Jiova techmaka yekmelauj nemakixtilis
Jiova techmaka yekmelauj nemakixtilis
“Momachtijtinemi [...] ika chipaktsin Tajtoltsin de Dios [tein] kuali techtojtontinemi.” (SANT. 1:25)
¿TONI TIONTANANKILISKIA?
¿Katiyejua tanauatil techpaleuijtok maj tikpiakan nemakixtilis, uan akonimej kinpaleuia?
¿Toni techpaleuis maj tikpiakan yekmelauj nemakixtilis?
¿Toni taman nemakixtilis kiseliskej akin kisentokaskej itech ojti tein teuika itech nemilis?
1, 2. 1) ¿Keniuj nemij axkan taltikpakneminij uan keyej? 2) ¿Toni taman nemakixtilis kichiaj itekitikauan Jiova?
ITECH tonalmej kampa tinemij, taltikpakneminij okachi xijxikuimej, tateuiaj uan kichiuaj miak taman tein amo kuali (2 Tim. 3:1-5). Tekiuanij kitemouaj kitsakuiliskej nejon, yejua ika kichijchiuaj okachi tanauatilmej, kintaliaj okachi miakej tajpianij uan kitaliaj cámaras tein ika tajpiaj. Uan itech miak altepemej, taltikpakneminij kitaliaj alarmas ininchan, uan amo sayoj se taman ika tatsakuaj ta miak taman kitaliliaj, uan no kiyoualouaj ininchan ika teposmej tein kipia electricidad. Miakej amo kisaj keman tayoua uan amo kinkauaj ininkoneuan maj ininselti mauiltikan kalampa, maski tonayan. Yejua ika, taltikpakneminij kemej yeskia ilpitokej uan amo moita maj niman motayektali.
2 Komo ijkon, ¿toni moneki tikchiuaskej tein tapaleuis maj tikpiakan nemakixtilis? Itech xochital tein moajsia Edén, Satanás kiyekijtoj ke tapaleuis komo se kikaua Jiova. Sayoj ke tein mochiujtok axkan, kinextia ke nejon se ueyi takajkayaualis. Tein melauj, keman taltikpakneminij okachi kichiuaj tein kinekij uan amo tein Dios tajtani, nochin okachi tajyouiaj. Uan nejon no techijtakoua tein tiktekitiliaj Jiova. Sayoj ke tiyolpakij porin tikchiaj tonal keman techkixtiliskej tajtakol uan taijtakolis, uan tikseliskej tein Biblia kitokaytia “kualtsin nemakixtilis kemej ikoneuan Dios” (Rom. 8:21, NM). Tein melauj, Jiova techmachtijtokya maj tikchiuakan tein techpaleuis maj tikpiakan nejon nemakixtilis. ¿Keniuj kichiujtok?
3. ¿Toni tanauatil Jiova kinmakatok itekitikauan uan toni netajtanilmej tiknankilitij?
3 Jiova techmaka tein Santiago kitokaytij “chipaktsin Tajtoltsin [oso tanauatil] de Dios [tein] kuali techtojtontinemi”, tein techpaleuia maj tikpiakan nejon nemakixtilis amo uejkaua (xikonixtajtolti Santiago 1:25). Sayoj ke ijkuak se taltikpaknenkej kikaki tajtol: tanauatilmej, amo kitanemililtia ke uelis kichiuas tein kinekis, ta kinemilia ke okachi kitsakuilia. Komo ijkon, ¿toni nejin “chipaktsin Tajtoltsin de Dios [tein] kuali techtojtontinemi”? ¿Keniuj techmaka nemakixtilis?
TANAUATIL TEIN TECHMAKIXTIA
4. ¿Toni “chipaktsin Tajtoltsin de Dios [tein] kuali techtojtontinemi” uan akonimej kinpaleuia?
4 “Chipaktsin Tajtoltsin de Dios [tein] kuali techtojtontinemi” amo yejua Tanauatil tein kiselij Moisés, porin nejon sayoj “technextilijtiuala ke titajtakolejke”, uan Cristo senkis kitakamatikya nejon tanauatil (Mat. 5:17; Gál. 3:19). Tein melauj, Santiago ika tajtoj “tanauatil de Cristo” uan “tanauatil tein ika moojtokaltia xolal tein kipia nemakixtilis” (Gál. 6:2; Sant. 2:12, NM). Yejua ika, chipaktsin Tajtoltsin kijtosneki nochi tein Jiova kichia maj tikchiuakan. Nejon tanauatil kinpaleuia tokniuan taixpejpenalmej uan ‘okseki ichkamej’ (Juan 10:16).
5. ¿Keyej amo ouij se kitakamatis tanauatil tein kitemaka nemakixtilis?
5 Tanauatilmej tein kiixtaliaj itech miak altepemej, semi ouij se kiajsikamatis uan se kitakamatis. Sayoj ke “chipaktsin Tajtoltsin” kipia tamachtilis tein okachi moneki uan tanauatilmej tein amo ouij se kitakamatis (1 Juan 5:3). Jesús kijtoj: “Yugo [...] semi amo etik. Uan [...] semi amo no tesiouti” (Mat. 11:29, 30). Uan no, “chipaktsin Tajtoltsin” amo moneki kipias miak tatsakuiltilis, porin kitayekanaltia netasojtalis uan ijkuiliujtok itech totanemilil uan itech toyolo, amo itech patauak tet (xikonixtajtolti Hebreos 8:6, 10).
KENIUJ TECHMAKIXTIA “CHIPAKTSIN TAJTOLTSIN”
6, 7. 1) ¿Keniuj techpaleuiaj itanauatiluan Jiova? 2) ¿Toni techkaua maj tikchiuakan “chipaktsin Tajtoltsin”?
6 Jiova kiixtaliani miak taman tein amo uelis tikchiuaskej tein ika techpaleuia maj amo timoijtakokan. Kemej neskayot, Jiova kitaliani se tanauatil oso se chikaualis (gravedad) tein tapaleuia maj nochi yeto talpan uan amo ejekaixko. ¿Tikijtoskiaj ke nejon tanauatil amo techkaua maj tikchiuakan tein tiknekij? Amo, ta tinochin tiktasojkamatij uan tikajsikamatij ke techpaleuia maj kuali tiyetokan. Nochi tanauatilmej tein kitemaka Jiova, tein timomachtiaj itech “chipaktsin Tajtoltsin” tein kitemakak Cristo, no ijkon sayoj techualkuilia tein kuali.
7 Tanauatil tein kitemaka nemakixtilis amo sayoj techpaleuia maj kuali tiyetokan, ta no maj tikpiakan tein tiknejnekij. Sayoj ke ijkuak tikchiuaj nejon, amo timoijtakouaj nion titeijtakouaj uan amo tikintsakuiliaj oksekin maj kichiuakan tein yejuan kinekij. Yejua ika, moneki maj totanejnekilis mouika iuan itanauatiluan Jiova uan ikualneskayouan, nejon techpaleuis maj tikpiakan yekmelauj nemakixtilis, tein kijtosneki, tikchiuaskej tein tiknekiskej. Ika okseki tajtolmej, moneki tiktasojtaskej tein Dios kitasojta uan tiktauelitaskej tein kitauelita. Yejua nejon techmachtia tanauatil tein kitemaka nemakixtilis (Amós 5:15).
8, 9. ¿Toni tein kuali techualkuilia ijkuak tiktakamatij tanauatil tein kitemaka nemakixtilis? Xikonijto se neskayot.
8 Kemej titajtakouanijok, semi techouijmaka tiktsakuiliskej tanejnekilis tein amo kuali. Sayoj ke komo amo tikauaj Dios uan tiktakamatij tanauatil tein kitemaka nemakixtilis, uelis tikmachiliskej ke tikpiaj nemakixtilis axkan. Ijkon kinextia tein kipanok Jay, se takat tein semi tachichinaya ijkuak peuak momachtia Biblia. Keman kiajsikamatik ke Dios amo kiyolpaktia tachichinalis, moixnamikik ika se ouijkayot: ¿kisentokaskia mokauaskia maj tachichinalis kiyekana oso kitakamatiskia Jiova? Semi kuali tein kichiuak porin ika tamatilis kiixpejpenak kitekitilis Dios uan kiixtalij kikauas tachichinalis. ¿Keniuj momachilij ijkuak uelik kikauak nejon tachiualis? Yejua kijtoj: “Tel kuali nimomachilij, nitelyolpakik uan nikmachilij ke senkis nikpiak nemakixtilis”.
9 Jay kiajsikamatik nejin taman: maski taltikpak tekaua maj se kichiua tein se kinekis, tein kijtosneki ‘tiyoltanemilijtinemiskej sayo itech totalnamikilis ten kualkui tajtakol’, tein melauj timokauaj maj techyekana totanejnekilis. Sayoj ke nemakixtilis tein kitemaka Jiova, tein kijtosneki ‘tiyoltanemilijtinemiskej sayo itech in tamachilis ten kualkui in Yektikatsin Espíritu’, techmakixtia uan techmaka “nemilis uan se kualtsin yolseukanemilis” (Rom. 8:5, 6). ¿Toni kipaleuij Jay maj kikaua tachichinalis? Amo yejua iselti uelik kichiuak, ta Jiova kipaleuij. Jay kimelaua: “Mojmostaj nimomachtiaya Biblia, niktajtaniaya Jiova maj nechmaka iespíritu uan nochipa nikseliaya nepaleuil tein ika netasojtalis nechmakayaj tokniuan itech nechikol”. Maj tikitakan keniuj nochi nejon, no techpaleuia maj tikpiakan yekmelauj nemakixtilis.
MAJ TIMOMACHTIKAN IKA NEJMACHKAYOT ITAJTOL DIOS
10. ¿Toni kijtosneki maj se “kiita ika nejmachkayot” itanauatil Dios?
10 Santiago 1:25 kijtoua: “Kuak in tokniu taneltok[a]ke momachtijtinemi [‘kiita ika nejmachkayot’, NM] [...] in Tajtoltsin de Dios, [uan] [...] [‘kisentoka’, NM] kitakamatinemi” kipias yolpakilis. Tajtol griego tein nikan mokepa “kiita ika nejmachkayot”, kijtosneki “moixpiloua uan ijkon ueli kiyekita”, uan moneki mochikauas uan kiyekitas tein momachtia. Yejua ika, moneki timomachtiskej Biblia ika nejmachkayot, uan ika netataujtil maj tiknemilikan tein tikixtajtoltiaj. Ijkon, tanauatil tein kitemaka nemakixtilis techpaleuis itech totanemilil uan toyolo (1 Tim. 4:15).
11, 12. 1) ¿Keniuj kiyeknextij Jesús ke moneki techyekanas iTajtol Dios itech tonemilis? 2) Kemej kinextia taixkopin itech nejin página, ¿toni moneki ika timopiaskej tinochin uan okachiok telpochmej uan ichpochmej?
11 Uan no, moneki tiksentokaskej tikchiuaskej kemej kijtoua iTajtol Dios, tein kijtosneki, maj yejua tayekanto itech tonemilis. Jesús no yejua kiyeknextij keman kiniluij imomachtijkauan: “Komo namejuan nankisentokaj nankiyektakamatiyoue nochi tein namechilijtok, ijkuakon melau nanmochiuaske nannomomachtijkauan. Uan ijkon nankajsikamatiyaske [‘nakiixmatiskej’, NM] [...] ne Tajtoltsin ten yek melau. Uan [...] yejua ne namechtojtomatiu” (Juan 8:31, 32). Se amaix kijtoua ke tajtol tein nikan mokepa “nakiixmatiskej” no kijtosneki ke tikajsikamatij ke motelneki tein tikixmatij itech tonemilis. Yejua ika, uelis tikijtoskej ke senkis tikixmatij tamachtilis tein melauak keman tikauaj maj techyekana itech tonemilis. Sayoj ijkon uelis tikijtoskej ke “Tajtoltsin de Dios” totech “tekititok”, techpaleuijtok maj timopatakan uan ijkon okachi tikpiaskej ikualneskayouan Dios (1 Tes. 2:13).
12 Moneki timotajtaniskej: “¿Yekmelauj nikixmati tein melauak? ¿Yejua tein nechyekana itech nonemilis? ¿Oso niknejnekiok nikchiuas tein taltikpak kinextia ke ueli se kichiua tein se kineki?”. Se tokniuj siuat tein itatuan katkajya itaixpantijkauan Jiova keman yejua moskaltij, kimelaua tein kipanok keman katka ichpoch: “Keman timoskaltia ika tamachtilis tein melauak, uelis se kijtos ke Jiova nochipa ompa yetok. Sayoj ke nejua, amo keman yekmelauj nikixmatik. Amo niktauelitaya tein kitauelita, niknemiliaya ke amo kitekipachouaya tein nikchiuaya uan amo niktemouaya inepaleuil keman nikpiaya kuejmolmej. Niknemiliaya ke nochi nikmatia, sayoj ke amo melauak porin amo teyi nikmatia”. Semi kuali ke satepan kiajsikamatik ke mopolojtoya uan mopatak. Uan hasta peuak kichiua tekit kemej precursor regular.
YEKTIKATSIN ESPÍRITU TECHPALEUIA MAJ TIKPIAKAN NEMAKIXTILIS
13. ¿Keniuj iespíritu Dios tapaleuia maj tikpiakan yekmelauj nemakixtilis?
13 Itech 2 Corintios 3:17 tikixtajtoltiaj: “Kampa tekititok in Yektikatsin Espíritu [...] [ompa] kintojtomilijtok de nojon kinixtsakuiltijtok itaneltokakauan”. ¿Keniuj yektikatsin espíritu tapaleuia maj tikpiakan nemakixtilis? Se taman tein kichiua, techpaleuia maj tikpiakan kualneskayomej tein tel tapaleuiaj maj tikpiakan nemakixtilis. Seki yejua nejin: “Ma se tetasojtatinemi; uan ma se yolpaktinemi; uan ma se yolseukanentinemi; uan ma se kipixtinemi paciencia; uan ma se teyoliknelijtinemi; uan ma se kichiutinemi ten kuali, uan ma se takuautama[t]katagat; uan ma se yolyemankanemi; uan ma se moyekantinemi ika nejmach” (Gál. 5:22, 23). Ijkon kemej tinemij, moyekita ke nion akin uelis kipias nemakixtilis komo amo tikpiaj nejin kualneskayomej uan okachiok netasojtalis. Satepan ke Pablo kijtoj nejin kualneskayomej, kiajxitij: “Amo teyi ongak tanauatil ten uelis [techtakaualtis] ke ma amo tikpiakan nijin takilot”. Amo onkak nion se tanauatil tein uelis techtsakuilis maj tikiskaltikan takilot tein kitemaka iespíritu Dios (Gál. 5:18). ¿Techpaleuiskia se tanauatil kemej nejin komo onkaskia? Jiova amo kineki maj nion se taman techtsakuili maj tikiskaltikan nejin kualneskayomej uan kineki maj nochipaya tikiskaltijtokan.
14. ¿Keniuj talnamikilis tein onkak nikan taltikpak kichiua maj taltikpakneminij mokauakan maj kinyekana inintanejnekilis?
14 Akin mokauaj maj kintanejnekti talnamikilis tein onkak nikan taltikpak uan kichiuaj inintanejnekilis tein amo kuali, xa kinemiliaj ke ueli kichiuaj tein kinekij (xikonixtajtolti 2 Pedro 2:18, 19). Sayoj ke tein melauj, mokauaj maj inintanejnekilis kinyekana. Se taman, tekiuanij kitalianij tel miak tanauatilmej tein ika kinpaleuiaj maj kisentokakan kichiuakan inintanejnekilis uan inintachiualis. Kemej kijtoj Pablo: “Tanauatil [...] amo [...] [‘kinmakaj’, NM] nekes ten kichiutinemij ten kuali. Ta, [...] ne naken eliuistijtinemij uan nekes ten amo tatakamatinemij iuan Dios” (1 Tim. 1:9, 10). Uan okse taman, kemej kichiuaj ‘inintanejnekilis de tajtakol’, mokauaj maj kinyekana tajtakol tein semi kiualkui tajyouilis (Efe. 2:1-3). Uelis tikijtoskej ke tamatij kemej moyomej tein youij kampa nekti porin kintilana: amo ueli kitsakuiliaj inintanejnekilis tein kinuika itech se tamekauilis tein kiualkui mikilis (Sant. 1:14, 15).
NEMAKIXTILIS ITECH NECHIKOL TEIN KICHIUAJ KEMEJ CRISTO
15, 16. ¿Keyej motelneki maj tipouikan itech nechikol tein kichiuaj kemej Cristo, uan toni taman yolseuilis tikpiaj ompa?
15 Komo tipouij itech nechikol tein kichiuaj kemej Cristo, amo tiyetokej ompa porin tejuan titajtankej maj techselikan, kemej ijkuak aksa tajtani maj kiselikan itech se taltikpaknechikol, ta tiyetokej porin Jiova kinekik maj timotokikan (Juan 6:44). ¿Keyej kinekik? ¿Porin tiyolmelaujkejya katkaj uan tikmoujkatokayajya Dios? Xa amo. Komo ijkon, ¿toni kiitak Jiova? Kiitak itech toyolo ke timokauaskiaj maj techyekana uan tiktakamatiskiaj tanauatil tein kitemaka nemakixtilis. Keman tiyetoyajya itech nechikol, Jiova techmachtij iTajtol, techpaleuij maj tikauakan takajkayaualis uan nochi tamachtilis tein amo melauak, uan techmachtij maj tikpiakan ikualneskayouan Cristo (xikonixtajtolti Efesios 4:22-24). Ika nejon, tikpiaj tatiochiualis tipouiskej itech nechikol tein sayoj yejua “xolal tein kipia nemakixtilis” (Sant. 2:12, NM).
16 Keman tiyetokej iniuan taltikpakneminij tein kitasojtaj Jiova ika nochi ininyolo, ¿melauj ke amo timoujkayetokej uan amo timoyekpixtokej porin uelis teisa techchiuiliskej? ¿Melauj ke ijkuak tiyetokej itech Kali kampa Timosentiliaj, amo moneki tikitskijtoskej tein toaxka porin tikmouiliaj maj aksa techkuili? Amo, ta kuali timomachiliaj uan tiyolseujtokej. Amo ijkon timomachiliaj ijkuak tiyetokej okseko. Uan tein okachi kuali, yolseuilis tein axkan tikpiaj itech ixolal Dios sayoj tepitsin kineskayotia yolseuilis tein amo uejkaua tikpiaskej.
“UEYI NEMAKIXTILIS KEMEJ TEIN KIPIAJ IKONEUAN DIOS”
17. ¿Keniuj moteluika maj “monextikan ikoneuan Dios” iuan nemakixtilis tein kiseliskej taltikpakneminij?
17 Keman Pablo kimelauak nemakixtilis tein Jiova kinmakas itekitikauan nikan taltikpak, kinextij ke “itachijchiualis Dios kichixtok ika ueyi yoltanejnekilis maj monextikan ikoneuan Dios”. Satepan kijtoj: “Itachijchiualis Dios kiajchiuiliskej ijtakauilis uan kipias ueyi nemakixtilis kemej tein kipiaj ikoneuan Dios” (Rom. 8:19-21, NM). Itech nejin tajkuilol, “itachijchiualis Dios” yejuan taltikpakneminij tein kichiaj nemiskej nochipaya nikan taltikpak, uan kiseliskej tein kuali keman ‘monextiskej’ ikoneuan Dios tein taixpejpenalmej. Nejin peuas keman taixpejpenalmej moajokuiskejya ne iluikak, uan kipaleuiskej Cristo maj motachipaua nikan taltikpak uan maj kinpanoltikan “uel miak tagayot” itech taltikpak kampa nochi yankuik yeski (Apo. 7:9, 14).
18. ¿Keniuj kipixtiyaskej nemakixtilis taltikpakneminij tein tatakamatiskej, uan toni taman nemakixtilis kiajsiskej?
18 Itech nejon tonalmej, taltikpakneminij kipiaskej okse taman nemakixtilis, porin amo moajsisok ichikaualis Satanás uan iamokuali ejekauan (Apo. 20:1-3). ¡Tel ueyi yolseuilis onkas! Ompa, 144,000 tekiuanij uan tiopixkamej tein tekitiskej iuan Cristo, yolik kinpaleuijtiyaskej taltikpakneminij ika taxtauil tein kitemakak Jesús hasta senkis kinajchiuiliskej tajtakol, uan amo yeskijok tajtakouanij (Apo. 5:9, 10). Satepan ke moyejyekosya inintakuaujtamatilis, senkis kipiaskejya nemakixtilis tein Jiova motenkauak kinmakas, “ueyi nemakixtilis kemej tein kipiaj ikoneuan Dios”. ¿Ueli timonemiliaj keniuj yeski? Amo techouijmakasok tikixtopeuaskej amo kuali tachiualismej porin senkis amo tikpiaskejok tajtakol uan tikpiaskejya ikualneskayouan Dios.
19. ¿Toni moneki tikchiuaskej komo tiknekij tikpiaskej yekmelauj nemakixtilis?
19 ¿Tikonnejneki tikonselis “ueyi nemakixtilis kemej tein kipiaj ikoneuan Dios”? Komo ijkon, xikonsentoka xikonkaua maj “chipaktsin Tajtoltsin [oso tanauatil] de Dios [tein] kuali techtojtontinemi” tekiti itech motanemilil uan moyolo. Mojmostaj xionmomachti Biblia ika nejmachkayot. Xionmokaua maj mitsonyekana tamachtilis tein melauak itech monemilis. Xikontajtani Jiova maj mitsonmaka iespíritu. Senkis xikonseli nepaleuil tein motemaka itech nechikol tein kichiuaj kemej Cristo, uan xikonseli tamachtilis tein Jiova techmaka. Maj amo mitsonpano kemej Eva, akin mokauak maj Satanás kikajkayaua uan kineltokak ke itanauatiluan Dios semi amo tekauaj maj se kichiua tein se kinekis. Semi melauak ke Amokuali kitelmati takajkayauas. Sayoj ke kemej tikitaskej itech okse tamachtilis, uelis tiktaniskej porin “kuali tikmatinemij de keniu in Satanás tekajkayautinemi” (2 Cor. 2:11).
[Inetajtaniluan tamachtilis]
[Taixkopimej itech página 14]
¿Niknejnekiok nikchiuas tein taltikpak kinextia ke ueli se kichiua tein se kineki?
[Taixkopimej itech página 14]
¿Nechyekana itech nonemilis tamachtilis tein melauak?
