebaibol na kẹse kẹse, lẹ kẹ ẹzi ọfuafo na, jẹ yare obufihọ inievo ukoko na.” Eware enana e rẹ sai fi obọ họ kẹ omai re nọ ma tẹ gwọlọ wo uvi ufuoma. Joma ta kpahe epanọ onana o sae rọ lọhọ.
ROMATOTỌ KIẸ ẸME ỌGHẸNẸ
10. Re a ‘riwi’ uzi Ọghẹnẹ eme u dhesẹ?
10 Jemis 1:25 o ta nọ: ‘Ọnọ o riwi e ruọ eva uzi ufuoma nọ o gba kiete na, ọ jẹ ruabọhọ iẹe, . . . o re ti wo oghale eva iruo riẹ.’ Ẹme Griki nọ a jọ etenẹ fa ‘riwi’ na, u dhesẹ epanọ “a re ruwẹ romatotọ rri oware.” Ẹhẹ, ma tẹ gwọlọ nọ uzi ufuoma na o kpọ iroro gbe udu mai, o gwọlọ nọ ma rẹ romatotọ wuhrẹ Ebaibol, lẹ, je roro didi kpahe oware nọ ma se.—1 Tim. 4:15.
11, 12. (a) Ẹvẹ Jesu o ro dhesẹ nọ u fo re ma yeri uzuazọ mai lele uzẹme na? (b) Wọhọ epanọ oriruo oniọvo na o dhesẹ, iroro ethọthọ vẹ u fo nọ izoge a rẹ whaha?
11 Evaọ oke ovona, ma rẹ daoma fi Ẹme Ọghẹnẹ h’iruo ẹsikpobi, ekoko uzi Ọghẹnẹ o vẹ rọ ere reria omai oma. Onana Jesu o wo họ iroro nọ ọ ta kẹ ahwo jọ nọ a fi ẹrọwọ họ iẹe inọ: ‘Wha tẹ rria evaọ eme mẹ, yọ whai ghinọ ilele mẹ, wha rẹ te riẹ uzẹme na, uzẹme na u re ti ru owhai emuyẹ.’ (Jọn 8:31, 32) Obe jọ o ta nọ “riẹ” nọ a jọ etenẹ ikereakere na fodẹ na o sai je dhesẹ edẹro nọ ohwo o re wo fikinọ “oware nọ ohwo na ọ ‘riẹ’ na o rrọ ghaghae kẹe.” Fikiere, nọ ma te bi koko izi Ọghẹnẹ kẹdẹ kẹdẹ u re dhesẹ nọ ma ginẹ “riẹ” uzẹme na ziezi. Ẹsiẹe ma sae rọ ta gbagba inọ “ẹme Ọghẹnẹ” ọ ginẹ rọ eva mai “ru iruo,” be kpọ uruemu mai re ma sae rọ aro kele Ọsẹ obọ odhiwu mai.—1 Tẹs. 2:13.
12 Nọ omara nọ, ‘Kọ mẹ ginẹ riẹ uzẹme na? Kọ me bi yeri uzuazọ kẹdẹ kẹdẹ wọhọ ohwo nọ ọ ginẹ riẹ uzẹme na? Manikọ eware nọ ahwo-akpọ a bi se ufuoma i gbe bi si omẹ urru?’ Oniọvo-ọmọtẹ jọ nọ ọsẹgboni riẹ a rrọ ukoko na ọ ta kpahe oke nọ ọ jọ uzoge inọ: “Nọ ọsẹgboni ra a tẹ rrọ ukoko na, o rẹ wọhọ nọ Jihova ọ rrọ kugbe owhẹ ẹsikpobi. Rekọ nọ mẹ jọ uzoge, me si kẹle Jihova tere he. Me gine mukpahe eware nọ Jihova o mukpahe he. Mẹ rọwo ẹdẹvo ho inọ oware nọ me ru u wuzou kẹe. Mẹ rẹ lẹ sei hi nọ me te wo ẹbẹbẹ. Mẹ jẹ rẹroso otoriẹ omobọ mẹ, yọ obọnana mẹ ruẹ vuhumu inọ ere oruo u fioka ha keme mẹ tubẹ riẹ oware ovo oke oyena ha.” U woma gaga inọ oniọvo-ọmọtẹ na o vuhumu uwhremu na inọ iroro nọ o wo oke ọsosuọ na e thọ gaga, o te ru inwene ilogbo evaọ uzuazọ riẹ. Ọ tubẹ ruọ iruo ọkobaro uwhremu na dede.
ẸZI ỌFUAFO Ọ RẸ SAI FI OBỌ HỌ K’OWHẸ WO UFUOMA
13. Ẹvẹ ẹzi ọfuafo na o re ro fi obọ họ k’omai wo ufuoma?
13 Obe 2 Ahwo Kọrint 3:17 o ta nọ: “Oria nọ Ẹzi Ọnowo na ọrọ, etẹe ufoma o rẹ jọ.” Ẹvẹ ẹzi ọfuafo na ọ sai ro fi obọ họ kẹ omai wo ufuoma? Edhere jọ họ, u re fi obọ họ k’omai wo iruemu nọ e rẹ wha ufuoma se omai, iruemu wọhọ “uyoyou, oghọghọ, udhedhẹ, uye oruẹ krẹkri, oma-onyẹ, ewoma, orọwọ, oma-urokpotọ, oma-oyọrọ.” (Gal. 5:22, 23) Ababọ iruemu nana, maero kọ uyoyou, ohwo ọvo ọ rẹ sai wo uvi ufuoma ha, wọhọ epanọ ma rrọ akpọ na ruẹ nẹnẹ. U woma kẹhẹ, nọ Pọl ukọ na o kele iruemu nọ ẹzi ọfuafo na o re fi obọ họ kẹ ohwo wo na no, o fibae nọ: “Uzi ovo o rọ nọ u mukpahe [iruemu] nana ha.” Eme họ otọ ẹme riẹ na? Uzi ovo o riẹ hẹ nọ o rẹ whaha ohwo iruemu nana ewo. (Gal. 5:18) O hae jọnọ uzi jọ o rẹ whaha ohwo iruemu nana ewo, kiyọ uzi utioye u fioka ha. Oreva Jihova họ re ma dhesẹ ọkpọ iruemu Kristi bẹdẹ bẹdẹ, ababọ oware jọ nọ o rẹ whaha omai.
14. Idhere vẹ ẹzi akpọ na o bi ro fi ahwo nọ a kie lele iei họ igbo?
14 Ahwo nọ ẹzi akpọ na o bi su, nọ a bi ru oware kpobi nọ u si rai urru a rẹ sai roro nọ a wo ufuoma. (Se 2 Pita 2:18, 19.) Rekọ uzẹme na họ, a rrọ igbo. Egọmeti a re fi izi buobu họ re a ruẹse kpọ uruemu uyoma ahwo otiọye na vi. Pọl ọ ta nọ: “A ru uzi kẹ ohwo okiẹrẹe he, rekọ enọ i re muruẹ, gbe iwudu.” (1 Tim. 1:9, 10) A rrọ igbo uzioraha, bi ‘kie lele ẹgwọlọ iwo’ nọ u bi su ai ruọ uye. (Ẹf. 2:1-3) Ahwo otiọye na, a wọhọ emera nọ e rẹ rara nyai kie fihọ ọnyọ. Urusio rai u bi su ai ruọ okpẹtu.—Jem. 1:14, 15.
UFUOMA NỌ O RRỌ UKOKO ILELEIKRISTI NA
15, 16. Irere vẹ ma wo no anwẹnọ ma ro kuomagbe ukoko Ileleikristi na, kọ ufuoma vẹ ma be reawere riẹ?
15 Nọ whọ ziọ ukoko na, orọnikọ whẹ ọvo nyaze ti kere odẹ fihotọ họ wọhọ epanọ ahwo nọ a gwọlọ ro imitini a re ru. Ukpoye, Jihova o si owhẹ ziọ ukoko riẹ. (Jọn 6:44) Eme ọ lẹliẹ Jihova si owhẹ? Kọ fikinọ who kiẹrẹe jẹ be dhozọ riẹ? Ẹsejọhọ whọ te ta nọ, “Vievie!” Kọ eme Ọghẹnẹ ọ ruẹ? Ọ ruẹ nọ who wo udu omaurokpotọ, inọ who ti koko uzi riẹ nọ o rẹ kẹ ufuoma. Jihova ọ tẹ jọ ukoko na rọ ẹme riẹ wuhrẹ owhẹ, o te si owhẹ no igbo egagọ erue gbe eware ethọthọ nọ ahwo a be rọwo, o te bi je wuhrẹ owhẹ epanọ whọ sai ro wo ọkpọ iruemu Kristi. (Se Ahwo Ẹfẹsọs 4:22-24.) Onana o tẹ whae ze nọ whọ rọ rrọ usu ẹko ahwo nọ a rẹ sai gine se ahwo “ufuoma” evaọ akpọ na soso.—Jem. 2:12.
16 Roro kpahe onana: Nọ whọ tẹ rrọ kugbe ahwo nọ a you Jihova no eva rai kpobi ze, kọ ozọ u re mu owhẹ? Kọ who re rri oma wariẹ ozozọ? Nọ who te bi lele oniọvo ta ẹme evaọ obọ Ọgwa Uvie, kọ who re kru ẹkpa ra kekeke re ohwo jọ ọ siẹe ba etho? Vievie! Ozọ ovo o rẹ jọ owhẹ ẹro ho, keme ufuoma o rrọ etẹe. Kọ oma o sae jọ owhẹ epọvo na nọ whọ tẹ rrọ kugbe amọfa nọ a rrọ ukoko na ha? Ijo! Ufuoma nọ whọ be reawere riẹ nẹnẹ na yọ odhesẹvia ọrọ ufuoma nọ ma bi rẹro riẹ evaọ obaro.
“UVẸ ORUARO EMỌ ỌGHẸNẸ”
17. Ẹvẹ “odhesẹvia emọ Ọghẹnẹ” o te rọ wha ufuoma se ahwo-akpọ?
17 Nọ Pọl ọ jẹ ta kpahe ufuoma nọ Jihova ọ te kẹ idibo riẹ evaọ otọakpọ, o kere nọ: ‘Enọ a ma na a be rọ ọwhọ hẹrẹ odhesẹvia emọ Ọghẹnẹ.’ Kẹsena o te fibae nọ: ‘A re ti si enọ a ma na omarai no igbo egbogbo eruọ eva uvẹ oruaro emọ Ọghẹnẹ.’ (Rom 8:19-21) ‘Enọ a ma na’ họ ahwo-akpọ nọ a te rọ otọ-akpọ na reuku, enọ i ti wo erere evaọ oke “odhesẹvia” emọ Ọghẹnẹ nọ a rọ ẹzi wholo na. Odhesẹvia yena u ti muhọ nọ “emọ Ọghẹnẹ” nọ a kpare kpohọ obọ odhiwu no a ti lele Kristi si emuemu no akpọ na, a ve fi obọ họ kẹ “otu obuobu” na ruọ akpọ ọkpokpọ na.—Evia. 7:9, 14.
18. Ẹvẹ idibo Ọghẹnẹ a ti ro wo ufuoma vi epanọ o rrọ enẹna, kọ ufuoma vẹ a te reawere riẹ uwhremu na?
18 Evaọ oke yena, ahwo-akpọ nọ a ta no igbo no a vẹ te reawere obọdẹ ufuoma, ufuoma rono ukpokpoma Setan avọ idhivẹri riẹ. (Evia. 20:1-3) Omofọwẹ nọ ahwo a ti wo, a rẹ ruẹ unu gbiku riẹ hẹ! Kẹsena ahwo idu udhuhrẹ gbe ene (144,000) nọ i ti lele Kristi su na a vẹ te rọ ẹkwoma idhe ẹtanigbo Kristi rọ ẹmẹrera fi obọ họ kẹ ahwo-akpọ no igbo uzioraha gbe sebaẹgba Adamu. (Evia. 5:9, 10) Nọ a tẹ kparobọ no odawọ urere na no, a ve ti wo uzedhe ufuoma nọ Jihova ọ gwọlọ nọ ahwo-akpọ a wo, “uvẹ oruaro emọ Ọghẹnẹ.” Dai roro epanọ o te jọ. O gbẹ te jọ bẹbẹ k’owhẹ re who ru oreva Ọghẹnẹ hẹ, keme whọ gba no yọ uruemu ra kpobi o ruẹrẹhọ no wọhọ ohwo nọ ọ be rọ aro kele Ọghẹnẹ.
19. Eme ma re ru nẹnẹ re ma sae daji edhere nọ u bi su kpohọ uvi ufuoma na?
19 Kọ who bi rẹro ufuoma orọ “uvẹ oruaro emọ Ọghẹnẹ” na? O tẹ rrọ ere, kuvẹ re “uzi ufuoma nọ o gba kiete” na o kpọ udu gbe iroro ra. Ẹhẹ, romatotọ wuhrẹ Ebaibol na. Yeri uzuazọ ra wọhọ ohwo nọ ọ ginẹ riẹ uzẹme na. Lẹ se Ọghẹnẹ re ọ kẹ owhẹ ẹzi ọfuafo na. Hai kpohọ iwuhrẹ ukoko gbe eruẹrẹfihotọ efa nọ Jihova o fihọ. Whọ jọ Setan ọ viẹ owhẹ họ họ wọhọ epanọ ọ viẹ Ivi họ, re who roro nọ izi Ọghẹnẹ e ga hrọ. Uzẹme, Ẹdhọ o wo ẹghẹ gaga. Rekọ wọhọ epanọ ma ti wuhrẹ evaọ uzoẹme nọ o rrọ aro na, ma rẹ yọroma re “Setan ọ siọ erere ba ewo eva oma mai: keme ma rọ ogbori ereghẹ riẹ hẹ.”—2 Kọr. 2:11.
[Enọ Uwuhrẹ]
[Iwoho nọ e rrọ ẹwẹ-obe avọ 9]
Kọ eware nọ ahwo-akpọ a bi se ufuoma i gbe bi si omẹ urru?
[Iwoho nọ e rrọ ẹwẹ-obe avọ 9]
Kọ mẹ be rọ uzuazọ mẹ dhesẹ nọ mẹ riẹ uzẹme na?
