“[Këxˈix] yajxon mä ja ley diˈib wäˈäts diˈib yajkypyë awäˈätstumˈäjtën.” (SANT. 1:25, Traducción del Nuevo Mundo [NM])

¿WIˈIX MˈATSOOJËMBITÄˈÄNY?

¿Diˈibë ley xypyudëjkëm parë awäˈätstum nyajpatëm, ets pënaty tyukˈoyˈäjttëp?

¿Ti mbäät nduˈunëm parë nˈijtëm awäˈätstum?

¿Ti awäˈätstumˈäjtën pyäädandëp pënaty xëmë myëmëdoodëbë Jyobaa?

1, 2. 1) ¿Tiko mayë jäˈäy kyaj nyayjawëdë awäˈätstum? 2) ¿Wiˈixë Dios mëduumbë wyëˈëmäˈändë awäˈätstum?

MÄ TYÄˈÄDË tiempë niˈigyë tijaty jäˈäy tˈatsoktë, tkutëjtë ley ets axëëk ttundë myëguˈuk (2 Tim. 3:1-5). Päätyë gobiernë niˈigyë tpëjtaˈagyë ley, dyajnimayë polisiyë ets axtë tpëjtäˈäktë kamara parë tˈixtët tijaty tuun jäjtëp. Ets mä näägë paˈis, mayë jäˈäy tpëjtäˈäktë alarmë mä jyëën tyëjk, tmëdattë kanäk niˈawiˈtpety ets axtë tpëjtäˈäktë nyagam diˈibë jëën tukmäjtsp. May nan kyaj koots jyëdittë ets nan kyaj yˈuˈunk yˈënäˈk dyajkuyattë nëëˈääy tuˈääy oy jyaxëënyëty. Tyäˈädë yëˈë xytyukˈijxëm ko mayë jäˈäy kyaj nyayjawëdë awäˈätstum, ets extëm nˈijxëm, tyäˈädë tiempë niˈigyë wyindëgooyˈadëˈëtsy.

² Satanás ojts jyënaˈany jam Edén ko naxwinyëdë jäˈäy mbäät yˈity awäˈätstum pën kyaj tmëmëdoyë Jyobaa. Per extëm tyuny jyatyëty axtë tyambäät, yëˈë xytyukˈijxëm ko Satanás nëgoo jyantsy yˈandaˈaky. Pes ko jäˈäy ttuny diˈibë Dios kyaj tniˈanaˈamë, ta naxwinyëdë jäˈäy tkuˈayowëdë, ets nan kyuˈayoˈowëp pënaty myëduundëbë Jyobaa. Per mbäät agujk jotkujk njëjpˈijxëm ko xynyiwäˈätsäˈänëm ja poky kaytyey etsë axëkˈäjtën, ets nˈaxäjëm diˈibë Biiblyë tyijpy “ja awäˈätstuuyˈäjtën [...] diˈibë pyäättëp ja Diosë yˈuˈungëty” (Rom. 8:21). Mä tyäˈädë tiempë, Jyobaa xytyukniˈˈijxëm ti mbäät nduˈunëm parë nbatëmë tyäˈädë awäˈätstumˈäjtën. ¿Wiˈix?

3. ¿Ti ley të xymyoˈoyëmë Jyobaa, ets diˈibatyë yajtëˈëwën yaˈˈatsoojëmbitäämp?

³ Parë tyam nnayjëjpˈijxëm ets nˈawäˈätspëtsëˈëmëm, Jyobaa të xymyoˈoyëm diˈibë Santiago tyij “ja ley diˈib wäˈäts diˈib yajkypyë awäˈätstumˈäjtën” (käjpxë Santiago 1:25, NM). * Ko jäˈäy tmëdoy yajmaytyaˈagyë ley, yëˈë  miimp mä wyinmäˈäny ko kyaj yˈitäˈäny awäˈätstum parë ttunët ti tyim tunaampy. Pääty, ¿tidën yˈandijpy “ja ley diˈib wäˈäts diˈib yajkypyë awäˈätstumˈäjtën”? ¿Wiˈixtsoo xyajwëˈëmëm awäˈätstum?

JA LEY DIˈIB XYAˈˈAWÄˈÄTSPËTSËˈËMËM

4. ¿Ti yˈandijpy “ja ley diˈib wäˈäts diˈib yajkypyë awäˈätstumˈäjtën”, ets pënaty tyukˈoyˈäjttëp?

⁴ “Ja ley diˈib wäˈäts diˈib yajkypyë awäˈätstumˈäjtën”, kyaj yëˈëjëty ja Ley diˈibë Moisés yajmooy, diˈib ojts “dyaˈixyëty diˈibë dëˈën ja pojpë”, pesë Kristë yëˈë kyuytyuunë tyäˈädë ley (Mat. 5:17; Gal. 3:19). Diˈibë Santiago myaytyäˈägan yëˈë “ja Kristë yˈanaˈamën” (Gal. 6:2). Päätyë tyäˈädë “ley diˈib wäˈäts”, yëˈë yˈandijpy tukëˈëyë diˈibë Jyobaa tsyejpy ets nduˈunëm. Ets duˈun ttukˈoyˈatyë Dios mëduumbë diˈib nëjkxtëp tsäjpotm ets diˈib wëˈëmandëp yä Naxwiiny, diˈib yajtijtëp ja wiinkpë borreegë (Fwank 10:16).

5. ¿Tiko kyaj tsyipëty nbaduˈunëm ja ley diˈib yajkypyë awäˈätstumˈäjtën?

⁵ Mayë paˈis tpëjtäˈäktë ley diˈib tsip yajjaygyujkëp ets tsip yajpadunët. Per “ja ley diˈib wäˈäts” kyaj tsip yajjaygyukë ets kyaj tsyipëty nbaduˈunëm (1 Fwank 5:3). Jesus jyënany: “Ja [ngukapëts] diˈibëts ëj nbëjtäˈägaampy mä miitsëty, kyaj tsyipëty xyajnëjxtët, es ja tsemy diˈibë mëët xykyëˈëyët, toˈtyky yëˈë” (Mat. 11:29, 30). “Ja ley diˈib wäˈäts” nan kyaj tmëminy tuˈugë listë mä tnigäjpxtäˈäyët tukëˈëyë anaˈamën, mët ko yëˈë tyukwäˈkpejtypy ja tsojkën ets yˈity jääybyety mä jot winmäˈäny ets mä jot korasoon, kyaj yˈity jääybyety mä tuˈugë tsää (käjpxë Ebreeʉsʉty 8:6, 10).

¿WIˈIX XYAˈˈAWÄˈÄTSPËTSËˈËMËM “JA LEY DIˈIB WÄˈÄTS”?

6, 7. 1) ¿Wiˈix yˈixëtyë Jyobaa yˈanaˈamën? 2) ¿Wiˈixtsoo xyajwëˈëmëm awäˈätstum “ja ley diˈib wäˈäts”?

⁶ Jyobaa të kanäk pekyë anaˈamën tpëjtaˈaky diˈibë naxwinyëdë jäˈäy tyukˈoyˈajtypy ets kyuwäˈänyëty. Extëm nˈokpëjtakëm, taaˈäjtpë mëjää diˈib yˈaneˈemy tukëˈëyë diˈib tsäjpotm ets diˈib yä Naxwiiny, extëmë mëjää diˈibë Naxwinyëdë myëdäjtypy parë tnaxkuwoonë tijaty jaˈäjtp o ley de la gravedad. Nipën mbäät kyajënäˈäny ko duˈumbë anaˈamënë tsumy matsypyëm xyaˈijtëm. Niˈigyë nmëjjäˈäwëm ko jyaajëty parë ndukˈoyˈäjtëm. Nanduˈun jyaty mëdë Diosë yˈanaˈamën “ja ley diˈib wäˈäts”, diˈibë Kristë jyaˈäjtypy, yëˈë parë ndukˈoyˈäjtëm.

⁷ Tyäˈädë ley diˈib yajkypyë awäˈätstumˈäjtën xykyuwäˈänëm ets nyasˈijxëp parë nduˈunëm tijaty ntsojkëm pën yëˈë diˈib oy, nan xypyudëjkëm parë nwintsëˈkëmë wiink jäˈäyë jyukyˈäjtën. Pääty, parë mbäät nˈijtëm awäˈätstum o nduˈunëm ti ntsojkënyëˈäjtëm, jëjpˈam nˈijxëm pën kijpxyëp mëdë Jyobaa yˈanaˈamënë ets tijaty yëˈë tsyejpy. Nan jëjpˈam ntsojkëm ti Dios tsyejpy ets nˈaxëkˈijxëm ti yëˈë yˈaxëkˈijxypy. Etsë tyäˈädë ley diˈib yajkypyë awäˈätstumˈäjtën, yëˈë xypyudëjkëm parë duˈun nduˈunëm (Amós 5:15).

8, 9. ¿Wiˈix ndukˈoyˈäjtëm ko nmëmëdoˈojëm Diosë lyey diˈib yajkypyë awäˈätstumˈäjtën? Pëjtäˈäk tuˈugë ijxpajtën.

⁸ Tsiptäˈägäämp njëjpkudijëmë axëëkpë tsojkën mët ko pokyjyaˈay nyajpatëm. Per pën nmëmëdoˈojëm yajxonë tyäˈädë ley diˈib yajkypyë awäˈätstumˈäjtën, mbäät nnayjäˈäwëm awäˈätstum axtë mä tyäˈädë tiempë. Extëm nˈokpëjtakëm, tuˈugë yetyëjk diˈib xyëˈäjtypy Jay ojts tyëkë ëxpëjkpë ets jantsy juˈkpë nety. Ko ojts tnijawë ko Dios kyaj tˈoyˈixy ti yëˈë tyuumpy, ta twinˈijxy ti tyunaampy: ¿naytyukˈanaˈamanëp ja juˈuky o myëmëdowaambyë Jyobaa? Yëˈë, ta twinˈijxy tmëdunäˈänyë Dios ets tjëjpkudijëyaˈany ja tsojkënë ko jyantsy jyuˈugäˈäny.  ¿Wiˈix nyayjäˈäwë ko tmastutyë tyäˈädë bisië? Yëˈë jyënany: “Jantsy oyëts nnayjäˈäwë, agujk jotkujk ets awäˈätstum”.

⁹ Jay, ojts tˈixy ko ja awäˈätstumˈäjtën diˈibë naxwinyëdë jäˈäy yˈawäˈänëp, tyuktuumbyë jäˈäy tijaty tsyojkënyëˈajtypy ets yëˈë anaˈamëp. Per pënaty myëmëdoodëbë Diosë lyey diˈib yajkypyë awäˈätstumˈäjtën, yëˈë anaˈamëbë Diosë myëjää, ta yˈawäˈätspëtsëmdë ets tmëdattë “jotkujkˈäjtën es ja jikyˈäjtën” (Rom. 8:5, 6). ¿Mä Jay tpejkyë mëjää parë yˈawäˈätspëtseemy mä juˈuky? Mä Jyobaa. Yëˈë jyënaˈany: “Xëmëtsë Biiblyë nˈëxpejky, nˈamdooyëtsë Diosë myëjää ets ojtsëts nˈaxäjë naybyudëkë diˈibëts yajmooy mä naymyujkën”. Min nˈokˈijxëm wiˈix mbäät nanduˈun xypyudëjkëm parë nyajpatëm awäˈätstum.

NˈOKˈËXPËJKËM YAJXONË DIOSË YˈAYUK

10. ¿Ti yˈandijpy ngëxˈijxëm yajxon mä Diosë lyey?

¹⁰ Biiblyë twandaˈaky: “Per diˈib këxˈijxp yajxon mä ja ley diˈib wäˈäts diˈib yajkypyë awäˈätstumˈäjtën, ets kyaj tmastuˈuty, [...] jotkujk yˈitäˈäny ko ttunët” (Santiago 1:25, NM). Ko jyënaˈany “këxˈijxp yajxon”, mä ayuk grieegë yëˈë yˈandijpy ko “nwäˈkwëˈëmëm parë nˈijxëm yajxon”, tyäˈädë yëˈë yˈandijpy ko yajtunäämbë mëjää. Pääty, parë tyäˈädë ley diˈib yajkypyë awäˈätstumˈäjtën tyunët mä jot winmäˈäny ets mä jot korasoon, tsojkëp nduˈunëmë mëjää parë nˈëxpëjkëm yajxonë Biiblyë ets nbawinmäˈäyëm këkpäät (1 Tim. 4:15).

11, 12. 1) ¿Wiˈixë Jesus jyënany parë dyaˈijxë ko tsojkëp ndukjukyˈäjtëmë tëyˈäjtën? 2) Extëm kyëxeˈegyë dibujë mä tyäˈädë pajina, ¿ti jotmay mbäät njëjpkudijëm niˈamukë ets masë ënäˈktëjk?

¹¹ Nan tsojkëp xëmë nbaduˈunëmë Diosë yˈAyuk ets ndukjukyˈäjtëmë tëyˈäjtën. Jesus  duˈun dyajjaygyujkë ko tˈanmääy pënaty panëjkxëdëp: “Pën mbadiimpy extëmëts miits nˈanëëmëdë, nˈëxpëjkpëˈatëpts miitsëty, es mˈixyˈattëp ja tëyˈäjtën, es yëˈë tëyˈäjtën yëˈë myajwëˈëmëdëp awäˈätstuuy” (Fwank 8:31, 32). Mbäät njënäˈänëm ko nˈixyˈäjtëm yajxon ja tëyˈäjtën, pën ndukjukyˈäjtëm. Duˈuntsoo, ja “Dios yˈayuk” tyunët mä ëtsäjtëm ets dyaˈoyëdë jäˈäyˈäjtën extëm jyaˈayˈatyë nDeetyˈäjtëmë Tsäjpotmëdë (1 Tes. 2:13).

¹² Oy ko nnayajtëˈëwëm: “¿Njantsy yˈixyˈajtypyëtsë tëyˈäjtën? ¿Ndukjukyˈajtypyëtsë? ¿O jats ti nˈakˈatseky diˈibë naxwinyëdë jäˈäy tyijtëp awäˈätstumˈäjtën?”. Tuˈugë nmëguˈukˈäjtëm diˈib yaˈk pajt mä Diosë kyäjpn tmaytyaˈaky wiˈix jyajty. Ko yaˈkpëtseempy myëbejkypyë nety ko tamë Jyobaa, per ninäˈä tkaˈixyˈajty. Yëˈë tkujäˈäyë: “Ninäˈäjëts ngaˈˈaxëkˈijxy diˈibë Jyobaa yˈaxëkˈijxypy ets nan kyajts ijty nmëbeky pën kyuentëpëjtakypy tijatyëts nduumpy ets nan kyajts nˈamdooyë naybyudëkë kojëts nmëdäjtyë amay jotmay. Duˈunëtsë nety nwinmay ko nnijäˈäjëtyaabyëts tukëˈëyë, per këˈëmëtsë nety nnaywyinˈëënyëty, pes nitiijëts nganijawë”. Ko tiempë nyajxy, ta tyäˈädë nmëguˈukˈäjtëm tˈijxy ko tëgoopytyëmë nety, ta dyajtëgäjtsyë wyinmäˈäny. Ets axtë tyëjkë tuumbë prekusoora regulaar.

DIOSË MYËJÄÄ XYPYUDËJKËM PARË NˈAWÄˈÄTSPËTSËˈËMËM

13. ¿Wiˈixë Diosë myëjää tyuny parë nˈijtëm awäˈätstum?

¹³ Mä Biiblyë jyënaˈany: “Mä jaˈa Dios yˈEspiritu yajpaatyëny kaˈp ja jeky anaˈamëny jim yˈokˈanaˈamnë, të jaˈa yˈawaˈatspëtsëëmgëxnë” (2 Cor. 3:17, Nuevo Testamento de Mazatlán). ¿Wiˈixë Diosë myëjää xypyudëjkëm parë nˈijtëm awäˈätstum? Xypyudëjkëm parë nmëdäjtëmë oybyë jäˈäyˈäjtën extëmë “tsojkën, xondakën, tiˈigyëˈat, maˈxtujkën, oyjyaˈayˈat, kajxykyupëjkën, tudaˈakyˈäjtën es nayjyëjwijtsëmbijtëm këˈëm” (Gal. 5:22, 23). Naxwinyëdë jäˈäy kyaj mbäät yˈity awäˈätstum pën kyaj tmëdattë tyäˈädë oybyë jäˈäyˈäjtën, ets mas pën kyaj tmëdattë tsojkën. Ko Pablo tnigäjpxtääyë tyäˈädë oybyë jäˈäyˈäjtën, ta jyënany: “Tyäˈädë [...] kyaj tmëtsipˈaty nituˈugë anaˈamën”. Ninäˈä kyajaˈˈatäˈäny tuˈugë ley diˈib mbäät tjëjpkuwäˈägë parë kyaj nyajmëjwindëjkëmë tyäˈädë oybyë jäˈäyˈäjtën (Gal. 5:18). Jyobaa tsyejpy ets mas niˈigyë nyajmëjwindëjkëmë tyäˈädë oybyë jäˈäyˈäjtën ets nyaˈijxëm winë xëë.

14. ¿Wiˈix yajtuumbëˈattë pënaty naytyukmënëjkxëdëbë naxwinyëdë jäˈäyë wyinmäˈäny?

¹⁴ Pënaty naytyukwinˈëˈënëdëp extëmë naxwinyëdë jäˈäy wyinmay, mbäät jyënaˈany ko awäˈätstum yajpääty mët ko ttuny tijatyë nyiniˈkx kyëbäjk tsyejpy (käjpxë 2 Peedrʉ 2:18, 19). Per diˈib kyaj tnijawë, yëˈë ko yajtuumbëˈäjtp. Gobyernëtëjk jantsy may të dyajnaxkëdaˈagyë ley diˈib mbäädë jäˈäy tmëmëdoy mä jyukyˈäjtën ets mä tijaty tyuundëp. Extëmë Pablo jyënany: “Ni tuˈugë anaˈamën kyayajpëjtaˈaky mët ja diˈibë tyuundëp ja oybyë. Tadë anaˈamën jaˈa dëˈën mët ja diˈibë niyeˈepy yujkˈyeˈepy, diˈibë kyaj yˈëygyupeky kyajxykyupeky” (1 Tim. 1:9, 10). Ets kom nan yëˈë tyuundëp diˈib tsyejpy ja nyiniˈkx kyëbäjk, ta tyuumbëˈatëdë poky diˈib anaˈamp extëm tuˈugë wintsën diˈib mëk axëkjäˈäy (Éfe. 2:1-3). Mbäät njënäˈänëm ko yëˈëjëty duˈun extëmë tsatsy diˈib këxkakp mä seerë päˈäk, ja tsyojkënë yëˈë yajnëjkxëdëp mä tpäädäˈändë oˈkën (Sant. 1:14, 15).

MÄ NAYMYUJKËN AWÄˈÄTSTUM NNAYJÄˈÄWËM

15, 16. ¿Wiˈix ndukˈoyˈäjtëm ko nyajpatëm mä naymyujkën, ets wiˈix jap nnayjäˈäwëm?

¹⁵ Pën mijts myajpatp mä Diosë kyäjpn, kyaj myajpääty mët ko këˈëm winmäˈäny ojts mjäˈty, extëm ko muum myajkujayët,  yëˈë duˈun mët ko Jyobaa ojts mëjwoyëty (Fwank 6:44). ¿Ets tiko ojts mëjwoyëty? ¿Waˈandaa yëˈëjëty ko oyë nety mjukyˈaty ets ko mtsëˈkëbë Dios? Kyaj. ¿Tidaa Jyobaa yˈijx? Yëˈë yˈijxy ko mbäät xymyëmëdoyë yˈanaˈamën ets ko mbäät xondaˈakyˈää xondaˈakyjyot xykyupeky wiˈix mnëˈëmoˈoy mduˈumoˈoyëty. Ets ko mdëjkë mä Diosë kyäjpn, ta Jyobaa mˈijxˈijt mguentˈäjtë ets mdukniˈˈijxë yˈAyuk. Yëˈë myaˈˈawäˈätspëtsëëmë mä relijyonk diˈib kyaj tyëyˈäjtënëty ets tijaty myëbëjktëp, ta mdukniˈˈijxë wiˈix mbäät mjäˈäyˈaty extëmë Kristë jyaˈayˈaty (käjpxë Éfesʉ 4:22-24). Dyoskujuyëmë Jyobaa ko tyam myajpääty mä kyäjpn diˈib tuˈuk jeˈeyë jaˈäjtp abëtsemy nyaxwinyëdë ets mˈity awäˈätstum (Sant. 2:12).

¹⁶ ¿Këdii ninuˈun ngatsëˈk ngajäˈäwëm ko nyajpatëm mëdë jäˈäy diˈib tsyojktëbë Jyobaa amumduˈukjot? ¿Këdii kyaj mëk nmäjtsˈijtëm tijaty nmëdäjtëm mët ko ntsëˈkëm ko pën xymyaˈtsëm mä naymyujkën? Awäˈätstum nnayjäˈäwëm ets kyaj ntsëˈk njäˈäwëm. ¿Mbäät duˈun nnayjäˈäwëm ko nyajpatëm mëdë wiink jäˈäy o wiink lugäär? Kyaj. Ko tyam nnayjäˈäwëm awäˈätstum mä Diosë kyäjpn yëˈë waanë nˈaˈijxnäjxëm mä wiˈix nyajpäädäˈänëm awäˈätstum mä tiempë myiny kyëdaˈaky.

JA AWÄˈÄTSTUMˈÄJTËN “DIˈIBË PYÄÄTTËP JA DIOSË YˈUˈUNGËTY”

17. Ko “Dios dyajnigëxëˈëgët diˈibaty yˈuˈunkˈäjttëp”, ¿wiˈix tpudëkëyaˈanyë naxwinyëdë jäˈäy parë yˈawäˈätspëtsëmët?

¹⁷ Pablo ojts tnimaytyaˈaky ko Jyobaa yaˈˈawäˈätspëtsëmaampy pënaty mëduunëp, jyënany ko “diˈibë Dios yajkoj yˈawijx jyëjpˈijxtëp es tˈixäˈändë ja xëë tiempë ko Dios dyajnigëxëˈëgët diˈibaty yˈuˈunkˈäjttëp”. Ets ta net jyënany: “Tëgekyë diˈibë Dios pyëjtak yˈawijxtëp ko kyaj yˈokkutëgoyanëdë es patëp ja mëjˈäjtën, ja awäˈätstuuyˈäjtën es ja kunuˈxën diˈibë pyäättëp ja Diosë yˈuˈungëty” (Rom. 8:19-21). Ko jyënaˈany, “diˈibë Dios yajkoj”, yëˈë yˈandijpyë naxwinyëdë jäˈäy diˈib jukyˈatandëp winë xëë yä Naxwiiny, diˈib tyukˈoyˈatandëp “ko Dios dyajnigëxëˈëgët diˈibaty yˈuˈunkˈäjttëp”. Jaˈa njënäˈänëm ko nety tyëkëdë tuumbë mëdë Kristë parë dyajjëgaˈaktëdë axëkˈäjtën yä Naxwiiny ets dyajtëkëdët “tëgoy myay ja jäˈäy” mä jembyë jukyˈäjtën (Diˈibʉ Jat. 7:9, 14).

18. ¿Wiˈixë naxwinyëdë jäˈäy wanaty wanaty yˈawäˈätspëtsëmäˈäny, ets ti awäˈätstumˈäjtën pyäädandëp?

¹⁸ Taanëmë naxwinyëdë jäˈäy yajpäädäˈändë awäˈätstum, pes kyaj nyekyjamˈatäˈänyë Satanás mëdë kyaˈoybyëty (Diˈibʉ Jat. 20:1-3). ¡Jantsy jotkujk nnayjawëyäˈänëm! Ta netë Kristë mëdë 144,000 diˈib tuundëp reyëty ets saserdotëty dyajtunäˈändë ja wintsëˈkën diˈibë Jesus yäjk parë naxwinyëdë jäˈäy ttukˈoyˈattët axtë ko yˈawäˈätspëtsëmdët mä poky kaytyey (Diˈibʉ Jat. 5:9, 10). Ets ok, ko nety të yaˈijxmatstë myëbëjkën, ta tpäädäˈändë “ja awäˈätstuuyˈäjtën es ja kunuˈxën diˈibë pyäättëp ja Diosë yˈuˈungëty” extëmë Jyobaa twandaky. Okwinmay, kyaj nyekytsiptäˈägäˈäny nduˈunëm diˈibë Dios tsyejpy, pes wäˈäts jäˈäyë nety nyajpatëm ets duˈunë nety njäˈäyˈäjtëm extëmë Dios.

19. ¿Ti mbäät nduˈunëm pën nbäädäˈänëmë awäˈätstumˈäjtën?

¹⁹ ¿Mˈaxäjëyaampy mijts “ja awäˈätstuuyˈäjtën es ja kunuˈxën diˈibë pyää[dandëp] ja Diosë yˈuˈungëty”? Pën duˈun, nasˈixë ets “ja ley diˈib wäˈäts diˈib yajkypyë awäˈätstumˈäjtën” ttuktëkëdë mjot mwinmäˈäny etsë mjot mgorasoon. Ëxpëk yajxonë Biiblyë ets jabom jabom. Tukjukyˈatë tëyˈäjtën ets amdowë Diosë myëjää. Këdii xymyëjagamgeˈegyë naymyujkën ets axäjë käˈäy ukën diˈibë Jyobaa yajkypy. Këdii mdëgoy extëm ja Eva, diˈib naytyukwinˈëˈënë Satanás ets wyinmääy ko tsip yajkuytyunëdë Diosë yˈanaˈamën. Satanás jyantsy nyiwijyˈajtypy tijaty. Per extëm nˈixäˈänëm mä ja tuˈukpë artikulo, mbäät nmëmadakëm mët ko “nnijäˈäm ja yˈaxëk winmäˈäny” (2 Kor. 2:11).

[Notë diˈib noky ëxˈääy]

[Yajtëˈëwën]

[Letrë diˈib miimp mä dibujë mä pajina 14]

¿Jats ti nˈakˈatseky diˈibë naxwinyëdë jäˈäy tyijtëp awäˈätstumˈäjtën?

[Letrë diˈib miimp mä dibujë mä pajina 14]

¿Ndukjukyˈajtypyëts ja tëyˈäjtën?