Mwitejenu Yehova Yayilomboli Kulonda Musubuki Chikupu

‘Talenu mulushimbi lwaloña lwakusubuka.’—YAK. 1:25.

MUNATELI KULUMBULULA?

Nshimbinyi yalombolaña kukusubuka chikupu nawa anyi ahetelaña munilu lushimbi?

Yumanyi yitwatela kwila kulonda twikali asubuka chikupu?

Kusubukanyi kwachiñejañawu antu ejima endaña munjila yaya kuwumi?

1, 2. (a) Indi kusubuka kwawantu mukaayi kudi ñahi nawa muloñadi? (b) Kusubuka kwamuchidinyi kunakuhembelelawu ambuña aYehova?

 TUNAKUSHAKAMA mumpinji mudi antu anasweji lwisu, kuluwalala nimadombu. (2 Tim. 3:1-5) Hamuloña wayumiyi, nfulumendi yatuñaña nshimbi jajivulu nikwiñija atupokola amakwawu nikuzatisha makamera kulonda amoneña yuma yinakwilawu antu. Mumatuña amakwawu, antu ashaña maalamu, tupatishu nikukoleka nsambu jakesi kawuneñu kumatala awu. Antu amavulu akaanaña kwidika hanzi nawufuku hela kwiteja anyanawu kuhemena hanzi namwana hela nawufuku nkawawu. Eñañi, antu hiyadi asubukaku nawa iku kukala kunakutwalekahu.

² Kufuma tuhu mwitempa daEdeni, Satana wahosheli nindi antu anateli kusubuka hohu neyi adambula kudi Yehova. Yuma yahosheliyi yakutwamba chikupu! Eñañi, chaswejawu antu kudiwula nshimbi jaNzambi yihuñu niyena mukaayi yaswejelañaku. Ambuña aYehova niwena anakumona yinzeñeli hamuloña wakutama kwayuma. Hela chochu, tunakuhweleli netu antu akasubuka kuwuduñu wanshidi nikutoka nawa akadiluñisha yuma yatenawu muBayibolu nawu ‘kusubuka kwalema kwawanyana kaNzambi.’ (Rom. 8:21) Nawa Yehova watachika dehi kuleja ambuñindi kulonda akasubuki. Munjilanyi?

3. Lushimbinyi lwayinkawu atumbanji twaKristu kudi Yehova nawa malwihwinyi itukuhanjekahu?

³ Ñakwilu yinashindameni hamazu ahosheliyi nsoneki waBayibolu Yakoba nindi ‘lushimbi lwaloña lwakusubuka.’ (Tañenu Yakoba 1:25.) Antu atoñojokaña nawu nshimbi jayishaña mumpompa bayi neyi jayisubulañaku. Hanu dinu, ‘lushimbi lwaloña lwakusubuka’ hilushimbinyi? Nawa lwatusubulaña ñahi?

 LUSHIMBI LWATUSUBULAÑA

4. Indi ‘lushimbi lwaloña lwakusubuka’ hilushimbinyi nawa anyi ahetelañamu?

⁴ ‘Lushimbi lwaloña lwakusubuka’ bayi neyi hiLushimbi lwaMosuku, muloña ilu lushimbi lwamwekesheleña nawu aIsarela adiña akwanshidi nawa Kristu washikijili ilu lushimbi. (Mat. 5:17; Ŋal. 3:19) Lushimbinyi lwateneneñayi Yakoba? Wahosheleña ‘halushimbi lwaKristu,’ lwatenañawu cheñi nawu ‘lushimbi lwakukuhwelela’ ‘nilushimbi lwakusubula antu.’ (Ŋal. 6:2; Rom. 3:27; Yak. 2:12) Dichi ‘lushimbi lwaloña’ lwabombelamu yuma yejima yakeñañayi Yehova kudetu. Nawa akwaKristu awayishewa ‘nianyikoku acheñi’ ahetelañamu.—Yow. 10:16.

5. Muloñadi lushimbi lwakwikala asubuka chilwapelela?

⁵ Kwambukaku nanshimbi jamumatuña amavulu, ‘lushimbi lwaloña’ hilwasweja kukalaku ilaña lukweti nshimbi japela kutiya hela kulondela. (1 Yow. 5:3) Yesu nindi: “Mpanda yami yaswayi, nichisenda chami chapepela.” (Mat. 11:29, 30) Cheñi, ‘lushimbi lwaloña’ hilukweti yuma yayivulu yatuhishawuku, muloña lwashindamena hakukeña nawa ayisoneka muyitoñojoka nimunyichima yawantu bayi neyi hamalola awubasaku.—Tañenu Aheberu 8:6, 10.

‘LUSHIMBI LWALOÑA’ CHILWATUSUBULAÑA

6, 7. Tunateli kuhosha netudi kutalisha hanshimbi jaYehova nawa lushimbi lwakusubuka lwatukwashaña kwiladi?

⁶ Nshimbi jaYehova jayinkayi antu jayikwashaña nikuyikiña. Chakutalilahu, toñojokenu hanshimbi jalombolaña yuma yitwamonaña yamwiwulu niyahamaseki. Antu hiyatobaña nawu iji nshimbi jinakuyikabishaku. Ilaña ahamekaña hakwikala naniji nshimbi muloña eluka nawu jayikwashaña nankashi. Munjila yoyimu, nshimbi jaYehova jajiwahi jamwekenaña ‘mulushimbi lwaloña’ lwaKristu jakwashaña antu.

⁷ Hela chakwila lwatukiñaña, lushimbi lwakusubuka lwatukwashaña kwila yuma yitunakufwila chakadi kudiletela yihuñu hela kudiwula munafuukuluwu akwetu hela kukañesha yuma yinakukeña kwilawu. Hakwila twikali asubuka chikupu nikwila yuma yitunakukeña, chiña hohu twilaña yuma yayiwahi, yuma yinesekani nankeñelu yaYehova ninshimbi jindi. Munjila yikwawu, twatela kukeña yuma yakeñayi Yehova nikuhela yuma yahelayi nawa lushimbi lwakusubuka lwatukwashaña kwila mwenimu.—Amosi 5:15.

8, 9. Nkiswinyi yatambwilañawu antu alondelaña lushimbi lwakusubuka? Shimunenu chakutalilahu.

⁸ Hamuloña wakubula kuwanina, chatukalilaña chikupu kuleka yuma yaheña. Hela chochu, neyi twovwahila lushimbi lwakusubuka, tunateli kwikala akasunuka nihayinu mpinji. Chakutalilahu: Kadizi waBayibolu wumu wejina daJay wateñukili namakanya. Chelukiliyi nindi chumichi chamuneñesheleña Nzambi, watachikili kutoñojokahu. Wadi kutwalekeluhu nachaaku chindi tahindi wadi kufuukulahu kumwovwahila Yehova? Wafuukwiluhu kumuzatila Nzambi hela chakwila chamukalilili nankashi kuleka makanya. Watiyili ñahi chelili yaleka kunwa makanya? Wahosheli nindi: “Nakasunukili chikupu nikuzañalala hama.”

⁹ Hanyima yakuhita muniku kukala, Jay welukili nindi kusubuka kwamukaayi kwakoleshaña antu ‘kusha maana kuyuma yakumujimba,’ yayishaña muwuduñu ilaña kusubuka kwafumaña kudi Yehova, dikwila nawu ‘kwikala nayitoñojoka yaspiritu,’ kwafumishaña antu muwuduñu nawa kwalombolaña ‘kuwumi nikuwunda.’ (Rom. 8:5, 6) Indi Jay wawanini kudihi ñovu yakushinda chaaku chakunwa makanya? Kudi Nzambi bayi neyi kuñovu yinduku. Wahosheli nindi: “Nadizileña  Bayibolu mpinji yejima nikulomba spiritu yajila nikuzatisha kufumba kwakuwahi kwanfumbileñawu akwaKristu muchipompelu.” Iyi yuma yinateli kutukwasha wejima wetu kulonda twikali asubuka chikupu. Tutalenu chiyinateli kutukwasha.

TALENUÑA MWIZU DANZAMBI

10. Indi ‘kutala’ mulushimbi lwaNzambi kwatalisha mudihi?

¹⁰ HaYakoba 1:25 twatañañahu nawu: ‘Muntu wukutala mulushimbi lwaloña lwakusubuka hakukakelamu, . . . wakakooleka mwakwililayi.’ Izu dachiGriki dabalumunawu nawu ‘kutala’ datalisha mukwila nawu “kunoñama nakushinshika chikupu,” chinayi mukwila nawu kushaku maana nankashi. Eñañi, neyi tunakukeña lushimbi lwakusubuka lutukwashi muyitoñojoka nimunyichima yetu, twatela kudishaku kuhitila mukudiza Bayibolu chikupu nikutoñojoka nankashi hansañu yitunatañi.—1 Tim. 4:15.

11, 12. (a) Indi Yesu wakonkomweneni nindidi hansañu yakuzatisha nsañu yalala muchihandilu chetu? (b) Neyi chinalumbululiwu hewulu, wubanjinyi watela kutondolwelawu atwansi?

¹¹ Hampinji yoyimu, twatela ‘kutatakena’ hela kuumika hakuzatisha Izu daNzambi, neyi twila mwenimu tukwiteja chalala kutulombola muchihandilu chetu. Yesu wahosheli mazu wowamu hampinji yalejeleñayi antu amukuhweleleli nindi: ‘Neyi mukushakama mumazu ami, mukwikala atumbanji twami chalala; mukwiluka nsañu yalala, ninsañu yalala yikuyifumisha muwuduñu.’ (Yow. 8:31, 32) Mukanda wumu wahosha nawu, ‘kwiluka’ kwatalisha cheñi mukwikala namuchima wakuhameka  muloña “yuma ‘yelukewa’ yalema nankashi kumesu amuntu wayiluka.” Dichi, tukumwekesha netu ‘tweluka’ nsañu yalala chikupu neyi tuyizatishaña muchihandilu chetu. Dihu tukuhosha netu “izu dansañu yaNzambi” ‘dinakukoña’ mudetu, dinakuhimpa yililu yetu kulonda tumwimbujoleña chikupu Tata yetu wamwiwulu.—1 Tesa. 2:13.

¹² Dihulenu nenu: ‘Komana nsañu yalala nayiluka chikupu? Komana nayizatishaña muchihandilu chami? Tahindi nichidi kukeña kudiluñisha nayuma yamukanu kaayi?’ Kushinshika hachihandilu chindi chawansi, muhela wakulishiluwu kudi anvwali akwaKristu wasonekeli nindi: “Neyi wukulila muchalala, Yehova wukutwalekahu kukukwasha. Ilaña ami, hinamwilukili Nzambuku. Hinaheleli yuma yahelayuku. Hinelukili nami yuma yinakoñeleña yamuneñesheleñaku. Nawa nelukili wanyi nami neyi naholokeli mukukala natela kumulomba. Nashindameneni hakashinshi kamami aweni nawa ichi neluki nami nadiña chisupi muloña kwosi chuma chinelukili.” Chafuminumu, iwu muhela welukili nindi watoñojokeleña mwaheña nawa wahimpili yililu yindi chikupu. Watachikili nikuzata wupayiniya wampinji yejima.

SPIRITU YAJILA YINATELI KUYISUBULA

13. Indi spiritu yaNzambi yajila yatukwashaña ñahi kwikala asubuka?

¹³ Ha 2 Akorinda 3:17, twatañañahu nawu: ‘Kwekala spiritu yaYehova diku kwekala kusubuka.’ Indi spiritu yajila yatukwashaña ñahi kwikala asubuka? Spiritu yajila yatukwashaña mwamuvulu, yatukwashaña cheñi kwikala nayililu yalema yatusubulaña yidi neyi, “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.” (Ŋal. 5:22, 23) Antu hiyanateli kusubuka chakadi kwikala naniyi yililuku, sweje-e chililu chakukeña, nawa yuma yinakumwekana mukaayi yinakumwekesha nawu antu adi mumpompa. Hanyima yakutena yililu yamukabu waspiritu, kapostolu Pawulu wabombeleluhu nindi: “Hikwekala lushimbi lwalekeshaña yumiyuku.” Watalishili mudihi? Kwosi lushimbi lunateli kukañesha mukabu waspiritu yaNzambi kubula kupama mudi muntuku. (Ŋal. 5:18) Neyi lwadiña kwoku, lwadi kuzata mudimwinyi? Nkeñelu yaYehova yidi yakwila nawu twikali nayililu yidi neyi yaKristu haya nyaka nikuyimwekesha mpinji yejima.

14. Indi spiritu yamukaayi yashaña ñahi antu ayovwahilaña muwuduñu?

¹⁴ Antu ayulañawu kudi spiritu yetuña niantu eñijaña mutu mukufwila yuma yakumujimba atoñojokaña nawu asubuka. (Tañenu 2 Petulu 2:18, 19.) Ilaña eluka nawu hiyanduñu wanyi. Nfulumendi yatuñaña nshimbi jajivulu jakukañeshelamu antu kwila yuma yatama. Pawulu wahosheli nindi: “Nshimbi hiyajililili muntu waloñaku; chiña akwakuluwalala, niakwawinyi.” (1 Tim. 1:9, 10) Ekala muwuduñu wanshidi, elaña ‘mwafwila chisemwa chawu chamujimba,’ nawa himwanta watama nankashi. (Efwes. 2:1-3) Antu amuchidiwu adi neyi tububu tunakañanyi kwenda mubashila yawuchi. Hamuloña wakukeña kumanisha mpwila yawu, adifwishaña aweni mumuhetu.—Yak. 1:14, 15.

TWEKALA ASUBUKA MUCHIPOMPELU CHAWAKWAKRISTU

15, 16. Muloñadi chichalemena kudikunda nachipompelu nawa twekala ñahi akasunuka?

¹⁵ Hampinji yimwatachikili kudikunda nachipompelu chawakwaKristu, himwadibombeli nezanvu dawantu dahemaña yiselaku. Ilaña mwenjili muchipompelu muloña Yehova diyi wayikundamishili. (Yow. 6:44) Chumanyi chayikundamishililiyi kuchipompelu? Komana wamweni nindi mudi aloña nawa mwamutiyaña Nzambi  woma? Munateli kukaana. Hanu dinu, chumanyi chamweniyi Nzambi? Wamweni nindi mwakovwahilaña nshimbi jindi namuchima wejima nikwiteja wunlomboli windi wawuwahi. Kufuma tuhu mpinji yimwenjili muchipompelu, Yehova wayakamenaña nankashi kuspiritu, wayifumisha muwuduñu wansakililu yakutwamba nikunsañu jakupanda nawa nayidizishi chimwatela kwikala nayililu yidi neyi yaKristu. (Tañenu Aefwesesa 4:22-24.) Chuma chafumamu, mukweti kukooleka kwakwikala hakachi kawantu mukaayi atenawu nawu ‘antu asubuka.’—Yak. 2:12.

¹⁶ Toñojokenu hachumichi: Neyi mudi nawantu amukeña Yehova namuchima wawu wejima, komana mwatiyaña woma? Komana mwakamenaña nikutalatala nankashi? Hampinji yimunakuhanjeka Hetala daWanta, komana mwashaña maana kuyuma yenu nenu keña ayiyili? Inehi. Mwekalaña akasunuka. Komana dichimwatiyaña neyi mudi nawantu akwituña? Inehi! Kusubuka kumunakudiluñisha nawantu jaNzambi hayinu mpinji kunakumwekesha nawu kumbidi mwamba kadiluñisha chikupu.

‘KUSUBUKA KWALEMA KWAWANYANA KANZAMBI’

17. Indi kusubuka kwawantu kunesekani ñahi ‘nakumwekana kwawanyana kaNzambi’?

¹⁷ Hakuhosha hakusubuka kwakanayi Yehova ambuñindi hamaseki, Pawulu wasonekeli nindi: “Kuleña kwejima kwachiñililaña nakudihudika chamba kamwekana anyana kaNzambi.” Wabombeleluhu cheñi nindi: ‘Kuleña kwakweni kufumi muwuduñu wakutoka kwiñili mukusubuka kwalema kwawanyana kaNzambi.’ (Rom. 8:19-21) “Kuleña” kunatalishi kudi antu akweti kuchiñeja kwakushakama hamaseki, akahetela ‘mukumwekesha’ anyana kaNzambi awayishewa naspiritu. Akayimwekesha hampinji yakayisañulawu “anyana” kaNzambi nanyijimba yaspiritu kulonda akazatili hamu naKristu hakufumisha antu atama hamaseki nikwiñija ‘izaza deneni’ mwituña dadiha.—Chim. 7:9, 14.

18. Indi kusubuka kwawantu ovwahila kwakavula ñahi nawa akadiluñisha yuma yamuchidinyi?

¹⁸ Antu akakuulawu akasubuka chikupu, akasubuka kuwunduñu waSatana niandemoni jindi. (Chim. 20:1-3) Mwalala akakasunuka chikupu! Nkumininaku, 144,000 akekala anyanta niatupristu naKristu akatwalekahu kukuula antu kuhitila mukuzatisha ifutu danyiloña chovu-chovu sampu nichakamanishawu nshidi nikubula kuwanina kwaswanawu antu kudi Adama. (Chim. 5:9, 10) Hanyima yakweseka chikuhwelelu chawu, antu akekala awanina chikupu neyi chochafuukwiliyi Yehova hakusambila, akekala ‘mukusubuka kwalema kwawanyana kaNzambi.’ Chitoñojokenu! Himwakakañanyaña kwila yuma yaloña kumesu aNzambuku, muloña mujimba wenu wejima wakekala wawanina nawa wuntu wenu akawuhimpa nakwikala muchifwikija chaNzambi.

19. Makonu, chumanyi chitwatela kutwalekahu kwila kulonda twikali munjila yalombolaña kukusubuka chikupu?

¹⁹ Komana mwachiñejaña ‘kusubuka kwalema kwawanyana kaNzambi’? Neyi mwachiñejaña, yitoñojoka nimuchima wenu wutwalekuhu kulondela ‘mulushimbi lwaloña lwakusubuka.’ Eñañi, mwatela kutaña chikupu Nsona. Zatishenuña nsañu yalala muchihandilu chenu. Lombenu spiritu yajila. Zatishenu chikupu yuma yimwadizaña muchipompelu chawakwaKristu niyakudya yakuspiritu yayiloñeshelañayi Yehova. Bayi mumwiteja Satana yayidimbi neyi chamudimbiliyi Evu, nakutachika kutoñojoka nenu nshimbi jaNzambi jakala chikupuku. Twatela kwiluka netu Diyabolu wababala chikupu. Ilaña neyi chitukumona muchibaaba chinalondeluhu, bayi tumwiteja ‘Satana atukwati nansañu yinduku, muloña hitunayambi maaninduku.’—2 Kor. 2:11.

[Malwihu aKuzatisha haKudiza]

[Nyevulu yidi hefu 9]

Komana nichidi kukeña kudiluñisha nayuma yamukanu kaayi?

[Nyevulu yidi hefu 9]

Komana nazatishaña nsañu yalala muchihandilu chami?