Yambula Yave Kafila Muna Luvevoko Lwakieleka
Yambula Yave Kafila Muna Luvevoko Lwakieleka
‘Kengelelanga muna nsiku aziku a vevoka.’—YAK. 1:25.
NGA OLENDA SASILA?
Nkia nsiku utwasanga luvevoko lwakieleka? Aki nani bevwanga nluta muna nsiku wau?
Ayeyi i nsabi muna vwa luvevoko lwakieleka?
Nkia luvevoko bevingilanga awonso bena muna nzil’a moyo?
1, 2. (a) Ekuma luvevoko lwa wantu a nza lukulukilanga? (b) Nkia luvevoko bevingilanga selo ya Yave?
ELOKO, umpumbulu ye nsoki mu wokela kaka una mu lumbu yayi yambaninu tuzingilanga. (2 Tim. 3:1-5) Muna kuma kiaki, ayadi besikidisanga nsiku miayingi, wokesa vu ya mapolisia yo kubavana nwaninwa yafwana yo sia makina meyingilanga fulu ya mpila mu mpila. Muna nsi zakaka, wantu muna kitanina besianga ngunga muna nzo zau, makumba mayingi ye nkaku mia kura. Ndonga, wonga bemonanga mu vaika ku mbazi muna fuku yo yambula wan’au basakananga kuna mbazi yau kaka. Dialudi vo, luvevoko mu kuluka kaka luna, nanga e diambu diadi ke disoba ko.
2 Muna mpatu a Edene, Satana wavova vo o wantu muna kala ye luvevoko lwakieleka bafwete vambana yo Yave. O mambu mebwanga muna zingu kia wantu tuka muna kolo kiakina mesonganga vo Satana luvunu kavova. Dialudi, ekolo wantu beluta kululanga nsiku mia Nzambi, e mpasi mpe ziwokelanga muna nza yawonso. Yeto mpe selo ya Yave tumonanga mpasi zazi. Kansi, tuvingilanga e ntangwa ina wantu bevevoka muna ubundu w’esumu ye uwolezia. O luvevoko lwalu luyikilwanga muna Nkand’a Nzambi vo: “Vevoka kwa nkembo a wan’a Nzambi.” (Roma 8:21) Dialudi, Yave wayantika kubika selo yandi muna vwa luvevoko lwalu. Mu nkia mpila?
3. Nkia nsiku kavana Yave kw’alandi a Kristu? Nkia yuvu tubadika?
3 Muna kuma kia luvevoko bevwa selo ya Yave kuna sentu, Yave wavana nsiku una kayikila Yakobo vo: “Nsiku aziku a vevoka.” (Tanga Yakobo 1:25.) E nsekola zakaka za Nkand’a Nzambi zisekolanga tini kiaki vo “nsiku uvevolanga wantu” (Bíblia na Linguagem de Hoje) ye “nsiku mialunga, nsiku mia kimpwanza” (Masonukwa Manlongo). Nkumbu miayingi wantu bebadikilanga nsiku nze zitu, ke luvevoko ko. Nki i “nsiku aziku a vevoka”? Nkia mpila ulenda kutuvevolwela?
NSIKU UTWASANGA LUVEVOKO
4. Nki i “nsiku aziku a vevoka”? Aki nani bevwanga nluta muna nsiku wau?
4 “Nsiku aziku a vevoka” ke Nsiku a Mose ko owu wasengomonanga makuzuka yo lungana muna Kristu. (Mat. 5:17; Ngal. 3:19) Nkia nsiku kayika Yakobo? “Nsiku a Kristu” kayika. O nsiku wau uyikilwanga mpe vo “nsiku a lukwikilu” ye ‘nsiku uvevolanga wantu.’ (Ngal. 6:2; Roma 3:27; Yak. 2:12) O “nsiku aziku” i mawonso Yave kevavanga oku kwa yeto. Akristu akuswa ye “mameme makaka” nluta miayingi bevwanga muna nsiku wau.—Yoa. 10:16.
5. Ekuma tulenda vovela vo nsiku a luvevoko ke wampasi ko?
5 Nswaswani ye nsiku mia nsi zayingi, o “nsiku aziku” ke wabala ko ngatu wampasi. (1 Yoa. 5:3) Yesu wavova vo: “Vangu kiame kiambote, enatu diame diampevo.” (Mat. 11:29, 30) Vana ntandu, wau vo wasikidisilwa muna zola, o “nsiku aziku” ke ulolo wa nkanikinu ko yovo ulolo wa mambu metumbwanga, ke wasonekwa muna matadi ko kansi muna nyindu ye ntima.—Tanga Ayibere 8:6, 10.
UNA “NSIKU AZIKU” UKUTUVEVOLWELANGA
6, 7. Adieyi tulenda vova mu kuma kia nkanikinu mia Yave? O nsiku a luvevoko aweyi ukutusadisilanga?
6 Yave wasia nkendelo muna zingu kia vangwa yandi ya ngangu muna wete diau yo kubatanina. Kasikil’owu, badika nsiku miyalanga mini y’ezulu ye ngambwila. Wantu ke bevovanga ko vo nsiku miami miampasi. Kansi, betoma yangalelanga e nsiku miami; bazeye wo vo miasikidiswa muna wete diau. Diau adimosi mpe, e nkanikinu mia nkal’ambote mia Yave mina muna “nsiku aziku” a Kristu miasikidiswa muna wete dia wantu.
7 Vana ntandu a kututanina, o nsiku a luvevoko ukutusadisanga mu lungisa e nsatu zeto lembi kuyisia mu mpasi ngatu fwasa luvevoko lw’akaka. Muna kuma kiaki, okala y’etima dia lungisa zolela yeto yambote, musungula eyi ina ngwizani ye nkanikinu mia Yave i nsabi muna vwa luvevoko lwakieleka. Ediadi divavanga vo twazola mana Yave kezolanga yo menga mana kemenganga. O nsiku a luvevoko ulenda kutusadisa mu vanga wo.—Am. 5:15.
8, 9. Nkia nluta bevwanga awana belemvokelanga nsiku a luvevoko? Yika nona.
8 Muna kuma kia usumuki weto, diampasi dikalanga mu sunda zolela yeto yambi. Kansi, avo tusidi sungididi kia lemvokela nsiku a luvevoko, kana nkutu wau tulenda vevoka muna ubundu w’esumu. Muna bong’e nona, Jay ona wakala ye fu kia nua fomo wayantika longoka Nkand’a Nzambi. Vava kalongoka vo Nzambi omenganga fu kiaki, wabaka nzengo. Nga wakwamanana lungisa zolela ya nitu andi ovo Yave kalemvokela? Kana una vo luzolo lwa nua fomo ngolo lwakala, wabaka nzengo za sadila Nzambi. Aweyi kamona vava kasunda fu kiaki? Wavova vo: “Kiese kiayingi imonanga wau yavevoka muna fu kiaki.”
9 Jay wabakula vo luvevoko lwa wantu a nza i “nyindu a nitu” ufilanga muna ubundu, kansi luvevoko lwa Yave i “nyindu a mwanda,” ufilanga wantu mu vwa “moyo yo luvuvamu.” (Roma 8:5, 6) Aweyi Jay kasundila fu kia nua fomo kiambundunanga? Ke mu ngolo za yandi kibeni ko kansi mu ngolo za Nzambi. Wavova vo: “Yalongokanga Nkand’a Nzambi ntangwa zawonso, lomba mwand’avelela muna sambu yo tambulwila lusadisu lw’Akristu akwa mvevo muna nkutakani.” E nkubika zazi zilenda sadisa mpe yeto awonso mu vwa luvevoko lwakieleka. Yambula twabadika una zilenda kutusadisila.
KENGELELANGA MUNA DIAMBU DIA NZAMBI
10. Ayeyi i nsas’a mvovo “kengelela” muna nsiku a Nzambi?
10 Muna Yakobo 1:25 tutanganga vo: “Vo i ndion’okengelelanga muna nsiku aziku a vevoka, yo sikilanga mo . . . osambwilwa muna mpang’andi.” E mvovo wa Kingerekia wasekolwa vo “kengelelanga,” usongele vo “tala lekwa lembi laba o meso,” ediadi ngolo divavanga. Muna kuma kiaki, avo tuzolele vo nsiku a luvevoko wakala muna nyindu ye ntim’eto, tufwete sia sungididi kia longoka Nkand’a Nzambi, samba yo badika mana tutanganga.—1 Tim. 4:15.
11, 12. (a) Adieyi Yesu kavova disonganga o mfunu wakitula ludi se mpila zingu kieto? (b) Nze una usonganga e nona kiyikilu ova ntandu, nkia vonza bafwete venga aleke?
11 Kuna diak’e sambu, tufwete ‘sikila’ yovo zindalala sadila Diambu dia Nzambi yo kitula ludi se mpila zingu kieto. Yesu wavova diambu diadi kw’awana bakwikilanga muna yandi vo: “Ovo nukalanga muna diambu diame, nu alongoki ame kieleka; nwazay’e ludi, e ludi kikunuvevola.” (Yoa. 8:31, 32, NW) Nkanda umosi uvovanga vo o mvovo “nwazaya” una ye nsasa vo “yangalela yo zitisa dina ozeye.” Muna kuma kiaki, avo tutomene ‘zaya’ e ludi, tukitula kio se mpila zingu kieto. Tulenda vova ye ziku kiawonso vo: “Diambu dia Nzambi” ‘disalanga’ omu yeto yo soba kiwuntu kieto kimana twatoma tanginina S’eto ezulu.—1 Tes. 2:13.
12 Muna kuma kiaki, ukiyuvula, ‘Nga ntomene zaya ludi? Nga yakitula ludi se mpila zingu kiame? Nga yakinu yangalela “luvevoko” lwa nza?’ Vava kasungamena kileke kiandi, mpangi mosi akento wasanswa kwa mase m’Akristu wavova vo: “Avo mu ludi wasansukila, okwikilanga yo zaya vo Yave muntu akieleka. Kansi, mono kiatoma kunzaya ko. Kiamenganga ko mana kemenganga. Kiakwikilanga ko vo mana yavanganga mfunu makala kwa Nzambi. Muna ntangw’a mpasi kiavavanga lusadisu lwandi ko. Kana una vo kiazaya diambu ko, yabundanga e vuvu muna umbakuzi wame.” Diakiese mu zaya vo mpangi ndioyo wavunguka e ngindu yo soba mpila zingu kiandi. I bosi, wakota mu salu kia mviti a nzila a ngonde ke ngonde.
MWAND’AVELELA ULENDA KUSADISA MU VWA LUVEVOKO
13. Mwand’avelela a Nzambi aweyi ukutusadisilanga mu vwa luvevoko?
13 Muna 2 Korinto 3:17, tutanganga vo: ‘Kuna kwin’o mwand’a Yave, i kwin’o vevoka.’ Aweyi mwand’avelela ulenda kutusadisila mu vwa luvevoko? Mwanda wau ukutusadisanga mu yima fu nze “zola, ekembo, luvuvamu, nlandu a lutantu, walakazi, unsongi, kwikizi, lembama, volo.” (Ngal. 5:22, 23) Nze una tumonanga mu nza yayi, kavena wantu ko balenda vwa luvevoko lwakieleka kondwa kwa fu yayi, musungula zola. Vava Paulu wa ntumwa kayika mbongo a mwanda, wakudikila diaka vo: “Mana mena wau, ke mena ma nsiku ko.” Adieyi kazola vova? Kavena nsiku ko ulenda kakidila lunungunuku lwa mbongo a mwand’a Nzambi. (Ngal. 5:18) Adieyi tulenda longoka muna nsiku wau? Yave ozolele vo twayima fu yayi ya Kikristu yo songanga yo ntangwa zawonso.
14. Mwand’a nza nkia mpila ubundunwinanga awana belemvokelanga wo?
14 Awana befilwanga kwa mwand’a nza yo kuyivana muna zolela yau ya nitu beyindulanga vo bavevoka. (Tanga 2 Petelo 2:18, 19.) Kansi, ka bazeye wo ko vo abundu. Ayadi besikidisanga nsiku miayingi muna kakidila fu ye mavangu mau mambi. Paulu wa ntumwa wavova vo: “O nsiku ke wasilwa mu diambu dia muntu ansongi ko, muna diambu dia yimpumbulu ye mindembi lemvoka kaka.” (1 Tim. 1:9, 10) Bavwa bundunwa mpe kw’esumu dikubafilanga muna “maketo ma nitu.” E nitu i mfidi ambi. (Ef. 2:1-3) Wantu awaya bena nze yimfietete yibwidi vana longa dia wiki. Ekolo bekuyivananga muna zolela yau, bebwanga muna ubundu w’esumu.—Yak. 1:14, 15.
LUVEVOKO MUNA NKUTAKANI A KIKRISTU
15, 16. Ekuma dinina mfunu okalanga muna nkutakani? Nkia luvevoko tuna lwau?
15 Okala mu nkutakani a Kikristu, ke diau adimosi ko yo kala mu buka kia nsaka. Kadi, Yave watunta kimana wiza mu nkutakani. (Yoa. 6:44) Adieyi diamfila? Nga Nzambi wamona vo u muntu ansongi ona ovuminanga Nzambi? Nanga lenda vutula vo “ve kikilu.” Ozevo, Nzambi adieyi kamona? Wamona luzolo lwaku lwa lemvokela nsiku miandi yo tambulwila luludiku lwandi lwambote. Muna nkutakani, Yave okubikanga madia ma mwanda malenda kusadisa mu lunga-lunga ntim’aku yo kuvevola muna ubundu wa malongi ma nsambila zaluvunu, fu kia banzikila mambu ye kusadisa mu tanginina kiwuntu kia Kikristu. (Tanga Efeso 4:22-24.) Owau ovwidi elau diakala kumosi yo nkangu uyikilwanga mu nza yawonso vo ‘nkangu a vevoka.’—Yak. 2:12.
16 Badika edi: Nga wonga omonanga vava okalanga kumosi y’awana bezolanga Yave ye nsi a ntima yawonso? Vava omokenanga ye mpangi zaku mun’Eseka dia Kintinu, nga otokananga vo balenda yiya lekwa yaku? Ve kikilu! Dialudi, mu luvuvamu okalanga. Nga olenda kala ye luvuvamu lwalu muna fulu yakaka ikalanga ndonga? Ve kikilu! Vana ntandu, luvevoko una lwau owau vana vena nkangu a Nzambi, i kini kia luvevoko lukala kuna sentu.
“VEVOKA KWA NKEMBO A WAN’A NZAMBI”
17. Nkia luvevoko bevwa wantu muna “lusengomoko lua wan’a Nzambi”?
17 Vava kayika luvevoko luna Yave kesinga vana kwa selo yandi va nza, Paulu wa ntumwa wasoneka vo: “E mpunguvuvu a nsema ivingila lusengomoko lua wan’a Nzambi.” I bosi, wakudikila vo: “Nsema kibeni wavevoka muna kibundu kia uwolezia, yamuna vevoka kwa nkembo a wan’a Nzambi.” (Roma 8:19-21) O “nsema” i wantu awonso bena ye vuvu kia zingila ova nza ana bevwa nluta mia “lusengomoko” lwa wan’a Nzambi akuswa muna mwanda. Lusengomoko lwalu luyantika vava “wana” awaya befutumuka yo kwenda kun’ezulu muna yikama Kristu muna sukisa mbi yawonso ova nza yo vuluza “ndong’ayingi” bezingila muna nz’ampa.—Lus. 7:9, 14.
18. Aweyi wantu alemvoka bevwila luvevoko? Nkia luvevoko besinga vwa kuna mfoko?
18 Wantu ana bevuluzwa bevevoka emvimba muna umpukumuni wa Satana ye nkwiya. (Lus. 20:1-3) Ekwe luvevoko bevwa wantu! I bosi, 144.000 m’atinu ye nganga ana beyala kumosi ye Kristu besadila kimenga kia lukûlu lwa Yesu muna vevola wantu malembe-malembe yavana usumuki y’esumu dia Adami disukiswa mvimba. (Lus. 5:9, 10) Awana bezizidila ye kwikizi muna lutonto, besinga vwa luvevoko lwalunga luna kabasila o nsilu Yave muna “lusengomoko lua wan’a Nzambi.” Yindula edi: ke dikala diaka mpasi ko mu vanga edi diansongi vana meso ma Nzambi, kadi nitu ye kiwuntu kiaku kiawonso kialunga kikala mun’owu wa fwaniswa kia Nzambi.
19. Adieyi tufwete vanga mu kwamanana vwa luvevoko lwakieleka?
19 Nga olakukilang’o moyo mu mona “lusengomoko lua wan’a Nzambi”? Avo i wau, yambula “nsiku aziku a vevoka” wakala muna ngindu ye ntim’aku. Muna kuma kiaki, kala ye fu kia longokanga Nkand’a Nzambi. Zingila ngwizani ye ludi yo kitula kio se evwa diaku. Lombanga mwand’avelela muna sambu. Kalanga muna tukutakanu twa Kikristu yo vwa nluta mia madia ma mwanda kevananga Yave. Kuyambula ko vo Satana kavukumuna nze una kavukumunwina Eva mu yindula vo nkanikinu mia Nzambi miabala. Dialudi, Nkadi ampemba ovwidi ngangu. Kansi, nze una tulongoka mun’elongi dilanda, ‘ke tusundwa kwa Satana ko: kadi oyeto ke tulembele zaya makani mandi ko.’—2 Kor. 2:11.
[Yuvu ya Longoka]
[Mafoto zina muna lukaya lwa 9]
Nga yakinu yangalela “luvevoko” lwa nza?
[Mafoto zina muna lukaya lwa 9]
Nga yakitula ludi se mpila zingu kiame?
