Bas-y t’a Zeova sõng-y tɩ y paam lohorem hakɩka
Bas-y t’a Zeova sõng-y tɩ y paam lohorem hakɩka
“[Get-y] tõog sẽn zems zãngã sẽn yaa lohorem tõogã.”—ZAK 1:25.
Y TÕE N WILGA A VÕOR BƖ?
Tõ-bʋg n wat ne lohorem hakɩka, la ãnd dãmb n dɩt a yõodo?
Bõe la d tõe nmaan n paam lohorem hakɩka?
Lohorem bʋg la wẽn-sakdbã na n wa paame?
1, 2. a) Bõe n wilgd tɩ ãdem-biisã pa so b mense, la bõe yĩnga? b) Lohorem bʋg la a Zeova nin-buiidã gũuda?
RŨNDÃ-RŨNDÃ, neb nins sẽn yaa beed rãmbã, sẽn nong nen-kɛglem tʋʋmã la sẽn kɩɩsd noyã sõor tara paasgo. (2 Tɩm. 3:1-5) Woto kɩtame tɩ goosneema-rãmbã maneg n yiisd noya, n paasd polɩɩs-rãmbã sõore. Tẽns kẽer pʋsẽ, sãnda tara bũmb b rotẽ wãtɩ ned sã n bao n na n kao roogã bɩ yãb tɩ b bãnge. B ningda b rotã sogds wʋsgo, wall b tolg n ning kʋʋrã b lalsã zutu. Wʋsg pa sakd n yi yʋngo, wall b pa basd b kambã tɩ b reem yɩng b ye baa wĩndg meng ye. Yaa vẽeneg tɩ nebã pa le so b mense, la wõnda yel-kãngã na n talla zẽnebo.
2 A Sʋɩtãan sẽn wa n na belg a Hawa wã, a yeelame tɩ yaa ninsaalbã sẽn na n kɩɩs a Zeova n soog b mens la b na n paam lohorem hakɩka. Rẽ tɛk n tãag masã, ninsaalbã yɛl sẽn yaa to-to wãwilgdame t’a gomdã yaa ziri fasɩ. Sɩd me, nebã sẽn kɩɩsd Wẽnnaam noyã n paasdẽ wã, ãdem-biisã zu-loeesã me tara paasgo. Zu-loe-kãens namsda a Zeova nin-buiidã me. La tõnd saagdame tɩ ãdem-biisã na n wa paama b mens ne yel-wẽndã la faoolmã yembdo, n paam ‘Wẽnnaam kambã lohorem la b ziirã’ wa Biiblã sẽn yeelã. (Rom 8:21) Sɩd me, a Zeova zoe n sõngda a nin-buiidã sẽn na yɩl tɩ b wa paam lohorem kãnga. Wãn to la a sõngd-ba?
3. Tõ-bʋg la a Zeova kõ kiris-nebã, la sogs-bʋs la d na n leoke?
3 A Zeova kõ a nin-buiidã tõog ning a Zak sẽn bool tɩ “tõog sẽn zems zãngã sẽn yaa lohorem tõogã,” n na n sõng-b tɩ b wa paam lohorem ning sẽn watã. (Karm-y Zak 1:25.) La naoor wʋsgo, nebã sã n tagsd tõog bɩ noor yelle, b pa tagsd lohorem yell ye. B get-a-la wa bũmb sẽn kɩt tɩ b pa tõe nmaan b yam. Woto wã, “tõog sẽn zems zãngã sẽn yaa lohorem tõogã” yaa bõe? La wãn to la tõ-kãng kɩt tɩ d paam d mense?
TÕOG NING SẼN KƖT TƖ D PAAM D MENSÃ
4. “Tõog sẽn zems zãngã sẽn yaa lohorem tõogã” yaa bõe, la ãnd dãmb la a nafda?
4 “Tõog sẽn zems zãngã sẽn yaa lohorem tõogã” pa a Moiiz tõogã ye. Bala, b kõ a Moiiz tõogã sẽn na yɩl tɩ nebã bãng tɩ b yaa yel-wẽn-maandba. Sẽn paase, Kiristã wa n pidsa tõ-kãnga. (Mat. 5:17; Gal. 3:19) La yaa tõ-bʋg yell la a Zak sẽn gomã? Yaa “Kirist tõogã” b sẽn boond me tɩ “tẽeb tõogã.” (Gal. 6:2; Rom 3:27) Dẽnd “tõog sẽn zems zãngã” yaa bũmb nins fãa a Zeova sẽn dat tɩ d maanã. Kiris-neb nins sẽn paam vʋʋsem sõngã zaeebã ne “piis a taabã” fãa rɩta tõ-kãng nafa.—Zã 10:16.
5. Bõe yĩng tɩ lohorem tõogã tũub pa toogo?
5 “Tõog sẽn zems zãngã” pa wa tõod nins sẽn be tẽns wʋsg pʋsẽ wãye. Yaa noy la saglse, tɩ b võorã wʋmb la b tũubã pa toog ye. (1 Zã 5:3) A Zezi yeela woto: “Mam yɛlã yaa naana, la mam zɩɩb yaa faasga.” (Mat. 11:29, 30) Sẽn paase, “tõog sẽn zems zãngã” pa wilgd sɩbgr buud toor-toor ned sẽn kɩɩs sẽn segd ne ye. Bala, yaa nonglem n kɩt tɩ b tũud-a. B gʋls-a-la nebã pʋ-tẽerẽ la b sũyã pʋsẽ, pa kug-wals zut ye.—Karm-y Hebre dãmb 8:6, 10.
“TÕOG SẼN ZEMS ZÃNGÔ SẼN KƖTD TƖ D PAAM D MENS TO-TO
6, 7. Bõe la d tõe nyeel a Zeova noyã wɛɛngẽ, la bõe la lohorem tõogã kɩt tɩ d tõe nmaane?
6 A Zeova sẽn kõ ninsaalbã noy ninsã fãa yaa b nafr la b koglg yĩnga. Tẽeg-y tɩ ãndũniyã bũmba fãa tũuda noya. La nebã pa get tɩ no-kãens kɩtame tɩ b pa tõe nmaan b sẽn dat ye. B sũur pʋd n nooma ne yɛlã sẽn yaa woto wã, n getẽ tɩ yaa b neer yĩnga. Woto me, a Zeova sẽn kõ tõnd noy ninsã sẽn be “tõog sẽn zems zãngã” sẽn yaa Kiristã tõogã pʋgẽ wã, yaa d neer yĩnga.
7 Lohorem tõogã sẽn kogend tõndã toor sẽn ka be, a kɩtame tɩ d tõe npids d raab buud toor-toorã n pa bao yɛl n kõ d mens wall d taabã ye. Rẽnd bũmb d sẽn tõe nmaan n paam lohorem hakɩkã sẽn yaa tõogd n maand d sẽn datã, yaa d sẽn na n mao tɩ d raab buud fãa zems ne a Zeova noyã. Rat n yeel tɩ d segd n mao n nonga bũmb nins a Zeova sẽn nongã, la d kisg bũmb nins a sẽn kisã. Lohorem tõogã sõngda tõnd tɩ d maan dẽ.—Amos 5:15.
8, 9. Nafa bʋs la sẽn sakd-b lohorem tõogã paamda? Rɩk-y makre.
8 Yaa sɩd tɩ d sẽn yaa koangdbã, d mi n tara tʋls-wẽns n segd n mao ne-ba. La d sẽn modgd n sakd lohorem tõogã, d paamda d mens ne yɛl kẽer masã menga. Ad kibar sẽn wilgd rẽ: Rao a ye yʋʋr sẽn boond t’a Jay ra yũuda sɩgaar a sẽn wa n sɩng Biiblã zãmsgã. La a sẽn wa n bãng tɩ sɩgaar yũub pa noom Wẽnnaamã, a ra segd n yãka a sã n na n kell n saka a yĩngã ratem, bɩ a sã n na n saka a Zeova. A yãka yam n na n sak Wẽnnaam, baa sɩgaarã basg sẽn pa yɩ nana wã. A tagsg yɩɩ wãn a sẽn tõog n maan dẽ wã? Ad a sẽn yeele: “Mam paama m meng zãng-zãnga, n tar sũ-noog wʋsgo.”
9 A Jay vɩɩmã sẽn lebg to-to wãkɩtame t’a bãng tɩ dũniyã neb sẽn ‘sakd b yĩngã ratmã’ tẽedame tɩ b tara lohorem n yaool n yaa yembse. A leb n bãngame tɩ lohorem ning a Zeova sẽn kõtã, rat n yeel tɩ ‘sɩɩg sõng ratmã sakr’ kɩtdame tɩ d paam d mense, la wat ne “vɩɩm la laafɩ” me. (Rom 8:5, 6) Bõe n sõng a Jay t’a tõog n bas a minim-wẽngã? Pa tũ ne a meng pãng ye. Yaa Wẽnnaam n sõng-a. Ad a sẽn yeele: “M da zãmsda Biiblã n pa vaandẽ, n pʋʋsd Wẽnnaam n kot vʋʋsem sõngã, la m pẽnegd tigingã neb tɩ b sõngd-m ne b sũur fãa.” Bũmb nins sẽn sõng a Jay wãtõe nsõnga tõnd ned kam fãa me t’a paam lohorem hakɩka. Wãn to?
KAREMD-Y WẼNNAAM GOMDÃ
10. “Ket n get” Wẽnnaam tõogã pʋgẽ wãrat n yeelame tɩ bõe?
10 Zak 1:25 wãyeta woto: ‘Ned ninga sẽn get tõog sẽn zems zãngã sẽn yaa lohorem tõogã, la sẽn ket n get daar fãa, . . . bark na n zĩnda yẽ zugu, a sẽn maand woto wãyĩnga.’ Gɛrkã gom-bil ning b sẽn lebg ka tɩ “getẽ” wãrat n yeelame me tɩ “sulgd n get bũmb pʋgẽ,” tɩ wilgdẽ tɩ rẽ baooda maag-m-menga. Sɩd me, d sã n dat tɩ lohorem tõogã kẽ d yamã la d sũurã, d segd n modgdame n zãmsd Biiblã sõma, la d bʋgsd a goamã zug neere.—1 Tɩm. 4:15.
11, 12. a) Bõe la a Zezi yeel tɩ wilgdẽ tɩ d segd n sakda sɩdã wakat fãa? b) Wa kibarã sẽn wilgdã, kom-bɩɩsã segd n gũusa ne bõe?
11 La d segdame me n ‘ket n get’ Wẽnnaam Gomdã pʋgẽ daar fãa, rat n yeel tɩ d segd n sakd-a-la wakat fãa. A Zezi ra yeela a karen-biisã bũmb sẽn wõnd woto. A yeel-b lame: ‘Yãmb sã n tall mam goamã, yãmb yaa mam karen-biis hakɩka. Yãmb na bãng sɩda, la sɩdã na kõ yãmb lohorem.’ (Zã 8:31, 32) Yaa d sẽn na n sakd sɩdã wakat fãa la d wilgd tɩ d bãng-a-la sõma. Rẽ la d tõe nyeel tɩ “Wẽnnaam koɛɛgã” ‘tʋmda’ d pʋsẽ, n toeemd d zʋgã tɩ d rɩkd d saasẽ Ba wãtogs-n-taare.—1 Tes. 2:13.
12 Sok-y y meng woto: ‘Mam bãnga sɩdã sõma bɩ? M sakd-a-la wakat fãa bɩ, bɩ m mi n tʋll n maana yɛl kẽer dũniyã neb sẽn so b mens n maandẽ wã?’ Saam-bi-poak a ye sẽn dog n mik t’a roagdbã yaa kiris-neb yeela woto: “F roagdbã sã n wub-f sɩdã pʋgẽ, f tẽeda a Zeova. La mam yẽ ra pa mi a Zeova sõma ye. M da pa kis bũmb nins a sẽn kisã ye. M da pa tẽed me tɩ bũmb nins m sẽn maanda pak-a lame ye. M sã n da wa tar zu-loɛɛga, m pa baood a sõngr ye. M da teegda m meng bãngre, la rũndã-rũndã m miime tɩ woto ra yaa yalemdo. Bala m da pa mi baa fʋɩ.” Zu-noogo, d saam-bi-poakã bãngame t’a sẽn da get yɛlã to-to wãpa zemse, n toeeme. A lebga wakat fãa so-pakd menga.
VƲƲSEM SÕNGÃ TÕE N SÕNG-D LAME TƖ D PAAM LOHOREM
13. Wãn to la vʋʋsem sõngã tõe nsõng-d tɩ d paam d mense?
13 A Poll yeela 2 Korẽnt dãmb 3:17 soabẽ wãwoto: “Zusoabã sɩɩgã sẽn be zĩig ninga, lohorem bee be.” Wãn to la vʋʋsem sõngã tõe nsõng-d tɩ d paam d mense? A sõngd-d lame tɩ d paamd zʋg-sõma wala ‘nonglem, sũ-noogo, laafɩ, sũ-mare, maan-neere, sũ-maasem, tẽebo, sũ-bʋgsem la yõk-m-menga.’ (Gal. 5:22, 23) Neb sã n pa tar zʋg-sõma kãensã, sẽn yɩɩd fãa nonglmã, b pa tõe npaam lohorem hakɩk ye. Dũniyã yɛl sẽn yaa to-to rũndã-rũndã wãwilgda rẽ vẽenega. Tʋm-tʋmd a Poll sẽn sõdg zʋg-sõma nins vʋʋsem sõngã sẽn sõngd ned t’a paamã poore, a yeela woto: “Tõog ka be sẽn kɩɩsd bõn-kãensã ye.” Woto võor yaa bõe? Rat n yeelame tɩ tõog ka be sẽn wilgd ned sẽn segd n bao zʋg-sõma kãens n tek zĩig ning ye. (Gal. 5:18) A Zeova ratame tɩ d mao n paam zʋg-sõma kãense, la d wilgd wakat fãa tɩ d tar-b lame.
14. Bõe n kɩt tɩ neb nins sẽn tar dũniyã yamã lebg yembse?
14 Neb nins sẽn tar dũniyã yamã la sẽn sakd b yĩnsã ratmã tõe ntẽedame tɩ b tara lohorem. (Karm-y 2 Pɩɛɛr 2:18, 19.) La b yaool n pa tar lohorem ye. Goosneem-rãmbã yiisa noy ka tɛk n na n gɩdg tʋʋm-wẽnsã. Sɩd me, a Poll yeelame tɩ “tõog ka maan nin-tɩrg yĩng ye, yaa tõog kɩɩsdbã yĩnga.” (1 Tɩm. 1:9, 10) Sẽn paase, sẽn kɩɩsd-b noyã yaa yel-wẽnã yembse, n sakd “yĩngã ratem wẽngã” sẽn namsd-bã. (Ef. 2:1-3) Nin-kãensã yaa wa goetrgoees sẽn yã sɩɩd laagẽ n data. B kẽeme n dɩ, n pa le tõe nyi ye.—Zak 1:14, 15.
D TARA LOHOREM TIGINGÃ PƲGẼ
15, 16. D sẽn lebg tigingã nedã naf-bʋs la d paam-yã, la lohorem bʋg la d tar a pʋgẽ?
15 Yãmb sẽn wa tigingã pʋgẽ wãpa y sẽn tʋll n naag neb sull sẽn nong taab bal ye. Yaa a Zeova n bool-yã. (Zã 6:44) Bõe yĩng t’a bool-y-yã? Yaa a sẽn mik tɩ yãmb yaa wẽn-zoɛt yĩng bɩ? Tõe tɩ y tagsdame tɩ pa woto ye. La sã n pa rẽ, yaa bõe la Wẽnnaam yã yãmb nengẽ? A yãame tɩ y yaa ned sẽn na n sak a lohorem tõogã la y tũ a sor-wilgrã. Y sẽn lebg tigingã nedã, a Zeova sõng-y lame tɩ y bãng a Gomdã sõma, tɩ y paam y meng ne ziri tũudmã zãms-yoodã fãa, la a sõng-y tɩ y bãng y sẽn tõe ndɩk Kiristã togs-n-taar to-to. (Karm-y Efɛɛz rãmb 4:22-24.) Woto kɩtame tɩ y paam n naag neb nins sẽn sɩd “paam b mensã.”—Zak 2:12, MN.
16 Tags-y n ges-y-yã: Rẽ yĩnga y sã n wa be ne nin-kãensã sẽn nong a Zeova ne b sũy fãa wã, rabeem tar-y lame sɩda? Y sã n wa sõsd ne y tẽed-n-taasã Rĩungã roogẽ, y gũusda y teeda, n yɛɛsdẽ tɩ na n wa menem sɩda? Abada! Y yam gãeyã bãane. La rẽ yĩnga y sã n wa tɩ be ne neb sẽn pa kiris-neba, y na sak n bas y yam sɩda? Lae-lae! La lohorem ning y sẽn tar Wẽnnaam nin-buiidã sʋkã yaa lohorem ning sẽn nan watã reng-n-lɛmbg bala.
‘WẼNNAAM KAMBÃ LOHORMÃ NE B ZIIRÃ’
17. Wãn to la “Wẽnnaam kambã pukr” na n sõng ãdem-biisã tɩ b paam b mense?
17 A Poll goma lohorem ning a Zeova sẽn na n wa kõ a nin-buiidã yell n yeel woto: “Bõn-naandsã fãa me gũuda Wẽnnaam kambã pukr ne ratem-kãsenga.” Rẽ poore, a paasame tɩ “bãmb me na paam yolsg ne faoolem yembdo, n paam pʋɩɩr ne Wẽnnaam kambã b lohormã ne b ziirã pʋgẽ.” (Rom 8:19-21) “Bõn-naandsã” ka wãyaa neb nins sẽn na n wa vɩɩmd tẽngã zugã. B na n dɩɩ Wẽnnaam kambã sẽn paam vʋʋsem sõng zaeebã “pukrã” yõodo. Wẽnnaam kambã pukrã yaa sasa ning b sẽn na n wa tɩ naag Kiristã saasẽ n kɩt tɩ wẽng buud fãa sa tẽngã zugu, la b kɩt tɩ neb “kʋʋng” paam n kẽ dũni-paalgã pʋgẽ wã.—Wil. 7:9, 14.
18. Wãn to la wẽn-sakdbã na n wa paam b mense, la lohorem bʋg la b na n paam dẽ poore?
18 Ãdem-biisã na n wa paama lohorem hakɩka: B na n wa paama b mens ne a Sʋɩtãan la a zĩn-dãmbã. (Wil. 20:1-3) Ad woto sɩd na n yɩɩ yolsg tɛkẽ! Rẽ poore, Kiristã na-rɩt-n-taasã bãmb 144000 sẽn yaa rĩm-dãmb la maan-kʋʋdbã na n kell n sõnga ãdem-biisã bilf-bilfu, tɩ b rɩ Kiristã maoongã yõodo, hal n wa paam b mens fasɩ ne a Ãdem yel-wẽndã biisi. (Wil. 5:9, 10) Rẽ zugẽ, b sã n mak-b n mik tɩ b sɩd yaa sakdba, a Zeova na n kɩtame tɩ b paam lohorem ning a sẽn da sɩng n dat tɩ b paamã, rat n yeel tɩ b na n paama ‘Wẽnnaam kambã lohormã ne b ziirã.’ Yãmb we n tags n gese! Wẽnnaam sakr pa na n le yɩ toog ne-yã, bala y na n zemsa zãnga, n tõe ndɩk Wẽnnaam togs-n-taar sõma.
19. D sã n dat n wa paam ‘Wẽnnaam kambã lohormã ne b ziirã,’ bõe la d segd n maane?
19 Y tʋll n wa paama ‘Wẽnnaam kambã lohormã ne b ziirã’ ne y sũur fãa bɩ? Sã n yaa rẽ, bɩ y ket n sakd “tõog sẽn zems zãngã sẽn yaa lohorem tõogã.” Wɩng-y ne Biiblã zãmsgo. Sakd-y bũmb nins y sẽn zãmsdã. Pʋʋsd-y Wẽnnaam n kot a vʋʋsem sõngã. Kẽnd-y tigissã n pa vaandẽ, n paamd y tẽed-n-taasã sõngre, la y rɩt zãmsg ning Wẽnnaam sẽn kõt-dã yõod sõma. Ra bas-y t’a Sʋɩtãan belg-y wa a sẽn belg a Hawa wãtɩ y tẽ tɩ Wẽnnaam noyã tũub yaa toog ye. Yaa sɩd t’a Sʋɩtãan tara sɩlem, la wa sõsg ning sẽn pʋgdã sẽn na n wilgã, d tõeeme t’a ra “tõog tõnd ye, tɩ bõe, tõnd ka zɩ Sʋɩtãanã sɩlem ye.”—2 Kor. 2:11.
[Zãmsgã sogsgã]
[Foto rãmba, seb-neng 14]
Mam mi n tʋll n maana yɛl kẽer dũniyã neb sẽn so b mens n maandẽ wãbɩ?
[Foto rãmba, seb-neng 14]
Mam sakda sɩdã wakat fãa bɩ?
